Hum se Ibrahim Bin Musa ne bayan kiya, unhon ne kaha hum ko Yazid Bin Zuraie ne khabar di, unhein Khalid ne, unhein Abu Usman Nahdi ne aur un se Mujashia Bin Masood (Radi Allahu Anhu) ne bayan kiya ke Mujashia apne bhai Mujalid Bin Masood (Radi Allahu Anhu) ko le kar khidmat-e-Nabwi (Sallallahu Alaihi Wasallam) mein hazir hue aur arz kiya ke ye Mujalid hain. Aap se hijrat par bait karna chahte hain. Lekin Aap (Sallallahu Alaihi Wasallam) ne farmaya ke fatah-e-Makkah ke baad ab hijrat baqi nahi rahi. Haan mein Islam par un se bait le loon ga
.

Hum se Ali Bin Abdullah ne bayan kiya, kaha hum se Sufyan ne bayan kiya ke Amr aur Ibn Juraij bayan karte thay ke hum ne Ata se suna tha, wo bayan karte thay ke mein Ubaid Bin Umair ke sath Aisha (Radi Allahu Anha) ki khidmat mein hazir hua. Is waqt aap Thubair pahad ke qareeb qayam farma theen. Aap ne hum se farmaya ke jab Allah Ta'ala ne apne Nabi (Sallallahu Alaihi Wasallam) ko Makkah par fatah di thi, isi waqt se hijrat ka silsila khatam ho gaya tha (Thubair mashhoor pahad hai)
.

Mujh se Muhammad Bin Abdullah Bin Haushab Al-Taifi ne bayan kiya, un se Hushaim ne bayan kiya, unhein Husain ne khabar di, unhein Saad Bin Ubaida ne aur unhein Abi Abdur Rahman ne aur wo Usmani thay, unhon ne Atiyya se kaha, jo Alwi thay, ke mein acchi tarah janta hoon ke tumhare sahab (Ali Radi Allahu Anhu) ko kis cheez se khoon bahane par jurat hui, mein ne khud un se suna, wo bayan karte thay ke mujhe aur Zubair Bin Awwam (Radi Allahu Anhu) ko Nabi Kareem (Sallallahu Alaihi Wasallam) ne bheja. Aur hidayat farmayi ke Raudha Khakh par jab tum pahuncho, to unhein ek aurat (Sara nami) milegi. Jise Hatib Ibn Balta'a (Radi Allahu Anhu) ne ek khat de kar bheja hai (tum wo khat is se le kar aao) chunanche jab hum is bagh tak pahunche hum ne is aurat se kaha khat la. Us ne kaha ke Hatib (Radi Allahu Anhu) ne mujhe koi khat nahi diya. Hum ne is se kaha ke khat khud ba khud nikal kar dede warna (talashi ke liye) tumhare kapde utaar liye jayenge. Tab kahin us ne khat apne neefe mein se nikal kar diya. (Jab hum ne wo khat Rasul Allah Sallallahu Alaihi Wasallam ki khidmat mein pesh kiya, to) Aap ne Hatib (Radi Allahu Anhu) ko bula bheja unhon ne (hazir ho kar) arz kiya. Ya Rasul Allah! Mere bare mein jaldi na farmayein! Allah ki qasam! Mein ne na kufr kiya hai aur na mein Islam se hata hoon, sirf apne khandan ki muhabbat ne is par majboor kiya tha. Aap (Sallallahu Alaihi Wasallam) ke ashab (Muhajireen) mein koi shakhs aisa nahi jis ke rishtadar waghera Makkah mein na hon. Jin ke zariya Allah Ta'ala un ke khandan walon aur un ki jayidad ki hifazat na karata ho. Lekin mera wahan koi bhi aadmi nahi, is liye mein ne chaha ke in Makkah walon par ek ihsan kar doon, Nabi Kareem (Sallallahu Alaihi Wasallam) ne bhi un ki baat ki tasdeeq farmayi. Umar (Radi Allahu Anhu) farmane lage mujhe is ka sarr utaarne dijiye ye to munafiq ho gaya hai. Lekin Nabi Kareem (Sallallahu Alaihi Wasallam) ne farmaya tumhein kya maloom! Allah Ta'ala Ahl-e-Badr ke halat se khoob waqif tha aur wo khud Ahl-e-Badr ke bare mein farma chuka hai ke "Jo chaho karo." Abu Abdur Rahman ne kaha, Ali (Radi Allahu Anhu) ko isi irshad ne (ke tum jo chaho karo, khoon rezi par) diler bana diya hai
.

