Aur Nabi Karim salla Allahu alaihi wasallam ne farmaya jo shakhs janaze par namaaz parhe aur Aap salla Allahu alaihi wasallam ne sahaba se farmaya tum apne sathi par namaaz-e-janaza parh lo . Aur Aap salla Allahu alaihi wasallam ne farmaya ke Najashi par namaaz parho . Is ko namaaz kaha is mein na ruku hai na sajda aur na is mein baat ki ja sakti hai aur is mein takbir hai aur salam hai . Aur Abdullah bin Umar razi Allahu anhuma janaze ki namaaz na parhte jab tak ba-wuzu na hote aur sooraj nikalne aur doobte waqt na parhte aur janaze ki namaaz mein rafa-e-yadain karte aur Imam Hasan Basri rahimahullah ne kaha ke main ne bohat se sahaba aur tabiyeen ko paya woh janaze ki namaaz mein imamat ka zyada haqdar isi ko jaante jis ko farz namaaz mein imamat ka zyada haqdar samajhte aur jab Eid ke din ya janaze par wuzu na ho to paani dhoondhe ‘ tayammum na kare aur jab janaze par is waqt pahunche ke log namaaz parh rahe hon to Allahu Akbar keh kar shareek ho jaye . Aur Saeed bin Musayyib rahimahullah ne kaha raat ho ya din ‘ safar ho ya hazar janaze mein chaar takbirain kahe . Aur Anas razi Allahu anhu ne kaha pehli takbir janaze ki namaaz shuru karne ki hai aur Allah jalla jalaluhu ne (Surah at-Tauba mein) farmaya in munafiqon mein jab koi mar jaye to un par kabhi namaaz na parhiyo . Aur is mein saffein hain aur Imam hota hai .

Hum se Sulayman bin Harb ne byaan kiya ‘ kaha ke hum se Shubah ne ‘ un se Shaybani ne aur un se Shabi ne byaan kiya ke mujhe is sahabi ne khabar di thi jo Nabi Karim salla Allahu alaihi wasallam ke saath ek alag thalag qabr par se guzra . Woh kehta tha ke Aap salla Allahu alaihi wasallam ne hamari imamat ki aur hum ne Aap salla Allahu alaihi wasallam ke peeche saffein bana lein . Hum ne poocha ke Abu Amr (yeh Shabi ki kuniyat hai) yeh Aap se byaan karne wale kaun sahabi hain ? Farmaya ke Abdullah bin Abbas razi Allahu anhuma .

Aur Zayd bin Thabit razi Allahu anhu ne farmaya ke namaaz parh kar tum ne apna haq ada kar diya . Humayd bin Bilal (tabi) ne farmaya ke hum namaaz parh kar ijazat lena zaroori nahin samajhte . Jo shakhs bhi namaaz-e-janaza parhe aur phir wapas aaye to ise ek qiraat ka thawab milta hai .

Hum se Abu al-Numan ne byaan kiya ‘ un se Jarir bin Hazim ne byaan kiya ‘ kaha ke main ne Nafi se suna ‘ Aap ne byaan kiya ke Ibn Umar razi Allahu anhuma ne byaan kiya ke Abu Hurairah razi Allahu anhu ne byaan kiya ke jo dafan tak janaza ke saath rahe ise ek qiraat ka thawab mile ga . Ibn Umar razi Allahu anhuma ne farmaya ke Abu Hurairah ahadees bohat zyada byaan karte hain .

Phir Abu Hurairah razi Allahu anhu ki Aisha razi Allahu anha ne bhi tasdeeq ki aur farmaya ke main ne Rasool Allah salla Allahu alaihi wasallam se yeh irshad khud suna hai . Is par Ibn Umar razi Allahu anhuma ne kaha ke phir to hum ne bohat se qiraaton ka nuqsan uthaya . (Surah az-Zumar mein jo lafz) «farrattu» aaya hai is ke yehi maani hain main ne zaya kiya .

Hum se Abdullah bin Maslamah ne byaan kiya ‘ kaha ke main ne Ibn Abi Zi'b ke saamne yeh hadees parhi ‘ un se Abu Saeed Maqburi ne byaan kiya ‘ un se un ke baap ne ‘ unhon ne Abu Hurairah razi Allahu anhu se poocha to Aap ne farmaya ke main ne Nabi Karim salla Allahu alaihi wasallam se suna tha . (Doosri sanad) Hum se Ahmad bin Shabib ne byaan kiya ‘ kaha ke mujh se mere waalid ne byaan kiya ‘ un se Yunus ne byaan kiya ke Ibn Shihab ne kaha ke (mujh se falan ne yeh bhi hadees byaan ki) aur mujh se Abdur Rahman Aaraj ne bhi kaha ke Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne farmaya ke jis ne janaza mein shirkat ki phir namaaz-e-janaza parhi to ise ek qiraat ka thawab milta hai aur jo dafan tak saath raha to ise do qiraat ka thawab milta hai . Poocha gaya ke do qiraat kitne hon ge ? Farmaya ke do azeem paharon ke barabar .

Hum se Yaqub bin Ibrahim ne byaan kiya ‘ unhon ne kaha hum se Yahya bin Abi Bukayr ne ‘ unhon ne kaha hum se Zaidah ne byaan kiya ‘ un se Abu Ishaq Shaybani ne ‘ un se Aamir ne ‘ un se Ibn Abbas razi Allahu anhuma ne ke Rasool Allah salla Allahu alaihi wasallam ek qabr par tashreef laaye . Sahaba ne arz kiya ke is mayyat ko guzishta raat dafan kiya gaya hai . (saahib-e-qabr mard tha ya aurat thi) Ibn Abbas razi Allahu anhuma ne kaha ke phir hum ne Aap salla Allahu alaihi wasallam ke peeche saff bandi ki aur Aap salla Allahu alaihi wasallam ne namaaz-e-janaza parhayi .

Hum se Yahya bin Bukayr ne byaan kiya ‘ unhon ne kaha hum se Layth ne byaan kiya ‘ un se Aqeel ne byaan kiya ‘ un se Ibn Shihab ne byaan kiya ‘ un se Saeed bin Musayyib aur Abu Salamah ne byaan kiya aur un donon hazrat se Abu Hurairah razi Allahu anhu ne riwayat kiya ke Nabi Karim salla Allahu alaihi wasallam ne Habsh ke Najashi ki wafat ki khabar di ‘ isi din jis din un ka intiqal hua tha . Aap salla Allahu alaihi wasallam ne farmaya ke apne bhai ke liye Allah se maghfirat chaho .

Aur Ibn Shihab se yoon bhi riwayat hai unhon ne kaha ke mujh se Saeed bin Musayyib ne byaan kiya ke Abu Hurairah razi Allahu anhu ne farmaya ke Nabi Karim salla Allahu alaihi wasallam ne eidgah mein saff bandi karayi phir (namaaz-e-janaza ki) chaar takbirain kahein .

Hum se Ibrahim bin Munzir ne byaan kiya , un se Abu Zamrah ne byaan kiya , unhon ne kaha hum se Musa bin Uqbah ne byaan kiya , un se Nafi ne aur un se Abdullah bin Umar razi Allahu anhuma ne ke Yahud Nabi Karim salla Allahu alaihi wasallam ke huzoor mein apne hum mazhab ek mard aur aurat ka , jinhon ne zina kiya tha , muqaddama le kar aaye . Nabi Karim salla Allahu alaihi wasallam ke hukm se masjid ke nazdeek namaaz-e-janaza parhne ki jagah ke paas unhein sangsar kar diya gaya .