Hum se Asbagh bin Faraj ne byaan kiya , kaha ke humein Abdullah bin Wahab ne khabar di , unhein Yunus ne , unhein Ibn Shihab ne , unhein Salim ne aur un se in ke walid ne farmaya ke maine Rasool Allah salla Allahu alaihi wasallam se talbeed ki haalat mein Labbaik kehte suna .

Hum se Ali bin Abdullah Madini ne byaan kiya , unhon kaha ke hum se Sufyan bin Uyaynah ne byaan kiya , unhon ne kaha ke hum se Musa bin Uqbah ne byaan kiya , unhon ne kaha ke maine Salim bin Abdullah se suna , unhon ne kaha ke maine Ibn Umar razi Allahu anhuma se suna (doosri sanad) Imam Bukhari rahmahu Allah ne kaha aur hum se Abdullah bin Maslamah Qanabi ne byaan kiya , un se Imam Malik ne , un se Musa bin Uqbah ne , un se Salim bin Abdullah ne , unhon ne apne baap se suna , ke woh keh rahe thay ke Rasool Allah salla Allahu alaihi wasallam ne Masjid-e-Zul Hulaifah ke qareeb hi puhanch kar ahram baandha tha .

Hum se Abdullah bin Yusuf ne byaan kiya , unhon ne kaha ke humein Imam Malik ne khabar di , unhein Nafi ne aur unhein Abdullah bin Umar razi Allahu anhuma ne ke ek shakhs ne poocha ke Ya Rasool Allah! Muhrim ko kis tarah ka kapra pehanna chahiye ? Nabi Karim salla Allahu alaihi wasallam ne farmaya na kurta pehne , na amama baandhe , na pajama pehne , na baran-kot , na moze . Lekin agar us ke paas jooti na ho to woh moze is waqt pehan sakta hai jab takhnon ke neeche se in ko kaat liya ho . (Aur ahram mein) koi aisa kapra na pehno jis mein zafran ya wars laga hua ho . Abu Abdullah Imam Bukhari rahmatullah alaihi ne kaha ke muhrim apna sar dho sakta hai lekin kangha na kare . Badan bhi na khujlana chahiye aur joon sar aur badan se nikaal kar zameen par daali ja sakti hai .

Hum se Abdullah bin Muhammad ne byaan kiya , un se Wahab bin Jureir ne byaan kiya , unhon ne kaha ke mujh se mere walid Jureir bin Hazim ne byaan kiya . Un se Yunus bin Zaid ne , un se Zuhri ne , un se Ubaidullah bin Abdullah ne aur un se Zuhri ne , un se Ubaidullah bin Abdullah ne aur un se Ibn Abbas razi Allahu anhuma ne ke Arafat se Muzdalifah tak Usama bin Zaid razi Allahu anhuma Rasool Allah salla Allahu alaihi wasallam ki sawari par peeche baithe hue thay . Phir Muzdalifah se Mina tak Fadhal bin Abbas razi Allahu anhuma peeche baith gaye thay , dono hazrat ne byaan kiya ke Rasool Allah salla Allahu alaihi wasallam Jamrah-e-Aqba ki rami tak barabar talbiya kehte rahe .

Hum se Abdullah bin Muhammad ne byaan kiya , un se Wahab bin Jureir ne byaan kiya , unhon ne kaha ke mujh se mere walid Jureir bin Hazim ne byaan kiya . Un se Yunus bin Zaid ne , un se Zuhri ne , un se Ubaidullah bin Abdullah ne aur un se Zuhri ne , un se Ubaidullah bin Abdullah ne aur un se Ibn Abbas razi Allahu anhuma ne ke Arafat se Muzdalifah tak Usama bin Zaid razi Allahu anhuma Rasool Allah salla Allahu alaihi wasallam ki sawari par peeche baithe hue thay . Phir Muzdalifah se Mina tak Fadhal bin Abbas razi Allahu anhuma peeche baith gaye thay , dono hazrat ne byaan kiya ke Rasool Allah salla Allahu alaihi wasallam Jamrah-e-Aqba ki rami tak barabar talbiya kehte rahe .

Aur Aisha razi Allahu anha muhrim thin lekin kusum (kaisu ke phool) mein range hue kapre pehne hui thin . Aap ne farmaya ke auraten ahram ki haalat mein apne hont na chhupayein na munh par naqab daalein aur na wars ya zafran ka ranga hua kapra pehnein aur Jabir bin Abdullah Ansari razi Allahu anhu ne kaha ke main kusum ko khushbu nahi samajhta aur Aisha razi Allahu anha ne auraton ke liye zewar siyah gulabi kapre aur mozoon ke pehne mein koi muzaiqa nahi samjha aur Ibrahim Nakh'ee ne kaha ke auraton ko ahram ki haalat mein kapre badal lene mein koi haraj nahi .

