Hum se Abu Nuaim ne bayan kiya, kaha hum se Abdul Aziz Bin Abi Salama ne bayan kiya, un se Muhammad Bin Munkadir ne kaha hum ko Jabir Bin Abdullah Radi Allahu Anhuma ne khabar di ke Umar Radi Allahu Anhu kaha karte thay ke Abu Bakr Radi Allahu Anhu hamare sardar hain aur hamare sardar ko unhon ne azad kiya hai, un ki murad Bilal Habshi Radi Allahu Anhu se thi
.

Hum se Ibn Numair ne bayan kiya, un se Muhammad Bin Ubaid ne kaha, hum se Ismail ne bayan kiya, aur un se Qais ne ke Bilal Radi Allahu Anhu ne Abu Bakr Radi Allahu Anhu se kaha: Agar aap ne mujhe apne liye khareeda hai to phir apne paas hi rakhiye aur agar Allah ke liye khareeda hai to phir mujhe azad kar dijiye aur Allah ke raste mein amal karne dijiye
.

Hum se Musaddad ne bayan kiya, kaha hum se Abdul Waris ne bayan kiya, un se Khalid ne, un se Ikrimah ne ke Ibn Abbas Radi Allahu Anhuma ne kaha: Mujhe Nabi Kareem Sallallahu Alaihi Wasallam ne seene se lagaya aur farmaya " Ay Allah! Ise hikmat ka ilm ata farma. "
.

Hum se Ahmad Bin Waqid ne bayan kiya, kaha hum se Hammad Bin Zaid ne bayan kiya, un se Ayub ne un se Humaid Bin Hilal ne aur un se Anas Bin Malik Radi Allahu Anhu ne ke Nabi Kareem Sallallahu Alaihi Wasallam ne kisi ittila ke pahunchne se pehle Zaid, Jafar aur Ibn Rawahah Radi Allahu Anhum ki shahadat ki khabar Sahaba ko suna di thi. Aap Sallallahu Alaihi Wasallam ne farmaya ke ab Islami alam ko Zaid (Radi Allahu Anhu) liye hue hain aur wo shaheed kar diye gaye, ab Jafar (Radi Allahu Anhu) ne alam utha liya aur wo bhi shaheed kar diye gaye, ab Ibn Rawahah (Radi Allahu Anhu) ne alam utha liya aur wo bhi shaheed kar diye gaye, Nabi Kareem Sallallahu Alaihi Wasallam ki aankhon se aansu jari thay phir Aap Sallallahu Alaihi Wasallam ne farmaya ke aur aakhir Allah ki talwaron mein se ek talwar (Khalid Bin Walid Radi Allahu Anhu) ne alam utha liya aur Allah Ta'ala ne un ke hath par musalmanon ko fatah inayat farmai
.

Hum se Sulaiman Bin Harb ne bayan kiya, kaha hum se Shuba ne bayan kiya, un se Amr Bin Murrah ne, un se Ibrahim ne aur un se Masruq ne ke Abdullah Bin Amr Radi Allahu Anhuma ke yahan Abdullah Bin Masood ka zikr hua to unhon ne kaha mein un se hamesha mohabbat rakhoon ga kyunke mein ne Rasul Allah Sallallahu Alaihi Wasallam ko ye farmate suna hai ke char ashkhash se Quran seekho. Abdullah Bin Masood, Aap Sallallahu Alaihi Wasallam ne ibtida Abdullah Bin Masood Radi Allahu Anhu se hi ki aur Abu Huzaifah ke Maula Salim, Ubayy Bin Kab aur Muaz Bin Jabal se, unhon ne bayan kiya ke mujhe poori tarah yaad nahi ke Nabi Kareem Sallallahu Alaihi Wasallam ne pehle Ubayy Bin Kab ka zikr kiya ya Muaz Bin Jabal Radi Allahu Anhu ka
.

