Hum se Ishaq ne bayan kiya, kaha hum ko Wahb Bin Jareer ne khabar di, un se mere walid ne bayan kiya, unhon ne kaha ke mein ne Humaid Bin Hilal se suna aur un se Anas Bin Malik (Radi Allahu Anhu) ne bayan kiya ke jaise wo ghubar meri nazron ke samne hai. Musa ne riwayat mein yun ziyadati ki ke Jibrail Alaihis Salam ke (sath aane wale) sawar farishton ki wajah se. Jo ghubar khandan Banu Ghanam ki gali se utha tha
.

Hum se Farwa Bin Abi-ul-Maghra ne bayan kiya, kaha hum se Ali Bin Mushir ne bayan kiya, un se Hisham Bin Urwah ne, un se un ke baap ne aur un se Aisha (Radi Allahu Anha) ne bayan kiya ke Harith Bin Hisham (Radi Allahu Anhu) ne Nabi Kareem (Sallallahu Alaihi Wasallam) se pucha ke wahi Aap ke paas kis tarah aati hai? Aap (Sallallahu Alaihi Wasallam) ne farmaya ke kai tarah se aati hai. Kabhi farishta ke zariya aati hai to wo ghanti bajne ki awaz ki tarah nazil hoti hai. Jab wahi khatam ho jati hai to jo kuch farishte ne nazil kiya hota hai, mein ise poori tarah yaad kar chuka hota hoon. Wahi utarne ki ye surat mere liye bahut dushwar hoti hai. Kabhi farishta mere samne ek mard ki surat mein aa jata hai wo mujh se baatein karta hai aur jo kuch keh jata hai mein ise poori tarah yaad kar leta hoon
.

Hum se Adam Bin Abi Iyas ne bayan kiya, kaha hum se Shaiban ne bayan kiya, un se Yahya Bin Abi Kaseer ne bayan kiya, un se Abu Salama ne aur un se Abu Hurairah (Radi Allahu Anhu) ne bayan kiya ke mein ne Nabi Kareem (Sallallahu Alaihi Wasallam) se suna, Aap (Sallallahu Alaihi Wasallam) farma rahe thay ke Allah ke raste mein jo shakhs kisi cheez ka bhi joda de, to Jannat ke chaukidar farishte ise bulayenge ke falan is darwaze se andar aa ja. Abu Bakr (Radi Allahu Anhu) ne is par kaha ke ye to wo shakhs hoga jise koi nuqsan na hoga. Nabi Kareem (Sallallahu Alaihi Wasallam) ne farmaya ke mujhe umeed hai ke tu bhi unhi mein se hoga
.

Hum se Abdullah Bin Muhammad Musandi ne bayan kiya, kaha hum se Hisham ne bayan kiya, kaha hum ko Ma'mar ne khabar di, unhein Zuhri ne, unhein Abu Salama ne aur unhein Aisha (Radi Allahu Anha) ne ke Nabi Kareem (Sallallahu Alaihi Wasallam) ne ek martaba farmaya "Ae Aisha! Ye Jibrail Alaihis Salam aaye hain, tum ko salam keh rahe hain." Aisha (Radi Allahu Anha) ne jawab mein kaha, ke wa-alaihis-salam wa-rahmatullahi wa-barakatuh. Aap wo cheezain dekhte hain jinhein mein nahi dekh sakti, Aisha (Radi Allahu Anha) ki murad Nabi Kareem (Sallallahu Alaihi Wasallam) se thi
.

Hum se Abu Nuaym ne bayan kiya, kaha hum se Umar Bin Zarr ne bayan kiya (doosri sanad) Imam Bukhari Rahimahullah ne kaha ke mujh se Yahya Bin Jafar ne bayan kiya, kaha hum se Wakee ne bayan kiya, un se Umar Bin Zarr ne, un se un ke walid ne, un se Said Bin Jubair ne aur un se Abdullah Bin Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne Jibrail Alaihis Salam se ek martaba farmaya "Hum se mulaqat ke liye jitni martaba Aap aate hain is se zyada kyun nahi aate?" Bayan kiya ke is par ye ayat nazil hui "wa ma natanazzalu illa bi-amri rabbika lahu ma baina aidina wa ma khalfana" "Aur hum nahi utarte lekin tere Rabb ke hukm se, usi ka hai jo kuch ke hamare samne hai aur jo kuch hamare peechhe hai." Akheer ayat tak
.

Hum se Ismail Bin Abi Idrees ne bayan kiya, kaha ke mujh se Sulaiman Bin Bilal ne bayan kiya, un se Yunus Bin Yazid ne, un se Ibn Shihab Zuhri ne, un se Ubaidullah Bin Abdullah Bin Utba Bin Masood ne aur un se Ibn Abbas (Radi Allahu Anhuma) ne ke Rasul Allah (Sallallahu Alaihi Wasallam) ne farmaya "Jibrail Alaihis Salam ne Quran Majeed mujhe (Arab ke) ek hi muhaware ke mutabiq parh kar sikhaya tha, lekin mein is mein barabar izafa ki khwahish ka izhar karta raha, ta-aanke Arab ke saat muhawaron par is ka nazool hua."
.

