Hum se Qutaiba Bin Saeed ne bayan kiya, kaha hum se Abdul Wahab ne bayan kiya, kaha hum se Ayyub ne bayan kiya, un se Abu Qilaba ne aur un se Anas (Radi Allahu Anhu) ne bayan kiya ke mein Abu Talha (Radi Allahu Anhu) ki sawari par un ke peeche baitha hua tha. Tamam sahaba hajj aur umrah donon hi ke liye ek sath labbaik keh rahe thay
.

Hum se Qutaiba Bin Saeed ne bayan kiya, kaha hum se Abu Safwan ne bayan kiya, un se Yunus Bin Yazid ne, un se Ibn Shihab ne, un se Urwah ne, un se Usama Bin Zaid (Radi Allahu Anhuma) ne ke Rasul Allah (Sallallahu Alaihi Wasallam) ek gadhe par is ki palan rakh kar sawar hue. Jis par ek chadar bichhi hui thi aur Usama (Radi Allahu Anhu) ko Aap ne apne peeche bitha rakha tha
.

Hum se Yahya Bin Bukair ne bayan kiya, kaha hum se Laith Bin Saad ne bayan kiya ke mujh se Yunus ne bayan kiya, unhein Nafi ne khabar di aur unhein Abdullah Bin Umar (Radi Allahu Anhuma) ne ke Fatah Makkah ke mauqe par Rasul Allah (Sallallahu Alaihi Wasallam) Makkah ke balayi ilaqe se apni sawari par tashreef laye. Usama (Radi Allahu Anhu) ko Aap (Sallallahu Alaihi Wasallam) ne apni sawari par peeche bitha diya tha aur Aap ke sath Bilal (Radi Allahu Anhu) bhi thay. Aur Usman Bin Talha (Radi Allahu Anhu) bhi jo Kaabah ke kaleed-bardar thay. Aap (Sallallahu Alaihi Wasallam) ne Masjid-ul-Haram mein apni sawari bitha di aur Usman (Radi Allahu Anhu) se kaha ke Bait-ul-Allah Al-Haram ki kunji layein. Unhon ne Kaabah ka darwaza khol diya aur Rasul Allah (Sallallahu Alaihi Wasallam) andar dakhil ho gaye. Aap (Sallallahu Alaihi Wasallam) ke sath Usama, Bilal aur Usman (Radi Allahu Anhum) bhi thay. Aap (Sallallahu Alaihi Wasallam) kafi der tak andar thehre rahe. Aur jab bahar tashreef laye to sahaba ne (andar jaane ke liye) ek doosre se aage hone ki koshish ki sab se pehle andar dakhil hone wale Abdullah Bin Umar (Radi Allahu Anhuma) thay. Unhon ne Bilal (Radi Allahu Anhu) ko darwaze ke peeche khara paya aur un se poocha ke Rasul Allah (Sallallahu Alaihi Wasallam) ne namaz kahan parhi hai? Unhon ne is jagah ki taraf ishara kiya jahan Rasul Allah (Sallallahu Alaihi Wasallam) ne namaz parhi thi. Abdullah Bin Umar (Radi Allahu Anhuma) ne bayan kiya ke mujhe ye poochna yaad nahi raha ke Rasul Allah (Sallallahu Alaihi Wasallam) ne kitni rakatein parhi thiin
.

Hum se Ishaq Bin Mansur ne bayan kiya, kaha hum ko Abdur Razzaq ne khabar di, kaha hum ko Ma'mar ne khabar di, unhein Hammam ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Insan ke har ek jorr par sadaqah lazim hota hai. Har din jis mein sooraj tulu hota hai. Phir agar wo insanon ke darmiyan insaf kare to ye bhi ek sadaqah hai aur kisi ko sawari ke mamle mein agar madad pahunchaye, is tarah par ke ise is par sawar karaye ya us ka saman utha kar rakh de to ye bhi ek sadaqah hai aur acchi baat munh se nikalna bhi ek sadaqah hai aur har qadam jo namaz ke liye uthta hai wo bhi sadaqah hai aur agar koi raste se kisi takleef dene wali cheez ko hata de to wo bhi ek sadaqah hai."
.

