Aur Ibn Umar razi Allahu anhuma ne Saeed bin Zayd razi Allahu anhu ke bache (Abdur Rahman) ke khushbu lagayi phir us ki naash utha kar le gaye aur namaaz parhi , phir wuzu nahin kiya . Ibn Abbas razi Allahu anhuma ne farmaya ke Musalman najis nahin hota , zinda ho ya murda , Saad razi Allahu anhu ne farmaya ke agar (Saeed bin Zayd razi Allahu anhu) ki naash najis hoti to main ise chhoota hi nahin . Nabi Karim salla Allahu alaihi wasallam ka irshad hai ke Momin napak nahin hota .

Hum se Ismail bin Abdullah ne byaan kiya , unhon ne kaha ke mujh se Imam Malik ne byaan kiya , un se Ayub Sakhtiyani ne aur un se Muhammad bin Sirin ne , un se Umm Atiya Ansari razi Allahu anha ne byaan kiya ke jab Rasool Allah salla Allahu alaihi wasallam ki beti (Zaynab ya Umm Kulsoom razi Allahu anhuma) ki wafat hui Aap salla Allahu alaihi wasallam wahan tashreef laaye aur farmaya ke teen ya paanch martaba ghusl de do aur agar munasib samjho to is se bhi zyada de sakti ho . Ghusl ke paani mein beri ke patte mila lo aur aakhir mein kafoor ya (yeh kaha ke) kuch kafoor ka istemal kar lena aur ghusl se farigh hone par mujhe khabar de dena . Chunanche hum ne jab ghusl de liya to Aap salla Allahu alaihi wasallam ko khabar dedi . Aap salla Allahu alaihi wasallam ne humein apna izaar diya aur farmaya ke ise un ki qamees bana do . Aap salla Allahu alaihi wasallam ki murad apne izaar se thi .

Hum se Muhammad ne byaan kiya , unhon ne kaha ke hum se Abdul Wahhab Saqafi ne byaan kiya , un se Ayub ne , un se Muhammad ne , un se Umm Atiya razi Allahu anha ne ke hum Rasool Allah salla Allahu alaihi wasallam ki beti ko ghusl de rahi thin ke Aap salla Allahu alaihi wasallam tashreef laaye aur farmaya ke teen ya paanch martaba ghusl do ya is se bhi zyada , paani aur beri ke patton se aur aakhir mein kafoor bhi istemal karna . Phir farigh ho kar mujhe khabar de dena . Jab hum farigh huay to Aap salla Allahu alaihi wasallam ko khabar kar di . Aap salla Allahu alaihi wasallam ne apna izaar inayat farmaya aur farmaya ke yeh andar is ke badan par lapait do .

Ayub ne kaha ke mujh se Hafsa ne bhi Muhammad bin Sirin ki hadees ki tarah byaan kiya tha . Hafsa ki hadees mein tha ke taaq martaba ghusl dena aur is mein yeh tafseel thi ke teen ya paanch ya saat martaba (ghusl dena) aur is mein yeh bhi byaan tha ke mayyat ke dayein taraf se aaza-e-wuzu se ghusl shuru kiya jaye . Yeh bhi isi hadees mein tha ke Umm Atiya razi Allahu anha ne kaha ke hum ne kanghi kar ke un ke baalon ko teen latton mein taqseem kar diya tha .

Hum se Ali bin Abdullah ne byaan kiya , unhon ne kaha ke hum se Ismail bin Ibrahim ne byaan kiya , unhon ne kaha ke hum se Khalid ne byaan kiya , un se Hafsa bint Sirin ne aur un se Umm Atiya razi Allahu anha ne ke Rasool Allah salla Allahu alaihi wasallam ne apni beti ke ghusl ke waqt farmaya tha ke dayein taraf se aur aaza-e-wuzu se ghusl shuru karna .

Hum se Yahya bin Musa ne byaan kiya , kaha ke hum se Wakee ne byaan kiya , un se Sufyan ne , un se Khalid Hazza ne , un se Hafsa bint Sirin ne aur un se Umm Atiya razi Allahu anha ne ke Rasool Allah salla Allahu alaihi wasallam ki saahibzadi ko hum ghusl de rahi thin . Jab hum ne ghusl shuru kar diya to Aap salla Allahu alaihi wasallam ne farmaya ke ghusl dayein taraf se aur aaza-e-wuzu se shuru karo .

Hum se Abdur Rahman bin Hammad ne byaan kiya , kaha ke hum ko Ibn Awn ne khabar di , unhein Muhammad ne , un se Umm Atiya razi Allahu anha ne byaan kiya ke Nabi Karim salla Allahu alaihi wasallam ki ek saahibzadi ka intiqal ho gaya . Is mauqe par Aap salla Allahu alaihi wasallam ne humein farmaya ke tum ise teen ya paanch martaba ghusl do aur agar munasib samjho to is se zyada martaba bhi ghusl de sakti ho . Phir farigh ho kar mujhe khabar dena . Chunanche jab hum ghusl de chakein to Aap salla Allahu alaihi wasallam ko khabar di aur Aap salla Allahu alaihi wasallam ne apna izaar inayat farmaya aur farmaya ke ise is ke badan se lapait do .

Hum se Hamid bin Amr ne byaan kiya , kaha ke hum se Hammad bin Zayd ne byaan kiya , un se Ayub ne , un se Muhammad ne aur un se Umm Atiya razi Allahu anha ne ke Nabi Karim salla Allahu alaihi wasallam ki ek beti ka intiqal ho gaya tha . Is liye Aap salla Allahu alaihi wasallam bahar tashreef laaye aur farmaya ke ise teen ya paanch martaba ghusl de do aur agar tum munasib samjho to is se bhi zyada paani aur beri ke patton se nehlao aur aakhir mein kafoor ya (yeh kaha ke) kuch kafoor ka bhi istemal karna . Phir farigh ho kar mujhe khabar dena . Umm Atiya razi Allahu anha ne byaan kiya ke jab hum farigh huay to hum ne kehla bhijwaya . Aap salla Allahu alaihi wasallam ne apna tehband humein diya aur farmaya ke ise andar jism par lapait do . Ayub ne Hafsa bint Sirin se riwayat ki , un se Umm Atiya ne isi tarah hadees byaan ki .

Aur Umm Atiya razi Allahu anha ne is riwayat mein yoon kaha ke Nabi Karim salla Allahu alaihi wasallam ne farmaya ke teen ya paanch ya saat martaba ya agar tum munasib samjho to is se bhi zyada ghusl de sakti ho . Hafsa razi Allahu anha ne byaan kiya ke Umm Atiya razi Allahu anha ne farmaya ke hum ne un ke sar ke baal teen latton mein taqseem kar diye thay .

Aur Ibn Sirin rahimahullah ne kaha ke mayyat (aurat) ke sar ke baal kholne mein koi haraj nahin .