Hum se Muhammad ne bayan kiya, kaha hum ko Abdul Ala ne khabar di, unhein Ma'mar ne, unhein Yahya Bin Abi Kasir ne, unhein Ikrima ne, unhein Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne ek aadmi ko dekha ke wo qurbani ka ont liye ja raha hai aap (Sallallahu Alaihi Wasallam) ne farmaya ke is par sawar ho ja, is ne kaha ke ye to qurbani ka hai to aap (Sallallahu Alaihi Wasallam) ne phir farmaya ke sawar ho ja. Abu Hurairah (Radi Allahu Anhu) ne kaha ke phir mein ne dekha ke wo is par sawar hai aur Nabi Kareem (Sallallahu Alaihi Wasallam) ke sath chal raha hai aur joote (ka haar) is ont ke gardan mein hai. Is riwayat ki mutabiat Muhammad Bin Bashar ne ki hai. Hum se Usman Bin Umar ne bayan kiya, hum ko Ali Bin Mubarak ne khabar di, unhein Yahya ne unhein Ikrima ne aur unhein Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se (misl-e-sabiq hadees ke)
.

Aur Abdullah Bin Umar (Radi Allahu Anhuma) sirf kohan ki jagah ke jhool ko pharte aur jab is ki qurbani karte to is darr se ke kaheen ise khoon kharab na kar de jhool utar dete aur phir is ko bhi sadqa kar dete
.

Hum se Qabisa ne bayan kiya, unhon ne kaha ke hum se Sufyan ne bayan kiya, un se Ibn Abi Najeeh ne, un se Mujahid ne, un se Abdul Rahman Bin Abi Laila ne aur un se Ali (Radi Allahu Anhu) ne bayan kiya ke mujhe Rasul Allah (Sallallahu Alaihi Wasallam) ne in qurbani ke janwaron ke jhool aur un ke chamre ko sadqa karne ka hukum diya tha jin ki qurbani mein ne kar di thi
.

Hum se Ibrahim Bin Al-Munzir ne bayan kiya, kaha ke hum se Abu Zamrah ne bayan kiya, un se Musa Bin Uqbah ne bayan kiya, un se Nafi ne ke Ibn Umar (Radi Allahu Anhuma) ne Ibn Zubair (Radi Allahu Anhuma) ke ehd-e-khilafat mein Hajjat-ul-Harooriya ke saal Haj ka irada kiya to un se kaha gaya ke logon mein baham qatl-o-khoon hone wala hai aur hum ko khatra is ka hai ke aap ko (mufsid log Haj se) rok dein, aap ne jawab mein ye ayat sunayi ke ”Tumhare liye Rasul Allah (Sallallahu Alaihi Wasallam) ki zindagi behtareen namuna hai.“ Is waqt mein bhi wahi kaam karoon ga jo Nabi Kareem (Sallallahu Alaihi Wasallam) ne kiya tha. Mein tumhein gawah banata hoon ke mein ne apne oopar Umrah wajib kar liya hai, phir jab aap Baida ke balayi hissa tak pohanche to farmaya ke Haj aur Umrah to ek hi hai mein tumhein gawah banata hoon ke Umrah ke sath mein ne Haj ko bhi jama kar liya hai, phir aap ne ek hadyi bhi sath le li jise haar pehnaya gaya tha. Aap ne ise khareed liya yahan tak ke aap Makkah aaye to Bait Allah ka tawaf aur Safa-o-Marwah ki sayee ki, is se zyada aur kuch nahi kiya jo cheezon (ihram ki wajah se un par) haram theen un mein se kisi se qurbani ke din tak wo halal nahi hue, phir sar mundwaya aur qurbani ki wajah ye samajhte thay ke apna pehla tawaf kar ke unhon ne Haj aur Umrah dono ka tawaf poora kar liya hai phir aap ne kaha ke Nabi Kareem (Sallallahu Alaihi Wasallam) ne bhi isi tarah kiya tha
.

