Hum se Hajjaj Bin Minhal ne bayan kiya, kaha hum se Hammam ne bayan kiya, unhon ne kaha ke mein ne Abu Imran Juni se suna, un se Abu Bakr Bin Abdullah Bin Qais Ashari ne bayan kiya aur un se un ke walid ne ke Nabi Kareem (Sallallahu Alaihi Wasallam) ne farmaya "(Jannatiyon ka) khaima kya hai, ek moti hai kholdar jis ki bulandi upar ko tees meel tak hai. Is ke har kinare par momin ki ek biwi hogi jise doosre na dekh sakeinge." Abu Abdus Samad aur Harith Bin Ubaid ne Abu Imran se (bajaye tees meel ke) saath meel bayan kiya
.

Hum se Humaidi ne bayan kiya, kaha hum se Sufyan Bin Uyaina ne bayan kiya, kaha hum se Abu-uz-Zinad ne bayan kiya, un se Aaraj ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Allah Ta'ala ka irshad hai ke mein ne apne naik bandon ke liye wo cheezain tayyar kar rakhi hain, jinhein na ankhon ne dekha, na kanon ne suna aur na kisi insan ke dil mein un ka kabhi khayal guzra hai. Agar jee chahe to ye ayat parh lo 'fala talamu nafsun ma ukhfiya lahum min qurrati ayunin' 'Pas koi shakhs nahi janta ke is ki ankhon ki thandak ke liye kya kya cheezain chhupa kar rakhi gayi hain'."
.

Hum se Muhammad Bin Muqatil ne bayan kiya, kaha hum ko Abdullah ne khabar di, kaha hum ko Ma'mar ne khabar di, unhein Hammam Bin Munabbih ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Jannat mein dakhil hone wale sab se pehle giroh ke chehre aise roshan honge jaise chaudhwin ka chand roshan hota hai. Na is mein thookeinge na un ki naak se koi aalaish aaye gi aur na peshab, pakhana kareinge. Un ke bartan sone ke honge. Kanghe sone chandi ke honge. Angeethiyon ka indhan ood ka hoga. Paseena mushk jaisa khushbudar hoga aur har shakhs ki do biwiyaan hongi. Jin ka husn aisa hoga ke pindliyon ka goda gosht ke upar se dikhayi dega. Na jannatiyon mein aapas mein koi ikhtilaf hoga aur na bughz-o-inaad, un ke dil ek honge aur wo subah-o-sham Allah Paak ki tasbeeh-o-tahleel mein mashghool raha kareinge."
.

Hum se Abu-ul-Yaman ne bayan kiya, unhon ne kaha hum ko Shuaib ne khabar di, un se Abu-ul-Zinad ne bayan kiya, un se Aaraj ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Jannat mein dakhil hone wale sab se pehle giroh ke chehre aise roshan honge jaise chaudhwin ka chand hota hai. Jo giroh is ke baad dakhil hoga un ke chehre sab se zyada chamakdar sitare jaise roshan honge. Un ke dil ek honge ke koi bhi ikhtilaf un mein aapas mein na hoga aur na ek doosre se bughz-o-hasad hoga. Har shakhs ki do biwiyaan hongi, un ki khubsoorti aisi hogi ke un ki pindliyon ka goda gosht ke upar se dikhayi dega. Wo subah-o-sham Allah ki tasbeeh karte raheinge na un ko koi bimari hogi, na un ki naak mein koi aalaish aaye gi aur na thook aaye ga. Un ke bartan sone aur chandi ke aur kanghe sone ke honge aur un ki angeethiyon ka indhan 'alwa' ka hoga, Abu-ul-Yaman ne bayan kiya ke 'alwa' se ood-e-hindi murad hai. Aur un ka paseena mushk jaisa hoga. Mujahid ne kaha ke 'ibkar' se murad awwal-e-fajr hai. Aur 'al-ashiy' se murad sooraj ka itna dhal jana ke wo ghuroob hota nazar aane lage
.

Hum se Muhammad Bin Abi Bakr Muqaddami ne bayan kiya, unhon ne kaha hum se Fuzail Bin Sulaiman ne bayan kiya, un se Abu Hazim ne bayan kiya aur un se Sahl Bin Saad (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Meri ummat mein se sattar hazar ya (Aap Sallallahu Alaihi Wasallam ne ye farmaya ke) saat lakh ki ek jamaat Jannat mein ek hi waqt mein dakhil hongi aur in sab ke chehre aise chamkeinge jaise chaudhwin ka chand chamakta hai."
.

Hum se Abdullah Bin Muhammad Jafi ne bayan kiya, kaha hum se Yunus Bin Muhammad ne bayan kiya, un se Shaiban ne bayan kiya, un se Qatada ne aur un se Anas Bin Malik (Radi Allahu Anhu) ne bayan kiya, unhon ne kaha ke Nabi Kareem (Sallallahu Alaihi Wasallam) ki khidmat mein sundus (ek khaas qism ka resham) ka ek jubba tuhfa mein pesh kiya gaya. Aap (Sallallahu Alaihi Wasallam) (mardon ke liye) resham ke istemal se pehle hi mana farma chuke thay. Logon ne is jubbe ko bahut hi pasand kiya, to Aap (Sallallahu Alaihi Wasallam) ne farmaya ke Jannat mein Saad Bin Muaz ke rumal is se behtar honge
.

Hum se Musaddad ne bayan kiya, unhon ne kaha hum se Yahya Bin Said ने bayan kiya, un se Sufyan ne bayan kiya, unhon ne kaha ke mujh se Abu Ishaq ne bayan kiya, kaha ke mein ne Bara Bin Azib (Radi Allahu Anhuma) se suna, Aap ne bayan kiya ke Rasul Allah (Sallallahu Alaihi Wasallam) ki khidmat mein resham ka ek kapda pesh kiya gaya is ki khubsoorti aur nazakat ne logon ko hairat mein daal diya. Aap (Sallallahu Alaihi Wasallam) ne farmaya ke Jannat mein Saad Bin Muaz ke rumal is se behtar aur afzal hain
.

Hum se Ali Bin Abdullah ne bayan kiya, unhon ne kaha hum se Sufyan ne bayan kiya, un se Abu Hazim ne aur un se Sahl Bin Saad Sa'idi (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Jannat mein ek kode ki jagah dunya se aur jo kuch dunya mein hai, sab se behtar hai."
.

Hum se Ruh Bin Abdul Momin ne bayan kiya, kaha hum se Yazid Bin Zuraie ne bayan kiya, kaha hum se Said Bin Abi Arubah ne bayan kiya, un se Qatada ne aur un se Anas Bin Malik (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jannat mein ek darakht hai jis ke saye mein ek sawar so saal tak chal sakta hai aur phir bhi is ko tay na kar sakega."
.

Hum se Muhammad Bin Sinan ne bayan kiya, unhon ne kaha hum se Falih Bin Sulaiman ne bayan kiya, un se Hilal Bin Ali ne bayan kiya, un se Abdur Rahman Bin Abi Amra ne bayan kiya aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jannat mein ek darakht hai jis ke saye mein ek sawar so saal tak chal sakega aur agar tumhara jee chahe to ye ayat parh lo 'wa zillin mamdoodin' aur lamba sayah."
.