Hum se Abdullah Bin Muhammad ne bayan kiya, kaha hum se Abu Aamir ne bayan kiya, un se Qurra ne bayan kiya, un se Muhammad Bin Sireen ne kaha ke mujhe Abdul Rahman Bin Abi Bakrah ne aur ek aur shakhs ne jo mere nazdeek Abdul Rahman se bhi afzal hai yani Hameed Bin Abdul Rahman ne khabar di ke Abu Bakr (Radi Allahu Anhu) ne batlaya ke Nabi Kareem (Sallallahu Alaihi Wasallam) ne daswein tareekh ko Mina mein khutba sunaya, Aap (Sallallahu Alaihi Wasallam) ne poocha logo! Maloom hai aaj ye kaun sa din hai? Hum ne arz ki Allah aur is ka Rasul zyada jaante hain, Aap (Sallallahu Alaihi Wasallam) is par khamosh ho gaye aur hum ne samjha ke Aap (Sallallahu Alaihi Wasallam) is din ka koi aur naam rakhein ge lekin Aap (Sallallahu Alaihi Wasallam) ne farmaya: Kya ye qurbani ka din nahi. Hum bole haan zaroor hai, phir Aap (Sallallahu Alaihi Wasallam) ne poocha ye mahina kaun sa hai? Hum ne kaha Allah aur is ke Rasul zyada jaante liye. Aap is martaba bhi khamosh ho gaye aur humein khayal hua ke Aap (Sallallahu Alaihi Wasallam) is mahina ka naam koi aur naam rakhein ge, lekin Aap ne farmaya kya ye Zi Al-Hijjah ka mahina nahi hai? Hum bole kyun nahi, phir Aap (Sallallahu Alaihi Wasallam) ne poocha ye shehar kaun sa hai? Hum ne arz ki Allah aur is ke Rasul behtar jaante hain, is martaba bhi Aap (Sallallahu Alaihi Wasallam) is tarah khamosh ho gaye ke hum ne samjha ke Aap (Sallallahu Alaihi Wasallam) is ka koi aur naam rakhein ge, lekin Aap (Sallallahu Alaihi Wasallam) ne farmaya ke ye hurmat ka shehar nahi hai? Hum ne arz ki kyun nahi zaroor hai, is ke baad Aap (Sallallahu Alaihi Wasallam) ne irshad farmaya bas tumhara khoon aur tumhare maal tum par isi tarah haram hain jaise is din ki hurmat is mahina aur is shehar mein hai, ta-aanke tum apne Rabb se ja milo. Kaho kya mein ne tum ko Allah ka paigham pohancha diya? Logon ne kaha ke haan. Aap (Sallallahu Alaihi Wasallam) ne farmaya Aye Allah! Tu gawah rehna aur haan! Yahan maujood ghayeb ko pohancha dein kyunke bohat se log jin tak ye paigham pohanche ga sunne walon se zyada (paigham ko) yaad rakhne wale sabit hon ge aur mere baad kafir na ban jana ke ek doosre ki (na-haq) gardanein maarne lago
.

Hum se Muhammad Bin Musanna ne bayan kiya, kaha hum se Yazid Bin Haroon ne bayan kiya, kaha hum ko Asim Bin Muhammad Bin Zaid ne khabar di, unhein un ke baap ne aur un se Ibn Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne Mina mein farmaya ke tum ko maloom hai! Aaj kaun sa din hai? Logon ne kaha ke Allah aur is ke Rasul zyada jaante hain. Nabi Kareem (Sallallahu Alaihi Wasallam) ne farmaya ke ye hurmat ka din hai aur ye bhi tum ko maloom hai ke ye kaun sa shehar hai? Logon ne kaha Allah aur is ke Rasul zyada jaante hain, Aap (Sallallahu Alaihi Wasallam) ne farmaya ke ye hurmat ka shehar hai aur tum ko ye bhi maloom hai ke ye kaun sa mahina hai, logon ne kaha Allah aur is ke Rasul zyada jaante hain, Nabi Kareem (Sallallahu Alaihi Wasallam) ne farmaya ke ye hurmat ka mahina hai phir farmaya ke Allah Ta'ala ne tumhara khoon! Tumhara maal aur izzat ek doosre par (na-haq) is tarah haram kar di hain jaise is din ki hurmat is mahina aur is shehar mein hai. Hisham Bin Ghaz ne kaha ke mujhe Nafi ne Ibn Umar (Radi Allahu Anhuma) ke hawale se khabar di ke Rasul Allah (Sallallahu Alaihi Wasallam) Hajjat-ul-Wida mein daswein tareekh ko jamrat ke darmiyan kharay hue thay aur farmaya tha ke dekho! Ye ( «Yaum-un-Nahr») Haj-e-Akbar ka din hai, phir Nabi Kareem (Sallallahu Alaihi Wasallam) ye farmane lage ke Aye Allah! Gawah rehna, Nabi Kareem (Sallallahu Alaihi Wasallam) ne is moqa par kyunke logon ko rukhsat kiya tha. (Aap samajh gaye ke wafat ka zamana aan pohancha) jab se log is Haj ko Hajjat-ul-Wida kehne lage
.

