Hum se Saeed bin Yahya ne byaan kiya , kaha mujh se mere walid ne byaan kiya , kaha ke hum se Aamash ne byaan kiya , un se Shaqeeq ne aur un se Abu Masood Ansari razi Allahu Ta'ala anhu ne kaha ke Rasool Allah salla Allahu alaihi wasallam ne jab humein sadqa karne ka hukm diya to hum mein se bahut se bazaar ja kar bojh uthane ki mazdoori karte aur is tarah ek mudd (ghalla ya khajoor waghera) haasil karte . (Jisay sadqa kar dete) lekin aaj hum mein se bahut son ke paas laakh laakh (dirham ya deenaar) maujood hain .

Hum se Sulayman bin Harb ne byaan kiya ‘ kaha ke hum se Shubah ne byaan kiya aur un se Abu Ishaq Amru bin Abdullah Sabiee ne kaha ke maine Abdullah bin Maqal se suna ‘ unhon ne kaha ke maine Adi bin Hatim razi Allahu anhu se suna ‘ unhon ne kaha ke maine Rasool Allah salla Allahu alaihi wasallam ko yeh kehte suna ke Jahannam se bacho agarchay khajoor ka ek tukra de kar hi sahi (magar zaroor sadqa kar ke dozakh ki aag se bachne ki koshish karo) .

Hum se Bishr bin Muhammad ne byaan kiya ‘ kaha ke humein Abdullah bin Mubarak ne khabar di ‘ kaha ke humein Mamar ne Zuhri se khabar di ‘ unhon ne kaha ke mujh se Abdullah bin Abi Bakr bin Hazm ne byaan kiya ‘ un se Urwah bin Zubayr ne aur un se Aisha razi Allahu anha ne ke ek aurat apni do bacchiyon ko liye mangti hui aayi . Mere paas ek khajoor ke siwa is waqt aur kuch na tha maine wahi de di . Woh ek khajoor us ne apni dono bacchiyon mein taqseem kar di aur khud nahi khayi . Phir woh uthi aur chali gayi . Is ke baad Nabi Karim salla Allahu alaihi wasallam tashreef laye to maine Aap salla Allahu alaihi wasallam se is ka haal byaan kiya . Aap salla Allahu alaihi wasallam ne farmaya ke jis ne in bacchiyon ki wajah se khud ko mamooli si bhi takleef mein dala to bacchiyan us ke liye dozakh se bacha'o ke liye aar ban jayeingi .

Allah Ta'ala ka farmaan hai «wa-anfiqu mimma razaqnakum min qabli an ya-tiya ahadakumul-mautu» ”Aur is mein se kharch karo jo Hum ne tumhein diya hai , is se pehle ke tum mein se kisi ko maut aa jaye“ aur Allah Ta'ala ka farmaan «ya-ayyuhal-ladheena aamanu anfiqu mimma razaqnakum min qabli an ya-tiya yaumul-la bai'un feehi» ”Ae logo jo imaan laye ho! Is mein se kharch karo jo Hum ne tumhein diya hai , is se pehle ke woh din aaye jis mein na koi khareed o farokht ho gi .“

Hum se Musa bin Ismail ne byaan kiya ‘ kaha ke hum se Abdul Wahid bin Ziyad ne byaan kiya ‘ kaha ke hum se Amarah bin Qaqaa ne byaan kiya ‘ kaha ke hum se Abu Zurah ne byaan kiya ‘ kaha ke hum se Abu Hurairah razi Allahu anhu ne byaan kiya ke ek shakhs Nabi Karim salla Allahu alaihi wasallam ki khidmat mein hazir hua aur kaha ke Ya Rasool Allah! Kis tarah ke sadqa mein sab se zyada sawab hai ? Aap salla Allahu alaihi wasallam ne farmaya ke is sadqa mein jisay tum sehat ke saath bukhl ke bawajood karo . Tumhein ek taraf to faqeeri ka darr ho aur doosri taraf maaldar banne ki tamanna aur umeed ho aur (is sadqa khairat mein) dheel na honi chahiye ke jab jaan halq tak aa jaye to is waqt to kehne lage ke falan ke liye itna aur falan ke liye itna halanke woh to ab falan ka ho chuka .

Hum se Musa bin Ismail ne byaan kiya ‘ kaha ke hum se Abu Awanah Waddah Yashkuri ne byaan kiya ‘ un se Firas bin Yahya ne un se Shabi ne , un se Masrooq ne aur un se Aisha razi Allahu anha ne ke Nabi Karim salla Allahu alaihi wasallam ki baaz biwiyon ne Aap salla Allahu alaihi wasallam se poocha ke sab se pehle hum mein aakhirat mein Aap salla Allahu alaihi wasallam se kaun ja kar mile gi to Aap salla Allahu alaihi wasallam ne farmaya jis ka haath sab se zyada lamba ho ga . Ab hum ne lakri se naapna shuroo kar diya to Sawdah razi Allahu anha sab se lambe haath wali niklin . Hum ne baad mein samjha ke lambe haath wali hone se Aap salla Allahu alaihi wasallam ki muraad sadqa zyada karne wali se thi . Aur Sawdah razi Allahu anha hum sab se pehle Nabi Karim salla Allahu alaihi wasallam se ja kar milin ‘ sadqa karna Aap razi Allahu anha ko bahut mahboob tha .