Hum se Muhammad bin Abi Bakr Muqaddami ne byaan kiya , kaha ke hum se Fadhail bin Sulayman ne byaan kiya , kaha ke hum se Musa bin Uqbah ne byaan kiya , kaha ke mujhe Kuraib ne khabar di aur un se Abdullah bin Abbas razi Allahu anhuma ne byaan kiya ke Hajjat-ul-Wada mein Zohr aur Asr ke darmiyan hafta ke din Nabi Karim salla Allahu alaihi wasallam kangha karne aur tail lagane aur izaar aur rida pehne ke baad apne as'haab ke saath Madina se nikle . Aap salla Allahu alaihi wasallam ne is waqt zafran mein range hue aise kapre ke siwa jis ka rang badan par lagta ho kisi qism ki chadar ya tehband pehne se mana nahi kiya . Din mein Aap salla Allahu alaihi wasallam Zul Hulaifah puhanch gaye (aur raat wahin guzari) phir Aap salla Allahu alaihi wasallam sawar hue aur Baida se Aap salla Allahu alaihi wasallam ne aur Aap salla Allahu alaihi wasallam ke saathiyon ne Labbaik kaha aur ahram baandha aur apne oonton ko haar pehnaya . Di-ul-Qada ke mahine mein ab paanch din reh gaye thay phir jab Aap salla Allahu alaihi wasallam Makka puhanche to Di-ul-Hijja ke chaar din guzar chuke thay . Aap salla Allahu alaihi wasallam ne Baitullah ka tawaf kiya aur Safa aur Marwah ki sayi ki , Aap salla Allahu alaihi wasallam abhi halal nahi hue kyunke qurbani ke jaanwar Aap salla Allahu alaihi wasallam ke saath thay aur Aap salla Allahu alaihi wasallam ne in ki gardan mein haar daal diya tha . Aap salla Allahu alaihi wasallam Hajoon pahaar ke nazdeek Makka ke balayi hissa mein utre . Hajj ka ahram ab bhi baaqi tha . Baitullah ke tawaf ke baad phir Aap salla Allahu alaihi wasallam wahan is waqt tak tashreef nahi le gaye jab tak maidan-e-Arafat se wapas na ho liye . Aap salla Allahu alaihi wasallam ne apne saathiyon ko hukm diya tha ke woh Baitullah ka tawaf karein aur Safa o Marwah ke darmiyan sayi karein , phir apne saron ke baal turshwa kar halal ho jayein . Yeh farmaan in logon ke liye tha jin ke saath qurbani ke jaanwar nahi thay . Agar kisi ke saath is ki biwi thi to woh us se hum-bistar ho sakta tha . Isi tarah khushbu-dar aur (sile hue) kapre ka istemal bhi us ke liye jaiz tha .

Yeh Abdullah bin Umar razi Allahu anhuma Nabi Karim salla Allahu alaihi wasallam se naqal karte hain .

Hum se Abdullah bin Muhammad Musandi ne byaan kiya , unhon ne kaha ke hum se Hisham bin Yusuf ne byaan kiya , unhon ne kaha ke mujhe Ibn Juraij ne khabar di , unhon ne kaha ke mujh se Muhammad bin Al-Munkadir ne byaan kiya aur un se Anas bin Malik razi Allahu anhu ne byaan kiya , unhon ne kaha ke Nabi Karim salla Allahu alaihi wasallam ne Madina mein chaar rak'at parhi lekin Zul Hulaifah mein do rak'at ada farmayi phir Aap salla Allahu alaihi wasallam ne raat wahin guzari . Subah ke waqt jab Aap salla Allahu alaihi wasallam apni sawari par sawar hue to Aap salla Allahu alaihi wasallam ne Labbaik pukari .

Hum se Qutaibah bin Saeed ne byaan kiya , kaha ke hum se Abdul Wahab ne byaan kiya , ke hum se Ayub Sakhtiyani ne byaan kiya , un se Abu Qilabah ne aur un se Anas bin Malik ne ke Rasool Allah salla Allahu alaihi wasallam ne Madina mein Zohr chaar rak'at parhi lekin Zul Hulaifah mein Asr do rak'at . Unhon ne kaha ke mera khayal hai ke raat subah tak Aap salla Allahu alaihi wasallam ne Zul Hulaifah mein hi guzar di .