Hum se Muhammad Bin Bashar ne bayan kiya, kaha hum se Muhammad Bin Abi Adi aur Sahl Bin Yusuf ne bayan kiya, un se Said Bin Abi Arubah ne, un se Qatada ne aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ki khidmat mein Rial, Zakwan, Usaiya aur Banu Lihyan qabail ke kuch log aaye aur yaqeen dilaya ke wo log Islam la chuke hain aur unhon ne apni kafir qaum ke muqabil imdad aur taleem-o-tableegh ke liye Aap se madad chahi. To Nabi Kareem (Sallallahu Alaihi Wasallam) ne sattar Ansariyion ko un ke sath kar diya. Anas (Radi Allahu Anhu) ne bayan kiya, ke hum unhein Qari kaha karte thay. Wo log din mein jangal se lakriyan jama karte aur raat mein namaz parhte rehte. Ye hazrat in qabile walon ke sath chale gaye, lekin jab Bi'r Mauna par pahunche to unhein qabile walon ne in Sahaba ke sath dagha ki aur unhein shaheed kar dala. Nabi Kareem (Sallallahu Alaihi Wasallam) ne ek mahina tak (namaz mein) Qunoot parhi aur Rial-o-Zakwan aur Banu Lihyan ke liye bad-dua karte rahe. Qatada ne kaha ke hum se Anas (Radi Allahu Anhu) ne kaha ke (in shuhada ke bare mein) Quran Majeed mein hum ye ayat yun parhte rahe "Haan! Hamari qaum (Muslim) ko bata do ke hum apne Rabb se ja mile. Aur wo hum se razi ho gaya hai aur humein bhi us ne khush kiya hai." Phir ye ayat mansookh ho gayi thi
.

Hum se Muhammad Bin Abdur Raheem ne bayan kiya, kaha hum se Rauh Bin Ubadah ne bayan kiya, un se Said ne bayan kiya, un se Qatada ne bayan kiya, kaha ke hum se Anas Bin Malik (Radi Allahu Anhu) ne Abu Talha (Radi Allahu Anhu) se bayan kiya ke Nabi Kareem (Sallallahu Alaihi Wasallam) ko jab kisi qaum par fatah hasil hoti, to maidan-e-jung mein teen raat qayam farmate. Rauh Bin Ubadah ke sath is hadees ko Maaz aur Abd-ul-A'la ne bhi riwayat kiya. Dono ne kaha hum se Said ne bayan kiya unhon ne Qatada se, unhon ne Anas se, unhon ne Abu Talha se unhon ne Aap (Sallallahu Alaihi Wasallam) se
.

Aur Rafi Bin Khadij (Radi Allahu Anhu) ne kaha ke hum Zul Hulaifa mein Nabi Kareem (Sallallahu Alaihi Wasallam) ke sath thay, hum ko bakriyan aur ont ghaneemat mein mile thay aur Nabi Kareem (Sallallahu Alaihi Wasallam) ne das bakriyon ko ek ont ke barabar qarar de kar taqseem ki thi
.

Hum se Hadba Bin Khalid ne bayan kiya, kaha hum se Hammam Bin Yahya ne bayan kiya, un se Qatada ne aur unhein Anas (Radi Allahu Anhu) ne khabar di, Aap ne bayan kiya ke Nabi Kareem (Sallallahu Alaihi Wasallam) ne maqam-e-Jarana se, jahan Aap (Sallallahu Alaihi Wasallam) ne jung-e-Hunain ka mal-e-ghaneemat taqseem kiya tha, Umrah ka ihram bandha tha
.

Aur Abdullah Bin Numair ne kaha, ke hum se Ubaidullah ne bayan kiya, un se Nafi ne aur un se Abdullah Bin Umar (Radi Allahu Anhuma) ne bayan kiya ke un ka ek ghoda bhag gaya tha aur dushmanon ne is ko pakad liya tha. Phir Musalmanon ko ghalba hasil hua to un ka ghoda unhein wapas kar diya gaya. Ye waqiya Rasul Allah (Sallallahu Alaihi Wasallam) ke ahd-e-mubarak ka hai. Isi tarah un ke ek ghulam ne bhag kar Rome mein panah hasil kar li thi. Phir jab Musalmanon ko is mulk par ghalba hasil hua to Khalid Bin Waleed (Radi Allahu Anhu) ne un ka ghulam unhein wapas kar diya. Ye waqiya Nabi Kareem (Sallallahu Alaihi Wasallam) ke baad ka hai
.

