Hum se Qubaysah bin Uqbah ne byaan kiya ‘ unhon ne kaha ke hum se Sufyan Thauri ne byaan kiya ‘ un se Khalid Hazza ne ‘ un se Umm Huzayl Hafsa bint Sirin ne ‘ un se Umm Atiya razi Allahu anha ne byaan kiya ke humein (auraton ko) janaze ke saath chalne se mana kiya gaya magar takeed se mana nahin hua .

Hum se Musaddad bin Musarhad ne byaan kiya ‘ unhon ne kaha ke hum se Bishr bin Mufaddal ne byaan kiya ‘ unhon ne kaha ke hum se Salamah bin Alqamah ne aur un se Muhammad bin Sirin ne ke Umm Atiya razi Allahu anha ke ek bete ka intiqal ho gaya . Intiqal ke teesre din unhon ne ”sufrah khuloog“ (ek qism ki zard khushbu) mangwayi aur ise apne badan par lagaya aur farmaya ke khawand ke siwa kisi doosre par teen din se zyada sog karne se humein mana kiya gaya hai .

Hum se Abdullah bin Zubayr Humaydi ne byaan kiya ‘ unhon ne kaha ke hum se Sufyan Thauri ne byaan kiya ‘ unhon ne kaha ke hum se Ayub bin Musa ne byaan kiya ‘ unhon ne kaha ke mujhe Humayd bin Nafi ne Zaynab bint Abi Salamah se khabar di ke Abu Sufyan razi Allahu anhu ki wafat ki khabar jab Shaam se aayi to Umm Habiba razi Allahu anha (Abu Sufyan razi Allahu anhu ki saahibzadi aur Umm al-Mumineen) ne teesre din ”sufrah“ (khushbu) mangwa kar apne donon rukhsaaron aur baazuon par mala aur farmaya ke agar main ne Nabi Karim salla Allahu alaihi wasallam se yeh na suna hota ke koi bhi aurat jo Allah aur Aakhirat ke din par iman rakhti ho is ke liye jaiz nahin hai ke woh shauhar ke siwa kisi ka sog teen din se zyada manaye aur shauhar ka sog chaar maheene das din kare . To mujhe is waqt is khushbu ke istemal ki zaroorat nahin thi .

Hum se Ismail bin Abi Uwais ne byaan kiya ‘ unhon ne kaha ke mujh se Imam Malik ne byaan kiya ‘ un se Abdullah bin Abi Bakr ne byaan kiya ‘ un se Muhammad bin Amr bin Hazm ne ‘ un se Humayd bin Nafi ne ‘ un ko Zaynab bint Abi Salamah razi Allahu anha ne khabar di ke woh Nabi Karim salla Allahu alaihi wasallam ki zauja mutahira Umm Habiba razi Allahu anha ke paas gayi to unhon ne farmaya ke main ne Rasool Allah salla Allahu alaihi wasallam se suna hai ke koi bhi aurat jo Allah aur Yaum-e-Aakhirat par iman rakhti ho is ke liye shauhar ke siwa kisi murday par bhi teen din se zyada sog manana jaiz nahin hai . Han shauhar par chaar maheene das din tak sog manaye .

Phir main Zaynab bint Jahsh razi Allahu anha ke yahan gayi jabke un ke bhai ka intiqal hua ‘ unhon ne khushbu mangwayi aur ise lagaya ‘ phir farmaya ke mujhe khushbu ki koi zaroorat na thi lekin main ne Nabi Karim salla Allahu alaihi wasallam ko mimbar par yeh kehte huay suna hai ke kisi bhi aurat ko jo Allah aur Yaum-e-Aakhirat par iman rakhti ho ‘ jaiz nahin hai ke kisi mayyat par teen din se zyada sog kare . Lekin shauhar ka sog (iddat) chaar maheene das din tak kare .

Hum se Adam bin Abi Iyas ne byaan kiya ‘ kaha ke hum se Shubah ne byaan kiya ‘ un se Thabit ne byaan kiya aur un se Anas bin Malik razi Allahu anhu ne ke Nabi Karim salla Allahu alaihi wasallam ka guzar ek aurat par hua jo qabr par baithi ro rahi thi . Aap salla Allahu alaihi wasallam ne farmaya ke Allah se dar aur sabr kar . Woh boli jao jee pare hato . Yeh museebat tum par pari hoti to pata chalta . Woh Aap salla Allahu alaihi wasallam ko pehchan na saki thi . Phir jab logon ne ise bataya ke yeh Nabi Karim salla Allahu alaihi wasallam thay , to ab woh (ghabra kar) Nabi Karim salla Allahu alaihi wasallam ke darwaza par pahunchi . Wahan ise koi darban na mila . Phir us ne kaha ke main Aap ko pehchan na saki thi . (maaf farmaiye) to Aap salla Allahu alaihi wasallam ne farmaya ke sabr to jab sadma shuru ho is waqt karna chahiye (ab kya hota hai) .

