Hum se Hashim ne bayan kiya, kaha hum se Amr bin Awn ne bayan kiya, kaha hum se Khalid bin Abdullah ne bayan kiya, in se Ismail ne, in se Qais ne bayan kiya ke mein ne Sa'd bin Abi Waqqas Radi Allahu Anhu se suna, woh bayan karte thay ke Arab mein sab se pehle Allah ke raste mein, mein ne teer andazi ki thi (ibtida-e-Islam mein) hum Nabi Kareem Sallallahu Alaihi Wa Sallam, ke sath is tarah ghazwat mein shirkat karte thay ke hamare pas darakht ke patton ke siwa khane ke liye kuch bhi na hota tha, is se humein ont aur bakriyon ki tarah ijabat hoti thi. Yani mili hui nahi hoti thi. Lekin ab Bani Asad ka yeh haal hai ke Islami ahkam par amal mein mere andar aib nikalte hain (agar) aisa ho to mein bilkul mehroom aur be-naseeb hi raha aur mere sab kaam barbad ho gaye. Hua yeh tha ke Bani Asad ne Umar Radi Allahu Anhu se Sa'd Radi Allahu Anhu ki chughli khayi thi. Yeh kaha tha ke woh acchi tarah namaz bhi nahi parhte.

Hum se Abu al-Yaman ne bayan kiya, kaha hum ko Shuaib ne khabar di, in se Zuhri ne bayan kiya, kaha mujh se Ali bin Husain ne bayan kiya aur in se Miswar bin Makhramah Radi Allahu Anhu ne bayan kiya ke Ali Radi Allahu Anhu ne Abu Jahl ki larki ko (jo Musalman thin) paigham-e-nikah diya, is ki ittela jab Fatimah Radi Allahu Anha ko hui to woh Rasoolullah Sallallahu Alaihi Wa Sallam ke pas aayin aur arz kiya ke Aap ki qoum ka khayal hai ke Aap ko apni betiyon ki khatir (jab unhein koi takleef de) kisi par ghussa nahi aata. Ab dekhiye yeh Ali Abu Jahl ki beti se nikah karna chahte hain, is par Aap Sallallahu Alaihi Wa Sallam ne Sahaba ko khitab farmaya: Mein ne Aap Sallallahu Alaihi Wa Sallam ko khutba parhte suna. Phir Aap Sallallahu Alaihi Wa Sallam ne farmaya: Amm-a-ba'd: Mein ne Abu al-Aas bin Rabi se (Zainab Radi Allahu Anha ki, Aap ki sab se badi sahib-zadi) shadi karayi to unhon ne jo baat bhi kahi is mein woh sacche utre aur bila-shubha Fatimah bhi mere (jism ka) ek tukra hai aur mujhe yeh pasand nahi ke koi bhi ise takleef de. Allah ki qasam! Rasoolullah ki beti aur Allah Ta'ala ke ek dushman ki beti ek shakhs ke pas jama nahi ho saktin. Chunanche Ali Radi Allahu Anhu ne is shadi ka irada tark kar diya. Muhammad bin Amr bin Halhalah ne Ibn Shihab se yeh izafa kiya hai, unhon ne Ali bin Husain se aur unhon ne Miswar Radi Allahu Anhu se bayan kiya ke mein ne Nabi Kareem Sallallahu Alaihi Wa Sallam se suna, Aap ne Bani Abd-Shams ke apne ek damad ka zikr kiya aur huqooq-e-damadi ki aday-ish ki tareef farmayi. Phir farmaya ke unhon ne mujh se jo baat bhi kahi sacchi kahi aur jo waada bhi kiya poora kar dikhaya.

Aur Bara Radi Allahu Anhu ne Nabi Kareem Sallallahu Alaihi Wa Sallam se naqal kiya ke Nabi Kareem Sallallahu Alaihi Wa Sallam ne Zaid bin Harithah Radi Allahu Anhu se farmaya tha, tum hamare bhai aur hamare moula ho.

Hum se Khalid bin Makhlad ne bayan kiya, kaha hum se Sulaiman ne bayan kiya, kaha ke mujh se Abdullah bin Dinar ne bayan kiya, in se Abdullah bin Umar Radi Allahu Anhuma ne bayan kiya ke Nabi Kareem Sallallahu Alaihi Wa Sallam ne ek fauj bheji aur is ka ameer Usama bin Zaid ko banaya. In ke ameer banaye jane par baaz logon ne itiraz kiya to Aap Sallallahu Alaihi Wa Sallam ne farmaya ke agar aaj tum is ke ameer banaye jane par itiraz kar rahe ho to is se pehle is ke baap ke ameer banaye jane par bhi tum ne itiraz kiya tha aur Allah ki qasam! Woh (Zaid Radi Allahu Anhu) imarat ke mustahiq thay aur mujhe sab se zyada aziz thay. Aur yeh (Usama Radi Allahu Anhu) ab un ke baad mujhe sab se zyada aziz hain.