Hum se Hafs Bin Umar ne bayan kiya, kaha hum se Shuba ne bayan kiya, un se Sulaiman ne bayan kiya, kaha mein ne Abu Wail se suna, kaha ke mein ne Masruq se suna, unhon ne bayan kiya ke Abdullah Bin Amr Radi Allahu Anhuma ne kaha ke Rasul Allah Sallallahu Alaihi Wasallam ki zaban mubarak par koi bura kalma nahi aata tha aur na Aap Sallallahu Alaihi Wasallam ki zaat se ye mumkin tha aur Aap Sallallahu Alaihi Wasallam ne farmaya tha ke tum mein sab se zyada azeez mujhe wo shakhs hai jis ke aadat o akhlaq sab se umdah hon
.

Aur aap ne farmaya ke Quran Majeed char aadmiyon se seekho, Abdullah Bin Masood, Abu Huzaifah ke Maula Salim, Ubayy Bin Kab aur Muaz Bin Jabal (Radi Allahu Anhum) se
.

Hum se Musa ne bayan kiya, un se Abu Awana ne, un se Mugheerah ne, un se Ibrahim ne, un se Alqamah ne ke mein Sham pahuncha to sab se pehle mein ne do rakat namaz parhi aur ye dua ki ke ay Allah! Mujhe kisi (naik) sathi ki suhbat se faiz yabi ki taufiq ata farma. Chunanche mein ne dekha ke ek buzurg aa rahe hain, jab wo qareeb aa gaye to mein ne socha ke shayad meri dua qabool ho gayi hai. Unhon ne daryaft farmaya: Aap ka watan kahan hai? Mein ne arz kiya ke mein Kufa ka rehne wala hoon, is par unhon ne farmaya: Kya tumhare yahan «Sahib-un-Na'layni wal Wisadi wal Mutahharati» (Abdullah Bin Masood Radi Allahu Anhu) nahi hain? Kya tumhare yahan wo Sahabi nahi hain jinhein Shaitan se (Allah ki) panah mil chuki hai. (Yani Ammar Bin Yasir Radi Allahu Anhuma) Kya tumhare yahan sarbasta raazon ke janne wale nahi hain ke jinhein un ke siwa aur koi nahi janta (phir daryaft farmaya) Ibn Umm Abd (Abdullah Bin Masood Radi Allahu Anhu) ayat «wal-layli» ki qiraat kis tarah karte hain? Mein ne arz kiya ke «wal-layli iza yaghsha * wan-nahari iza tajalla * waz-zakara wal unsa» aap ne farmaya ke mujhe bhi Rasul Allah Sallallahu Alaihi Wasallam ne khud apni zaban mubarak se isi tarah sikhaya tha. Lekin ab Sham wale mujhe is tarah qiraat karne se hatana chahte hain
.

Hum se Sulaiman Bin Harb ne bayan kiya, kaha hum se Shuba ne bayan kiya, un se Abu Ishaq ne, un se Abdur Rahman Bin Zaid ne bayan kiya ke hum ne Huzaifah Radi Allahu Anhu se poocha ke Sahaba mein Nabi Kareem Sallallahu Alaihi Wasallam se aadat o akhlaq aur taur tariq mein sab se zyada qareeb kaun se Sahabi thay? Taake hum un se seekhein, unhon ne kaha akhlaq, taur tariq aur seerat o aadat mein Ibn Umm Abd se zyada Aap Sallallahu Alaihi Wasallam se qareeb aur kisi ko mein nahi samajhta
.

Mujh se Muhammad Bin Ala ne bayan kiya, kaha hum se Ibrahim Bin Yusuf Bin Abi Ishaq ne bayan kiya, kaha ke mujh se mere walid ne bayan kiya, un se Abu Ishaq ne, kaha ke mujh se Aswad Bin Yazid ne bayan kiya, kaha ke mein ne Abu Musa Ashari Radi Allahu Anhu se suna: Unhon ne bayan kiya ke mein aur mere bhai Yemen se (Madinah Tayyibah) hazir hue aur ek zamane tak yahan qiyam kiya, hum is poore arsa mein yahi samajhte rahe ke Abdullah Bin Masood Radi Allahu Anhu Nabi Kareem Sallallahu Alaihi Wasallam ke gharane hi ke ek fard hain, kyunke Nabi Kareem Sallallahu Alaihi Wasallam ke ghar mein Abdullah Bin Masood Radi Allahu Anhu aur un ki walidah ka (bakasrat) aana jana hum khud dekha karte thay
.