Aur Abu Hamzah ne Amash se byaan kiya ‘ un se Amr ne ‘ un se Ibn Abi Layla ne ke main Qays aur Sahl razi Allahu anhuma ke saath tha . In donon ne byaan kiya ke hum Rasool Allah salla Allahu alaihi wasallam ke saath thay . Aur Zakariya ne kaha un se Shabi ne aur un se Ibn Abi Layla ne ke Abu Masood aur Qays razi Allahu anhuma janaza ke liye kharay ho jaate thay .

Hum se Abdul Aziz ne byaan kiya ‘ unhon ne kaha ke hum se Layth ne byaan kiya ‘ unhon ne kaha ke hum se Saeed Maqburi ne byaan kiya ‘ un se un ke baap Kaysan ne ke unhon ne Abu Saeed Khudri razi Allahu anhu se suna ke Rasool Allah salla Allahu alaihi wasallam ne farmaya ke jab mayyat charpayi par rakkhi jaati hai aur mard ise kandhon par uthate hain to agar woh nek ho to kehta hai ke mujhe aage le chalo . Lekin agar nek nahin to kehta hai haye barbadi! mujhe kahan liye ja rahe ho . Is awaaz ko insaan ke siwa tamam Allah ki makhlooq sunti hai . Agar insaan kahin sun paye to be-hosh ho jaye .

Aur Anas razi Allahu anhu ne kaha ke tum janaze ko pahuncha dene wale ho tum is ke saamne bhi chal sakte ho peeche bhi ‘ dayein bhi aur bayein bhi ‘ sab taraf chal sakte ho aur Anas razi Allahu anhu ke siwa aur logon ne kaha janaze ke qareeb chalna chahiye .

Hum se Ali bin Abdullah Madini ne byaan kiya ‘ kaha ke hum se Sufyan ne byaan kiya ‘ unhon ne kaha ke hum ne Zuhri se sun kar yeh hadees yaad ki ‘ unhon ne Saeed bin Musayyib se aur unhon ne Abu Hurairah razi Allahu anhu se ke Nabi Karim salla Allahu alaihi wasallam ne farmaya ke janaza le kar jald chala karo kyonke agar woh nek hai to tum is ko bhalayi ki taraf nazdeek kar rahe ho aur agar is ke siwa hai to ek shar hai jise tum apni gardanon se utarte ho .

Hum se Abdullah bin Yusuf Tanisi ne byaan kiya ‘ unhon ne kaha ke hum se Layth ne byaan kiya ‘ unhon ne kaha ke hum se Saeed Maqburi ne byaan kiya . Un se un ke waalid (Kaysan) ne aur unhon ne Abu Saeed Khudri razi Allahu anhu se suna ‘ Aap ne kaha ke Nabi Karim salla Allahu alaihi wasallam farmaya karte thay ke jab mayyat charpayi par rakkhi jaati hai aur log ise kandhon par uthate hain is waqt agar woh marne wala nek hota hai to kehta hai ke mujhe jald aage barhaye chalo . Lekin agar nek nahin hota to kehta hai ke haye barbadi! mujhe kahan liye ja rahe ho . Is ki yeh awaaz insaan ke siwa har Allah ki makhlooq sunti hai . Kahin agar insaan sun paye to be-hosh ho jaye .

Hum se Musaddad ne byaan kiya ‘ unhon ne kaha ke hum se Abu Awanah Waddah Yashkuri ne byaan kiya ‘ un se Qatadah ne byaan kiya ‘ un se Ata ne aur un se Jabir bin Abdullah razi Allahu anhuma ne ke jab Rasool Allah salla Allahu alaihi wasallam ne Najashi ki namaaz-e-janaza parhi to main doosri ya teesri saff mein tha .

Hum se Musaddad ne byaan kiya ‘ unhon ne kaha ke hum se Yazid bin Zuray ne byaan kiya ‘ unhon ne kaha ke hum se Mamar ne ‘ un se Zuhri ne ‘ un se Saeed ne aur un se Abu Hurairah razi Allahu anhu ne ke Nabi Karim salla Allahu alaihi wasallam ne apne ashaab ko Najashi ki wafat ki khabar sunayi ‘ phir Aap salla Allahu alaihi wasallam aage barh gaye aur logon ne Aap salla Allahu alaihi wasallam ke peeche saffein bana lein ‘ phir Aap salla Allahu alaihi wasallam ne chaar martaba takbir kahi .

Hum se Muslim bin Ibrahim ne byaan kiya ‘ kaha ke hum se Shubah ne byaan kiya ‘ kaha ke hum se Shaybani ne ‘ un se Shabi ne byaan kiya ke mujhe Nabi Karim salla Allahu alaihi wasallam ke ek sahabi ne khabar di ke Nabi Karim salla Allahu alaihi wasallam ek qabr par aaye jo aur qabron se alag thalag thi . Sahaba Kiram razi Allahu anhum ne saff bandi ki aur Aap salla Allahu alaihi wasallam ne chaar takbirain kahein . Main ne poocha ke yeh hadees Aap se kis ne byaan ki hai ? Unhon ne bataya ke Ibn Abbas razi Allahu anhuma ne .

Hum se Ibrahim bin Musa ne byaan kiya ‘ kaha ke hum ko Hisham bin Yusuf ne khabar di ke unhein Ibn Jurayj ne khabar di ‘ unhon ne byaan kiya ke mujhe Ata bin Abi Rabah ne khabar di ‘ unhon ne Jabir bin Abdullah razi Allahu anhuma se suna ke Nabi Karim salla Allahu alaihi wasallam ne farmaya ke aaj Habsh ke ek mard-e-salih (Najashi Habsh ke baadshah) ka intiqal ho gaya hai . Aao un ki namaaz-e-janaza parho . Jabir razi Allahu anhu ne byaan kiya ke phir hum ne saff bandi kar li aur Nabi Karim salla Allahu alaihi wasallam ne un ki namaaz-e-janaza parhayi . Hum saff baandhe kharay thay . Abu al-Zubayr ne Jabir razi Allahu anhu ke hawala se naqal kiya ke main doosri saff mein tha .

Hum se Musa bin Ismail ne byaan kiya ‘ kaha ke hum se Abdul Wahid ne byaan kiya ‘ kaha ke hum se Shaybani ne byaan kiya ‘ un se Aamir ne aur un se Ibn Abbas razi Allahu anhuma ne byaan kiya ke Rasool Allah salla Allahu alaihi wasallam ka guzar ek qabr par hua . Mayyat ko abhi raat hi dafnaya gaya tha . Nabi Karim salla Allahu alaihi wasallam ne daryaft farmaya ke dafan kab kiya gaya hai ? Logon ne kaha ke guzishta raat . Aap salla Allahu alaihi wasallam ne farmaya ke mujhe kyon nahin itla karayi ? Logon ne arz kiya ke andheri raat mein dafan kiya gaya ‘ is liye hum ne Aap ko jagana munasib nahin samjha . Phir Aap salla Allahu alaihi wasallam kharay ho gaye aur hum ne Aap salla Allahu alaihi wasallam ke peeche saffein bana lein . Ibn Abbas razi Allahu anhuma ne byaan kiya ke main bhi unhein mein tha (nabaligh tha lekin) namaaz-e-janaza mein shirkat ki .