Hum se Muhammad Bin Ubaid Bin Maimun ne bayan kiya, unhon ne kaha ke hum se Isa Bin Yunus ne, un se Ubaidullah ne, un se Nafi ne aur un se Ibn Umar (Radi Allahu Anhuma) ne ke Nabi Kareem (Sallallahu Alaihi Wasallam) ne ijazat di
.

(Doosri sanad) aur hum se Yahya Bin Musa ne bayan kiya, kaha hum se Muhammad Bin Bakr ne bayan kiya, kaha hum ko Ibn Jurayj ne khabar di, unhein Ubaidullah ne, unhein Nafi ne aur unhein Ibn Umar (Radi Allahu Anhuma) ne ke Nabi Kareem (Sallallahu Alaihi Wasallam) ne ijazat di
.

Aur hum se Muhammad Bin Abdullah Bin Numair ne bayan kiya, un se un ke baap ne bayan kiya, un se Ubaidullah ne bayan kiya, kaha ke mujh se Nafi ne bayan kiya aur un se Ibn Umar (Radi Allahu Anhuma) ne ke Abbas (Radi Allahu Anhu) ne Nabi Kareem (Sallallahu Alaihi Wasallam) se Mina ki raaton mein (hajiyon) ko pani pilane ke liye Makkah mein rehne ki ijazat chahi to Aap (Sallallahu Alaihi Wasallam) ne un ko ijazat de di. Is riwayat ki mutabiat Muhammad Bin Abdullah ke sath Abu Usama Uqbah Bin Khalid aur Abu Zamrah ne ki hai
.

Aur Jabir (Radi Allahu Anhu) ne kaha ke Nabi Kareem (Sallallahu Alaihi Wasallam) ne daswein Zi Al-Hijjah ko chasht ke waqt kankariyan mari theen aur is ke baad ki tareekhon mein sooraj dhal jaane par
.

Hum se Abu Naeem ne bayan kiya, unhon ne kaha hum se Mis'ar ne bayan kiya, un se Wabra ne ke mein ne Abdullah Bin Umar (Radi Allahu Anhuma) se poocha ke mein kankariyan kis waqt maroon? To Aap ne farmaya ke jab tumhara Imam mare to tum bhi maro, lekin dobara mein ne un se yahi masla poocha to unhon ne farmaya ke hum intizar karte rehte aur jab sooraj dhal jata to kankariyan marte
.

Muhammad Bin Kasir ne bayan kiya, kaha ke hum ko Sufyan Suri ne khabar di, unhein Aamash ne, unhein Ibrahim ne aur un se Abdul Rahman Bin Zaid ne bayan kiya ke Abdullah (Radi Allahu Anhu) ne wadi ke nasheeb (batn-e-wadi) mein kharay ho kar kankari mari to mein ne kaha, Aye Abu Abdul Rahman! Kuch log to wadi ke balayi ilaqa se kankariyan marte hain, is ka jawab unhon ne ye diya ke is zaat ki qasam! Jis ke siwa koi mabood nahi yahi (batn-e-wadi) un ke kharay hone ki jagah hai (rami karte waqt) jin par Surah al-Baqarah nazil hui thi Sallallahu Alaihi Wasallam. Abdullah Bin Waleed ne bayan kiya ke un se Sufyan Suri ne aur un se Aamash ne yahi hadees bayan ki
.

Is ko Abdullah Bin Umar (Radi Allahu Anhuma) ne Nabi Kareem (Sallallahu Alaihi Wasallam) se naqal kiya hai
.

Hum se Hafs Bin Umar ne bayan kiya, kaha ke hum se Shuba ne bayan kiya, un se Hakam Bin Utbah ne, un se Ibrahim Nakhai ne, un se Abdul Rahman Bin Yazid ne ke Abdullah Bin Masood (Radi Allahu Anhu) jamrah kubra ke paas pohanche to Kaabah ko apne bayein taraf kiya aur Mina ko dayein taraf, phir saat kankariyon se rami ki aur farmaya ke jin par Surah al-Baqarah nazil hui thi Sallallahu Alaihi Wasallam unhon ne bhi isi tarah rami ki thi. (Yani Rasul Allah Sallallahu Alaihi Wasallam)
.