Aur Muhammad Bin Bishr se isi tarah marwi hai. Wo Ubaidullah se riwayat karte hain, wo Nafi se wo Ibn Umar (Radi Allahu Anhuma) se aur wo Nabi Kareem (Sallallahu Alaihi Wasallam) se aur Ubaidullah ke sath is hadees ko Muhammad Bin Ishaq ne bhi Nafi se, unhon ne Ibn Umar (Radi Allahu Anhuma) se riwayat kiya hai aur khud Nabi Kareem (Sallallahu Alaihi Wasallam) ne apne sahaba ke sath dushmanon ke ilaqe mein safar kiya, halanke wo sab hazrat Quran Majeed ke aalim thay
.

Hum se Abdullah Bin Maslama ne bayan kiya, in se Imam Malik (Rahimahullah) ne, in se Nafi ne aur in se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne dushman ke ilaqe mein Quran Majeed le kar jaane se mana farmaya tha
.

Hum se Abdullah Bin Muhammad Musnadi ne bayan kiya, kaha hum se Sufyan Bin Uyainah ne bayan kiya, in se Ayyub Sakhtiyani ne, in se Muhammad Bin Sireen ne aur in se Anas (Radi Allahu Anhu) ne bayan kiya ke subah hui to Nabi Kareem (Sallallahu Alaihi Wasallam) Khaibar mein dakhil thay. Itne mein wahan ke rehne wale (yahudi) phaware apni gardanon par liye hue nikle. Jab Nabi Kareem (Sallallahu Alaihi Wasallam) ko (ma Aap ke lashkar ke) dekha to chilla utthe ke ye Muhammad lashkar ke sath (aa gaye) Muhammad lashkar ke sath, Muhammad lashkar ke sath! (Sallallahu Alaihi Wasallam) chunancha wo sab bhag kar qila mein panah-guzeen ho gaye. Is waqt Nabi Kareem (Sallallahu Alaihi Wasallam) ne apne hath uthaye aur nara-e-takbeer buland farmaya, sath hi irshad hua ke Khaibar to tabah ho chuka. Ke jab kisi qaum ke aangan mein hum utar aate hain to daraye hue logon ki subah buri ho jati hai. Aur Anas (Radi Allahu Anhu) ne bayan kiya ke hum ko gadhe mil gaye, aur hum ne unhein zibah kar ke pakana shuru kar diya ke Nabi Kareem (Sallallahu Alaihi Wasallam) ke munadi ne ye pukara ke Allah aur us ke Rasul tumhein gadhe ke gosht se mana karte hain. Chunancha handiyon mein jo kuch tha sab ulat diya gaya. Is riwayat ki mutabiat Ali ne Sufyan se ki hai ke Rasul Allah (Sallallahu Alaihi Wasallam) ne apne donon hath uthaye thay
.

Hum se Muhammad Bin Yusuf ne bayan kiya, kaha hum se Sufyan Bin Uyainah ne bayan kiya, in se Aasim ne, in se Abu Usman ne, in se Abu Musa Ashari (Radi Allahu Anhu) ne ke hum ek safar mein Rasul Allah (Sallallahu Alaihi Wasallam) ke sath thay. Jab hum kisi wadi mein utarte to «la ilh ila allh» aur «allh akbr» kehte aur hamari awaz buland ho jati is liye Nabi Kareem (Sallallahu Alaihi Wasallam) ne farmaya: "Ae logo! Apni janon par raham khao, kyunke tum kisi behre ya ghaib Allah ko nahi pukar rahe ho. Wo to tumhare sath hi hai. Beshak wo sunne wala aur tum se bahut qareeb hai. Barkaton wala hai. Is ka naam aur is ki azmat bahut hi bari hai."
.

Hum se Muhammad Bin Yusuf ne bayan kiya, kaha hum se Sufyan Bin Uyainah ne bayan kiya, in se Husain Bin Abdur Rahman ne in se Salim Bin Abil Jadh ne aur in se Jabir Bin Abdullah (Radi Allahu Anhuma) ne bayan kiya ke jab hum (kisi bulandi par) charhte, to «allh akbr» kehte aur jab (kisi nisheb mein) utarte to «sb han allh» kehte thay
.

Hum se Muhammad Bin Bashar ne bayan kiya, unhon ne kaha hum se Ibn Adi ne bayan kiya, in se Shuba ne bayan kiya, in se Husain ne, in se Salim ne aur in se Jabir (Radi Allahu Anhu) ne bayan kiya ke jab hum bulandi par charhte to «allh akbr» kehte aur nisheb mein utarte to «sb han allh» kehte thay
.