Is par Abdullah bin Abbas razi Allahu anhuma ne bhi taeid ki ke Umar razi Allahu anhu ne bhi aisa hi farmaya tha . Phir Aap byaan karne lage ke main Umar razi Allahu anhu ke saath Makkah se chala jab hum Baida tak pahunche to saamne ek babool ke darakht ke neeche chand sawaar nazar pare . Umar razi Allahu anhu ne kaha ke ja kar dekho to sahi yeh kaun log hain . Un ka byaan hai ke main ne dekha to Suhayb razi Allahu anhu thay . Phir jab is ki itla di to Aap ne farmaya ke unhein bula lao . Main Suhayb razi Allahu anhu ke paas dobara aaya aur kaha ke chaliye Amir-ul-Mumineen bulate hain . Chunanche woh khidmat mein hazir huay . (khair yeh qissa to ho chuka) phir jab Umar razi Allahu anhu zakhmi kiye gaye to Suhayb razi Allahu anhu rone huay andar dakhil huay . Woh keh rahe thay haye mere bhai! haye mere saahib! is par Umar razi Allahu anhu ne farmaya ke Suhayb razi Allahu anhu! tum mujh par rote ho ‘ tum nahin jaante ke Rasool Allah salla Allahu alaihi wasallam ne farmaya tha ke mayyat par is ke ghar walon ke rone se azab hota hai .

Ibn Abbas razi Allahu anhuma ne farmaya ke jab Umar razi Allahu anhu ka intiqal ho gaya to main ne is hadees ka zikr Aisha razi Allahu anha se kiya . Unhon ne farmaya ke rahmat Umar razi Allahu anhu par ho . Bakhuda Rasool Allah salla Allahu alaihi wasallam ne yeh nahin farmaya hai ke Allah Momin par is ke ghar walon ke rone ki wajah se azab kare ga balkay Nabi Karim salla Allahu alaihi wasallam ne yoon farmaya ke Allah Ta'ala kafir ka azab is ke ghar walon ke rone ki wajah se aur zyada kar deta hai . Is ke baad kehne lagein ke Quran ki yeh aayat tum ko bas karti hai ke ”koi kisi ke gunah ka zimmedar aur is ka bojh uthane wala nahin .“ Is par Ibn Abbas razi Allahu anhuma ne is waqt (yani Umm Aban ke janaze mein) Surah an-Najm ki yeh aayat parhi ”aur Allah hi hansata hai aur wahi rulata hai .“ Ibn Abi Mulaykah ne kaha ke Allah ki qasam! Ibn Abbas razi Allahu anhuma ki yeh taqreer sun kar Ibn Umar razi Allahu anhuma ne kuch jawab nahin diya .

Hum se Abdullah bin Yusuf Tanisi ne byaan kiya ‘ unhein Imam Malik ne khabar di ‘ unhein Abdullah bin Abi Bakr ne ‘ unhein un ke baap ne aur unhein Umrah bint Abdur Rahman ne ‘ unhon ne Nabi Karim salla Allahu alaihi wasallam ki biwi Aisha razi Allahu anha se suna . Aap ne kaha ke hum se Abdullah bin Yusuf Tanisi ne byaan kiya ‘ unhein Imam Malik ne khabar di ‘ unhein Abdullah bin Abi Bakr ne ‘ unhein un ke baap ne aur unhein Umrah bint Abdur Rahman ne ‘ unhon ne Nabi Karim salla Allahu alaihi wasallam ki biwi Aisha razi Allahu anha se suna . Aap ne kaha ke Nabi Karim salla Allahu alaihi wasallam ka guzar ek Yahudi aurat par hua jis ke marne par is ke ghar wale ro rahe thay . Is waqt Aap salla Allahu alaihi wasallam ne farmaya ke yeh log ro rahe hain halanke is ko qabr mein azab kiya ja raha hai .

Hum se Ismail bin Khaleel ne byaan kiya ‘ un se Ali bin Mushir ne byaan kiya ‘ un se Abu Ishaq Shaybani ne ‘ un se Abu Burdah ne aur un se un ke waalid Abu Musa Ashari ne ke jab Umar razi Allahu ko zakhmi kiya gaya to Suhayb razi Allahu anhu yeh kehte huay aaye ‘ haye mere bhai! is par Umar razi Allahu anhu ne farmaya ke kya tujh ko maloom nahin ke Nabi Karim salla Allahu alaihi wasallam ne farmaya hai ke murday ko is ke ghar walon ke rone se azab kiya jata hai .

Aur Umar razi Allahu anhu ne farmaya ‘ auraton ko Abu Sulayman (Khalid bin Waleed) par rone de jab tak woh khaak na urayein aur chillayein nahin . «naq-a» sar par mitti daalne ko aur «qalqa» chillane ko kehte hain .

Hum se Abu Naeem ne byaan kiya ‘ kaha ke hum se Saeed bin Ubayd ne ‘ un se Ali bin Rabeeah ne aur un se Mughirah bin Shubah razi Allahu anhu ne ke main ne Nabi Karim salla Allahu alaihi wasallam se suna Aap salla Allahu alaihi wasallam farmate thay ke mere mutaliq koi jhooti baat kehna aam logon se mutaliq jhoot bolne ki tarah nahin hai jo shakhs bhi jaan boojh kar mere oopar jhoot bole woh apna thikana Jahannam mein bana le . Aur main ne Nabi Karim salla Allahu alaihi wasallam se yeh bhi suna ke kisi mayyat par agar nuha o maatam kiya jaye to is nuha ki wajah se bhi is par azab hota hai .