Hum se Abdullah Bin Yusuf ne bayan kiya, kaha hum ko Imam Malik (Rahimahullah) ne khabar di, unhein Yahya Bin Saeed ne, un se Amarah Bint Abdul Rahman ne bayan kiya ke mein ne Aisha (Radi Allahu Anha) se suna, unhon ne batlaya ke hum Rasul Allah (Sallallahu Alaihi Wasallam) ke sath (Haj ke liye) nikle to Zi Qadah mein se panch din baqi rahe thay hum sirf Haj ka irada le kar nikle thay, jab hum Makkah ke qareeb pohanche to Rasul Allah (Sallallahu Alaihi Wasallam) ne hukum diya ke jin logon ke sath qurbani na ho wo jab tawaf kar lein aur Safa-o-Marwah ki sayee bhi kar lein to halal ho jayein ge, Aisha (Radi Allahu Anha) ne kaha ke qurbani ke din hamare ghar gaye ka gosht laya gaya to mein ne kaha ke ye kya hai? (Lane wale ne batlaya) ke Rasul Allah (Sallallahu Alaihi Wasallam) ne apni biwiyon ki taraf se ye qurbani ki hai, Yahya ne kaha ke mein ne Amarah ki ye hadees Qasim se bayan ki unhon ne kaha Amarah ne ye hadees theek theek bayan kiya hai
.

Hum se Ishaq Bin Ibrahim Bin Rahwayh ne bayan kiya, unhon ne Khalid Bin Haris se suna, kaha hum se Ubaidullah Bin Umar ne bayan kiya, un se Nafi ne ke Abdullah (Radi Allahu Anhu) nahr karne ki jagah nahr karte thay, Ubaidullah ne bataya ke murad Nabi Kareem (Sallallahu Alaihi Wasallam) ke nahr karne ki jagah se thi
.

Hum se Ibrahim Bin Al-Munzir ne bayan kiya, kaha hum se Anas Bin Iyaz ne bayan kiya, kaha hum se Musa Bin Uqbah ne bayan kiya, un se Nafi ne ke Ibn Umar (Radi Allahu Anhuma) apni qurbani ke janwaron ko Muzdalifah se akhir raat mein Mina bhijwa dete, ye qurbaniyan jin mein haaji log neez ghulam aur azad dono tarah ke log hote, is maqam mein le jate jahan Nabi Kareem (Sallallahu Alaihi Wasallam) nahr kiya karte thay
.

Hum se Sahl Bin Bakkar ne bayan kiya, unhon ne kaha ke hum se Wuhaib ne bayan kiya, un se Ayub ne, un se Abu Qulaba ne, un se Anas Bin Malik (Radi Allahu Anhu) ne aur unhon ne mukhtasar hadees bayan ki aur ye bhi bayan kiya ke Nabi Kareem (Sallallahu Alaihi Wasallam) ne saat ont kharay kar ke apne hath se nahr kiye aur Madinah mein do chitkabray seeng daar meindhon ki qurbani ki
.

Hum se Abdullah Bin Maslama Qanabi ne bayan kiya, unhon ne kaha hum se Yazid Bin Zuraie ne bayan kiya, un se Yunus ne, un se Ziyad Bin Jubair ne ke mein ne dekha ke Abdullah Bin Umar (Radi Allahu Anhuma) ek shakhs ke paas aaye jo apna ont bitha kar nahr kar raha tha, Abdullah (Radi Allahu Anhu) ne farmaya ke ise khara kar aur bandh de, phir nahr kar ke yahi Rasul Allah (Sallallahu Alaihi Wasallam) ki sunnat hai. Shuba ne Yunus se bayan kiya ke mujhe Ziyad ne khabar di
.

Aur Abdullah Bin Umar (Radi Allahu Anhuma) ne kaha ke Muhammad (Sallallahu Alaihi Wasallam) ki yahi sunnat hai, Ibn Abbas (Radi Allahu Anhuma) ne kaha ke (Surah al-Hajj mein) jo aaya hai «Fazkurusm Allahi Alaiha Sawaffa» ke mani yahi hain ke wo kharay hon safein bandh kar
.