Hum se Usman Bin Abi Shaiba ne bayan kiya, kaha hum se Jareer ne bayan kiya, un se Mansoor ne, un se Abu Wail ne aur un se Abdullah Bin Masood (Radi Allahu Anhu) ne bayan kiya ke mein hazir-e-khidmat tha to Nabi Kareem (Sallallahu Alaihi Wasallam) ke samne ek aise shakhs ka zikr aaya, jo raat bhar din chadhe tak pada sota raha ho, Aap (Sallallahu Alaihi Wasallam) ne farmaya ke ye aisa shakhs hai jis ke kaan ya dono kanon mein shaitan ne peshab kar diya hai
.

Hum se Musa Bin Ismail ne bayan kiya, kaha hum se Hammam ne bayan kiya, un se Mansoor ne un se Salim Bin Abi-ul-Jad ne, un se Kuraib ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya, jab koi shakhs apni biwi ke paas aata hai aur ye dua parhta hai 'Bismillah Allahumma jannibnash shaitana, wa jannibish shaitana ma razaqtana' 'Allah ke naam se shuru karta hoon, Ae Allah! Hum se shaitan ko door rakh aur jo kuch humein tu de (aulad) is se bhi shaitan ko door rakh.' Phir agar un ke yahan bacha paida hota hai to shaitan ise koi nuqsan nahi pahuncha sakta
.

Hum se Muhammad Bin Salam ne bayan kiya, unhon ne kaha hum ko Abdah ne khabar di, unhein Hisham Bin Urwah ne, unhein un ke walid ne aur un se Abdullah Bin Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne farmaya "Jab sooraj ka upar ka kinara nikal aaye to namaz na parho jab tak wo poori tarah zahir na ho jaye aur jab ghuroob hone lage tab bhi is waqt tak ke liye namaz chhod do jab tak bilkul ghuroob na ho jaye."
.

Aur namaz sooraj ke nikalne aur doobne ke waqt na parho, kyunke sooraj shaitan ke sarr ke ya shaitanon ke sarr ke dono konon ke beech mein se nikalta hai. Abdah ne kaha mein nahi janta Hisham ne shaitan ka sarr kaha ya shaitanon ka
.

Hum se Abu Ma'mar ne bayan kiya, kaha hum se Abdul Waris ne bayan kiya, kaha hum se Yunus ne bayan kiya, un se Humaid Bin Bilal ne, un se Abu Salih un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Agar tum mein se namaz parhne mein kisi shakhs ke samne se koi guzre to ise guzarne se roke, agar wo na ruke to phir roke aur agar ab bhi na ruke to is se lade wo shaitan hai."
.

Aur Usman Bin Haisham ne bayan kiya, kaha hum se Auf ne bayan kiya, un se Muhammad Bin Sireen ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne ek martaba sadqa-e-fitr ke ghalla ki hifazat par mujhe muqarrar kiya, ek shakhs aaya aur dono hathon se ghalla lipp bhar bhar kar lene laga. Mein ne ise pakad liya aur kaha ke ab mein tujhe Rasul Allah (Sallallahu Alaihi Wasallam) ki khidmat mein pesh karoon ga. Phir unhon ne aakhir tak hadees bayan ki, is (chor) ne Abu Hurairah (Radi Allahu Anhu) se kaha ke jab tum apne bistar par sone ke liye laitne lago to Ayat-ul-Kursi parh liya karo, is ki barkat se Allah Ta'ala ki taraf se tum par ek nigahban muqarrar ho jaye ga aur shaitan tumhare qareeb subah tak na aa sakega. Aap (Sallallahu Alaihi Wasallam) ne farmaya ke baat to us ne sacchi kahi hai agarchay wo khud jhoota hai, wo shaitan tha
.

Hum se Yahya Bin Bukair ne bayan kiya, kaha hum se Laith Bin Saad ne bayan kiya, un se Aqeel ne, un se Ibn Shihab ne bayan kiya, unhein Urwah ne khabar di aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Tum mein se kisi ke paas shaitan aata hai aur tumhare dil mein pehle to ye sawal paida karta hai ke falan cheez kis ne paida ki, falan cheez kis ne paida ki? Aur aakhir mein baat yahan tak pahunchata hai ke khud tumhare Rabb ko kis ne paida kiya? Jab kisi shakhs ko aisa waswasa dale to Allah se panah mangni chahiye, shaitani khayal ko chhod de."
.

Hum se Yahya Bin Bukair ne bayan kiya, kaha hum se Laith ne bayan kiya, un se Aqeel ne bayan kiya, un se Ibn Shihab ne, un se Taymiyyeen ke maula Ibn Abi Anas ne bayan kiya, un se un ke walid ne bayan kiya ke Abu Hurairah (Radi Allahu Anhu) ko ye kehte suna tha ke Rasul Allah (Sallallahu Alaihi Wasallam) ne farmaya "Jab Ramzan ka mahina aata hai to Jannat ke darwaze khol diye jate hain. Jahannum ke darwaze band kar diye jate hain aur shayatin ko zanjeeron mein kas diya jata hai."
.

Hum se Humaidi ne bayan kiya, kaha hum se Sufyan Bin Uyaina ne, kaha hum se Amr Bin Dinar ne, kaha ke mujhe Said Bin Jubair ne khabar di, kaha ke mein ne Ibn Abbas (Radi Allahu Anhuma) se pucha (Nauf Bakali kehta hai ke Khizar ke paas jo Musa gaye thay wo doosre Musa thay) to unhon ne kaha ke hum se Ubai Bin Kab ne bayan kiya, unhon ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) farma rahe thay ke Musa Alaihis Salam ne apne rafeeq-e-safar (Yusha Bin Noon) se farmaya ke hamara khana la, is par unhon ne bataya ke aap ko maloom bhi hai jab hum ne chattan par padao dala tha to mein machhli wahin bhool gaya (aur apne sath na la saka) aur mujhe ise yaad rakhne se sirf shaitan ne ghafil rakha aur Musa Alaihis Salam ne is waqt tak koi thakan maloom nahi ki jab tak is hadd se na guzar liye, jahan ka Allah Ta'ala ne hukm diya tha
.

Hum se Abdullah Bin Muslima ne bayan kiya, un se Imam Maalik ne bayan kiya, un se Abdullah Bin Dinar ne bayan kiya aur un se Abdullah Bin Umar (Radi Allahu Anhuma) ne bayan kiya ke mein ne Rasul Allah (Sallallahu Alaihi Wasallam) ko dekha ke Aap mashriq ki taraf isharah kar ke farma rahe thay ke haan! Fitna isi taraf se nikalega jahan se shaitan ke sarr ka kona nikalta hai
.