Hum se Sadaqah Bin Fazl ne bayan kiya ‘ kaha hum ko Ibn Uyainah ne khabar di ‘ unhein Amr ne ‘ unhon ne Jabir Bin Abdullah (Radi Allahu Anhuma) se suna ‘ aap ne bayan kiya ke Nabi Kareem (Sallallahu Alaihi Wasallam) ne farmaya tha "Jung to ek chal-baazi ka naam hai."
.

Hum se Qutaiba Bin Saeed ne bayan kiya ‘ kaha hum se Sufyan Bin Uyainah ne ‘ in se Amr Bin Dinar ne aur in se Jabir Bin Abdullah (Radi Allahu Anhuma) ne ke Rasul Allah (Sallallahu Alaihi Wasallam) ne farmaya "Kaab Bin Ashraf ka kaam kaun tamam kare ga? Wo Allah aur us ke Rasul ko bahut aziyatein pahuncha chuka hai." Muhammad Bin Muslima (Radi Allahu Anhu) ne arz kiya: ya Rasul Allah! Kya Aap mujhe ijazat bakhsh dein ge ke mein ise qatl kar aaun? Aap (Sallallahu Alaihi Wasallam) ne farmaya "Haan." Rawi ne bayan kiya ke phir Muhammad Bin Muslima Kaab yahudi ke paas aaye aur us se kehne lage ke Nabi Kareem (Sallallahu Alaihi Wasallam) ne to humein thaka diya ‘ aur hum se Aap zakat mangte hain. Kaab ne kaha ke qasam Allah ki! Abhi kya hai abhi aur museebat mein paro ge. Muhammad Bin Muslima (Radi Allahu Anhu) is par kehne lage ke baat ye hai ke hum ne in ki pairwi kar li hai. Is liye is waqt tak is ka sath chorna hum munasib bhi nahi samajhte jab tak in ki dawat ka koi anjam hamare samne na aa jaye. Gharaz Muhammad Bin Muslima (Radi Allahu Anhu) is se isi tarah batein karte rahe. Aakhir mauqa pa kar ise qatl kar diya
.

Hum se Abdullah Bin Muhammad ne bayan kiya ‘ kaha hum se Sufyan Bin Uyainah ne bayan kiya ‘ in se Amr Bin Dinar ne aur in se Jabir Bin Abdullah Ansari (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Kaab Bin Ashraf ke liye kaun himmat karta hai?" Muhammad Bin Muslima (Radi Allahu Anhu) ne kaha kya mein ise qatl kar doon? Aap (Sallallahu Alaihi Wasallam) ne farmaya "Haan!" Unhon ne arz kiya ke phir Aap mujhe ijazat dein (ke mein jo chahun jhoot sach kahun) Aap (Sallallahu Alaihi Wasallam) ne farmaya "Meri taraf se is ki ijazat hai."
.

Laith Bin Saad ne bayan kiya ‘ in se Aqeel ne bayan kiya ‘ in se Ibn Shihab ne ‘ in se Salim Bin Abdullah aur in se Abdullah Bin Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) Ibn Sayyad (yahudi bacche) ki taraf ja rahe thay. Aap (Sallallahu Alaihi Wasallam) ke sath Ubayy Bin Kaab (Radi Allahu Anhu) bhi thay (Ibn Sayyad ke ajeeb o ghareeb ahwal ke mutalliq Aap Sallallahu Alaihi Wasallam khud tahqeeq karna chahte thay) Aap (Sallallahu Alaihi Wasallam) ko itla di gayi thi ke Ibn Sayyad is waqt khajooron ki aar mein maujood hai. Jab Aap (Sallallahu Alaihi Wasallam) wahan pahunche to shakhon ki aar mein chalne lage. (taake wo Aap ko dekh na sake) Ibn Sayyad is waqt ek chadar ore hue chupke chupke kuch gunguna raha tha ‘ is ki maan ne Aap (Sallallahu Alaihi Wasallam) ko dekh liya aur pukar utthi ke ae Ibn Sayyad! Ye Muhammad (Sallallahu Alaihi Wasallam) aa pahunche ‘ wo chounk uttha ‘ Aap (Sallallahu Alaihi Wasallam) ne farmaya ke agar ye is ki khabar na karti to wo kholta (yani is ki baatoon se is ka haal khul jata)
.