Kyonke Allah Paak ne Surah at-Tahreem mein farmaya ke apne nafs ko aur apne ghar walon ko Dozakh ki aag se bachao yani un ko bure kaamon se mana karo aur Nabi Karim salla Allahu alaihi wasallam ne farmaya tum mein har koi nigahban hai aur apne matahaton se poocha jaye ga aur agar yeh rona peetna is ke khandan ki rasm na ho aur phir achanak koi is par rone lage to Aisha razi Allahu anha ka daleel lena is aayat se sahih hai ke koi bojh uthane wala doosre ka bojh nahin uthaye ga . Aur koi bojh uthane wali jaan doosre ko apna bojh uthane ko bulaye to woh is ka bojh nahin uthaye ga . Aur baghair nuha chalaye peete rona durust hai . Aur Nabi Karim salla Allahu alaihi wasallam ne farmaya ke dunya mein jab koi nahaq khoon hota hai to Adam ke pehle bete Qabeel par is khoon ka kuch wabal parta hai kyonke nahaq khoon ki bina sab se pehle isi ne daali .

Hum se Abdan aur Muhammad bin Muqatil ne byaan kiya ‘ unhon ne kaha ke humein Imam Abdullah bin Mubarak ne khabar di ‘ kaha ke hum ko Asim bin Sulayman ne khabar di ‘ unhein Abu Usman Abdur Rahman Nahdi ne ‘ kaha ke mujh se Usama bin Zayd razi Allahu anhuma ne byaan kiya ke Nabi Karim salla Allahu alaihi wasallam ki ek saahibzadi (Zaynab razi Allahu anha) ne Aap salla Allahu alaihi wasallam ko itla karayi ke mera ek larka marne ke qareeb hai ‘ is liye Aap salla Allahu alaihi wasallam tashreef layein . Aap salla Allahu alaihi wasallam ne unhein salam kehlwaya aur kehlwaya ke Allah Ta'ala hi ka saara maal hai ‘ jo le liya woh isi ka tha aur jo us ne diya woh bhi isi ka tha aur har cheez us ki bargah se waqt-e-muqarrara par hi waqia hoti hai . Is liye sabr karo aur Allah Ta'ala se thawab ki umeed rakho . Phir Zaynab razi Allahu anha ne qasam de kar apne yahan bulwa bheja . Ab Rasool Allah salla Allahu alaihi wasallam jaane ke liye uthe . Aap salla Allahu alaihi wasallam ke saath Saad bin Ubadah ‘ Ma'az bin Jabal ‘ Ubayy bin Ka'ab ‘ Zayd bin Thabit aur bohat se doosre sahaba razi Allahu anhum bhi thay . Bache ko Rasool Allah salla Allahu alaihi wasallam ke saamne kiya gaya . Jis ki jankani ka aalam tha . Abu Usman ne kaha ke mera khayal hai ke Usama razi Allahu anhu ne farmaya ke jaise purana mashkeeza hota hai (aur paani ke takrane ki andar se awaaz hoti hai . Isi tarah jankani ke waqt bacha ke halaq se awaaz aa rahi thi) yeh dekh kar Rasool Allah salla Allahu alaihi wasallam ki aankhon se aansu beh nikle . Saad razi Allahu anhu bol uthe ke ya Rasool Allah! yeh rona kaisa hai ? Aap salla Allahu alaihi wasallam ne farmaya ke yeh to Allah ki rahmat hai ke jise Allah Ta'ala ne apne (nek) bandon ke dilon mein rakkha hai aur Allah Ta'ala bhi apne in raham dil bandon par raham farmata hai jo doosron par raham karte hain .

Hum se Abdullah bin Muhammad Musandi ne byaan kiya ‘ kaha hum se Abu Aamir Aqdi ne byaan kiya ‘ kaha hum se Falih bin Sulayman ne byaan kiya ‘ un se Hilal bin Ali ne aur un se Anas bin Malik razi Allahu anhu ne ke hum Nabi Karim salla Allahu alaihi wasallam ki ek beti (Umm Kulsoom razi Allahu anha) ke janaza mein hazir thay . (woh Uthman Ghani razi Allahu anhu ki biwi thin . jin ka 5 hijri mein intiqal hua) Nabi Karim salla Allahu alaihi wasallam qabr par baithe huay thay . Unhon ne kaha ke main ne dekha ke Aap salla Allahu alaihi wasallam ki aankhein aansuon se bhar aayi thin . Nabi Karim salla Allahu alaihi wasallam ne poocha . Kya tum mein koi aisa shakhs bhi hai ke jo aaj ki raat aurat ke paas na gaya ho . Is par Abu Talha razi Allahu anhu ne kaha ke main hoon . Rasool Allah salla Allahu alaihi wasallam ne farmaya ke phir qabr mein tum utro . Chunanche woh un ki qabr mein utre .

Hum se Abdan ne byaan kiya ‘ unhon ne kaha ke hum se Abdullah bin Mubarak ne byaan kiya ‘ unhon ne kaha ke hum ko Ibn Jurayj ne khabar di ‘ unhon ne kaha ke mujhe Abdullah bin Ubaydullah bin Abi Mulaykah ne khabar di ke Uthman razi Allahu anhu ki ek saahibzadi (Umm Aban) ka Makkah mein intiqal ho gaya tha . Hum bhi un ke janaze mein hazir huay . Abdullah bin Umar razi Allahu anhuma aur Abdullah bin Abbas razi Allahu anhuma bhi tashreef laaye . Main in donon hazrat ke darmiyan mein baitha hua tha ya yeh kaha ke main ek buzurg ke qareeb baith gaya aur doosre buzurg baad mein aaye aur mere baazu mein baith gaye . Abdullah bin Umar razi Allahu anhuma ne Amr bin Uthman se kaha (jo Umm Aban ke bhai thay) rone se kyon nahin rokte . Nabi Karim salla Allahu alaihi wasallam ne to farmaya hai ke mayyat par ghar walon ke rone se azab hota hai .