Hum se Musa bin Ismail ne byaan kiya , kaha ke hum se Wuhaib bin Khalid ne byaan kiya , kaha ke hum se Abdullah bin Ta'oos ne byaan kiya , un se in ke baap aur un se Ibn Abbas razi Allahu anhuma ne ke Arab samajhte thay ke Hajj ke dino mein Umrah karna roye zameen par sab se bara gunah hai . Yeh log Muharram ko Safar bana lete aur kehte ke jab oont ki peeth sasta le aur us par khoob baal ug jayein aur Safar ka mahina khatam ho jaye (yani Hajj ke ayaam guzar jayein) to Umrah halal hota hai . Phir jab Nabi Karim salla Allahu alaihi wasallam apne as'haab ke saath chauthi ki subah ko Hajj ka ahram baandhe hue aaye to Aap salla Allahu alaihi wasallam ne unhein hukm diya ke apne Hajj ko Umrah bana lein , yeh hukm (Arab ke purane riwaj ki bina par) aam Sahaba par bara bhaari guzra . Unhon ne poocha Ya Rasool Allah! Umrah kar ke hamare liye kya cheez halal ho gayi ? Aap salla Allahu alaihi wasallam ne farmaya ke tamam cheezein halal ho jayeingi .

Hum se Muhammad bin Musanna ne byaan kiya , kaha ke hum se Muhammad bin Jafar Ghundar ne byaan kiya , kaha ke hum se Shubah ne byaan kiya , un se Qais bin Muslim ne , un se Tariq bin Shihab ne aur un se Abu Musa Ashari razi Allahu anhu ne ke main Nabi Karim salla Allahu alaihi wasallam ki khidmat mein (Hajjat-ul-Wada ke mauqe par Yemen se) hazir hua to Aap salla Allahu alaihi wasallam ne (mujh ko Umrah ke baad) ahram khool dene ka hukm diya .

Hum se Ismail bin Abi Uwais ne byaan kiya , kaha ke mujh se Imam Malik rahmatullah alaihi ne byaan kiya (doosri sanad) aur Imam Bukhari rahmahu Allah ne kaha ke hum se Abdullah bin Yusuf ne byaan kiya , kaha ke humein Imam Malik rahmatullah alaihi ne khabar di , unhein Nafi ne aur unhein Ibn Umar razi Allahu anhuma ne ke Nabi Karim salla Allahu alaihi wasallam ki zauja-e-mutahharah Hafsah razi Allahu anha ne byaan kiya ke unhon ne Rasool Allah salla Allahu alaihi wasallam se daryaft kiya Ya Rasool Allah! Kya baat hai aur log to Umrah kar ke halal ho gaye lekin Aap halal nahi hue ? Nabi Karim salla Allahu alaihi wasallam ne farmaya ke maine apne sar ki talbeed (baalon ko jamane ke liye ek lais-dar cheez ka istemal karna) ki hai aur apne saath hadi (qurbani ka jaanwar) laya hoon is liye main qurbani karne se pehle ahram nahi khool sakta .

Hum se Adam bin Abi Iyas ne byaan kiya , kaha ke hum se Shubah ne byaan kiya , kaha ke hum se Abu Jamrah Nasr bin Imran Dabayee ne byaan kiya , unhon ne kaha ke maine Hajj aur Umrah ka ek saath ahram baandha to kuch logon ne mujhe mana kiya . Is liye maine Ibn Abbas razi Allahu anhuma se is ke mutalliq daryaft kiya . Aap ne tamattu karne ke liye kaha . Phir maine ek shakhs ko dekha ke mujh se keh raha hai ”Hajj bhi mabroor hua aur Umrah bhi qabool hua“ maine yeh khwab Ibn Abbas razi Allahu anhuma ko sunaya , to Aap ne farmaya ke yeh Nabi Karim salla Allahu alaihi wasallam ki sunnat hai . Phir Aap ne farmaya ke mere yahan qiyam kar , main apne paas se tumhare liye kuch muqarrar kar ke diya karoon ga . Shubah ne byaan kiya ke maine (Abu Jamrah se) poocha ke Ibn Abbas razi Allahu anhuma ne yeh kyun kiya tha ? (Yani maal kis baat par dene ke liye kaha) unhon ne byaan kiya ke isi khwab ki wajah se jo maine dekha tha .

