Hum se Qutaiba Bin Saeed ne bayan kiya ‘ unhon ne kaha hum se Jarir ne bayan kiya. In se Mansur ne bayan kiya ‘ in se Abu Wail ne bayan kiya aur in se Abu Musa Ashari (Radi Allahu Anhu) ne bayan kiya ‘ unhon ne kaha ke Rasul Allah (Sallallahu Alaihi Wasallam) ne farmaya ” «eany» yani qaidi ko chharaya karo ‘ bhooke ko khilaya karo ‘ bimar ki iyadat karo."
.

Hum se Ahmad Bin Yunus ne bayan kiya, kaha hum se Zuhair ne bayan kiya, un se Mutarrif ne bayan kiya, un se Aamir ne bayan kiya, aur un se Abu Juhaifa (Radi Allahu Anhu) ne bayan kiya ke mein ne Ali (Radi Allahu Anhu) se pucha, Aap hazrat (Ahl-e-Bait) ke paas Kitab Allah ke siwa aur bhi koi wahi hai? Aap ne is ka jawab diya. Is zaat ki qasam! Jis ne dane ko (zameen) cheer kar (nikala) aur jis ne rooh ko paida kiya, mujhe to koi aisi wahi maloom nahi (jo Quran mein na ho) albatta samajh ek doosri cheez hai, jo Allah kisi bande ko Quran mein ata farmaye (Quran se tarah tarah ke matalib nikale) ya jo is waraq mein hai. Mein ne pucha, is waraq mein kya likha hai? Unhon ne batlaya ke deeyat ke ahkaam aur qaidi ka chudana aur Musalman ka kafir ke badle mein na mara jana (ye masail is waraq mein likhe hue hain aur bas)
.

Hum se Ismail Bin Abi Uwais ne bayan kiya, kaha hum se Ismail Bin Ibrahim Bin Uqba ne bayan kiya, un se Musa Bin Uqba ne, un se Ibn Shihab ne bayan kiya aur un se Anas Bin Malik (Radi Allahu Anhu) ne bayan kiya ke Ansar ke baaz logon ne Rasul Allah (Sallallahu Alaihi Wasallam) se ijazat chahi aur arz kiya: Ya Rasul Allah! Aap humein is ki ijazat de dein ke hum apne bhanje Abbas Bin Abdul Muttalib ka fidya maaf kar dein, lekin Aap (Sallallahu Alaihi Wasallam) ne farmaya un ke fidye mein se ek dirham bhi na chhodo
.

Aur Ibrahim Bin Tahman ne bayan kiya, un se Abdul Aziz Bin Suhaib ne aur un se Anas Bin Malik (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ki khidmat mein Bahrain ka khiraj aya to Abbas (Radi Allahu Anhu) khidmat-e-Nabwi mein hazir hue aur arz kiya: Ya Rasul Allah! Is mal se mujhe bhi dijiye kyunke (Badr ke mauqa par) mein ne apna aur Aqeel dono ka fidya ada kiya tha. Aap (Sallallahu Alaihi Wasallam) ne farmaya "Phir aap le lein" chunanche Aap (Sallallahu Alaihi Wasallam) ne unhein un ke kapde mein naqdi ko bandhwa diya
.

Mujh se Mahmud Bin Ghaylan ne bayan kiya, kaha hum se Abdur Razzaq ne bayan kiya, kaha hum ko Ma'mar ne khabar di, unhein Zuhri ne, unhein Muhammad Bin Jubair ne, unhein un ke baap (Jubair Bin Mut'im Radi Allahu Anhu) ne wo Badr ke qaidiyon ko chudane Nabi Kareem (Sallallahu Alaihi Wasallam) ke paas aaye (wo abhi Islam nahi laye thay) unhon ne bayan kiya ke mein ne suna ke Nabi Kareem (Sallallahu Alaihi Wasallam) ne Maghrib ki namaz mein Surah At-Tur parhi
.

Hum se Abu Nuaim ne bayan kiya, kaha hum se Abu Umais Utbah Bin Abdullah ne bayan kiya, un se Iyas Bin Salama Bin Akwa (Radi Allahu Anhu) ne, un se un ke baap (Salama Radi Allahu Anhu) ne bayan kiya ke Nabi Kareem (Sallallahu Alaihi Wasallam) ke paas safar mein mushrikon ka ek jasoos aya. (Aap Sallallahu Alaihi Wasallam Ghazwa Hawazin ke liye tashreef le ja rahe thay) wo jasoos Sahaba ki jamaat mein baitha, baatein keen, phir wo wapas chala gaya, to Aap (Sallallahu Alaihi Wasallam) ne farmaya ke ise talash kar ke maar dalo. Chunanche ise (Salama Bin Akwa Radi Allahu Anhu ne) qatl kar diya, aur Aap (Sallallahu Alaihi Wasallam) ne is ke hathyar aur auzar qatl karne wale ko dilwa diye
.

