Mujh se Muhammad bin Bashar ne bayan kiya, kaha ke mujh se Yahya bin Sa'id Qattan ne bayan kiya, in se Sa'id ne, in se Qatadah ne aur in se Anas bin Malik Radi Allahu Anhu ne bayan kiya ke jab Nabi Kareem Sallallahu Alaihi Wa Sallam, Abu Bakr, Umar aur Uthman Radi Allahu Anhum ko sath le kar Uhud pahar par charhe to Uhud kanp utha, Aap Sallallahu Alaihi Wa Sallam ne farmaya "Uhud! Qarar pakar ke tujh par ek nabi, ek siddiq aur do shaheed hain."

Mujh se Abu Abdullah Ahmad bin Sa'id ne bayan kiya, kaha hum se Wahb bin Jarir ne bayan kiya, kaha hum se Sakhr ne bayan kiya, in se Nafi ne aur in se Abdullah bin Umar Radi Allahu Anhuma ne bayan kiya ke Rasoolullah Sallallahu Alaihi Wa Sallam ne farmaya ke mein ek kunwein par (khwab mein) khara is se pani khinch raha tha ke mere pas Abu Bakr aur Umar bhi pahunch gaye. Phir Abu Bakr ne dol le liya aur ek ya do dol khinche, in ke khinchne mein du'f tha aur Allah Ta'ala in ki maghfirat karega. Phir Abu Bakr ke hath se dol Umar ne le liya aur in ke hath mein pahunchte hi woh ek bahut bade dol ki shakl mein ho gaya. Mein ne koi himmat wala aur bahadur insan nahi dekha jo itni husn-e-tadbeer aur mazboot quwwat ke sath kaam karne ka aadi ho, chunanche unhon ne itna pani khincha ke log ne onton ke pani pilane ki jaghein bhar lein, Wahb ne bayan kiya ke "al-atan" onton ke baithne ki jagah ko kehte hain, Arab log bolte hain, ont seerab hue ke (wahin) baith gaye.

Hum se Waleed bin Salih ne bayan kiya, kaha hum se Isa bin Yunus ne bayan kiya, kaha hum se Umar bin Sa'id bin Abi al-Husain Makki ne un se Ibn Abi Mulaikah ne bayan kiya ke Ibn Abbas Radi Allahu Anhuma ne bayan kiya ke mein in logon ke sath khara tha jo Umar bin Khattab Radi Allahu Anhu ke liye duayein kar rahe thay, is waqt in ka janaza charpai par rakkha hua tha, itne mein ek sahib ne mere peeche se aa kar mere shanon par apni kohniyan rakh dein aur (Umar Radi Allahu Anhu ko mukhatib kar ke) kehne lage Allah Aap par raham kare. Mujhe to yahi umeed thi ke Allah Ta'ala Aap ko Aap ke dono sathiyon (Rasoolullah Sallallahu Alaihi Wa Sallam aur Abu Bakr Radi Allahu Anhu) ke sath (dafan) karayega, mein aksar Rasoolullah Sallallahu Alaihi Wa Sallam ko yun farmate suna karta tha ke "Mein aur Abu Bakr aur Umar thay", "Mein ne aur Abu Bakr aur Umar ne yeh kaam kiya", "Mein aur Abu Bakr aur Umar gaye" is liye mujhe yahi umeed thi ke Allah Ta'ala Aap ko in hi dono buzurgon ke sath rakkhega. Mein ne jo murh kar dekha to woh Ali Radi Allahu Anhu thay.

Mujh se Muhammad bin Yazid Kufi ne bayan kiya, kaha hum se Waleed ne bayan kiya, in se Awzai ne, in se Yahya Ibn Abi Kaseer ne, in se Muhammad bin Ibrahim ne aur in se Urwah bin Zubair ne bayan kiya ke mein ne Abdullah bin Umar Radi Allahu Anhuma se mushrikeen-e-Makkah ki sab se badi zalimana harkat ke bare mein poocha jo unhon ne Rasoolullah Sallallahu Alaihi Wa Sallam ke sath ki thi to unhon ne batlaya ke mein ne dekha ke Uqbah bin Abi Muait Aap Sallallahu Alaihi Wa Sallam ke pas aaya. Aap is waqt namaz parh rahe thay, is bad-bakht ne apni chadar Aap ki gardan mubarak mein daal kar khinchi jis se Aap ka gala badi sakhti ke sath phans gaya. Itne mein Abu Bakr Radi Allahu Anhu aaye aur is bad-bakht ko dafah kiya aur kaha kya tum ek aise shakhs ko qatal karna chahte ho jo yeh kehta hai ke mera Parwardigar Allah Ta'ala hai aur woh tumhare pas apne Parwardigar ki taraf se khuli hui daleelein bhi le kar aaya hai.

