Hum se Abu al-Yaman ne bayan kiya, kaha hum ko Shuaib ne khabar di, in se Zuhri ne bayan kiya, kaha hum se Urwah bin Zubair ne bayan kiya, aur in se Aisha Radi Allahu Anha ne ke Fatimah Radi Allahu Anha ne Abu Bakr Radi Allahu Anhu ke yahan apna aadmi bhej kar Nabi Kareem Sallallahu Alaihi Wa Sallam se milne wali meras ka mutaliba kiya jo Allah Ta'ala ne apne Rasool Sallallahu Alaihi Wa Sallam ko fai ki surat mein di thi. Yani Aap ka mutaliba Madinah ki is jandaad ke bare mein tha jis ki aamad se Aap Sallallahu Alaihi Wa Sallam masarif-e-khair mein kharch karte thay, aur isi tarah Fadak ki jandaad aur Khaibar ke khumus ka bhi mutaliba kiya.

Abu Bakr Radi Allahu Anhu ne kaha ke Rasoolullah Sallallahu Alaihi Wa Sallam khud farma gaye hain ke hamari meras nahi hoti. Hum (Anbiya) jo kuch chhorh jate hain woh sadqa hota hai aur yeh ke Aal-e-Muhammad ke ikhrajat isi maal mein se poore kiye jayein magar unhein yeh haq nahi hoga ke khane ke alawa aur kuch tasarruf karein aur mein, Allah ki qasam! Aap ke sadqe mein jo Aap ke zamane mein hua karte thay in mein koi radd-o-badal nahi karunga balkay rahi nizam jari rakhunga jaise Nabi Kareem Sallallahu Alaihi Wa Sallam ne qaim farmaya tha. Phir Ali Radi Allahu Anhu Abu Bakr Radi Allahu Anhu ke pas aaye aur kehne lage: Ae Abu Bakr Radi Allahu Anhu hum Aap ki fazeelat-o-martaba ka iqrar karte hain. Is ke baad unhon ne Nabi Kareem Sallallahu Alaihi Wa Sallam se apni qarabt ka aur apne haq ka zikr kiya, Abu Bakr Radi Allahu Anhu ne farmaya: Is zaat ki qasam jis ke hath mein meri jaan hai Aap Sallallahu Alaihi Wa Sallam ki qarabt walon se sulook karna mujh ko apni qarabt walon se sulook karne se zyada pasand hai.

Mujhe Abdullah bin Abdul Wahhab ne khabar di, kaha ke hum se Khalid ne bayan kiya, kaha hum se Shu'bah ne bayan kiya, in se Waqid ne bayan kiya ke mein ne apne walid se suna, woh Ibn Umar Radi Allahu Anhuma se bayan karte thay, woh Abu Bakr Radi Allahu Anhu se ke unhon ne kaha: Nabi Kareem Sallallahu Alaihi Wa Sallam ka khayal Aap ke ahl-e-bait mein rakho.

Hum se Abu al-Waleed ne bayan kiya, kaha hum se Ibn Uyainah ne bayan kiya, in se Amr bin Dinar ne in se Ibn Abi Mulaikah ne in se Miswar bin Makhramah Radi Allahu Anhu ne ke Rasoolullah Sallallahu Alaihi Wa Sallam ne farmaya ke Fatimah mere jism ka tukra hai, is liye jis ne ise nahaq naraz kiya, us ne mujhe naraz kiya.

Hum se Yahya bin Qaza'ah ne bayan kiya, kaha hum se Ibrahim bin Sa'd ne bayan kiya, in se in ke walid ne, in se Urwah ne aur in se Aisha Radi Allahu Anha ne bayan kiya ke Nabi Kareem Sallallahu Alaihi Wa Sallam ne apni sahib-zadi Fatimah Radi Allahu Anha ko apne is maraz ke mauqay par bulaya jis mein Aap ki wafat hui, phir aahista se koi baat kahi to woh rone lagein, phir Aap Sallallahu Alaihi Wa Sallam ne unhein bulaya aur aahista se koi baat kahi to woh hansne lagein, Aisha Radi Allahu Anha ne bayan kiya ke phir mein ne in se is ke mutalliq poocha.