Hum se Abdan Abdullah bin Uthman ne byaan kiya ‘ kaha ke mujhe mere baap ne khabar di ‘ unhein Shubah ne ‘ unhein Qatadah ne ‘ unhein Saeed bin Musayyib ne ‘ unhein Abdullah bin Umar razi Allahu anhuma ne apne baap Umar razi Allahu anhu se ke Nabi Karim salla Allahu alaihi wasallam ne farmaya ke mayyat ko is par nuha kiye jaane ki wajah se bhi qabr mein azab hota hai . Abdan ke saath is hadees ko Abdul Ala ne bhi Yazid bin Zuray ne riwayat kiya . Unhon ne kaha hum se Saeed bin Abi Arubah ne byaan kiya ‘ kaha hum se Qatadah ne . Aur Adam bin Abi Iyas ne Shubah se yoon riwayat kiya ke mayyat par zinda ke rone se azab hota hai .

Hum se Ali bin Abdullah bin Madini ne byaan kiya ‘ un se Sufyan bin Uyaynah ne byaan kiya ‘ kaha ke hum se Muhammad bin Munkadir ne byaan kiya ‘ kaha ke main ne Jabir bin Abdullah Ansari razi Allahu anhuma se suna ‘ unhon ne farmaya ke mere waalid ki laash Uhud ke maidan se laayi gayi . (mushrikon ne) Aap ki surat tak bigar di thi . Naash Rasool Allah salla Allahu alaihi wasallam ke saamne rakkhi gayi . Oopar se ek kapra dhaka hua tha ‘ main ne chaha ke kapre ko hataoon . Lekin meri qaum ne mujhe roka . Phir dobara kapra hatane ki koshish ki . Is martaba bhi meri qaum ne mujh ko rok diya . Is ke baad Rasool Allah salla Allahu alaihi wasallam ke hukm se janaza uthaya gaya . Is waqt kisi zor zor se rone wale ki awaaz sunayi di to Rasool Allah salla Allahu alaihi wasallam ne poocha ke yeh kaun hai ? Logon ne kaha ke yeh Amr ki beti ya (yeh kaha ke) Amr ki behen hain . (naam mein Sufyan ko shak hua tha) Aap salla Allahu alaihi wasallam ne farmaya ke roti kyon hain ? Ya yeh farmaya ke ro-o nahin ke malaika barabar apne paron ka saaya kiye rahe hain jab tak is ka janaza uthaya gaya .

Hum se Abu Naeem ne byaan kiya ‘ ke hum se Sufyan Thauri ne ‘ un se Zubayd Yami ne byaan kiya ‘ un se Ibrahim Nakhai ne ‘ un se Masrooq ne aur un se Abdullah bin Masood razi Allahu anhu ne ke Rasool Allah salla Allahu alaihi wasallam ne farmaya ke jo auratein (kisi ki maut par) apne chehron ko peet-ti aur gareban chaak kar leti hain aur jahiliyat ki baatein bakti hain woh hum mein se nahin hain .

Hum se Abdullah bin Yusuf Tanisi ne byaan kiya ‘ unhein Imam Malik ne khabar di . Unhein Ibn Shihab ne ‘ unhein Aamir bin Saad bin Abi Waqqas ne aur unhein un ke waalid Saad bin Abi Waqqas razi Allahu anhu ne ke Rasool Allah salla Allahu alaihi wasallam Hujjat-ul-Wida ke saal (10 hijri mein) meri iyadat ke liye tashreef laaye . Main sakht bimar tha . Main ne kaha ke mera marz shiddat ikhtiyar kar chuka hai mere paas maal o asbab bohat hai aur meri sirf ek larki hai jo waaris ho gi to kya main apne do tihayi maal ko khairat kar doon ? Aap salla Allahu alaihi wasallam ne farmaya ke nahin . Main ne kaha aadha . Aap salla Allahu alaihi wasallam ne farmaya nahin . Phir Aap salla Allahu alaihi wasallam ne farmaya ke ek tihayi kar do aur yeh bhi bari khairat hai ya bohat khairat hai agar tu apne waarisyon ko apne peeche maaldaar chhor jaye to yeh is se behtar ho ga ke muhtaji mein unhein is tarah chhor kar jaye ke woh logon ke saamne haath phelate phirein . Yeh yaad rakho ke jo kharch bhi tum Allah ki raza ki niyat se karo ge to is par bhi tumhein thawab mile ga . Hatta ke is luqma par bhi jo tum apni biwi ke munh mein rakkho . Phir main ne poocha ke ya Rasool Allah! mere sathi to mujhe chhor kar (Hujjat-ul-Wida kar ke) Makkah se ja rahe hain aur main un se peeche reh raha hoon . Is par Nabi Karim salla Allahu alaihi wasallam ne farmaya ke yahan reh kar bhi agar tum koi nek amal karo ge to is se tumhare darje buland hon ge aur shayad abhi tum zinda raho ge aur bohat se logon ko (Musalmanon ko) tum se faida pahunche ga aur bohaton ko (kuffar o murtadeen ko) nuqsan . (Phir Aap salla Allahu alaihi wasallam ne dua farmayi) Ae Allah! mere sathiyon ko hijrat par istiqlal ata farma aur un ke qadam peeche ki taraf na lauta . Lekin museebat zada Saad bin Khawlah thay aur Rasool Allah salla Allahu alaihi wasallam ne un ke Makkah mein wafat pa jaane ki wajah se izhaar-e-gham kiya tha .