Hum se Yahya bin Qaza'ah ne bayan kiya, kaha hum se Ibrahim bin Sa'd ne bayan kiya, in se Zuhri ne, in se Urwah ne aur in se Aisha Radi Allahu Anha ne bayan kiya ke ek qafa-shinas mere yahan aaya. Nabi Kareem Sallallahu Alaihi Wa Sallam is waqt wahin tashreef rakhte thay aur Usama bin Zaid aur Zaid bin Harithah (ek chadar mein) laite hue thay. (munh aur jism ka sara hissa qadmon ke siwa chupa hua tha) is qafa-shinas ne kaha ke yeh paon baaz, baaz se nikle hue maloom hote hain. (yani baap bete ke hain) qafa-shinas ne phir bataya ke Nabi Kareem Sallallahu Alaihi Wa Sallam is ke is andaze par bahut khush hue aur phir Aap ne Aisha Radi Allahu Anha se bhi yeh waqia bayan farmaya.

Hum se Qutaibah bin Sa'id ne bayan kiya, kaha hum se Laith bin Sa'd ne bayan kiya, in se Zuhri ne, in se Urwah ne aur in se Aisha Radi Allahu Anha ne ke Quraish Makhzumiyah aurat ke maamle ki wajah se bahut ranjeeda thay. Unhon ne yeh faisla aapas mein kiya ke Usama bin Zaid Radi Allahu Anhuma ke siwa, jo Rasoolullah Sallallahu Alaihi Wa Sallam ko nihayat aziz hain (is aurat ki sifarish ke liye) aur kon jurat kar sakta hai!

(doosri sanad) aur hum se Ali ne bayan kiya, kaha hum se Sufyan ne bayan kiya, unhon ne kaha ke mein ne Zuhri se Makhzumiyah ki hadeeth poochi to woh mujh par bahut ghussa ho gaye. Mein ne is par Sufyan se poocha ke phir Aap ne kisi aur zariya se is hadeeth ki riwayat nahi ki? Unhon ne bayan kiya ke Ayub bin Musa ki likhi hui ek kitab mein, mein ne yeh hadeeth dekhi. Woh Zuhri se riwayat karte thay, woh Urwah se, woh Aisha Radi Allahu Anha se ke Bani Makhzum ki ek aurat ne chori kar li thi. Quraish ne (apni majlis mein) socha ke Nabi Kareem Sallallahu Alaihi Wa Sallam ki khidmat mein is aurat ki sifarish ke liye kon ja sakta hai? Koi is ki jurat nahi kar saka, aakhir Usama bin Zaid Radi Allahu Anhuma ne sifarish ki to Aap Sallallahu Alaihi Wa Sallam ne farmaya ke Bani Israel mein yeh dastoor ho gaya tha ke jab koi shareef aadmi chori karta to ise chhorh dete aur agar koi kamzor aadmi chori karta to is ka hath kaatte. Agar aaj Fatimah (Radi Allahu Anha) ne chori ki hoti to mein is ka bhi hath kaatta.

Mujh se Hasan bin Muhammad ne bayan kiya, unhon ne kaha hum se Abu Abbad Yahya bin Abbad ne bayan kiya, unhon ne kaha hum se Majishoon ne bayan kiya, unhein Abdullah bin Dinar ne khabar di ke Abdullah bin Umar Radi Allahu Anhuma ne ek din ek sahib ko masjid mein dekha ke apna kapra ek kone mein phaila rahe thay. Unhon ne kaha dekho yeh kon sahib hain? Kaash! Yeh mere qareeb hote. Ek shakhs ne kaha Ae Abu Abdur Rahman! Kya Aap unhein nahi pehchanate? Yeh Muhammad bin Usama Radi Allahu Anhu hain. Ibn Dinar ne bayan kiya ke yeh sunte hi Abdullah bin Umar Radi Allahu Anhuma ne apna sar jhuka liya aur apne hathon se zameen kureedne lage phir bole agar Rasoolullah Sallallahu Alaihi Wa Sallam unhein dekhte to yaqeenan Aap un se mohabbat farmate.

Hum se Musa bin Ismail ne bayan kiya, kaha hum se Mutamir ne bayan kiya, kaha ke mein ne apne baap se suna, kaha hum se Abu Usman ne bayan kiya, aur in se Usama bin Zaid Radi Allahu Anhuma ne bayan kiya ke Nabi Kareem Sallallahu Alaihi Wa Sallam unhein aur Hasan Radi Allahu Anhu ko pakar lete aur farmate: Ae Allah! Tu unhein apna mahboob bana ke mein in se mohabbat karta hun.

Aur Nuaim ne kaha in se Ibn al-Mubarak ne bayan kiya, unhein Ma'mar ne khabar di, unhein Zuhri ne, unhein Usama bin Zaid Radi Allahu Anhuma ke ek moula (Harmalah) ne khabar di ke Hajjaj bin Aiman bin Umm-e-Aiman ko Abdullah bin Umar Radi Allahu Anhuma ne dekha (namaz mein) unhon ne ruku aur sajda poori tarah nahi ada kiya, (Aiman Ibn Umm-e-Aiman, Usama Radi Allahu Anhu ki maan ki taraf se bhai thay, Aiman Radi Allahu Anhu qabeela Ansar ke ek fard thay) to Ibn Umar Radi Allahu Anhuma ne in se kaha ke (namaz) dobara parh lo.