Hum se Ahmad bin Muhammad ne bayan kiya, kaha hum ko Hisham bin Urwah ne khabar di, unhein in ke walid ne aur in se Abdullah bin Zubair Radi Allahu Anhuma ne bayan kiya ke Jang-e-Ahzab ke mauqay par mujhe aur Umar bin Abi Salamah Radi Allahu Anhuma ko aurton mein chhorh diya gaya tha (kyunke yeh dono hazrat bacche thay) mein ne achanak dekha ke Zubair Radi Allahu Anhu (Aap ke walid) apne ghore par sawar Bani Quraizah (Yahudiyon ke ek qabeele ki) taraf aa ja rahe hain. Do ya teen martaba aisa hua, phir jab mein wahan se wapas aaya to mein ne arz kiya, abba jaan! Mein ne Aap ko kai martaba aate jate dekha. Unhon ne kaha: Bete! Kya waqai tum ne bhi dekha hai? Mein ne arz kiya: Ji haan, unhon ne kaha: Rasoolullah Sallallahu Alaihi Wa Sallam ne farmaya tha ke kon hai jo Banu Quraizah ki taraf ja kar in ki (naqal-o-harkat ke mutalliq) ittela mere pas la sake. Is par mein wahan gaya aur jab mein (khabar le kar) wapas aaya to Aap Sallallahu Alaihi Wa Sallam ne (fart-e-masarrat mein) apne walidain ka ek sath zikr kar ke farmaya ke "mere maan baap tum par fida hon."

Hum se Ali bin Hafs ne bayan kiya, kaha hum se Abdullah bin al-Mubarak ne bayan kiya, kaha hum ko Hisham bin Urwah ne khabar di aur unhein in ke walid ne ke Jang-e-Yarmook ke mauqay par Nabi Kareem Sallallahu Alaihi Wa Sallam ke Sahaba ne Zubair bin Awwam Radi Allahu Anhu se kaha Aap hamla kyun nahi karte taki hum bhi Aap ke sath hamla karein. Chunanche unhon ne in (Rumiyon) par hamla kiya. Is mauqay par unhon ne (Rumiyon ne) Aap ke do kari zakham shane par lagaye. Darmiyan mein woh zakham tha jo Badr ke mauqay par Aap ko laga tha. Urwah ne kaha ke (yeh zakham itne gehre thay ke acche ho jane ke baad) mein bachpan mein in zakhmon ke andar apni ungliyan daal kar khela karta tha.

Aur Umar Radi Allahu Anhu ne in ke mutalliq kaha ke Nabi Kareem Sallallahu Alaihi Wa Sallam apni wafat tak in se raazi thay.

Mujh se Muhammad bin Abi Bakr Muqaddami ne bayan kiya, in se Mutamir ne, in se in ke walid ne, in se Abu Usman Radi Allahu Anhu ne bayan kiya ke baaz in jangon mein jin mein Rasoolullah Sallallahu Alaihi Wa Sallam khud shareek hue thay (Uhud ki jang mein) Aap ke sath Talhah aur Sa'd Radi Allahu Anhuma ke siwa aur koi baqi nahi raha tha.

Mujh se Muhammad bin Abi Bakr Muqaddami ne bayan kiya, in se Mutamir ne, in se in ke walid ne, in se Abu Usman Radi Allahu Anhu ne bayan kiya ke baaz in jangon mein jin mein Rasoolullah Sallallahu Alaihi Wa Sallam khud shareek hue thay (Uhud ki jang mein) Aap ke sath Talhah aur Sa'd Radi Allahu Anhuma ke siwa aur koi baqi nahi raha tha.

Hum se Musaddad ne bayan kiya, kaha hum se Khalid ne bayan kiya, in se Khalid bin Abi Khalid ne, in se Qais bin Abi Hazim ne ke mein ne Talhah Radi Allahu Anhu ka rahi hath dekha hai jis se unhon ne Rasoolullah Sallallahu Alaihi Wa Sallam ki (Jang-e-Uhud mein) hifazat ki thi woh bilkul bekar ho chuka tha.

Banu Zuhrah Nabi Kareem Sallallahu Alaihi Wa Sallam ke mamu thay, in ka asal naam Sa'd bin Abi Malik hai.

Mujh se Muhammad bin Muthanna ne bayan kiya, kaha hum se Abdul Wahhab ne bayan kiya, kaha ke mein ne Yahya se suna, kaha ke mein ne Sa'id bin al-Musayyib se suna, kaha ke mein ne Sa'd bin Abi Waqqas Radi Allahu Anhu se suna woh bayan karte thay ke Jang-e-Uhud ke mauqay par mere liye Nabi Kareem Sallallahu Alaihi Wa Sallam ne apne walidain ko ek sath jama kar ke yun farmaya ke mere maan baap tum par fida hon.

Hum se Makki bin Ibrahim ne bayan kiya, kaha hum se Hashim bin Hashim ne bayan kiya, in se Aamir bin Sa'd ne aur in se in ke walid (Sa'd bin Abi Waqqas Radi Allahu Anhu) ne bayan kiya ke mujhe khoob yaad hai. Mein ne ek zamane mein Musalmanon ka teesra hissa apne aap ko dekha. Imam Bukhari Rahimahullah ne kaha Islam ke teesre hisse se yeh murad hai ke Rasoolullah Sallallahu Alaihi Wa Sallam ke sath sirf teen Musalman thay jin mein teesra Musalman mein tha.

Hum se Ibrahim bin Musa ne bayan kiya, kaha hum ko Ibn Abi Zaidah ne khabar di, kaha hum se Hashim bin Hashim bin Utbah bin Abi Waqqas ne bayan kiya, kaha ke mein ne Sa'id bin al-Musayyib se suna, kaha ke mein ne Sa'd bin Abi Waqqas se suna, unhon ne kaha ke jis din mein Islam laya, isi din doosre (sab se pehle Islam mein dakhil hone wale hazrat Sahaba) bhi Islam mein dakhil hue hain aur mein saat din tak isi tour par raha ke mein Islam ka teesra fard tha. Ibn Abi Zaidah ke sath is hadeeth ko Abu Usama ne bhi riwayat kiya.