Hum se Hajjaj bin Minhal ne bayan kiya, kaha hum se Abdul Aziz Majishoon ne bayan kiya, kaha hum se Muhammad bin Munkadir ne bayan kiya, aur in se Jabir bin Abdullah Radi Allahu Anhuma ne bayan kiya ke Nabi Kareem Sallallahu Alaihi Wa Sallam ne farmaya ke mein (khwab mein) jannat mein dakhil hua to wahan mein ne Abu Talhah Radi Allahu Anhu ki biwi Rumaisa ko dekha aur mein ne qadmon ki awaz suni to mein ne poocha yeh kon sahib hain? Bataya gaya ke yeh Bilal Radi Allahu Anhu hain aur mein ne ek mahal dekha is ke samne ek aurat thi, mein ne poocha yeh kis ka mahal hai? To bataya ke yeh Umar Radi Allahu Anhu ka hai. Mere dil mein aaya ke andar dakhil ho kar ise dekhun, lekin mujhe Umar ki ghairat yaad aayi (aur is liye andar dakhil nahi hua) is par Umar Radi Allahu Anhu ne rote hue kaha mere maan baap Aap par fida hon, Ya Rasul Allah! Kya mein Aap par ghairat karunga.

Hum se Sa'id bin Abi Maryam ne bayan kiya, kaha hum ko Laith ne khabar di, kaha ke mujh se Aqeel ne bayan kiya, in se Ibn Shihab ne bayan kiya ke mujhe Sa'id bin al-Musayyib ne khabar di aur in se Abu Hurairah Radi Allahu Anhu ne bayan kiya ke hum Rasoolullah Sallallahu Alaihi Wa Sallam ki khidmat mein hazir thay. Aap Sallallahu Alaihi Wa Sallam ne farmaya ke mein soya hua tha ke mein ne khwab mein jannat dekhi. Mein ne dekha ke ek aurat ek mahal ke kinare wudhu kar rahi hai. Mein ne poocha yeh mahal kis ka hai? To farishton ne jawab diya ke Umar Radi Allahu Anhu ka. Phir mujhe in ki ghairat-o-hamiyat yaad aayi aur mein wahin se lout aaya. Is par Umar Radi Allahu Anhu ro diye aur arz kiya: Ya Rasul Allah! Kya mein Aap par bhi ghairat karunga?

Mujh se Abu Ja'far Muhammad bin Salt Kufi ne bayan kiya, unhon ne kaha hum se Abdullah bin al-Mubarak ne bayan kiya, in se Yunus ne, in se Zuhri ne bayan kiya, kaha mujh ko Hamza ne khabar di aur unhein in ke walid (Abdullah bin Umar Radi Allahu Anhuma) ne ke Rasoolullah Sallallahu Alaihi Wa Sallam ne farmaya ke mein ne khwab mein doodh piya, itna ke mein doodh ki seerabi dekhne laga jo mere nakhun ya nakhunon par beh rahi hai, phir mein ne piyala Umar ko de diya. Sahaba ne poocha: Ya Rasul Allah! Is khwab ki tabeer kya hai Aap Sallallahu Alaihi Wa Sallam ne farmaya ke is ki tabeer ilm hai.