Hum se Abdullah Bin Abi Al-Aswad ne bayan kiya, kaha hum se Yazid Bin Zuraie aur Humaid Bin Al-Aswad ne bayan kiya, un se Habib Bin Shaheed ne aur un se Ibn Abi Mulika ke Abdullah Bin Zubair (Radi Allahu Anhuma) ne Abdullah Bin Jafar (Radi Allahu Anhu) se kaha, tumhein wo qissa yaad hai jab mein aur tum aur Abdullah Bin Abbas (Radi Allahu Anhuma) teeno aage ja kar Rasul Allah (Sallallahu Alaihi Wasallam) se mile thay (Aap Sallallahu Alaihi Wasallam Jihad se wapas aa rahe thay) Abdullah Bin Jafar ne kaha, haan yaad hai. Aur Aap (Sallallahu Alaihi Wasallam) ne mujh ko aur Ibn Abbas (Radi Allahu Anhuma) ko apne sath sawar kar liya tha, aur tumhein chhod diya tha
.

Hum se Malik Bin Ismail ne bayan kiya, kaha ke hum se Sufyan Bin Uyaina ne bayan kiya, un se Zuhri ne bayan kiya ke Saib Bin Yazid (Radi Allahu Anhu) ne kaha, (jab Rasul Allah Sallallahu Alaihi Wasallam Ghazwa Tabuk se wapas tashreef la rahe thay to) hum sab bacche Thaniyat-ul-Wada tak Aap (Sallallahu Alaihi Wasallam) ka istiqbal karne gaye thay
.

Hum se Musa Bin Ismail ne bayan kiya, kaha hum se Juwairiya ne bayan kiya, un se Nafi ne aur un se Abdullah Bin Umar (Radi Allahu Anhuma) ne ke jab Rasul Allah (Sallallahu Alaihi Wasallam) (Jihad se) wapas hote to teen baar Allahu Akbar kehte, aur ye dua parhte "Aaibuna in sha Allahu taibuna abiduna hamiduna lirabbina sajiduna, sadaqallahu wadahu, wa-nasara abdahu, wa-hazamal ahzaba wahdahu" "In sha Allah hum Allah ki taraf lautne wale hain. Hum tauba karne wale hain. Apne Rabb ki ibadat karne wale hain. Us ki tareef karne wale aur us ke liye sajda karne wale hain. Allah ne apna waada saccha kar dikhaya, apne bande ki madad ki, aur kafiron ke lashkar ko isi akele ne shikast de di."
.

Hum se Abu Muammar ne bayan kiya, kaha hum se Abdul Waris ne bayan kiya, kaha ke mujh se Yahya Bin Abi Ishaq ne bayan kiya, aur un se Anas Bin Malik (Radi Allahu Anhu) ne bayan kiya ke (Ghazwa Banu Lihyan mein jo 6 Hijri mein hua) Usfan se wapas hote hue hum Rasul Allah (Sallallahu Alaihi Wasallam) ke sath thay. Aap apni ontni par sawar thay aur Aap ne sawari par peechhe (Umm-ul-Momineen) Safiya Bint Huyai (Radi Allahu Anha) ko bithaya tha. Ittefaq se Aap ki ontni phisal gayi aur Aap dono gir gaye. Ye haal dekh kar Abu Talha (Radi Allahu Anhu) bhi fauran apni sawari se kood pade aur kaha, Ya Rasul Allah! Allah mujhe Aap par qurban kare, kuch chot to nahi lagi? Aap (Sallallahu Alaihi Wasallam) ne farmaya: "Pehle aurat ki khabar lo." Abu Talha (Radi Allahu Anhu) ne ek kapda apne chehre par daal liya, phir Safiya (Radi Allahu Anha) ke qareeb aaye aur wahi kapda un ke upar daal diya. Is ke baad dono ki sawari durust ki, jab Aap sawar ho gaye to hum Aap (Sallallahu Alaihi Wasallam) ke charon taraf jama ho gaye. Phir jab Madinah dikhayi dene laga to Aap (Sallallahu Alaihi Wasallam) ne ye dua parhi "Aaibuna taibuna abiduna lirabbina hamiduna." "Hum Allah ki taraf wapas hone wale hain. Tauba karne wale, apne Rabb ki ibadat karne wale aur us ki hamd parhne wale hain." Aap (Sallallahu Alaihi Wasallam) ye dua barabar parhte rahe yahan tak ke Madinah mein dakhil ho gaye
.

