Hum se Abdullah Bin Maslama Qanabi ne bayan kiya, un se Imam Malik (Rahimahullah) ne, un se Abu Al-Nazar ne, un se Abdullah Bin Abbas (Radi Allahu Anhuma) ke ghulam Umair ne, un se Umm-e-Fazl Bint Haris (Radi Allahu Anha) ne kaha ke un ke yahan logon ka Arafat ke din Rasul Allah (Sallallahu Alaihi Wasallam) ke roze se mutaliq kuch ikhtilaf ho gaya, baaz ne kaha ke Aap (Sallallahu Alaihi Wasallam) (Arafa ke din) roze se hain aur baaz kehte hain ke nahi, is liye unhon ne Aap ke paas doodh ka ek piyala bheja, Nabi Kareem (Sallallahu Alaihi Wasallam) is waqt ont par sawa ho kar Arafat mein wuquf farma rahe thay, Aap ne wo doodh pee liya
.

Aur Abdullah Bin Umar (Radi Allahu Anhuma) ki agar namaz Imam ke sath chhoot jati to bhi jama karte
.

Laith ne bayan kiya ke mujh se Aqeel ne Ibn Shihab se bayan kiya, unhon ne kaha ke mujhe Salim ne khabar di ke Hajjaj Bin Yusuf jis saal Abdullah Bin Zubair (Radi Allahu Anhuma) se larne ke liye Makkah mein utra to is moqa par is ne Abdullah Bin Umar (Radi Allahu Anhuma) se poocha ke Arafa ke din wuquf mein aap kya karte thay? Is par Salim (Rahimahullah) bole ke agar tu sunnat par chalna chahta hai to Arafa ke din namaz dopahar dhalte hi parh lena. Abdullah Bin Umar (Radi Allahu Anhuma) ne farmaya ke Salim ne sach kaha, Sahaba (Radi Allahu Anhum) Nabi Kareem (Sallallahu Alaihi Wasallam) ki sunnat ke mutabiq Zohar aur Asr ek hi sath parhte thay. Mein ne Salim se poocha ke kya Rasul Allah (Sallallahu Alaihi Wasallam) ne bhi isi tarah kiya tha? Salim ne farmaya aur kis ki sunnat par is masle mein chalte ho
.

Hum se Abdullah Bin Maslama ne bayan kiya, unhon ne kaha ke humein Imam Malik ne khabar di, unhein Ibn Shihab ne, unhein Salim Bin Abdullah ne ke Abdul Malik Bin Marwan (Khaleefa) ne Hajjaj ko likha ke Haj ke kaamon mein Abdullah Bin Umar (Radi Allahu Anhuma) ki iqtida kare. Jab Arafa ka din aaya to Abdullah Bin Umar (Radi Allahu Anhuma) aaye mein bhi aap ke sath tha, sooraj dhal chuka tha, aap ne Hajjaj ke dere ke paas aa kar buland awaz se kaha Hajjaj kahan hai? Hajjaj bahar nikla to Ibn Umar (Radi Allahu Anhuma) ne farmaya chal jaldi kar waqt ho gaya. Hajjaj ne kaha abhi se? Ibn Umar (Radi Allahu Anhuma) ne farmaya ke haan. Hajjaj bola ke phir thori muhlat de dijiye, mein abhi ghusl kar ke aata hoon. Phir Abdullah Bin Umar (Radi Allahu Anhuma) (apni sawari se) utar gaye. Hajjaj bahar nikla aur mere aur mere walid (Ibn Umar) ke beech mein chalne laga, mein ne is se kaha ke aaj agar sunnat par amal ki khwahish hai to khutba mukhtasar parh aur wuquf mein jaldi kar. Abdullah Bin Umar (Radi Allahu Anhuma) ne farmaya ke Salim sach kehta hai
.

(Is baab mein hadees nahi hai)
.

Hum se Ali Bin Abdullah ne bayan kiya, kaha ke hum se Sufyan Bin Uyainah ne bayan kiya, kaha hum se Amr Bin Dinar ne bayan kiya, kaha hum se Muhammad Bin Jubair Bin Mutim ne, un se un ke baap ne ke mein apna ek ont talash kar raha tha (Doosri sanad) aur hum se Musaddad ne bayan kiya, kaha hum se Sufyan Bin Uyainah ne bayan kiya, un se Amr Bin Dinar ne, unhon ne Muhammad Bin Jubair se suna ke un ke walid Jubair Bin Mutim ne bayan kiya ke mera ek ont kho gaya tha to mein Arafat mein us ko talash karne gaya, ye din Arafat ka tha, mein ne dekha ke Nabi Kareem (Sallallahu Alaihi Wasallam) Arafat ke maidan mein kharay hain. Meri zaban se nikla qasam Allah ki! Ye to Quraish hain phir ye yahan kyun hain
.