Hum se Muhammad bin Abdullah bin Numair ne bayan kiya, kaha hum se Muhammad bin Bishr ne bayan kiya, kaha hum se Ubaidullah ne bayan kiya, kaha ke mujh se Abu Bakr bin Salim ne bayan kiya, in se Salim ne aur in se Abdullah bin Umar Radi Allahu Anhuma ne ke Nabi Kareem Sallallahu Alaihi Wa Sallam ne farmaya ke mein ne khwab mein dekha ke mein ek kunwein se ek accha bada dol khinch raha hun, jis par "lakri ka charkh" laga hua hai, phir Abu Bakr aaye aur unhon ne bhi ek ya do dol khinche magar kamzori ke sath aur Allah in ki maghfirat kare. Phir Umar aaye aur in ke hath mein woh dol ek bahut bade dol ki surat ikhtiyar kar gaya. Mein ne in jaisa mazboot aur ba-azmat shakhs nahi dekha jo itni mazbooti ke sath kaam kar sakta ho. Unhon ne itna khincha ke log seerab ho gaye aur apne onton ko pila kar in ke thikanon par le gaye. Ibn Jubair ne kaha ke "abqari" ka mani umdah aur "zarabi" aur "abqari" sardar ko bhi kehte hain (hadeeth mein "abqari" se yahi murad hai) Yahya bin Ziyad Farra ne kaha, "zarabi" in bichonon ko kehte hain jin ke hashiye bareek, phaile hue bahut kasrat se hote hain.

Hum se Ali bin Abdullah bin Madini ne bayan kiya, kaha hum se Ya'qub bin Ibrahim ne bayan kiya, kaha ke mujh se mere walid ne bayan kiya in se Salih ne, in se Ibn Shihab ne, kaha mujh ko Abdul Hameed bin Abdur Rahman ne khabar di, unhein Muhammad bin Sa'd bin Abi Waqqas ne khabar di aur un se in ke walid (Sa'd bin Abi Waqqas Radi Allahu Anhu) ne bayan kiya (doosri sanad) aur mujh se Abdul Aziz bin Abdullah ne bayan kiya, kaha hum se Ibrahim bin Sa'd ne bayan kiya, in se Salih ne, in se Ibn Shihab ne, in se Abdul Hameed bin Abdur Rahman bin Zaid ne, in se Muhammad bin Sa'd bin Abi Waqqas ne aur in se in ke walid ne bayan kiya ke Umar Radi Allahu Anhu ne Rasoolullah Sallallahu Alaihi Wa Sallam se andar aane ki ijazat chahi. Is waqt Aap ke pas Quraish ki chand aurtein (Ummahat al-Momineen mein se) baithi batein kar rahi thin aur Aap ki awaz par apni awaz unchi karte hue Aap se naan-o-nafaqah mein ziyati ka mutaliba kar rahi thin. Joun hi Umar Radi Allahu Anhu ne ijazat chahi to woh tamam khari ho kar parde ke peeche jaldi se bhag khari hui. Aakhir Aap Sallallahu Alaihi Wa Sallam ne ijazat di aur woh dakhil hue to Aap Sallallahu Alaihi Wa Sallam muskura rahe thay. Umar Radi Allahu Anhu ne arz kiya: Ya Rasul Allah! Allah Ta'ala Aap Sallallahu Alaihi Wa Sallam ko hamesha khush rakkhe. Aap Sallallahu Alaihi Wa Sallam ne farmaya: Mujhe in aurton par hansi aa rahi hai jo abhi mere pas baithi hui thin, lekin tumhari awaz sunte hi sab parde ke peeche bhag gayin. Umar Radi Allahu Anhu ne arz kiya: Ya Rasul Allah! Darna to unhein Aap se chahiye tha. Phir unhon ne (aurton se) kaha Ae apni jaanon ki dushmano! Tum mujh se to darti ho aur Nabi Kareem Sallallahu Alaihi Wa Sallam se nahi dartin, aurton ne kaha ke haan, Aap theek kehte hain. Nabi Kareem Sallallahu Alaihi Wa Sallam ke muqable mein Aap kahin zyada sakht hain. Is par Aap Sallallahu Alaihi Wa Sallam ne farmaya: Ae Ibn Khattab! Is zaat ki qasam jis ke hath mein meri jaan hai, agar Shaitan tumhein kisi raste par chalta dekhta hai to ise chhorh kar woh kisi doosre raste par chal parta hai.

Hum se Muhammad bin Muthanna ne bayan kiya, kaha hum se Yahya ne bayan kiya, in se Ismail ne bayan kiya, kaha hum se Qais ne bayan kiya ke Abdullah bin Mas'ud Radi Allahu Anhu ne kaha ke Umar Radi Allahu Anhu ke Islam lane ke baad phir humein hamesha izzat hasil rahi.