Hum se Muhammad bin Fadl ne kiya ‘ unhon ne kaha ke hum se Hammad bin Zayd ne byaan kiya ‘ un se Thabit ne byaan kiya ‘ un se Abu Rafi ne aur un se Abu Hurairah razi Allahu anhu ne ke kaale rang ka ek mard ya ek kaali aurat masjid ki khidmat kiya karti thin ‘ un ki wafat ho gayi lekin Nabi Karim salla Allahu alaihi wasallam ko un ki wafat ki khabar kisi ne nahin di . Ek din Aap salla Allahu alaihi wasallam ne khud yaad farmaya ke woh shakhs dikhayi nahin deta . Sahaba ne kaha ke ya Rasool Allah (salla Allahu alaihi wasallam)! un ka to intiqal ho gaya . Aap salla Allahu alaihi wasallam ne farmaya ke phir tum ne mujhe khabar kyon nahin di ? Sahaba ne arz ki ke yeh wujooh thin (is liye Aap ko takleef nahin di gayi) goya logon ne un ko haqeer jaan kar qabil-e-tawajjoh nahin samjha lekin Aap salla Allahu alaihi wasallam ne farmaya ke chalo mujhe un ki qabr bata do . Chunanche Aap salla Allahu alaihi wasallam is ki qabr par tashreef laaye aur is par namaaz-e-janaza parhi .

Hum se Ayash bin Waleed ne byaan kiya ‘ kaha ke hum se Abdul Ala ne byaan kiya ‘ kaha ke hum se Saeed bin Abi Arubah ne byaan kiya . (Doosri sanad) Imam Bukhari rahimahullah ne kaha ke mujh se Khaleefa bin Khayyat ne byaan kiya ‘ un se Yazid bin Zuray ne ‘ un se Saeed bin Abi Arubah ne ‘ un se Qatadah ne aur un se Anas razi Allahu anhu ne ke Nabi Karim salla Allahu alaihi wasallam ne farmaya ke aadmi jab qabr mein rakkha jata hai aur dafan kar ke is ke log peeth mor kar rukhsat hote hain to woh un ke jooton ki awaaz sunta hai . Phir do farishte aate hain ise bithate hain aur poochte hain ke is shakhs (Muhammad salla Allahu alaihi wasallam) ke mutaliq tumhara kya aeteqad hai ? Woh jawab deta hai ke main gawahi deta hoon ke woh Allah ke bande aur us ke Rasool hain . Is jawab par is se kaha jata hai ke yeh dekh Jahannam ka apna ek thikana lekin Allah Ta'ala ne Jannat mein tere liye ek makaan is ke badle mein bana diya hai . Nabi Karim salla Allahu alaihi wasallam ne farmaya ke phir is banda-e-momin ko Jannat aur Jahannam donon dikhayi jaati hain aur raha kafir ya munafiq to is ka jawab yeh hota hai ke mujhe maloom nahin ‘ main ne logon ko ek baat kehte suna tha wahi main bhi kehta raha . Phir is se kaha jata hai ke na tu ne kuch samjha aur na (achhe logon ki) pairwi ki . Is ke baad ise ek lohay ke hathaure se bare zor se maara jata hai aur woh itne bhayanak tareeqe se cheekhta hai ke insaan aur jinn ke siwa ardgard ki tamam makhlooq sunti hai .

