Aur kisi shakhs ke liye ek kaman ke barabar Jannat mein jagah is poori dunya se behtar hai jis par sooraj tulu aur ghuroob hota hai
.

Hum se Ibrahim Bin-ul-Munzir ne bayan kiya, kaha hum se Muhammad Bin Falih ne bayan kiya, kaha hum se hamare baap ne bayan kiya, un se Hilal ne, un se Abdur Rahman Bin Abi Amra ne aur un se Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se ke sab se pehla giroh jo Jannat mein dakhil hoga, in ke chehre chaudhwin raat ke chand ki tarah roshan honge. Jo giroh is ke baad dakhil hoga un ke chehre aasman par moti ki tarah chamkne wale sitaron mein jo sab se zyada roshan sitara hota hai us jaise roshan honge, sab ke dil ek jaise honge na un mein bughz-o-fasad hoga aur na hasad, har jannati ki do hoor-een biwiyaan hongi, itni haseen ke un ki pindli ki haddi aur gosht ke andar ka goda bhi dekha ja sakega
.

Hum se Hajjaj Bin Minhal ne bayan kiya, kaha hum se Shuba ne bayan kiya, kaha ke mujhe Adi Bin Sabit ne khabar di, kaha ke mein ne Bara Bin Azib (Radi Allahu Anhu) se suna, unhon ne bayan kiya ke jab Rasul Allah (Sallallahu Alaihi Wasallam) ke (sahibzade) Ibrahim (Radi Allahu Anhu) ka intiqal hua, to Aap (Sallallahu Alaihi Wasallam) ne farmaya ke Jannat mein ise ek doodh pilane wali anna ke hawala kar diya gaya hai (jo in ko doodh pilati hai)
.

Hum se Abdul Aziz Bin Abdullah ne bayan kiya, kaha ke mujh se Imam Malik Bin Anas ne bayan kiya, un se Safwan Bin Sulaim ne, un se Ata Bin Yasar ne aur un se Abu Said Khudri (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Jannati log apne se buland kamre walon ko upar isi tarah dekheinge jaise chamakte sitare ko jo subah ke waqt reh gaya ho, aasman ke kinare purab ya pachham mein dekhte hain. In mein ek doosre se afzal hoga." Logon ne arz kiya: Ya Rasul Allah! Ye to anbiya ke mahal honge jinhein un ke siwa aur koi na pa sakega. Aap (Sallallahu Alaihi Wasallam) ne farmaya ke nahi, is zaat ki qasam! Jis ke hath mein meri jaan hai. Ye un logon ke liye honge jo Allah Ta'ala par iman laye aur anbiya ki tasdeeq ki
.

Aur Nabi Kareem (Sallallahu Alaihi Wasallam) ne farmaya ke jis ne (Allah ke raste mein kisi cheez ka) ek joda kharch kiya, ise Jannat ke darwaze se bulaya jaye ga is baab mein Ubada Bin Samit ne Nabi Kareem (Sallallahu Alaihi Wasallam) se riwayat ki hai
.

Hum se Said Bin Abi Maryam ne bayan kiya, kaha hum se Muhammad Bin Mutarrif ne bayan kiya, kaha ke mujh se Abu Hazim ne bayan kiya, un se Sahl Bin Saad Sa'idi (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jannat ke aath darwaze hain. In mein ek darwaze ka naam Rayyan hai. Jis se dakhil hone wale sirf roze dar honge."
.

