Hum se Musaddad ne bayan kiya, kaha hum se Yahya ne bayan kiya, un se Shuba ne, un se Abul Tayyah ne aur un se Anas Bin Malik (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Ghore ki peshani mein barkat bandhi hui hai."
.

Nabi Kareem (Sallallahu Alaihi Wasallam) ka irshad hai "Ghore ki peshani mein qayamat tak khair o barkat qaim rahe gi."
.

Hum se Abu Nuaym ne bayan kiya, kaha hum se Zakariya ne bayan kiya, kaha hum se Aamir ne, kaha hum se Urwah Bariqi (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Khair o barkat qayamat tak ghore ki peshani ke sath bandhi rahe gi yani aakhirat mein sawab aur duniya mein maal-e-ghanimat milta rahe ga."
.

Hum se Ali Bin Hafs ne bayan kiya, kaha hum se Imam Abdullah Bin Al-Mubarak ne bayan kiya, kaha mujh ko Talha Bin Abi Saeed ne khabar di, kaha ke mein ne Saeed Maqburi se suna, wo bayan karte thay ke unhon ne Abu Hurairah (Radi Allahu Anhu) se suna, unhon ne bayan kiya ke Nabi Kareem (Sallallahu Alaihi Wasallam) ne farmaya "Jis shakhs ne Allah Ta'ala par iman ke sath aur us ke wada-e-sawab ko jaante hue Allah ke raste mein (jihad ke liye) ghora pala to us ghore ka khana, pina aur us ka peshab o leed sab qayamat ke din is ki tarazu mein ho ga aur sab par us ko sawab mile ga."
.

Hum se Muhammad Bin Abi Bakr ne bayan kiya, kaha hum se Fudail Bin Sulaiman ne bayan kiya, un se Abu Hazim ne, un se Abdullah Bin Abi Qatada ne aur un se un ke baap ne ke wo Nabi Kareem (Sallallahu Alaihi Wasallam) ke sath (Sulh-e-Hudaibiyah ke mauqe par) nikle. Abu Qatada (Radi Allahu Anhu) apne chand sathiyon ke sath peeche reh gaye thay. Un ke doosre tamam sathi to muhrim thay lekin unhon ne khud ihram nahi bandha tha. Un ke sathiyon ne ek gor-khar dekha. Abu Qatada (Radi Allahu Anhu) ke is par nazar parne se pehle un hazrat ki nazar agarche is par pari thi lekin unhon ne ise chor diya tha lekin Abu Qatada (Radi Allahu Anhu) ise dekhte hi apne ghore par sawar hue, un ke ghore ka naam Jarada tha, is ke baad unhon ne sathiyon se kaha ke koi un ka kora utha kar unhein dede (jise liye baghair wo sawar ho gaye thay) un logon ne is se inkar kiya (muhrim hone ki wajah se) is liye unhon ne khud hi le liya aur gor-khar par hamla kar ke us ki kounchein kaat dein unhon ne khud bhi is ka gosht khaya aur doosre sathiyon ne bhi khaya phir Nabi Kareem (Sallallahu Alaihi Wasallam) ki khidmat mein hazir hue. Jab ye log Aap (Sallallahu Alaihi Wasallam) ke sath ho liye Aap (Sallallahu Alaihi Wasallam) ne poocha ke kya is ka gosht tumhare paas bacha hua baqi hai? Abu Qatada ne kaha ke haan is ki ek ran hamare sath baqi hai. Chunancha Nabi Kareem (Sallallahu Alaihi Wasallam) ne bhi wo gosht khaya. Ghore ka naam Jarada tha, (is se baab ka matlab sabit hua)
.

Hum se Ali Bin Abdullah Bin Jafar ne bayan kiya, kaha hum se Ma'n Bin Isa ne bayan kiya, kaha hum se Ubayyi Bin Abbas Bin Sahl ne bayan kiya, un se un ke walid ne un ke dada (Sahl Bin Saad Saidi Radi Allahu Anhu) se bayan kiya ke hamare bagh mein Nabi Kareem (Sallallahu Alaihi Wasallam) ka ek ghora rehta tha jis ka naam Luhaif tha
.

Hum se Ishaq Bin Ibrahim ne bayan kiya, unhon ne Yahya Bin Adam se suna, unhon ne kaha ke hum se Abul Hawas ne bayan kiya, un se Abu Ishaq ne, un se Amr Bin Maimoon ne aur un se Muaz (Radi Allahu Anhu) ne bayan kiya ke Nabi Kareem (Sallallahu Alaihi Wasallam) jis gadhe par sawar thay, mein is par Aap ke peeche baitha hua tha. Is gadhe ka naam Ufair tha. Aap (Sallallahu Alaihi Wasallam) ne farmaya "Ae Muaz! Kya tumhein maloom hai ke Allah Ta'ala ka haq apne bandon par kya hai? Aur bandon ka haq Allah Ta'ala par kya hai?" Mein ne arz kiya Allah aur us ke Rasul hi ziyada jaante hain. Aap (Sallallahu Alaihi Wasallam) ne farmaya "Allah ka haq apne bandon par ye hai ke us ki ibadat karein aur us ke sath kisi ko shareek na thahrayein aur bandon ka haq Allah Ta'ala par ye hai ke jo banda Allah ke sath kisi ko shareek na thahrata ho Allah use azab na de." Mein ne kaha ya Rasul Allah! Kya mein is ki logon ko basharat na de doon? Aap (Sallallahu Alaihi Wasallam) ne farmaya "Logon ko is ki basharat na do warna wo khali aitemad kar baithein ge. (Aur naik aamal se ghafil ho jayein ge)."
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya ke mein ne Qatada se suna ke Anas Bin Malik (Radi Allahu Anhu) ne bayan kiya (ek raat) Madinah mein kuch khatra sa mehsoos hua to Nabi Kareem (Sallallahu Alaihi Wasallam) ne hamara (Abu Talha Radi Allahu Anhu ka jo Aap ke azeez thay) ghora mangwaya, ghore ka naam Mandub tha. Phir Aap (Sallallahu Alaihi Wasallam) ne farmaya "Khatra to hum ne koi nahi dekha albatta is ghore ko hum ne samundar paya hai."
.

Hum se Abul Yaman ne bayan kiya, kaha hum ko Shuaib ne khabar di, un se Zuhri ne bayan kiya, unhein Salim Bin Abdullah ne khabar di aur un se عبداللہ Bin Umar (Radi Allahu Anhuma) ne bayan kiya ke mein ne Nabi Kareem (Sallallahu Alaihi Wasallam) se suna Aap (Sallallahu Alaihi Wasallam) ne farmaya tha "Nahoosat sirf teen cheezon mein hoti hai. Ghore mein, aurat mein aur ghar mein."
.

Hum se Abdullah Bin Maslama ne bayan kiya, unhon ne Imam Malik se riwayat kiya, unhon ne Abu Hazim Bin Dinar se, unhon ne Sahl Bin Saad Saidi (Radi Allahu Anhu) se riwayat kiya ke Rasul Allah (Sallallahu Alaihi Wasallam) ne farmaya "Nahoosat agar hoti to wo ghore, aurat aur makan mein hoti."
.