Hum se Mahmood bin Ghaylan ne byaan kiya ‘ kaha ke hum se Abdur Razzaq ne byaan kiya ‘ kaha ke hum ko Mamar ne khabar di ‘ unhein Abdullah bin Tawoos ne ‘ unhein un ke waalid ne aur un se Abu Hurairah razi Allahu anhu ne byaan kiya ke Malik-ul-Maut (aadmi ki shakal mein) Musa alaihis salam ke paas bheje gaye . Woh jab aaye to Musa alaihis salam ne (na pehchan kar) unhein ek zor ka tamancha maara aur un ki aankh phore daali . Woh wapas apne Rab ke huzoor mein pahunche aur arz kiya ke ya Allah! tu ne mujhe aise bande ki taraf bheja jo marna nahin chahta . Allah Ta'ala ne un ki aankh pehle ki tarah kar di aur farmaya ke dobara ja aur un se keh ke Aap apna haath ek bail ki peeth par rakhiye aur peeth ke jitne baal Aap ke haath talle aa jayein un ke har baal ke badle ek saal ki zindagi di jaati hai . (Musa alaihis salam tak jab Allah Ta'ala ka yeh paigham pahuncha to) Aap ne kaha ke ae Allah! phir kya ho ga ? Allah Ta'ala ne farmaya ke phir bhi maut aani hai . Musa alaihis salam bole to abhi kyon na aa jaye . Phir unhon ne Allah se dua ki ke unhein ek patthar ki maar par Arz-e-Muqaddas se qareeb kar diya jaye . Abu Hurairah razi Allahu anhu ne byaan kiya ke Nabi Karim salla Allahu alaihi wasallam ne farmaya ke agar main wahan hota to tumhein un ki qabr dikhata ke laal teele ke paas raste ke qareeb hai .

Hum se Uthman bin Abi Shaybah ne byaan kiya ‘ kaha ke hum se Jarir ne byaan kiya ‘ un se Shaybani ne ‘ un se Shabi ne aur un se Ibn Abbas razi Allahu anhuma ne byaan kiya ke Nabi Karim salla Allahu alaihi wasallam ne ek aise shakhs ki namaaz-e-janaza parhi jin ka intiqal raat ke waqt hua (aur ise raat hi mein dafan kar diya gaya tha) Aap salla Allahu alaihi wasallam aur Aap ke ashaab kharay huay aur Aap salla Allahu alaihi wasallam ne un ke mutaliq poocha tha ke yeh kin ki qabr hai . Logon ne bataya ke falan ki hai jise kal raat hi dafnaya gaya hai . Phir sab ne (doosre roz) namaaz-e-janaza parhi .

Hum se Ismail bin Abi Uwais ne byaan kiya ‘ kaha mujh se Imam Malik ne byaan kiya ‘ un se Hisham bin Urwah ne ‘ un se un ke baap ne aur un se Aisha razi Allahu anha ne ke jab Nabi Karim salla Allahu alaihi wasallam bimar pare to Aap salla Allahu alaihi wasallam ki baaz biwiyon (Umm Salamah razi Allahu anha aur Umm Habiba razi Allahu anha) ne ek girjay ka zikr kiya jise unhon ne Habsha mein dekha tha jis ka naam Mariyah tha . Umm Salamah aur Umm Habiba razi Allahu anha donon Habsh ke mulk mein gayi thin . Unhon ne is ki khubsurti aur is mein rakkhi hui tasaveer ka bhi zikr kiya . Is par Nabi Karim salla Allahu alaihi wasallam ne sar mubarak utha kar farmaya ke yeh woh log hain ke jab un mein koi salih shakhs mar jata to is ki qabr par masjid tameer kar dete . Phir is ki moorat is mein rakhte . Allah ke nazdeek yeh log saari makhlooq mein bure hain .

