Hum se Abdullah Bin Muhammad ne bayan kiya, kaha hum se Abu Aamir Abdul Malik Aqadi ne bayan kiya un se Hammam Bin Yahya ne bayan kiya, un se Abu Jamra Nasr Bin Imran Zabai ne bayan kiya ke mein Makkah mein Ibn Abbas (Radi Allahu Anhuma) ki khidmat mein baitha karta tha. Wahan mujhe bukhaar aane laga. Ibn Abbas (Radi Allahu Anhuma) ne farmaya ke is bukhaar ko Zamzam ke pani se thanda kar, kyunke Rasul Allah (Sallallahu Alaihi Wasallam) ne farmaya ke jahannum ki bhaap ke asar se aata hai, is liye ise pani se thanda kar liya karo ya ye farmaya ke Zamzam ke pani se. Ye shak Hammam rawi ko hua hai
.

Mujh se Amr Bin Abbas ne bayan kiya, kaha hum se Abdur Rahman Bin Mahdi ne bayan kiya, kaha hum se Sufyan Thauri ne bayan kiya, un se un ke baap ne, un se Abaya Bin Rifa'a ne bayan kiya, kaha mujh ko Rafi Bin Khadeej (Radi Allahu Anhu) ne khabar di ke mein ne Nabi Kareem (Sallallahu Alaihi Wasallam) se suna, Aap (Sallallahu Alaihi Wasallam) ne farmaya tha ke bukhaar jahannum ke josh marne ke asar se hota hai is liye ise pani se thanda kar liya karo
.

Hum se Maalik Bin Ismail ne bayan kiya, kaha hum se Zuhair ne bayan kiya, kaha hum se Hisham Bin Urwah ne bayan kiya, un se Urwah Bin Zubair ne bayan kiya aur un se Aisha (Radi Allahu Anha) ne ke Nabi Kareem (Sallallahu Alaihi Wasallam) ne farmaya "Bukhaar jahannum ki bhaap ke asar se hota hai ise pani se thanda kar liya karo."
.

Hum se Musaddad ne bayan kiya, un se Yahya ne, un se Ubaidullah ne bayan kiya, kaha ke mujh se Nafi ne bayan kiya aur unhein Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya "Bukhaar jahannum ki bhaap ke asar se hota hai is liye ise pani se thanda kar liya karo."
.

Hum se Ismail Bin Abi Uwais ne bayan kiya, kaha ke mujh se Imam Maalik Rahimahullah ne bayan kiya, un se Abu-ul-Zinad ne, un se Aaraj ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Tumhari (dunya ki) aag jahannum ki aag ke muqabale mein (apni garmi aur halakat kheezi mein) sattarwan hissa hai." Kisi ne pucha, Ya Rasul Allah! (Kuffar aur gunahgaron ke azab ke liye) ye hamari dunya ki aag bhi bahut thi. Aap (Sallallahu Alaihi Wasallam) ne farmaya "Dunya ki aag ke muqabale mein jahannum ki aag unhattar guna badh kar hai."
.

Hum se Qutaiba Bin Said ne bayan kiya, kaha hum se Sufyan Bin Uyaina ne bayan kiya, un se Amr Bin Dinar ne, unhon ne Ata se suna, unhon ne Safwan Bin Ya'la se khabar di. Unhon ne apne walid ke wasita se unhon ne Nabi Kareem (Sallallahu Alaihi Wasallam) ko mimbar par is tarah ayat parhte suna "wa-nado ya maliku" (aur wo dozakhi pukareinge, Ae Maalik!).

Hum se Ali Bin Abdullah Madini ne bayan kiya, kaha hum se Sufyan Bin Uyaina ne bayan kiya, un se Aamash ne, un se Abu Wail ne bayan kiya ke Usama Bin Zaid (Radi Allahu Anhuma) se kisi ne kaha ke agar aap falan sahab (Usman Radi Allahu Anhu) ke yahan ja kar un se guftagu karo to accha hai (taake wo ye fasad dabane ki tadbeer karein) unhon ne kaha kya tum log ye samajhte ho ke mein un se tum ko suna kar (tumhare samne hi) baat karta hoon, mein tanhayi mein un se guftagu karta hoon is tarah par ke fasad ka darwaza nahi kholta, mein ye bhi nahi chahta ke sab se pehle mein fasad ka darwaza kholoon aur mein Aap (Sallallahu Alaihi Wasallam) se ek hadees sunne ke baad ye bhi nahi kehta ke jo shakhs mere upar sardar ho wo sab logon mein behtar hai. Logon ne pucha ke aap ne Nabi Kareem (Sallallahu Alaihi Wasallam) se jo hadees suni hai wo kya hai? Usama (Radi Allahu Anhu) ne kaha Nabi Kareem (Sallallahu Alaihi Wasallam) ko mein ne ye farmate suna tha ke Qiyamat ke din ek shakhs ko laya jaye ga aur jahannum mein daal diya jaye ga. Aag mein is ki aantain bahar nikal aayeingi aur wo shakhs is tarah chakkar lagane lagega jaise gadha apni chakki par gardish kiya karta hai. Jahannum mein dale jane wale is ke qareeb aa kar jama ho jayenge aur is se kaheinge, Ae falan! Aaj ye tumhari kya halat hai? Kya tum humein acche kaam karne ke liye nahi kehte thay, aur kya tum bure kaamon se humein mana nahi kiya karte thay? Wo shakhs kahega ji haan, mein tumhein to acche kaamon ka hukm deta tha lekin khud nahi karta tha. Bure kaamon se tumhein mana bhi karta tha, lekin mein ise khud kiya karta tha. Is hadees ko Ghundar ne bhi Shuba se, unhon ne Aamash se riwayat kiya hai
.