Hum se Ali Bin Abdullah Madini ne bayan kiya, kaha hum se Bishr Bin Mufaddal ne bayan kiya, kaha hum se Yahya Bin Abi Ishaq ne bayan kiya aur un se Anas Bin Malik (Radi Allahu Anhu) ne bayan kiya ke wo aur Abu Talha (Radi Allahu Anhu) Nabi Kareem (Sallallahu Alaihi Wasallam) ke sath thay, Umm-ul-Momineen Safiya (Radi Allahu Anha) ko Aap (Sallallahu Alaihi Wasallam) ne apni sawari par peechhe bitha rakha tha. Raste mein ittefaq se Aap ki ontni phisal gayi aur Aap (Sallallahu Alaihi Wasallam) gir gaye aur Umm-ul-Momineen bhi gir gayeen. Abu Talha (Radi Allahu Anhu) ne yun kaha ke mein samajhta hoon, unhon ne apne aap ko ont se gira diya aur Aap (Sallallahu Alaihi Wasallam) ke qareeb pahunch kar arz kiya: Ae Allah ke Rasul! Allah mujhe Aap par qurban kare koi chot to Aap ko nahi aayi? Aap (Sallallahu Alaihi Wasallam) ne farmaya ke nahi lekin tum aurat ki khabar lo. Chunanche unhon ne ek kapda apne chehre par daal liya, phir Umm-ul-Momineen ki taraf badhe aur wahi kapda un par daal diya. Ab Umm-ul-Momineen khadi ho gayeen. Phir Abu Talha (Radi Allahu Anhu) ne Aap dono ke liye ontni ko mazboot kiya. To Aap sawar hue aur safar shuru kiya. Jab Madinah Munawwarah ke samne pahunch gaye ya rawi ne ye kaha ke jab Madinah dikhayi dene laga to Nabi Kareem (Sallallahu Alaihi Wasallam) ne ye dua parhi "Aaibuna taibuna abiduna lirabbina hamiduna." "Hum Allah ki taraf lautne wale hain. Tauba karne wale, apne Rabb ki ibadat karne wale aur us ki tareef karne wale hain!" Aap (Sallallahu Alaihi Wasallam) ye dua barabar parhte rahe, yahan tak ki Madinah mein dakhil ho gaye
.

Hum se Sulaiman Bin Harb ne bayan kiya, unhon ne kaha hum se Shuba ne bayan kiya, un se Muharib Bin Dithar ne bayan kiya, unhon ne kaha ke mein ne Jabir Bin Abdullah Ansari (Radi Allahu Anhuma) se suna, unhon ne bayan kiya ke mein Nabi Kareem (Sallallahu Alaihi Wasallam) ke sath ek safar mein tha. Jab hum Madinah pahunche to Aap (Sallallahu Alaihi Wasallam) ne farmaya ke pehle masjid mein ja aur do rakat (nafal) namaz parh
.

Hum se Abu Asim ne bayan kiya, unhon ne kaha hum se Ibn Juraij ne bayan kiya, un se Ibn Shihab ne, un se Abdur Rahman Bin Abdullah Bin Kaab ne, un se un ke walid (Abdullah) aur chacha Ubaidullah Bin Kaab (Radi Allahu Anhu) ne bayan kiya ke Nabi Kareem (Sallallahu Alaihi Wasallam) jab din chadhe safar se wapas hote to baithne se pehle masjid mein ja kar do rakat nafal namaz parhte thay
.