Hum se Abu Asim Nabeel ne Umar bin Saeed se byaan kiya ‘ un se Ibn Abi Malaikah ne ke Uqbah bin Harith razi Allahu anhu ne un se byaan kiya ke Rasool Allah salla Allahu alaihi wasallam ne Asr ki namaaz ada ki phir jaldi se Aap salla Allahu alaihi wasallam ghar mein tashreef le gaye . Thori der baad bahar tashreef le aaye . Is par maine poocha ya kisi aur ne poocha to Aap salla Allahu alaihi wasallam ne farmaya ke main ghar ke andar sadqa ke sone ka ek tukra chhor aaya tha mujhe yeh baat pasand nahi aayi ke isay taqseem kiye baghair raat guzaraon pas maine is ko baant diya .

Hum se Muslim bin Ibrahim ne byaan kiya ‘ kaha ke hum se Shubah ne byaan kiya ‘ kaha ke hum se Adi bin Thabit ne byaan kiya ‘ un se Saeed bin Jubair ne ‘ un se Ibn Abbas razi Allahu anhuma ne ke Nabi Karim salla Allahu alaihi wasallam Eid ke din nikle . Pas Aap salla Allahu alaihi wasallam ne (Eid gah mein) do rak'at namaaz parhayi . Na Aap salla Allahu alaihi wasallam ne is se pehle koi namaaz parhi aur na is ke baad . Phir Aap salla Allahu alaihi wasallam auraton ki taraf aaye . Bilal razi Allahu anhu Aap salla Allahu alaihi wasallam ke saath thay . Unhein Aap salla Allahu alaihi wasallam ne waaz o nasihat ki aur un ko sadqa karne ke liye hukm farmaya . Chunanche auraten kangan aur baaliyan (Bilal razi Allahu anhu ke kapre mein) daalne lagein .

Hum se Musa bin Ismail ne byaan kiya ‘ kaha ke hum se Abdul Wahid bin Ziyad ne byaan kiya ‘ kaha ke hum se Abu Burdah bin Abdullah bin Abi Burdah ne byaan kiya ‘ kaha ke hum se Abu Burdah bin Abi Musa ne byaan kiya ‘ aur un se un ke baap Abu Musa ne byaan kiya ke Rasool Allah salla Allahu alaihi wasallam ke paas agar koi mangne wala aata ya Aap salla Allahu alaihi wasallam ke saamne koi haajat pesh ki jati to Aap salla Allahu alaihi wasallam Sahaba-e-Karam se farmate ke tum sifarish karo ke is ka sawab pao ge aur Allah paak apne Nabi ki zaban se jo faisla chahe ga woh de ga .

Hum se Sadqa bin Fadl ne byaan kiya ‘ kaha ke humein Abdah ne Hisham se khabar di ’ unhein un ki biwi Fatimah bint Munzir ne aur un se Asma razi Allahu anha ne byaan kiya ke mujh se Nabi Karim salla Allahu alaihi wasallam ne farmaya ke khairat ko mat rok warna tera rizq bhi rok diya jaye ga .

Hum se Uthman bin Abi Shaiba ne byaan kiya ‘ aur un se Abdah ne yahi hadees riwayat ki ke ginne na lag jaana warna phir Allah bhi tujhe gin gin kar hi de ga .

Hum se Abu Asim (Abu Asim Dahhak) ne byaan kiya aur un se Ibn Juraij ne byaan kiya . (Doosri sanad) aur mujh se Muhammad bin Abdul Rahman ne byaan kiya ‘ un se Hajjaj bin Muhammad ne byaan kiya aur unhon ne kaha ke hum se Ibn Juraij ne byaan kiya ke mujhe Ibn Abi Malaikah ne khabar di ‘ unhein Abbad bin Abdullah bin Zubayr ne Asma bint Abi Bakr razi Allahu anhuma se khabar di ke woh Nabi Karim salla Allahu alaihi wasallam ke haan aayin . Aap salla Allahu alaihi wasallam ne farmaya ke (maal ko) theili mein band kar ke na rakhna warna Allah paak bhi tumhare liye apne khazane mein bandish laga de ga . Jahan tak ho sake logon mein khair khairat taqseem karti reh .