To unhon ne bataya ke pehle mujh se Nabi Kareem Sallallahu Alaihi Wa Sallam ne aahista se yeh farmaya tha ke woh apni isi bimari mein wafat pa jayein gay, mein is par rone lagi. Phir mujh se Nabi Kareem Sallallahu Alaihi Wa Sallam ne aahista se farmaya ke Aap ke ahl-e-bait mein sab se pehle mein Aap se ja milungi, is par mein hansi thi.

Ibn Abbas Radi Allahu Anhuma ne kaha ke woh Nabi Kareem Sallallahu Alaihi Wa Sallam ke hawari thay aur unhein (Isa Alaihis Salam ke hawariyeen ko) hawariyeen in ke safed kapron ki wajah se kehte hain (baaz logon ne in ko dhobi batlaya hai).

Hum se Khalid bin Makhlad ne bayan kiya, kaha hum se Ali bin Mushir ne, in se Hisham bin Urwah ne, in se in ke walid ne bayan kiya ke mujhe Marwan bin Hakam ne khabar di ke jis saal naksir phootne ki bimari phoot padi thi is saal Uthman Radi Allahu Anhu ko itni sakht naksir phooti ke Aap hajj ke liye bhi na ja sake, aur (zindagi se mayoos ho kar) wasiyat bhi kar di, phir in ki khidmat mein Quraish ke ek sahib gaye aur kaha ke Aap kisi ko apna khaleefa bana dein. Uthman Radi Allahu Anhu ne daryaft farmaya: Kya yeh sab ki khwahish hai, unhon ne kaha ji haan. Aap ne poocha ke kise banaun? Is par woh khamosh ho gaye. Is ke baad ek doosre sahib gaye. Mera khayal hai ke woh Harith thay,. Unhon ne bhi yahi kaha ke Aap kisi ko khaleefa bana dein, Aap ne in se bhi poocha kya yeh sab ki khwahish hai? Unhon ne kaha: Ji haan, Aap ne poocha: Logon ki raaye kis ke liye hai? Is par woh bhi khamosh ho gaye, to Aap ne khud farmaya: Ghaliban Zubair ki taraf logon ka rujhan hai? Unhon ne kaha: Ji haan, phir Aap ne farmaya: Is zaat ki qasam jis ke hath mein meri jaan hai mere ilm ke mutabiq bhi rahi in mein sab se behtar hain aur bila-shubha woh Rasoolullah Sallallahu Alaihi Wa Sallam ki nazron mein bhi in mein sab se zyada mahboob thay.

Mujh se Ubaid bin Ismail ne bayan kiya, kaha hum se Usama ne bayan kiya, in se Hisham ne, unhein in ke walid ne khabar di ke mein ne Marwan se suna ke mein Uthman Radi Allahu Anhu ki khidmat mein maujood tha ke itne mein ek sahib aaye aur kaha ke kisi ko Aap apna khaleefa bana dijiye,. Aap ne daryaft farmaya kya is ki khwahish ki ja rahi hai? Unhon ne bataya ke ji haan, Zubair Radi Allahu Anhu ki taraf logon ka rujhan hai, Aap ne is par farmaya theek hai, tum ko bhi maloom hai ke woh tum mein behtar hain, Aap ne teen martaba yeh baat doharayi.

Hum se Malik bin Ismail ne bayan kiya, unhon ne kaha hum se Abdul Aziz ne bayan kiya jo Abu Salamah ke sahib-zade thay, in se Muhammad ne bayan kiya, in se Muhammad bin Munkadir ne bayan kiya, aur in se Jabir Radi Allahu Anhu ne bayan kiya ke Nabi Kareem Sallallahu Alaihi Wa Sallam ne farmaya har nabi ke hawari hote hain aur mere hawari Zubair bin Awwam (Radi Allahu Anhu) hain.