Hum se Muhammad bin Sinan ne byaan kiya ‘ un se Falih bin Sulayman ne byaan kiya ‘ un se Hilal bin Ali ne byaan kiya ‘ un se Anas bin Malik razi Allahu anhu ne ke hum Rasool Allah salla Allahu alaihi wasallam ki beti ke janaza mein hazir thay . Nabi Karim salla Allahu alaihi wasallam qabr par baithe huay thay ‘ main ne dekha ke Aap salla Allahu alaihi wasallam ki aankhon se aansu jaari thay . Aap salla Allahu alaihi wasallam ne poocha ke kya aisa aadmi bhi koi yahan hai jo aaj raat ko aurat ke paas na gaya ho . Is par Abu Talha razi Allahu anhu bole ke main hazir hoon . Nabi Karim salla Allahu alaihi wasallam ne farmaya ke phir tum qabr mein utar jao . Anas razi Allahu anhu ne kaha ke woh utar gaye aur mayyat ko dafan kiya . Abdullah bin Mubarak ne byaan kiya ke Falih ne kaha ke mera khayal hai ke «lam yuqarif» ka maani yeh hai ke jis ne gunah na kiya ho . Imam Bukhari rahimahullah ne kaha ke Surah al-Anaam mein jo «liyantarafoo» aaya hai is ka maani yehi hai taake gunah karein .

Hum se Abdullah bin Yusuf ne byaan kiya ‘ unhon ne kaha ke hum se Layth bin Saad ne byaan kiya ‘ unhon ne kaha ke mujh se Ibn Shihab ne byaan kiya ‘ un se Abdur Rahman bin Ka'ab bin Malik ne ‘ un se Jabir bin Abdullah razi Allahu anhuma ne ke Nabi Karim salla Allahu alaihi wasallam ne Uhud ke do do shaheedon ko mila kar ek hi kapray ka kafan diya . Aap salla Allahu alaihi wasallam daryaft farmate ke in mein Quran kise zyada yaad hai . Kisi ek ki taraf ishaara se bataya jata to Aap salla Allahu alaihi wasallam baghli qabr mein isi ko aage karte aur farmate ke main Qayamat mein in ke haq mein shahadat doon ga . Phir Aap salla Allahu alaihi wasallam ne sab ko un ke khoon samait dafan karne ka hukm diya . Na unhein ghusl diya gaya aur na un ki namaaz-e-janaza parhi gayi .

Hum se Abdullah bin Yusuf ne byaan kiya ‘ kaha ke hum se Layth bin Saad ne byaan kiya ‘ un se Yazid bin Abi Habib ne byaan kiya ‘ un se Abul Khayr Yazid bin Abdullah ne ‘ un se Uqbah bin Aamir ne ke Nabi Karim salla Allahu alaihi wasallam ek din bahar tashreef laaye aur Uhud ke shaheedon par is tarah namaaz parhi jaise mayyat par parhi jaati hai . Phir mimbar par tashreef laaye aur farmaya . Dekho main tum se pehle ja kar tumhare liye meer-e-saaman banoon ga aur main tum par gawah rahoon ga . Aur qasam Allah ki main is waqt apne Hauz ko dekh raha hoon aur mujhe zameen ke khazanon ki kunjiyaan di gayi hain ya (yeh farmaya ke) mujhe zameen ki kunjiyaan di gayi hain aur qasam Allah ki mujhe is ka dar nahin ke mere baad tum shirk karo ge balkay is ka dar hai ke tum log dunya haasil karne mein raghbat karo ge (natija yeh ke aakhirat se ghafil ho jao ge) .

Hum se Saeed bin Sulayman ne byaan kiya ‘ unhon ne kaha ke hum se Layth ne byaan kiya ‘ unhon ne kaha ke hum se Ibn Shihab ne byaan kiya . Un se Abdur Rahman bin Ka'ab ne ke Jabir bin Abdullah razi Allahu anhuma ne unhein khabar di ke Nabi Karim salla Allahu alaihi wasallam ne Uhud ke do do shaheedon ko dafan karne mein ek saath jama farmaya tha .

Hum se Abu al-Waleed ne byaan kiya , kaha ke hum se Layth bin Saad ne byaan kiya un se Ibn Shihab ne , un se Abdur Rahman bin Ka'ab ne aur un se Jabir razi Allahu anhu ne ke Nabi Karim salla Allahu alaihi wasallam ne farmaya ke unhein khoon samait dafan kar do yani Uhud ki larayi ke mauqe par aur unhein ghusl nahin diya tha .