Hum se Abu Nu'aim ne byaan kiya , un se Abu Shihab ne kaha ke main tamattu ki niyat se Umrah ka ahram baandh ke yaum-e-tarwiyah se teen din pehle Makka puhancha . Is par Makka ke kuch logon ne kaha ab tumhara Hajj Makki ho ga . Main Ata bin Abi Rabah ki khidmat mein hazir hua . Yahi poochne ke liye . Unhon ne farmaya ke mujh se Jabir bin Abdullah razi Allahu anhuma ne byaan kiya ke unhon ne Rasool Allah salla Allahu alaihi wasallam ke saath woh Hajj kiya tha jis mein Aap salla Allahu alaihi wasallam apne saath qurbani ke oont laye thay (yani Hajjat-ul-Wada) Sahaba ne sirf mufrad Hajj ka ahram baandha tha . Lekin Nabi Karim salla Allahu alaihi wasallam ne un se farmaya ke (Umrah ka ahram baandh lo aur) Baitullah ka tawaf aur Safa Marwah ki sayi ke baad apne ahram khool dalo aur baal turshwa lo . Yaum-e-tarwiyah tak barabar isi tarah halal raho , phir yaum-e-tarwiyah mein Makka hi se Hajj ka ahram baandh-o aur is tarah apne Hajj-e-Mufrad ko jis ki tum ne pehle niyat ki thi , ab usay tamattu bana lo . Sahaba ne arz ki ke hum isay tamattu kaise bana sakte hain ? Hum to Hajj ka ahram baandh chuke hain . Is par Nabi Karim salla Allahu alaihi wasallam ne farmaya ke jis tarah main keh raha hoon waise hi karo . Agar mere saath hadi na hoti to khud main bhi isi tarah karta jis tarah tum se keh raha hoon . Lekin main kya karoon ab mere liye koi cheez is waqt tak halal nahi ho sakti jab tak mere qurbani ke jaanwaron ki qurbani na ho jaye . Chunanche Sahaba ne Aap ke hukm ki tameel ki . Abu Abdullah (Imam Bukhari rahmatullah alaihi) ne kaha ke Abu Shihab ki is hadees ke siwa aur koi marfoo hadees marwi nahi hai .

Hum se Qutaibah bin Saeed ne byaan kiya , kaha ke hum se Hajjaj bin Muhammad Awar ne byaan kiya , un se Shubah ne , un se Amru bin Murrah ne , un se Saeed bin Musayyab ne ke Uthman aur Ali razi Allahu anhuma Usfan aaye to in mein baaham tamattu ke silsile mein ikhtilaf hua to Ali razi Allahu anhu ne farmaya ke jis ko Rasool Allah salla Allahu alaihi wasallam ne kiya hai us se Aap kyun rok rahe hain ? Is par Uthman razi Allahu anhu ne farmaya ke mujhe apne haal par rehne do . Yeh dekh kar Ali razi Allahu anhu ne Hajj aur Umrah dono ka ahram ek saath baandha .

Hum se Musaddad ne byaan kiya , unhon ne kaha ke hum se Hammad bin Zaid ne byaan kiya , un se Ayub Sakhtiyani ne , kaha ke maine Mujahid se suna , unhon ne kaha hum se Jabir bin Abdullah razi Allahu anhuma ne byaan kiya unhon ne kaha ke jab hum Rasool Allah salla Allahu alaihi wasallam ke saath aaye to hum ne Hajj ki Labbaik pukari . Phir Rasool Allah salla Allahu alaihi wasallam ne humein hukm diya hum ne isay Umrah bana liya .

