Hum se Abdullah Bin Muhammad ne bayan kiya, unhon ne kaha hum se Hisham Bin Yusuf ne bayan kiya, un se Ma'mar ne bayan kiya, un se Zuhri ne bayan kiya, un se Salim ne bayan kiya aur un se Abdullah Bin Umar (Radi Allahu Anhuma) ne ke unhon ne Nabi Kareem (Sallallahu Alaihi Wasallam) se suna. Aap (Sallallahu Alaihi Wasallam) mimbar par khutba dete hue farma rahe thay ke sanpon ko maar dala karo (khususan) un ko jin ke saron par do nuqte hote hain aur dum bareeda saanp ko bhi, kyunke dono aankh ki roshni tak khatam kar dete hain aur hamal tak gira dete hain
.

Abdullah Bin Umar (Radi Allahu Anhuma) ne kaha ke ek martaba mein ek saanp ko maarne ki koshish kar raha tha ke mujh se Abu Lubaba (Radi Allahu Anhu) ne pukar kar kaha ke ise na maaro, mein ne kaha ke Rasul Allah (Sallallahu Alaihi Wasallam) ne to sanpon ke maarne ka hukm diya tha. Unhon ne bataya ke baad mein phir Aap (Sallallahu Alaihi Wasallam) ne gharon mein rehne wale sanpon ko jo jin hote hain dafatan maar dalne se mana farmaya
.

Aur Abdur Razzaq ne bhi is hadees ko Ma'mar se riwayat kiya, is mein yun hai ke mujh ko Abu Lubaba (Radi Allahu Anhu) ne dekha ya mere chacha Zaid Bin Khattab ne aur Ma'mar ke sath is hadees ko Yunus aur Ibn Uyaina aur Ishaq Kalbi aur Zubaida ne bhi Zuhri se riwayat kiya aur Salih aur Salim se, unhon ne Ibn Abi Hafsa aur Ibn Mujamma ne bhi Zuhri se unhon ne Ibn Umar (Radi Allahu Anhuma) se is mein yun hai ke mujh ko Abu Lubaba aur Zaid Bin Khattab (dono) ne dekha
.

Hum se Ismail Bin Abi Uwais ne bayan kiya, unhon ne kaha ke mujh se Imam Maalik ne bayan kiya, un se Abdur Rahman Bin Abdullah Bin Abdur Rahman Bin Abi Sasah ne, un se un ke walid ne, aur un se Abu Said Khudri (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Ek zamana aaye ga jab Musalman ka sab se umda mal is ki wo bakriyaan hongi jinhein wo pahad ki chotiyon aur barish ki wadiyon mein le kar chala jaye ga taake is tarah apne deen-o-iman ko fitnon se bacha le."
.

Hum se Abdullah Bin Yusuf ne bayan kiya, unhon ne kaha hum ko Imam Maalik ne khabar di, unhein Abu-ul-Zinad ne khabar di, unhein Aaraj ne khabar di, aur unhein Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Kufr ki choti mashriq mein hai aur fakhr aur takabbur karna ghode walon, ont walon aur zameendaron mein hota hai jo (umuman) gaon ke rehne wale hote hain aur bakri walon mein dil-jamayi hoti hai."
.

Hum se Musaddad ne bayan kiya, unhon ne kaha hum se Yahya Qattan ne bayan kiya, un se Ismail ne bayan kiya ke mujh se Qais ne bayan kiya aur un se Uqba Bin Amr Abu Masood (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne Yemen ki taraf apne hath se isharah karte hue farmaya ke iman to idhar hai Yemen mein! Haan, aur qasawat aur sakht dili in logon mein hai jo onton ki dumein pakde chalate rehte hain. Jahan se shaitan ki chotiyan namudar hongi, yaani Rabi'a aur Muzar ki qaumon mein
.

Hum se Qutaiba ne bayan kiya, unhon ne kaha hum se Laith Bin Saad ne bayan kiya, un se Jafar Bin Rabi'a ne, un se Aaraj ne bayan kiya aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jab murg ki baang suno to Allah se is ke fazl ka sawal kiya karo, kyunke us ne farishte ko dekha hai aur jab gadhe ki awaz suno to shaitan se Allah ki panah mango kyunke us ne shaitan ko dekha hai."
.

Hum se Ishaq Bin Rahwayh ne bayan kiya, kaha hum ko Ruh Bin Ubada ne khabar di, kaha hum ko Ibn Juraij ne khabar di, kaha ke mujhe Ata Bin Abi Rabah ne khabar di aur unhon ne Jabir Bin Abdullah (Radi Allahu Anhuma) se suna ke Rasul Allah (Sallallahu Alaihi Wasallam) ne farmaya "Jab raat ka andhera shuru ho ya (Aap Sallallahu Alaihi Wasallam ne ye farmaya ke) jab sham ho jaye to apne bacchon ko apne paas rok liya karo, kyunke shayatin isi waqt phailte hain. Albatta jab ek ghadi raat guzar jaye to unhein chhod do, aur Allah ka naam le kar darwaze band kar lo, kyunke shaitan kisi band darwaze ko nahi khol sakta, Ibn Juraij ne bayan kiya ke mujhe Amr Bin Dinar ne khabar di ke unhon ne Jabir Bin Abdullah (Radi Allahu Anhuma) se bilkul isi tarah hadees suni thi jis tarah mujhe Ata ne khabar di thi, albatta unhon ne is ka zikr nahi kiya ke 'Allah ka naam lo'."
.

Hum se Musa Bin Ismail ne bayan kiya, kaha hum se Wuhaib ne, un se Khalid ne un se Muhammad Bin Sireen ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Bani Israil mein kuch log ghaib ho gaye. (In ki suratein maskh ho gayeen) mera to ye khayal hai ke unhein choohe ki surat mein maskh kar diya gaya. Kyunke choohon ke samne jab ont ka doodh rakha jata hai to wo ise nahi peete (kyunke Bani Israil ke deen mein ont ka gosht haram tha) aur agar bakri ka doodh rakha jaye to pi jate hain. Phir mein ne ye hadees Ka'b Ahbar se bayan ki to unhon ne (hairat se) pucha, kya waqayi aap ne Nabi Kareem Sallallahu Alaihi Wasallam ye hadees suni hai? Kai martaba unhon ne ye sawal kiya. Is par mein ne kaha (ke Nabi Kareem Sallallahu Alaihi Wasallam se nahi suni to phir kis se) kya mein Tauraat parha karta hoon? (ke is se naql kar ke bayan karta hoon)."
.

Hum se Said Bin Afir ne bayan kiya, un se Ibn Wahb ne bayan kiya, kaha ke mujh se Yunus ne bayan kiya, un se Ibn Shihab ne, un se Urwah ne, unhon ne Aisha (Radi Allahu Anha) se bayan kiya ke Nabi Kareem (Sallallahu Alaihi Wasallam) ne girgat (chipkali) ke mutaliq farmaya ke wo mozi janwar hai lekin mein ne Aap (Sallallahu Alaihi Wasallam) se ise maar dalne ka hukm nahi suna tha aur Saad Bin Abi Waqqas batate thay ke Nabi Kareem (Sallallahu Alaihi Wasallam) ne ise maar dalne ka hukm farmaya hai
.