Hum se Abdah Bin Abdullah ne bayan kiya, kaha hum ko Yahya Bin Adam ne khabar di, unhein Israeel ne, unhein Mansoor ne, unhein Ibrahim ne, unhein Alqama ne aur un se Abdullah Bin Masood (Radi Allahu Anhu) ne bayan kiya ke (maqam-e-Mina mein) hum Nabi Kareem (Sallallahu Alaihi Wasallam) ke sath ek ghar mein baithe hue thay ke ayat "Wal-mursalate urfan" nazil hui, abhi hum Aap ki zaban-e-mubarak se ise sun hi rahe thay ke ek bill mein se ek saanp nikla. Hum ise maarne ke liye jhapte, lekin wo bhag gaya aur apne bill mein dakhil ho gaya, (Aap Sallallahu Alaihi Wasallam ne) is par farmaya "Tumhare hath se wo isi tarah bach nikla jaise tum is ke shar se bach gaye" aur Yahya ne Israeel se riwayat kiya hai, un se Aamash ne, un se Ibrahim ne, un se Alqama ne aur un se Abdullah (Radi Allahu Anhu) ne isi tarah riwayat kiya aur kaha ke Nabi Kareem (Sallallahu Alaihi Wasallam) ki zaban-e-mubarak se is surat ko taza-ba-taza sun rahe thay aur Israeel ke sath is hadees ko Abu Awana ne Mugheera se riwayat kiya aur Hafs Bin Ghiyath aur Abu Muawiyah aur Sulaiman Bin Qaram ne bhi Aamash se bayan kiya, un se Ibrahim ne, un se Aswad ne aur un se Abdullah Bin Masood (Radi Allahu Anhu)
.

Hum se Nasr Bin Ali ne bayan kiya, unhon ne kaha hum ko Abd-ul-A'la ne khabar di, unhon ne kaha hum se Ubaidullah Bin Umar ne bayan kiya, un se Nafi ne aur un se Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) ne bayan kiya "Ek aurat ek billi ke sabab se dozakh mein gayi, us ne billi ko baandh kar rakha na to ise khana diya aur na hi chhoda ke wo keede makode kha kar apni jaan bacha leti." Abd-ul-A'la ne kaha aur hum se Ubaidullah ne bayan kiya, un se Said Maqbari ne aur un se Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se isi tarah riwayat kiya
.

Hum se Ismail Bin Abi Uwais ne bayan kiya, kaha ke mujh se Imam Maalik ne bayan kiya, un se Abu-ul-Zinad ne, un se Aaraj ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Giroh-e-anbiya mein se ek Nabi ek darakht ke saye mein utre, wahan unhein kisi ek chiyonti ne kaat liya. To unhon ne hukm diya, un ka sara saman darakht ke tale se utha liya gaya. Phir chiyontiyon ka sara chhatta jalwa diya. Is par Allah Ta'ala ne un par wahi bheji ke tum ko to ek hi chiyonti ne kaata tha, faqat usi ko jalana tha."
.

Hum se Khalid Bin Makhlad ne bayan kiya, unhon ne kaha hum se Sulaiman Bin Bilal ne bayan kiya, unhon ne kaha ke mujh se Utba Bin Muslim ne bayan kiya, unhon ne kaha ke mujhe Ubaid Bin Hunain ne khabar di, unhon ne kaha ke mein ne Abu Hurairah (Radi Allahu Anhu) se suna, wo bayan karte thay ke Nabi Kareem (Sallallahu Alaihi Wasallam) ne farmaya "Jab makkhi kisi ke peene (ya khane ki cheez) mein pad jaye to ise dubo de aur phir nikal kar phaink de. Kyunke is ke ek parr mein bimari hai aur is ke doosre (parr) mein shifa hoti hai."
.

Hum se Hasan Bin Sabbah ne bayan kiya, kaha hum se Ishaq Azraq ne bayan kiya, kaha hum se Auf ne bayan kiya, un se Hasan aur Ibn Sireen ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Ek fahisha aurat sirf is wajah se bakhshi gayi ke wo ek kutte ke qareeb se guzar rahi thi, jo ek kunwein ke qareeb khada pyasa haanp raha tha. Aisa maloom hota tha ke wo pyas ki shiddat se abhi mar jaye ga. Is aurat ne apna moza nikala aur is mein apna dupatta baandh kar pani nikala aur us kutte ko pila diya, to is ki bakhshish isi (naiki) ki wajah se ho gayi."
.

Hum se Ali Bin Abdullah ne bayan kiya, kaha hum se Sufyan ne bayan kiya, kaha ke mein ne Zuhri se is hadees ko is tarah yaad rakha ke mujh ko koi shak hi nahi, jaise is mein shak nahi ke tu is jagah maujood hai. (Unhon ne bayan kiya ke) mujhe Ubaidullah ne khabar di, unhein Ibn Abbas (Radi Allahu Anhuma) ne aur unhein Abu Talha (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "(Rehmat ke) farishte in gharon mein nahi dakhil hote jin mein kutta ya (jandar ki) tasveer ho."
.

Hum se Abdullah Bin Yusuf ne bayan kiya, unhon ne kaha hum ko Imam Maalik ne khabar di, unhein Nafi ne aur unhein Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) ne kutton ko maarne ka hukm farmaya hai
.

Hum se Musa Bin Ismail ne bayan kiya, kaha hum se Hammam ne bayan kiya, un se Yahya ne bayan kiya, un se Abu Salama ne bayan kiya aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jo shakhs kutta paale, is ke amal-e-naik mein se rozana ek qiraat (sawab) kam kar diya jata hai, khet ke liye ya maweshi ke liye jo kutte paale jayein wo is se alag hain."
.

Hum se Abdullah Bin Muslima ne bayan kiya, kaha hum se Sulaiman ne bayan kiya, kaha ke mujhe Yazid Bin Khaseefa ne khabar di, kaha ke mujhe Sa'ib Bin Yazid ne khabar di, unhon ne Sufyan Bin Abi Zuhair Shanwi (Radi Allahu Anhu) se suna, unhon ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) ne farmaya "Jis ne koi kutta paala, na to paalne wale ka maqsad khet ki hifazat hai aur na maweshiyon ki, to rozana is ke naik amal mein se ek qiraat (sawab) ki kami ho jati hai." Sa'ib ne pucha, kya tum ne khud ye hadees Rasul Allah (Sallallahu Alaihi Wasallam) se suni thi? Unhon ne kaha, haan! Is qibla ke Rabb ki qasam (mein ne khud is hadees ko Rasul Allah Sallallahu Alaihi Wasallam se suna hai)
.