Hum se Musa bin Ismail ne byaan kiya , kaha ke hum se Hammam bin Yahya ne Qatada se byaan kiya kaha ke mujh se Mutarrif ne Imran bin Husain se byaan kiya , unhon ne kaha ke Rasool Allah salla Allahu alaihi wasallam ke zamana mein hum ne tamattu kiya tha aur khud Quran mein tamattu ka hukm nazil hua tha . Ab ek shakhs ne apni rai se jo chaha keh diya .

Aur Abu Kamil Fadhail bin Husain Basri ne kaha ke hum se Abumashar Yusuf bin Yazid Bara ne byaan kiya , kaha ke hum se Uthman bin Ghiyath ne byaan kiya , un se Ikrimah ne , un se Ibn Abbas razi Allahu anhuma ne , Ibn Abbas razi Allahu anhuma se Hajj mein tamattu ke mutalliq poocha gaya . Aap ne farmaya ke Hajjat-ul-Wada ke mauqe par Muhajireen Ansar Nabi Karim salla Allahu alaihi wasallam ki azwaj aur hum sab ne ahram baandha tha . Jab hum Makka aaye to Rasool Allah salla Allahu alaihi wasallam ne farmaya ke apne ahram ko Hajj aur Umrah dono ke liye kar lo lekin jo log qurbani ka jaanwar apne saath laye hain . (Woh Umrah karne ke baad halal nahi honge) chunanche hum ne Baitullah ka tawaf aur Safa o Marwah ki sayi kar li to apna ahram khool dala aur hum apni biwiyon ke paas gaye aur sile hue kapre pehne . Aap salla Allahu alaihi wasallam ne farmaya tha ke jis ke saath qurbani ka jaanwar hai woh is waqt tak halal nahi ho sakta jab tak hadi apni jagah na puhanch le (yani qurbani na hole) humein (jinhon ne hadi saath nahi li thi) Aap salla Allahu alaihi wasallam ne aathvein tareekh ki shaam ko hukm diya ke hum Hajj ka ahram baandh lein . Phir jab hum manasik-e-Hajj se farigh ho gaye to hum ne aa kar Baitullah ka tawaf aur Safa Marwah ki sayi ki , phir hamara Hajj poora ho gaya aur ab qurbani hum par lazim hui . Jaisa ke Allah Ta'ala ka irshad hai ”jisay qurbani ka jaanwar muyassar ho (to woh qurbani kare) aur agar kisi ko qurbani ki taqat na ho to teen roze Hajj mein aur saat din ghar wapas hone par rakhe (qurbani mein) bakri bhi kaafi hai . To logon ne Hajj aur Umrah dono ibadatein ek hi saal mein ek saath ada kin . Kyunke Allah Ta'ala ne khud apni kitab mein yeh hukm nazil kiya tha aur Rasool Allah salla Allahu alaihi wasallam ne is par khud amal kar ke tamam logon ke liye jaiz qarar diya tha . Albatta Makka ke bashindon ka is se istithna hai . Kyunke Allah Ta'ala ka farmaan hai ”yeh hukm in logon ke liye hai jin ke ghar wale Masjid-ul-Haram ke paas rehne wale na hon“ . Aur Hajj ke jin mahino ka Quran mein zikr hai woh Shawwal , Di-ul-Qada aur Di-ul-Hijja hain . In mahino mein jo koi bhi tamattu kare woh ya qurbani de ya agar maqdoor na ho to roze rakhe . Aur «rafath» ka maani jamaa (ya fuhsh baatein) aur «fusooq» gunah aur «jidal» logon se jhagarna .

Hum se Yaqub bin Ibrahim ne byaan kiya , un se Ismail bin Alayyah ne byaan kiya , unhein Ayub Sakhtiyani ne khabar di , unhein Nafi ne , unhon ne byaan kiya ke jab Abdullah bin Umar razi Allahu anhuma haram ki sarhad ke qareeb puhanchte to talbiya kehna band kar dete . Raat Di-Tuwa mein guzarte , subah ki namaaz wahin parhte aur ghusal karte (phir Makka mein dakhil hote) Aap byaan karte thay ke Nabi Karim salla Allahu alaihi wasallam bhi isi tarah kiya karte thay .