Hum se Qutaibah ne byaan kiya ‘ kaha ke hum se Jarir ne Aamash se byaan kiya ‘ un se Abu Wa'il ne ‘ unhon ne Huzaifah bin Yaman razi Allahu anhu se ke Umar bin Khattab razi Allahu anhu ne farmaya ke fitnah se mutalliq Rasool Allah salla Allahu alaihi wasallam ki hadees Aap logon mein kis ko yaad hai ? Huzaifah razi Allahu anhu ne byaan kiya ke maine kaha main is tarah yaad rakhta hoon jis tarah Nabi Karim salla Allahu alaihi wasallam ne is ko byaan farmaya tha . Is par Umar razi Allahu anhu ne farmaya ke tumhein is ke byaan par jurat hai . Accha to Nabi Karim salla Allahu alaihi wasallam ne fitnon ke baare mein kya farmaya tha ? Maine kaha ke (Aap salla Allahu alaihi wasallam ne farmaya tha) insaan ki aazmaish (fitnah) us ke khandan ‘ aulaad aur parosiyon mein hoti hai aur namaaz ‘ sadqa aur acchi baaton ke liye logon ko hukm karna aur buri baaton se mana karna is fitne ka kaffara ban jati hain . Aamash ne kaha Abu Wa'il kabhi yun kehte thay . Namaaz aur sadqa aur acchi baaton ka hukm dena buri baat se rokna ‘ yeh is fitne ko mita dene wale naik kaam hain . Phir is fitne ke mutalliq Umar razi Allahu anhu ne farmaya ke meri muraad is fitnah se nahi . Main is fitne ke baare mein poochna chahta hoon jo samundar ki tarah thaathein maarta hua phaile ga . Huzaifah razi Allahu anhu ne byaan kiya ‘ maine kaha ke Ameer-ul-Moomineen Aap is fitne ki fikr na kijiye Aap ke aur is fitnah ke darmiyan ek band darwaza hai . Umar razi Allahu anhu ne poocha ke woh darwaza tor diya jaye ga ya sirf khola jaye ga . Unhon ne batlaya nahi balke woh darwaza tor diya jaye ga . Is par Umar razi Allahu anhu ne farmaya ke jab darwaza tor diya jaye ga to phir kabhi bhi band na ho sake ga Abu Wa'il ne kaha ke haan phir hum ruaab ki wajah se Huzaifah razi Allahu anhu se yeh na pooch sake ke woh darwaza kaun hai ? Is liye hum ne Masrooq se kaha ke tum poocho . Unhon ne kaha ke Masrooq rahmatullah alaihi ne poocha to Huzaifah razi Allahu anhu ne farmaya ke darwaza se muraad khud Umar razi Allahu anhu hi thay . Hum ne phir poocha to kya Umar razi Allahu anhu jaante thay ke Aap ki muraad kaun thi ? Unhon ne kaha haan jaise din ke baad raat ke aane ko jaante hain aur yeh is liye ke maine jo hadees byaan ki woh ghalat nahi thi .

Hum se Abdullah bin Muhammad Musandi ne byaan kiya ‘ kaha ke hum se Hisham ne byaan kiya ‘ kaha ke humein Mamar ne Zuhri se khabar di ‘ unhein Urwah ne aur un se Hakeem bin Hizam razi Allahu anhu ne byaan kiya ke maine arz kiya Ya Rasool Allah! In naik kaamon se mutalliq Aap kya farmate hain jinhein main jahiliyat ke zamana mein sadqa ‘ ghulam aazad karne aur silah-e-rehmi ki soorat mein kiya karta tha . Kya un ka mujhe sawab mile ga ? Nabi Karim salla Allahu alaihi wasallam ne farmaya ke tum apni in tamam nekiyon ke saath Islam laye ho jo pehle guzar chuki hain .

Hum se Qutaibah bin Saeed ne byaan kiya ‘ unhon ne kaha ke hum se Jarir ne Aamash se byaan kiya ‘ un se Abu Wa'il ne ‘ un se Masrooq ne aur un se Aisha razi Allahu anha ne ke Rasool Allah salla Allahu alaihi wasallam ne farmaya ke jab biwi apne khawand ke khane mein se kuch sadqa kare aur us ki niyat usay barbad karne ki nahi hoti to usay bhi is ka sawab milta hai aur us ke khawand ko kamane ka sawab milta hai . Isi tarah khazanchi ko bhi is ka sawab milta hai .

Hum se Muhammad bin Alaa ne byaan kiya ‘ kaha ke hum se Abu Usama ne byaan kiya ‘ un se Bureid bin Abdullah ne ‘ un se Abu Burdah ne aur un se Abu Musa razi Allahu anhu ne ke Nabi Karim salla Allahu alaihi wasallam ne farmaya «khazin» musalman amanatdar jo kuch bhi kharch karta hai aur baaz dafa farmaya woh cheez poori tarah deta hai jis ka usay sarmaya ke maalik ki taraf se hukm diya gaya aur us ka dil bhi is se khush hai aur isi ko diya hai jisay dene ke liye maalik ne kaha tha to woh dene wala bhi sadqa dene walon mein se ek hai .