Hum se Farwah Bin Abi Al-Maghra ne bayan kiya, unhon ne kaha ke hum se Ali Bin Mushir ne bayan kiya, un se Hisham Bin Urwah ne, un se Urwah Bin Zubair (Radi Allahu Anhu) ne kaha ke Hums ke siwa baqiya sab log jahiliyat mein nange ho kar tawaf karte thay, Hums Quraish aur is ki aal aulad ko kehte thay, (aur Bani Kinana waghera, jaise Khuza'a) logon ko (Allah ke waste) kapre diya karte thay. (Quraish) ke mard doosre mardon ko taake unhein pehan kar tawaf kar sakein aur (Quraish ki) auratein doosri auraton ko taake wo unhein pehan kar tawaf kar sakein, aur jin ko Quraish kapra nahi dete wo Bait Allah ka tawaf nange ho kar karte. Doosre sab log to Arafat se wapas hote lekin Quraish Muzdalifah hi se (jo Haram mein tha) wapas ho jate. Hisham Bin Urwah ne kaha ke mere baap Urwah Bin Zubair ne mujhe Umm-ul-Momineen Aisha (Radi Allahu Anha) se khabar di ke ye ayat Quraish ke bare mein nazil hui ke ”Phir tum bhi (Quraish) wahin se wapas ao jahan se aur log wapas aate hain“ (yani Arafat se, Surah al-Baqarah) unhon ne bayan kiya ke Quraish Muzdalifah hi se laut aate thay is liye unhein bhi Arafat se lautne ka hukum hua
.

Hum se Abdullah Bin Yusuf Tinisi ne bayan kiya, kaha hum ko Imam Malik ne Hisham Bin Urwah se khabar di, un se un ke walid ne bayan kiya ke Usama Bin Zaid (Radi Allahu Anhuma) se kisi ne poocha (mein bhi wahin maujood tha) ke Hajjat-ul-Wida ke moqa par Arafat se Rasul Allah (Sallallahu Alaihi Wasallam) ke wapas hone ki chaal kya thi? Unhon ne jawab diya ke Aap (Sallallahu Alaihi Wasallam) paon utha kar chalte thay zara taiz, lekin jab jagah pate (hujoom na hota) to taiz chalte thay, Hisham ne kaha ke «Anaq» taiz chalna aur «Nass» «Anaq» se zyada taiz chalne ko kehte hain. «Fajwah» ke mani kushada jagah, is ki jama «Fajwat» aur «Fija» hai jaise Zakat mufrad «Zaka» is ki jama aur Surah Sad mein «Manas» ka jo lafz aaya hai is ke mani bhagna hai
.

Hum se Musaddad ne bayan kiya, kaha hum se Hammad Bin Zaid ne bayan kiya, un se Yahya Bin Saeed ne, un se Musa Bin Uqbah ne un se Abdullah Bin Abbas (Radi Allahu Anhuma) ke ghulam Kuraib ne aur un se Usama Bin Zaid (Radi Allahu Anhuma) ne ke jab Rasul Allah (Sallallahu Alaihi Wasallam) Arafat se wapas hue thay to Aap (Sallallahu Alaihi Wasallam) (raah mein) ek ghati ki taraf mure aur wahan qaza-e-hajat ki phir Aap (Sallallahu Alaihi Wasallam) ne wazu kiya to mein ne poocha Ya Rasul Allah! Kya (Aap Sallallahu Alaihi Wasallam Maghrib ki) namaz parhein ge? Aap (Sallallahu Alaihi Wasallam) ne farmaya namaz aage chal kar parhi jaye gi. (Yani Arafat se Muzdalifah aate hue qaza-e-hajat waghera ke liye rasta mein rukne mein koi haraj nahi hai)
.

Hum se Musa Bin Ismail ne bayan kiya, unhon ne kaha ke hum se Juwayriyah ne Nafi se bayan kiya, unhon ne kaha ke Abdullah Bin Umar (Radi Allahu Anhuma) Muzdalifah mein aa kar namaz Maghrib aur Isha mila kar ek sath parhte, albatta aap is ghati mein bhi murte jahan Rasul Allah (Sallallahu Alaihi Wasallam) mure thay. Wahan aap qaza-e-hajat karte phir wazu karte lekin namaz na parhte, namaz aap Muzdalifah mein aa kar parhte thay
.