Aur Allah Ta'ala ne (Surah Al-Baqarah mein) farmaya «alladheena yunfiqoona amwaalahum bil-laili wan-nahaari sirran wa-alaaniyatan» ”Jo log apne maal kharch karte hain raat mein aur din mein poshida taur par aur zahir ‘ in sab ka in ke Rabb ke paas sawab mile ga ‘ unhein koi darr nahi ho ga aur na unhein kisi qism ka gham ho ga .“

Aur Abu Hurairah razi Allahu anhu ne Nabi Karim salla Allahu alaihi wasallam se riwayat kiya ke ”Ek shakhs ne sadqa kiya aur usay is tarah chhupaya ke us ke bayein haath ko khabar nahi hui ke dahne haath ne kya kharch kiya hai“ aur Allah Ta'ala ne farmaya ”Agar tum sadqa ko zahir kar do to yeh bhi accha hai aur agar poshida taur par do aur do fuqara ko to yeh bhi tumhare liye behtar hai aur tumhare gunah mita de ga aur jo kuch tum karte ho Allah us se poori tarah khabardar hai .“

Hum se Abul Yaman ne byaan kiya ‘ kaha ke humein Shuayb ne khabar di ‘ kaha ke hum se Abul Zinad ne byaan kiya ‘ un se Aaraj ne aur un se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke ek shakhs ne (Bani Israel mein se) kaha ke mujhe zaroor sadqa (aaj raat) dena hai . Chunanche woh apna sadqa le kar nikla aur (nawaqifi se) ek chor ke haath mein rakh diya . Subah hui to logon ne kehna shuroo kiya ke aaj raat kisi ne chor ko sadqa de diya . Is shakhs ne kaha ke ae Allah! Tamam tareef Tere hi liye hai . (Aaj raat) main phir zaroor sadqa karoon ga . Chunanche woh dobara sadqa le kar nikla aur is martaba ek fahisha ke haath mein de aaya . Jab subah hui to phir logon mein charcha hua ke aaj raat kisi ne fahisha aurat ko sadqa de diya . Is shakhs ne kaha ae Allah! Tamam tareef Tere hi liye hai ‘ main zaniya ko apna sadqa de aaya . Accha aaj raat phir zaroor sadqa nikaaloon ga . Chunanche apna sadqa liye hue woh phir nikla aur is martaba ek maaldar ke haath par rakh diya . Subah hui to logon ki zaban par zikr tha ke ek maaldar ko kisi ne sadqa de diya hai . Is shakhs ne kaha ke ae Allah! Hamd Tere hi liye hai . Main apna sadqa (la-ilmi se) chor ‘ fahisha aur maaldar ko de aaya . (Allah Ta'ala ki taraf se) bataya gaya ke jahan tak chor ke haath mein sadqa chale jaane ka sawal hai . To is mein is ka imkan hai ke woh chori se ruk jaye . Isi tarah fahisha ko sadqa ka maal mil jaane par is ka imkan hai ke woh zina se ruk jaye aur maaldar ke haath mein par jaane ka yeh fayda hai ke usay ibrat ho aur phir jo Allah Azzawajal ne usay diya hai ‘ woh kharch kare .

Hum se Muhammad bin Yusuf Faryabi ne byaan kiya ‘ kaha ke hum Israel bin Yunus ne byaan kiya ‘ kaha ke hum se Abujuwairiyah (Hattan bin Khaffaf) ne byaan kiya ke Maan bin Yazid ne un se byaan kiya ‘ unhon ne kaha ke maine aur mere walid aur dada (Akhfash bin Habeeb) ne Rasool Allah salla Allahu alaihi wasallam ke haath par bay'at ki thi . Aap ne meri mangni bhi karayi aur Aap hi ne nikah bhi parhaya tha aur main Aap ki khidmat mein ek muqaddama le kar hazir hua tha . Woh yeh ke mere walid Yazid ne kuch deenaar khairat ki niyat se nikale aur un ko unhon ne masjid mein ek shakhs ke paas rakh diya . Main gaya aur maine un ko us se le liya . Phir jab main unhein le kar walid sahib ke paas aaya to unhon ne farmaya ke qasam Allah ki mera irada tujhe dene ka nahi tha . Yahi muqaddama main Rasool Allah salla Allahu alaihi wasallam ki khidmat mein le kar hazir hua aur Aap ne yeh faisla diya ke dekho Yazid jo tum ne niyat ki thi is ka sawab tumhein mil gaya aur Maan! Jo tu ne le liya woh ab tera ho gaya .