Hum se Abdullah Bin Yusuf ne bayan kiya, kaha hume Imam Malik ne khabar di, unhein Abdul Rahman Bin Qasim ne, unhein un ke walid ne aur unhein Aisha (Radi Allahu Anha) ne ke Nabi Kareem (Sallallahu Alaihi Wasallam) ki zauja mutahira Safiya Bint Huyayy (Radi Allahu Anha) (Hajjat-ul-Wida ke moqa par) haiza ho gayeen to mein ne is ka zikr Nabi Kareem (Sallallahu Alaihi Wasallam) se kiya, Aap (Sallallahu Alaihi Wasallam) ne farmaya ke phir to ye humein rokein gi, logon ne kaha ke unhon ne tawaf-e-ifazah kar liya hai, to Aap (Sallallahu Alaihi Wasallam) ne farmaya ke phir koi fikr nahi
.

Hum se Abul Numan ne bayan kiya, un se Ayub ne, un se Ikrima ne ke Madinah ke logon ne Ibn Abbas (Radi Allahu Anhuma) se ek aurat ke mutaliq poocha ke jo tawaf karne ke baad haiza ho gayi theen, aap ne unhein bataya ke (unhein theherne ki zaroorat nahi balkey) chali jayein. Lekin poochne walon ne kaha hum aisa nahi karein ge ke aap ki baat par amal to karein aur Zaid Bin Sabit (Radi Allahu Anhum) ki baat chhor dein, Ibn Abbas (Radi Allahu Anhuma) ne farmaya ke jab tum Madinah pohanch jao to ye masla wahan (akabir Sahaba Radi Allahu Anhum se) poochna. Chunancha jab ye log Madinah aaye to poocha, jin akabir se poocha gaya tha un mein Umm-e-Sulaim (Radi Allahu Anha) bhi theen aur unhon ne (un ke jawab mein wahi) Safiya (Radi Allahu Anha) ki hadees bayan ki. Is hadees ko Khalid aur Qatada ne bhi Ikrima se riwayat kiya hai
.

Hum se Abul Numan ne bayan kiya, un se Ayub ne, un se Ikrima ne ke Madinah ke logon ne Ibn Abbas (Radi Allahu Anhuma) se ek aurat ke mutaliq poocha ke jo tawaf karne ke baad haiza ho gayi theen, aap ne unhein bataya ke (unhein theherne ki zaroorat nahi balkey) chali jayein. Lekin poochne walon ne kaha hum aisa nahi karein ge ke aap ki baat par amal to karein aur Zaid Bin Sabit (Radi Allahu Anhum) ki baat chhor dein, Ibn Abbas (Radi Allahu Anhuma) ne farmaya ke jab tum Madinah pohanch jao to ye masla wahan (akabir Sahaba Radi Allahu Anhum se) poochna. Chunancha jab ye log Madinah aaye to poocha, jin akabir se poocha gaya tha un mein Umm-e-Sulaim (Radi Allahu Anha) bhi theen aur unhon ne (un ke jawab mein wahi) Safiya (Radi Allahu Anha) ki hadees bayan ki. Is hadees ko Khalid aur Qatada ne bhi Ikrima se riwayat kiya hai
.

Hum se Muslim ne bayan kiya, kaha ke hum se Wuhaib ne bayan kiya, kaha ke hum se Ibn Taoos ne bayan kiya, un se un ke baap ne aur un se Ibn Abbas (Radi Allahu Anhuma) ne bayan kiya ke aurat ko is ki ijazat hai ke agar wo tawaf-e-ifazah (tawaf-e-ziyarat) kar chuki ho aur phir (tawaf-e-wada se pehle) haiz aa jaye to (apne ghar) wapas chali jaye
.

Kaha mein ne Ibn Umar ko kehte suna ke is aurat ke liye wapasi nahi. Is ke baad mein ne un se suna aap farmate thay ke Nabi Kareem (Sallallahu Alaihi Wasallam) ne auraton ko is ki ijazat di hai
.

