Aur Nafi Bin Jubair ne Abu Hurairah Radi Allahu Anhu se bayan kiya ke Nabi Kareem Sallallahu Alaihi Wasallam ne Hasan Radi Allahu Anhu ko gale se lagaya
.

Hum se Sadaqah ne bayan kiya, kaha hum se Ibn Uyainah ne bayan kiya, kaha hum se Abu Musa ne bayan kiya, un se Hasan ne, unhon ne Abu Bakrah Radi Allahu Anhu se suna aur unhon ne Nabi Kareem Sallallahu Alaihi Wasallam se suna Aap Sallallahu Alaihi Wasallam minbar par tashreef farma thay aur Hasan Radi Allahu Anhu Aap ke pehlu mein thay, Aap kabhi logon ki taraf mutawajje hote aur phir Hasan Radi Allahu Anhu ki taraf aur farmate: Mera ye beta sardar hai aur umeed hai ke Allah Ta'ala is ke zariya musalmanon ki do jamaaton mein sulah karaye ga
.

Hum se Musaddad ne bayan kiya, unhon ne kaha hum se Mutamir ne bayan kiya, unhon ne kaha ke mein ne apne walid se suna, unhon ne bayan kiya ke hum se Abu Usman ne bayan kiya aur un se Usama Bin Zaid Radi Allahu Anhuma ne ke Nabi Kareem Sallallahu Alaihi Wasallam unhein aur Hasan Radi Allahu Anhu ko pakar kar ye dua karte thay «Allahumma inni uhibbuhuma fa ahibbuhuma» " Ay Allah! Mujhe un se mohabbat hai tu bhi un se mohabbat rakh. " «Aw kama qal.»
.

Mujh se Muhammad Bin Husain Bin Ibrahim ne bayan kiya, kaha ke mujh se Husain Bin Muhammad ne bayan kiya, kaha hum se Jarir ne bayan kiya, un se Muhammad ne aur un se Anas Bin Malik Radi Allahu Anhu ne ke jab Husain Radi Allahu Anhu ka sar mubarak Ubaidullah Bin Ziyad ke paas laya gaya aur ek tasht mein rakh diya gaya to wo badbakht is par lakri se marne laga aur Aap ke husn aur khoobsurti ke bare mein bhi kuch kaha (ke mein ne is se zyada khoobsurat chehra nahi dekha) is par Anas Radi Allahu Anhu ne kaha Husain Radi Allahu Anhu Rasul Allah Sallallahu Alaihi Wasallam se sab se zyada mushabeh thay. Unhon ne «Wasmatun» ka khizab istemal kar rakha tha
.

Hum se Hajjaj Bin Minhal ne bayan kiya, kaha hum se Shuba ne bayan kiya, kaha ke mujhe Adi ne khabar di, kaha ke mein ne Bara Radi Allahu Anhu se suna, unhon ne bayan kiya ke mein ne Rasul Allah Sallallahu Alaihi Wasallam ko dekha ke Hasan Radi Allahu Anhu Aap ke kandhe mubarak par thay aur Aap Sallallahu Alaihi Wasallam ye farma rahe thay " Ay Allah! Mujhe is se mohabbat hai tu bhi is se mohabbat rakh. "
.

Hum se Abdan ne bayan kiya, kaha hum ko Abdullah ne khabar di, kaha ke mujhe Umar Bin Saeed Bin Abi Husain ne khabar di, unhein Ibn Abi Mulaikah ne, un se Uqbah Bin Haris ne bayan kiya ke mein ne Abu Bakr Radi Allahu Anhu ko dekha ke Aap Hasan Radi Allahu Anhu ko uthaye hue hain aur farma rahe hain: Mere baap un par fida hon, ye Nabi Kareem Sallallahu Alaihi Wasallam se mushabeh hain, Ali se nahi aur Ali Radi Allahu Anhu muskura rahe thay
.

Mujh se Yahya Bin Maeen aur Sadaqah ne bayan kiya, kaha ke humein Muhammad Bin Jafar ne khabar di, unhein Shuba ne, unhein Waqid Bin Muhammad ne, unhein un ke walid ne aur un se Ibn Umar Radi Allahu Anhuma ne bayan kiya ke Abu Bakr Radi Allahu Anhu ne farmaya ke Nabi Kareem Sallallahu Alaihi Wasallam (ki khushnoodi) ko Aap ke Ahl-e-Bait ke sath (mohabbat o khidmat ke zariya) talash karo
.

Mujh se Ibrahim Bin Musa ne bayan kiya, kaha hum ko Hisham Bin Yusuf ne khabar di, unhein Ma'mar ne, unhein Zuhri ne aur unhein Anas Radi Allahu Anhu ne, aur Abdur Razzaq ne bayan kiya ke humein Ma'mar ne khabar di, unhein Zuhri ne aur un se Anas Radi Allahu Anhu ne bayan kiya ke Hasan Bin Ali Radi Allahu Anhuma se zyada aur koi shakhs Nabi Kareem Sallallahu Alaihi Wasallam se zyada mushabeh nahi tha
.

Mujh se Muhammad Bin Bashar ne bayan kiya, kaha ke hum se Ghundar ne bayan kiya, un se Shuba ne bayan kiya, un se Muhammad Bin Abi Yaqub ne, unhon ne Ibn Abi Naam se suna aur unhon ne Abdullah Bin Umar Radi Allahu Anhuma se suna aur kisi ne un se muhrim ke bare mein poocha tha, Shuba ne bayan kiya ke mere khayal mein ye poocha tha ke agar koi shakhs (ihram ki halat mein) makkhi maar de to use kya kaffara dena pare ga? Is par Abdullah Bin Umar Radi Allahu Anhuma ne farmaya: Iraq ke log makkhi ke bare mein sawal karte hain jab ke yahi log Rasul Allah Sallallahu Alaihi Wasallam ke nawase ko qatl kar chuke hain, jin ke bare mein Nabi Kareem Sallallahu Alaihi Wasallam ne farmaya tha ke dono (nawase Hasan o Husain Radi Allahu Anhuma) duniya mein mere do phool hain
.

Aur Nabi Kareem Sallallahu Alaihi Wasallam ne farmaya tha ke jannat mein apne aage mein ne tumhare qadmon ki chaap suni thi
.