Aur Mujahid ne kaha (Surah Al-Saffat mein) lafz "yuqzafoona" ka maane phainke jate hain (isi surat mein) "duhooran" ke maane dhutkare hue ke hain. Isi surat mein lafz "wasibun" ka maane hamesha ka hai aur Ibn Abbas (Radi Allahu Anhuma) ne kaha (Surah Al-Araf mein) lafz "mad-hooran" ka maane dhutkara hua, mardood (aur Surah Al-Nisa mein) "mareedan" ka maane mutamarrid-o-shareer ke hain. Isi surat mein "fal-yubattikunna" "battaka" se nikla hai. Yaani cheera, kaata. (Surah Bani Israil mein) "wa-stafziz" ka maane un ko halka kar de. Isi surat mein "khaylun" ka maane sawar aur "rajilun" yaani piyade. Yaani "rajjalatun" is ka mufrad "rajilun" jaise "sahbun" ka mufrad "sahibun" aur "tajarun" ka mufrad "tajirun" isi surat mein lafz "la-ahtanikanna" ka maane jarr se ukhad doon ga. Surah Al-Saffat mein lafz "qareenun" ke maane shaitan ke hain
.

Hum se Ibrahim Bin Musa ne bayan kiya, kaha hum ko Isa Bin Yunus ne khabar di, unhein Hisham ne, unhein un ke walid Urwah ne aur un se Aisha (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) par (jab Aap Sallallahu Alaihi Wasallam Hudaibiya se laute thay) jadoo hua tha. Aur Laith Bin Saad ne bayan kiya ke mujhe Hisham ne likha tha, unhon ne apne walid se suna tha aur yaad rakha tha aur un se Aisha (Radi Allahu Anha) ne bayan kiya tha ke Nabi Kareem (Sallallahu Alaihi Wasallam) par jadoo kiya gaya tha. Aap ke zehan mein baat hoti thi ke falan kaam mein kar raha hoon halanke Aap ise na kar rahe hote. Aakhir ek din Aap ne dua ki phir dua ki ke Allah Paak is jadoo ka asar dafa kare. Is ke baad Aap ne Aisha (Radi Allahu Anha) se farmaya ke tumhein maloom bhi hua Allah Ta'ala ne mujhe wo tadbeer bata di hai jis mein meri shifa muqaddar hai. Mere paas do aadmi aaye, ek to mere sarr ki taraf baith gaye aur doosra paon ki taraf. Phir ek ne doosre se kaha, unhein bimari kya hai? Doosre aadmi ne jawab diya ke un par jadoo hua hai. Unhon ne pucha, jadoo un par kis ne kiya hai? Jawab diya ke Labeed Bin A'sam yahudi ne, pucha ke wo jadoo (tona) rakha kis cheez mein hai? Kaha ke kanghe mein, katan mein aur khajoor ke khushk khoshe ke ghilaf mein. Pucha, aur ye cheezain hain kahan? Kaha Bir-e-Dauran mein. Phir Nabi Kareem (Sallallahu Alaihi Wasallam) wahan tashreef le gaye aur wapas aaye to Aisha (Radi Allahu Anha) se farmaya, wahan ke khajoor ke darakht aise hain jaise shaitan ki khopdi. Mein ne Aap (Sallallahu Alaihi Wasallam) se pucha, wo tona Aap ne niklwaya bhi? Aap (Sallallahu Alaihi Wasallam) ne farmaya ke nahi mujhe to Allah Ta'ala ne khud shifa di aur mein ne ise is khayal se nahi niklwaya ke kahin is ki wajah se logon mein koi jhagda khada kar doon. Is ke baad wo kunwan band kar diya gaya
.

Hum se Ismail Bin Abi Uwais ne bayan kiya, kaha mujh se mere bhai (Abdul Hameed) ne bayan kiya, unhon ne kaha hum se Sulaiman Bin Bilal ne, un se Yahya Bin Said ne, un se Said Bin Musayyab ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Jab koi tum mein se soya hua hota hai, to shaitan is ke sarr ki gaddi par teen girhein laga deta hai khoob acchi tarah se aur har girah par ye afsoon phoonk deta hai ke abhi bahut raat baqi hai. Pada sota reh. Lekin agar wo shakhs jaag kar Allah ka zikr shuru karta hai to ek girah khul jati hai. Phir jab wazu karta hai to doosri girah khul jati hai. Phir jab namaz-e-fajr parhta hai to teesri girah bhi khul jati hai aur subah ko khush mizaj khush dil rehta hai. Warna bad-mizaj sust reh kar wo din guzarta hai."
.