Hum se Abul Numan ne bayan kiya, kaha ke hum se Abu Awana ne bayan kiya, un se Mansoor ne, un se Ibrahim Nakhai ne, un se Aswad ne aur un se Aisha (Radi Allahu Anha) ne bayan kiya ke hum Nabi Kareem (Sallallahu Alaihi Wasallam) ke sath nikle, hamari niyat Haj ke siwa aur kuch na thi. Phir jab Nabi Kareem (Sallallahu Alaihi Wasallam) (Makkah) pohanche to Aap (Sallallahu Alaihi Wasallam) ne Bait Allah ka tawaf aur Safa aur Marwah ki sayee ki, lekin Aap (Sallallahu Alaihi Wasallam) ne ihram nahi khola kyunke Aap ke sath qurbani thi. Aap (Sallallahu Alaihi Wasallam) ke sath Aap (Sallallahu Alaihi Wasallam) ki biwiyon ne aur digar ashab ne bhi tawaf kiya aur jin ke sath qurbani nahi theen unhon ne (is tawaf-o-sayee ke baad) ihram khol diya lekin Aisha (Radi Allahu Anha) haiza ho gayi theen, sab ne apne Haj ke tamam manasik ada kar liye thay, phir jab Lailat-ul-Hasba yani rawangi ki raat aayi to Aisha (Radi Allahu Anha) ne arz ki Ya Rasul Allah (Sallallahu Alaihi Wasallam) Aap (Sallallahu Alaihi Wasallam) ke tamam saathi Haj aur Umrah dono kar ke ja rahe hain sirf mein Umrah se mahroom hoon, Aap (Sallallahu Alaihi Wasallam) ne farmaya ke acha jab hum aaye thay to tum (haiz ki wajah se) Bait Allah ka tawaf nahi kar saki theen? Mein ne kaha ke nahi, Aap (Sallallahu Alaihi Wasallam) ne farmaya ke phir apne bhai ke sath Taneem chali ja aur wahan se Umrah ka ihram bandh (aur Umrah kar) hum tumhara falan jagah intizar karein ge, chunancha mein apne bhai (Abdul Rahman Radi Allahu Anhu) ke sath Taneem gayi aur wahan se ihram bandha. Isi tarah Safiya Bint Huyayy (Radi Allahu Anha) bhi haiza ho gayi theen Nabi Kareem (Sallallahu Alaihi Wasallam) ne unhein (azrah-e-muhabbat) farmaya «Aqra Halqa» , to, tu humein rok le gi, kya tu ne qurbani ke din tawaf-e-ziyarat nahi kiya tha? Wo boleen ke kiya tha, is par Aap (Sallallahu Alaihi Wasallam) ne farmaya ke phir koi haraj nahi, chalee chalo. Mein jab aap tak pohanchi to Aap (Sallallahu Alaihi Wasallam) Makkah ke balayi ilaqa par charh rahe thay aur mein utar rahi thi ya ye kaha ke mein charh rahi thi aur Nabi Kareem (Sallallahu Alaihi Wasallam) utar rahe thay. Musaddad ki riwayat mein (Rasul Allah Sallallahu Alaihi Wasallam ke kehne par) haan ke bajaye nahi hai, is ki mutabiat Jareer ne Mansoor ke waste se ”nahi“ ke zikr mein ki hai
.

Hum se Muhammad Bin Musanna ne bayan kiya, kaha hum se Ishaq Bin Yusuf ne bayan kiya, un se Sufyan Suri ne bayan kiya, un se Abdul Aziz Bin Rafiee ne bayan kiya ke mein ne Anas Bin Malik (Radi Allahu Anhu) se poocha, mujhe wo hadees bataye jo aap ko Rasul Allah (Sallallahu Alaihi Wasallam) se yaad ho ke unhon ne athwein Zi Al-Hijjah ke din Zohar ki namaz kahan parhi thi, unhon ne kaha Mina mein, mein ne poocha aur rawangi ke din Asr kahan parhi thi unhon ne farmaya ke Abtah mein aur tum isi tarah karo jis tarah tumhare hakim log karte hon. (Taake fitna waqe na ho)
.

Hum se Abdul Mutaal Bin Talib ne bayan kiya, unhon ne kaha ke hum se Ibn Wahb ne bayan kiya, unhon ne kaha ke mujhe Amr Bin Haris ne khabar di, un se Qatada ne bayan kiya aur un se Anas Bin Malik (Radi Allahu Anhu) ne bayan kiya ke Zohar, Asr, Maghrib, Isha Nabi Kareem (Sallallahu Alaihi Wasallam) ne parhi aur thori der ke liye Muhassab mein so rahe, phir Bait Allah ki taraf sawar ho kar gaye aur tawaf kiya. (Yahan Tawaf-ul-Ziyarah murad hai)
.

Hum se Abu Naeem ne bayan kiya, kaha ke hum se Sufyan ne bayan kiya, un se Hisham Bin Urwah ne, un se un ke walid ne aur un se Aisha (Radi Allahu Anha) ne bayan kiya ke Nabi Kareem (Sallallahu Alaihi Wasallam) Mina se kooch kar ke yahan Muhassab mein is liye utre thay taake aasani ke sath Madinah ko nikal sakein. Aap (Sallallahu Alaihi Wasallam) ki murad Abtah mein utrne se thi
.

Hum se Ali Bin Abdullah ne bayan kiya, kaha hum se Sufyan Bin Uyainah ne bayan kiya, un se Amr Bin Ata Bin Abi Rabah ne bayan kiya aur un se Ibn Abbas (Radi Allahu Anhuma) ne bayan kiya ke Muhassab mein utrna Haj ki koi ibadat nahi hai, ye to sirf Rasul Allah (Sallallahu Alaihi Wasallam) ke qiyam ki jagah thi
.