Hum se Muhammad Bin Muqatil ne bayan kiya, kaha hum ko Abdullah Bin Mubarak ne khabar di, kaha hum ko Yunus ne khabar di, un se Zuhri ne bayan kiya, kaha mujh se Ubaidullah Bin Abdullah ne bayan kiya aur un se Abdullah Bin Abbas (Radi Allahu Anhuma) ne bayan kiya ke Rasul Allah (Sallallahu Alaihi Wasallam) sab se zyada sakhi thay aur Aap ki sakhawat Ramzan Sharif ke mahine mein aur badh jati, jab Jibrail Alaihis Salam Aap se mulaqat ke liye har roz aane lagte. Jibrail Alaihis Salam Aap (Sallallahu Alaihi Wasallam) se Ramzan ki har raat mein mulaqat ke liye aate aur Aap se Quran ka daur kiya karte thay. Aap (Sallallahu Alaihi Wasallam) khususan is daur mein jab Jibrail Alaihis Salam rozana Aap se mulaqat ke liye aate to Aap khairat-o-barakat mein taiz chalne wali hawa se bhi zyada sakhi ho jate thay aur Abdullah Bin Mubarak se riwayat hai, un se Ma'mar ne isi isnad ke sath isi tarah bayan kiya aur Abu Hurairah (Radi Allahu Anhu) aur Fatima (Radi Allahu Anha) ne naql kiya Nabi Kareem (Sallallahu Alaihi Wasallam) se ke Jibrail Alaihis Salam Nabi Kareem (Sallallahu Alaihi Wasallam) ke sath Quran Majeed ka daur kiya karte thay
.

Hum se Qutaiba Bin Said ne bayan kiya, kaha hum se Laith Bin Saad ne bayan kiya un se Ibn Shihab ne Umar Bin Abdul Aziz Rahimahullah ne ek din asar ki namaz kuch darr kar ke parhayi. Is par Urwah Bin Zubair Rahimahullah ne un se kaha. Lekin Jibrail Alaihis Salam (namaz ka tariqa Nabi Kareem Sallallahu Alaihi Wasallam ko sikhane ke liye) nazil hue aur Rasul Allah (Sallallahu Alaihi Wasallam) ke aage ho kar Aap ko namaz parhayi. Umar Bin Abdul Aziz ne kaha, Urwah! Aap ko maloom bhi hai aap kya keh rahe hain? Urwah ne kaha ke (aur sun lo) mein ne Bashir Bin Abi Masood se suna aur unhon ne Abu Masood (Radi Allahu Anhu) se suna, unhon ne bayan kiya ke mein ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) farma rahe thay ke Jibrail Alaihis Salam nazil hue aur unhon ne mujhe namaz parhayi. Mein ne un ke sath namaz parhi, phir (doosre waqt ki) un ke sath mein ne namaz parhi, phir un ke sath mein ne namaz parhi, phir mein ne un ke sath namaz parhi, phir mein ne un ke sath namaz parhi, apni ungliyon par Aap ne panchwan namazon ko gin kar bataya
.

Hum se Muhammad Bin Bashar ne bayan kiya, kaha hum se Ibn Abi Adi ne bayan kiya, un se Shuba ne, un se Habib Bin Abi Sabit ne, un se Zaid Bin Wahb ne aur un se Abu Zarr (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Jibrail Alaihis Salam keh gaye hain ke tumhari ummat ka jo aadmi is halat mein marega ke wo Allah Ta'ala ke sath kisi ko shareek na thehrata raha hoga, to wo Jannat mein dakhil hoga ya (Aap ne ye farmaya ke) Jahannum mein dakhil nahi hoga. Khwah us ne apni zindagi mein zina kiya ho, khwah chori ki ho, aur khwah zina aur chori karta ho."
.

Hum se Abu Yaman ne bayan kiya, kaha hum ko Shuaib ne khabar di, kaha hum se Abu-uz-Zinad ne bayan kiya, un se Aaraj ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya ke farishte aage peechhe zameen par aate jate rehte hain, kuch farishte raat ke hain aur kuch din ke aur ye sab fajr aur asar ki namaz mein jama ho jate hain. Phir wo farishte jo tumhare yahan raat mein rahe. Allah ke huzoor mein jate hain, Allah Ta'ala un se daryaft farmata hai.... halanke wo sab se zyada janne wala hai.... ke tum ne mere bandon ko kis haal mein chhoda, wo farishte arz karte hain ke jab hum ne unhein chhoda to wo (fajr ki) namaz parh rahe thay. Aur isi tarah jab hum un ke yahan gaye thay, jab bhi wo (asar) ki namaz parh rahe thay
.