Aur jab Hasan bin Hasan bin Ali razi Allahu anhum faut huay to un ki biwi (Fatima bint Husayn) ne ek saal tak qabr par khaima lagaye rakkha . Aakhir khaima uthaya gaya to logon ne ek awaaz suni ”kya in logon ne jin ko khoya tha ‘ un ko paya ? Doosre ne jawab diya nahin balkay na-umeed ho kar laut gaye“ .

Hum se Ubaydullah bin Musa ne byaan kiya ‘ un se Shayban ne ‘ un se Hilal Wazan ne ‘ un se Urwah ne aur un se Aisha razi Allahu anha ne ke Nabi Karim salla Allahu alaihi wasallam ne apne marz-e-wafat mein farmaya ke Yahud aur Nasara par Allah ki laanat ho ke unhon ne apne anbiya ki qabron ko masajid bana liya . Aisha razi Allahu anha ne kaha ke agar aisa dar na hota to Aap salla Allahu alaihi wasallam ki qabr khuli rehti (aur hujre mein na hoti) kyonke mujhe dar is ka hai ke kahin Aap salla Allahu alaihi wasallam ki qabr bhi masjid na bana li jaye .

Hum se Musaddad ne byaan kiya . Kaha ke hum se Yazid bin Zuray ne ‘ un se Husayn Mualim ne ‘ un se Abdullah bin Buraydah ne ‘ un se Samurah razi Allahu anhu ne byaan kiya ke main ne Rasool Allah salla Allahu alaihi wasallam ki iqtida mein ek aurat (Umm Ka'ab) ki namaaz-e-janaza parhi thi jis ka nifaas mein intiqal ho gaya tha . Rasool Allah salla Allahu alaihi wasallam is ki kamar ke muqabil kharay huay .

Hum se Imran bin Maysarah ne byaan kiya ‘ kaha ke hum se Abdul Warith ne byaan kiya ‘ un se Husayn ne byaan kiya aur un se Ibn Buraydah ne ke hum se Samurah bin Jundub razi Allahu anhu ne byaan kiya ke main ne Nabi Karim salla Allahu alaihi wasallam ke peeche ek aurat ki namaaz-e-janaza parhi thi jis ka zachgi ki haalat mein intiqal ho gaya tha . Aap salla Allahu alaihi wasallam is ke beech mein kharay huay .

Aur Humayd Taweel ne byaan kiya ke humein Anas bin Malik razi Allahu anhu ne namaaz parhayi to teen takbirain kahein phir salam pher diya . Is par unhein logon ne yaad dehani karayi to dobara Qibla rukh ho kar chauthi takbir bhi kahi phir salam phera .

Hum se Abdullah bin Yusuf Tanisi ne byaan kiya ‘ kaha ke humein Imam Malik rahimahullah ne khabar di ‘ unhein Ibn Shihab ne ‘ unhein Saeed bin Musayyib ne ‘ unhein Abu Hurairah razi Allahu anhu ne ke Najashi ka jis din intiqal hua isi din Rasool Allah salla Allahu alaihi wasallam ne un ki wafat ki khabar di aur Aap salla Allahu alaihi wasallam sahaba ke saath eidgah gaye . Phir Aap salla Allahu alaihi wasallam ne saff bandi karayi aur chaar takbirain kahein .

Hum se Muhammad bin Sinan ne byaan kiya ‘ kaha ke hum se Sulaym bin Hayyan ne byaan kiya ‘ kaha ke hum se Saeed bin Mina ne byaan kiya aur un se Jabir razi Allahu anhu ne ke Nabi Karim salla Allahu alaihi wasallam ne As-hamah Najashi ki namaaz-e-janaza parhayi to chaar takbirain kahein . Yazid bin Haroon Wasiti aur Abdus Samad ne Sulaym se As-hamah naam naqal kiya hai aur Abdus Samad ne is ki mutaba'at ki hai .

Aur Imam Hasan Basri rahimahullah ne farmaya ke bache ki namaaz-e-janaza mein pehle Surah Fatiha parhi jaye phir yeh dua parhi jaye «Allahummaj-alhu lana faratan wa salafan wa ajran» ya Allah! is bache ko hamara ameer-e-saaman aur aage chalne wala ‘ thawab dilane wala kar de .

Hum se Muhammad bin Bashar ne byaan kiya . Kaha ke hum se Ghundar (Muhammad bin Jafar) ne byaan kiya ‘ kaha ke hum se Shubah ne byaan kiya ‘ un se Saad bin Ibrahim ne aur un se Talha ne kaha ke main ne Ibn Abbas razi Allahu anhuma ki iqtida mein namaaz (janaza) parhi (doosri sanad) Hum se Muhammad bin Kaseer ne byaan kiya ‘ kaha ke humein Sufyan Thauri ne khabar di ‘ unhein Saad bin Ibrahim ne ‘ unhein Talha bin Abdullah bin Awf ne ‘ unhon ne batlaya ke main ne Ibn Abbas razi Allahu anhuma ke peeche namaaz-e-janaza parhi to Aap ne Surah Fatiha (zara pukar kar) parhi . Phir farmaya ke tumhein maloom hona chahiye ke yehi tareeqa-e-Nabwi hai .

Hum se Hajjaj bin Minhal ne byaan kiya ‘ kaha ke hum se Shubah ne byaan kiya ‘ kaha ke mujh se Sulayman Shaybani ne byaan kiya ‘ kaha ke main ne Shabi se suna ‘ unhon ne byaan kiya ke mujhe is sahabi ne khabar di jo Nabi Karim salla Allahu alaihi wasallam ke saath ek alag thalag qabr se guzre thay . Qabr par Aap salla Allahu alaihi wasallam Imam bane aur sahaba ne Aap salla Allahu alaihi wasallam ke peeche namaaz-e-janaza parhayi . Shaybani ne kaha ke main ne Shabi se poocha ke Abu Amr! yeh Aap se kis sahabi ne byaan kiya tha to unhon ne batlaya ke Ibn Abbas razi Allahu anhuma ne .