Hum se Muhammad Bin Bashar ne bayan kiya, kaha hum se Yahya Qattan ne bayan kiya, un se Ubaidullah Umari ne bayan kiya, unhein Nafi ne khabar di ke Ibn Umar (Radi Allahu Anhuma) ka ek ghulam bhag kar Rome ke kafiron mein mil gaya tha. Phir Khalid Bin Waleed (Radi Allahu Anhu) ki sirkardagi mein (Islami lashkar ne) is par fatah payi aur Khalid (Radi Allahu Anhu) ne wo ghulam unko wapas kar diya. Aur ye ke Abdullah Bin Umar (Radi Allahu Anhuma) ka ek ghoda bhag kar Rome pahunch gaya tha. Khalid Bin Waleed (Radi Allahu Anhu) ko jab Rome par fatah hui, to unhon ne ye ghoda bhi Abdullah ko wapas kar diya tha
.

Hum se Ahmad Bin Yunus ne bayan kiya, kaha hum se Zuhair ne bayan kiya, un se Musa Bin Uqba ne, un se Nafi ne aur un se Abdullah Bin Umar (Radi Allahu Anhuma) ne bayan kiya ke jis din Islami lashkar ki mud-bher (Rumiyon se) hui to wo ek ghode par sawar thay. Salar-e-fauj Abu Bakr (Radi Allahu Anhu) ki taraf se Khalid Bin Waleed (Radi Allahu Anhu) thay. Phir ghode ko dushmanon ne pakad liya, lekin jab unhein shikast hui to Khalid (Radi Allahu Anhu) ne ghoda Abdullah (Radi Allahu Anhu) ko wapas kar diya
.

Aur Allah Ta'ala ne farmaya "wa-khtilafu alsinatikum wa-alwanikum" " (Allah ki nishaniyon mein) tumhari zaban aur rang ka ikhtilaf bhi hai." Aur (Allah Ta'ala ka irshad ke) "wama arsalna min rasulin illa bilisani qawmihi" " Hum ne koi Rasul nahi bheja, lekin ye ke wo apni qaum ka ham-zaban hota tha."
.

Hum se Amr Bin Ali Fallas ne bayan kiya, kaha hum se Abu Asim ne bayan kiya, unhein Hanzala Bin Abi Sufyan ne khabar di, unhein Said Bin Mina ne khabar di, kaha ke mein ne Jabir Bin Abdullah (Radi Allahu Anhuma) se suna. Aap ne bayan kiya, ke mein ne (jung-e-Khandaq mein Aap Sallallahu Alaihi Wasallam ko bhooka pa kar chupke se) arz kiya: Ya Rasul Allah! Hum ne ek chhota sa bakri ka baccha zibah kiya hai. Aur ek sa' jau ka aata pakwaya hai. Is liye Aap do char aadmiyon ko sath le kar tashreef layein. Lekin Aap (Sallallahu Alaihi Wasallam) ne ba-awaz-e-buland farmaya "Ae Khandaq khodne walo! Jabir ne dawat ka khana tayyar kar liya hai. Aao chalo, jaldi chalo."
.

Hum se Habban Bin Musa ne bayan kiya, ke hum ko Abdullah Bin Mubarak ne khabar di, unhein Khalid Bin Said ne, unhein un ke walid ne aur un se Umm-e-Khalid Bint Khalid Bin Said (Radi Allahu Anha) ne bayan kiya ke mein Rasul Allah (Sallallahu Alaihi Wasallam) ki khidmat mein apne walid ke sath hazir hui, mein is waqt ek zard rang ki qameez pehne hue thi. Nabi Kareem (Sallallahu Alaihi Wasallam) ne is par farmaya "Sana Sana" Abdullah ne kaha ye lafz Habshi zaban mein umda ke maane mein bola jata hai. Unhon ne bayan kiya ke phir mein mohr-e-nubuwwat ke sath (jo Aap ke pusht par thi) khelne lagi to mere walid ne mujhe danta, lekin Aap (Sallallahu Alaihi Wasallam) ne farmaya ke ise mat danto, phir Aap (Sallallahu Alaihi Wasallam) ne Umm-e-Khalid ko (darazi-e-umar ki) dua di ke is qameez ko khoob pehen aur purani kar, phir pehen aur purani kar, aur phir pehen aur purani kar, Abdullah ne kaha ke chunanche ye qameez itne dinon tak baqi rahi ke zabanon par is ka charcha aa gaya
.