Is baab mein Sahl aur Anas (Radi Allahu Anhuma) ne ahadees Nabi Kareem (Sallallahu Alaihi Wasallam) se riwayat ki hain aur Yazid Bin Abi Ubaid ne Salama Bin Akwa (Radi Allahu Anhu) se bhi is baab mein ek hadees riwayat ki hai
.

Hum se Musaddad Bin Masrahad ne bayan kiya ‘ kaha hum se Abul Ahwas ne bayan kiya ‘ in se Abu Ishaq ne aur in se Bara Bin Azib (Radi Allahu Anhu) ne bayan kiya ke mein ne dekha ke Ghazwah-e-Ahzab mein (khandaq khodte hue) Rasul Allah (Sallallahu Alaihi Wasallam) khud mitti utha rahe thay. Yahan tak ke seena mubarak ke baal mitti se att gaye thay. Aap (Sallallahu Alaihi Wasallam) ke (jism mubarak par) baal bahut ghane thay. Is waqt Aap (Sallallahu Alaihi Wasallam) Abdullah Bin Rawahah (Radi Allahu Anhu) ka ye sher parh rahe thay "Ae Allah! Agar teri hidayat na hoti to hum kabhi seedha rasta na pate ‘ na sadaqah kar sakte aur na namaz parhte. Ab to, ya Allah! Hamare dilon ko sukoon aur itminan ata farma ‘ aur agar (dushmanon se mud-bher ho jaye to humein sabit qadam rakh ‘ dushmanon ne hamare upar ziyadati ki hai. Jab bhi wo hum ko fitna fasad mein mubtala karna chahte hain to hum inkar karte hain." Aap ye sher buland awaz se parh rahe thay
.

Hum se Muhammad Bin Abdullah Bin Numair ne bayan kiya ‘ kaha hum se Abdullah Bin Idrees ne bayan kiya ‘ in se Ismail Bin Abi Khalid ne ‘ in se Qais Bin Abi Hazim ne aur in se Jarir Bin Abdullah Bajali (Radi Allahu Anhu) ne bayan kiya ke jab se mein Islam laya ‘ Rasul Allah (Sallallahu Alaihi Wasallam) ne (parda ke sath) mujhe (apne ghar mein dakhil hone se) kabhi nahi roka aur jab bhi Aap mujh ko dekhte ‘ khushi se Aap muskurane lagte
.

Ek dafa mein ne Aap (Sallallahu Alaihi Wasallam) ki khidmat mein shikayat ki ke mein ghore ki peeth par acchi tarah nahi jam pata hoon ‘ to Aap (Sallallahu Alaihi Wasallam) ne mere seene par apna dast-e-mubarak mara ‘ aur dua ki «allhm sbth wajelh hadya mhdya» "Ae Allah! Ise ghore par jama de aur doosron ko seedha rasta batane wala bana de aur khud ise bhi seedhe raste par qaim rakh."
.

Hum se Ali Bin Abdullah Madini ne bayan kiya ‘ kaha hum se Sufyan Bin Uyainah ne bayan kiya ‘ kaha hum se Abu Hazim ne bayan kiya ‘ kaha ke Sahl Bin Saad Saidi (Radi Allahu Anhu) se shagirdon ne poocha ke (jung-e-Uhud mein) Nabi Kareem (Sallallahu Alaihi Wasallam) ke zakhmon ka ilaj kis dawa se kiya gaya tha? Sahl ne is par kaha ke ab sahaba mein koi shakhs bhi aisa zinda maujood nahi hai jo is ke bare mein mujh se ziyada janta ho. Ali (Radi Allahu Anhu) apni dhaal mein pani bhar-bhar kar la rahe thay aur Sayyida Fatima (Radi Allahu Anha) Aap (Sallallahu Alaihi Wasallam) ke chehre se khoon ko dho rahi thiin. Aur ek boriya jalaya gaya tha aur Aap ke zakhmon mein isi ki raakh ko bhar diya gaya tha
.

Aur Allah Ta'ala ne (Surah Al-Anfal mein) farmaya «wla tnazew ftfshlw wtzhb ryhkm» "Aapas mein phoot na paida karo ke is se tum buzdil ho jao ge aur tumhari hawa ukharr jaye gi." Qatada ne kaha ke (aayat mein) «ryh» se murad larayi se
.