Surah Al-Naba mein jo lafz "ghassaqan" aaya hai is ka maane peep lahu, Arab log kehte hain "ghassaqat ainuhu" is ki aankh beh rahi hai. "yaghsaqu-l-jarhu" zakham beh raha hai. "ghassaqun" aur "ghasaqun" dono ke ek hi maane hain. "ghisleenun" ka lafz jo Surah Al-Haqqa mein hai is ka maane "dahoonun" yaani kisi cheez ke dhone mein jaise aadmi ka zakham ho ya ont ka jo nikle "filenun" ke wazan par ghusl se mushtaq hai. Ikrima ne kaha "hasabu" ka lafz jo Surah Al-Anbiya mein hai maane "hatabu" yaani indhan ke hain. Ye lafz Habshi zaban ka hai. Doosron ne kaha, "hasiban" ka maane jo Surah Bani Israil mein hai tund hawa, aandhi aur "hasibun" is ko bhi kehte hain jo hawa uda kar laye. Isi se lafz "hasabu jahannama" nikla hai jo Surah Al-Anbiya mein hai. Yaani dozakh mein jhonke jayenge wo is ke indhan baneinge. Arab log kehte hain "hasaba fil ardhi" yaani wo zameen mein chala gaya. "hasabun" "hasba-u" se nikla hai. Yaani pathreeli kankariyan. "sadeedun" ka lafz jo Surah Ibrahim mein hai is ka maane peep aur lahu ke hain. "khabat" ka lafz jo Surah Bani Israil mein hai is ka maane bujh jaye gi. "tooroona" ka lafz jo Surah Al-Waqi'a mein hai is ka maane aag sulgate ho, kehte hain "auraitu" yaani mein ne aag sulgayi. "muqweena" ka lafz jo Surah Al-Waqi'a mein hai ye lafz "qaiyun" se nikla hai. "qaiyun" ujaad zameen ko kehte hain aur Abdullah Bin Abbas (Radi Allahu Anhuma) ne "sawa-il-jaheemi" ki tafseer mein kaha jo Surah Al-Saffat mein hai dozakh ka beechon beech ka hissa, "lashauban min hamimin" (jo isi surat mein hai) is ka maane ye hai ke dozakhiyon ke khane mein garam kholta hua pani milaya jaye ga. Alfaz "zafeer" aur "shaheeq" jo Surah Hud mein hain in ke maane awaz se rona aur aahista se rona, lafz "wirdan" jo Surah Maryam mein hai yaani pyaase, lafz "ghaiya" jo isi surat mein hai. Yaani tota nuqsan, aur Mujahid ne kaha lafz "yusjaroona" jo Surah Momin mein hai, yaani aag ka indhan baneinge. Lafz "nuhaasun" jo Surah Al-Rahman mein hai is ka maane tanba jo pighla kar un ke saron par dala jaye ga. Lafz "zooqoo" jo kai suraton mein aaya hai is ka maane ye hai ke azab ko dekho, munh se chakhna murad nahi hai. Lafz "maarijun" jo Surah Al-Rahman mein hai yaani khalis aag. Arab log kehte hain, "maraja-l-ameeru r'aiyyatahu" yaani badshah apni r'aiyyat ko chhod baitha, wo ek doosre par zulm kar rahe hain. Lafz "mareejun" jo Surah Qaaf mein hai, yaani mila hua, mushtaba. Kehte hain "maraja amru-n-nasi ikhtalata" yaani logon ka muamla sab khalt malt ho gaya. Lafz "maraja-l-bahrayni" jo Surah Al-Rahman mein hai "marajat dabbatuka" se nikla hai, yaani tu ne apna janwar chhod diya hai
.

Hum se Abu-ul-Waleed ne bayan kiya, kaha hum se Shuba ne bayan kiya, un se Muhajir Abu-ul-Hasan ne bayan kiya ke mein ne Zaid Bin Wahb se suna, unhon ne bayan kiya ke mein ne Abu Zarr (Radi Allahu Anhu) se suna wo bayan karte thay ke Nabi Kareem (Sallallahu Alaihi Wasallam) ek safar mein thay (jab Bilal Radi Allahu Anhu zuhar ki azan dene utthe to) Aap (Sallallahu Alaihi Wasallam) ne farmaya ke waqt zara thanda ho lene do, phir dobara (jab wo azan ke liye utthe to phir) Aap (Sallallahu Alaihi Wasallam) ne unhein yahi hukm diya ke waqt aur thanda ho lene do, yahan tak ke teelon ke neeche se sayah dhal gaya, is ke baad Aap (Sallallahu Alaihi Wasallam) ne farmaya ke namaz thande waqt auqat mein parha karo, kyunke garmi ki shiddat jahannum ki bhaap se paida hoti hai
.

Hum se Muhammad Bin Yusuf ne bayan kiya, kaha hum se Sufyan Thauri ne bayan kiya, un se Aamash ne, un se Zakwan ne aur un se Abu Said Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Namaz thande waqt mein parha karo, kyunke garmi ki shiddat jahannum ki bhaap se paida hoti hai."
.

Hum se Abu-ul-Yaman ne bayan kiya ke hum ko Shuaib ne khabar di, un se Zuhri ne bayan kiya, unhon ne kaha ke mujh se Abu Salama Bin Abdur Rahman ne bayan kiya aur unhon ne Abu Hurairah (Radi Allahu Anhu) se suna, aap bayan karte thay ke Rasul Allah (Sallallahu Alaihi Wasallam) ne farmaya "Jahannum ne apne Rabb ke huzoor mein shikayat ki aur kaha ke mere Rabb! Mere hi baaz hisse ne baaz ko kha liya hai. Allah Ta'ala ne ise do sanson ki ijazat di, ek saans jade mein aur ek garmi mein. Tum intihayi garmi aur intihayi sardi jo in mausamon mein dekhte ho, is ka yahi sabab hai."
.