Hum se Musa Bin Ismail ne bayan kiya, kaha hum se Abu Awana ne bayan kiya, unhein Husain Bin Abdur Rahman ne, un se Amr Bin Maimun ne ke Umar (Radi Allahu Anhu) ne (wafat se thodi der pehle) farmaya ke mein apne baad aane wale Khalifa ko is ki wasiyat karta hoon ke Allah Ta'ala aur us ke Rasul (Sallallahu Alaihi Wasallam) ka (Zimmiyon se) jo ahd hai us ko wo poora kare aur ye ke un ki himayat mein un ke dushmanon se jung kare aur un ki taqat se zyada koi bojh un par na dala jaye
.

(Is baab mein hadees nahi hai)
.

Hum se Qabisa ne bayan kiya, kaha hum se Sufyan Bin Uyaina ne bayan kiya, un se Sulaiman Ahwal ne, un se Said Bin Jubair ne aur un se Ibn Abbas (Radi Allahu Anhuma) ne bayan kiya ke Jumerat ke din, aur maloom hai Jumerat ka din kya hai? Phir aap itna roye ke kankariyan tak bheeg gayeen. Aakhir aap ne kaha ke Rasul Allah (Sallallahu Alaihi Wasallam) ki bimari mein shiddat isi Jumerat ke din hui thi. To Aap (Sallallahu Alaihi Wasallam) ne Sahaba se farmaya ke qalam dawat lao, taake mein tumhare liye ek aisi kitab likhwa jaoon ke tum (mere baad is par chalte raho to) kabhi gumrah na ho sako is par Sahaba mein ikhtilaf ho gaya. Aap (Sallallahu Alaihi Wasallam) ne farmaya ke Nabi ke samne jhagadna munasib nahi hai. Sahaba ne kaha ke Nabi Kareem (Sallallahu Alaihi Wasallam) (bimari ki shiddat se) hain. Aap (Sallallahu Alaihi Wasallam) ne farmaya ke accha, ab mujhe meri halat par chhod do, mein jis haal mein is waqt hoon wo is se behtar hai jo tum karana chahte ho. Aakhir Aap (Sallallahu Alaihi Wasallam) ne apni wafat ke waqt teen wasiyatain farmayi theen. Ye Mushrikeen ko Jazeerah Arab se bahar kar dena. Doosre ye ke wafood se aisa hi sulook karte rehna, jaise mein karta raha (un ki khatirdari ziyafat waghera) aur teesri hidayat mein bhool gaya. Aur Yaqub Bin Muhammad ne bayan kiya ke mein ne Mugheera Bin Abdur Rahman se Jazeerah Arab ke bare mein pucha to unhon ne farmaya kaha Makkah, Madinah, Yamama aur Yemen (ka naam Jazeerah Arab) hai. Aur Yaqub ne kaha ke Araj se Tihama shuru hota hai (Araj Makkah aur Madinah ke raste mein ek manzil ka naam hai)
.

Hum se Yahya Bin Bukair ne bayan kiya, kaha hum se Laith Bin Saad ne bayan kiya, un se Aqeel ne, un se Ibn Shihab ne, un se Salim Bin Abdullah ne aur un se Abdullah Bin Umar (Radi Allahu Anhuma) ne bayan kiya ke Umar (Radi Allahu Anhu) ne dekha ke bazar mein ek reshmi joda farokht ho raha hai. Phir ise wo Rasul Allah (Sallallahu Alaihi Wasallam) ki khidmat mein laye aur arz kiya Ya Rasul Allah! Ye joda Aap khareed lein aur Eid aur wafood ki mulaqat par is se apni zebaish farmaya karein. Aap (Sallallahu Alaihi Wasallam) ne farmaya ye un logon ka libas hai jin ka (Aakhirat mein) koi hissa nahi ya (Aap ne ye jumla farmaya) ise to wahi log pehen sakte hain jin ka (Aakhirat mein) koi hissa nahi. Phir Allah ne jitne din chaha Umar (Radi Allahu Anhu) khamosh rahe. Phir jab ek din Rasul Allah (Sallallahu Alaihi Wasallam) ne un ke paas ek reshmi jubba bheja to Umar (Radi Allahu Anhu) ise le kar khidmat-e-Nabwi mein hazir hue aur arz kiya: Ya Rasul Allah! Aap ne to ye farmaya tha ke ye un ka libas hai jin ka (Aakhirat mein) koi hissa nahi, ya (Umar Radi Allahu Anhu ne Aap ki baat is tarah doharayi ke) ise wahi log pehen sakte hain jin ka (Aakhirat mein) koi hissa nahi. Aur phir Aap ne yahi mere paas irsal farma diya. Is par Aap (Sallallahu Alaihi Wasallam) ne farmaya ke (mere bhejne ka maqsad ye tha ke) tum ise bech lo, ya (farmaya ke) is se apni koi zaroorat poori kar sako
.