Hum se Muhammad bin Yusuf Faryabi ne byaan kiya , unhon ne kaha ke hum se Imam Abdur Rahman Awzai ne byaan kiya , unhon ne kaha ke mujh se Yahya bin Abi Kathir ne byaan kiya , unhon ne kaha ke mujh se Abdullah bin Abi Qatadah ne byaan kiya , woh apne walid Abu Qatadah razi Allahu anhu se ke Nabi Karim salla Allahu alaihi wasallam Zuhr aur Asr ki do pehli rakaton mein Surah Fatihah aur koi aur surat parhte thay . Kabhi kabhi Aap salla Allahu alaihi wasallam koi aayat hamein suna bhi diya karte thay . Pehli rakat mein qiraat zyada taweel karte thay .

Hum se Abu Naeem Fadl bin Dukayn ne byaan kiya , unhon ne kaha ke hum se Hisham Dastuwai ne byaan kiya , unhon ne Yahya bin Abi Kathir se byaan kiya , unhon ne Abdullah bin Abi Qatadah se , unhon ne apne walid Abu Qatadah razi Allahu anhu se ke Nabi Karim salla Allahu alaihi wasallam Zuhr ki pehli rakat mein (qiraat) taweel karte thay aur doosri rakat mein mukhtasar . Subah ki namaaz mein bhi Aap salla Allahu alaihi wasallam isi tarah karte thay .

(jahri namazon mein) imam ka buland awaaz se «Ameen» kehna masnoon hai aur Ata bin Abi Rabah ne kaha ke «Ameen» ek dua hai aur Abdullah bin Zubayr razi Allahu anhuma aur un logon ne jo Aap ke peeche (namaaz parh rahe) thay . Is zor se «Ameen» kahi ke masjid goonj uthi aur Abu Hurayrah razi Allahu anhu imam se keh diya karte thay ke «Ameen» se hamein mehroom na rakhna aur Nafi ne kaha ke Ibn Umar razi Allahu anhuma «Ameen» kabhi nahi chhortay aur logon ko is ki targhib bhi diya karte thay . Main ne Aap se is ke mutalliq ek hadees bhi suni thi .

Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne khabar di unhon ne Ibn Shihab se , unhon ne Saeed bin Musayyab aur Abu Salamah bin Abdur Rahman ke wastay se , unhon ne Abu Hurayrah razi Allahu anhu se khabar di ke Rasool Allah salla Allahu alaihi wasallam ne farmaya ke jab imam «Ameen» kahe to tum bhi «Ameen» kaho . Kyunke jis ki «Ameen» malaika ke Ameen ke saath ho gayi us ke pichhle tamam gunah maaf kar diye jayen ge . Ibn Shihab ne byaan kiya ke Rasool Allah salla Allahu alaihi wasallam «Ameen» kehtay thay .

Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne Abuz Zinad se khabar di , unhon ne Araj se , unhon ne Abu Hurayrah razi Allahu anhu se ke Rasool Allah salla Allahu alaihi wasallam ne farmaya ke jab koi tum mein se «Ameen» kahe aur farishton ne bhi usi waqt aasman par «Ameen» kahi . Is tarah ek ki «Ameen» doosre ke «Ameen» ke saath mil gayi to us ke pichhle tamam gunah maaf ho jate hain .

Hum se Abdullah bin Maslamah Qanabi ne byaan kiya , unhon ne Imam Malik rahimahullah se , unhon ne Abu Bakr bin Abdur Rahman ke ghulam Sami se , unhon ne Abu Saleh Saman se , unhon ne Abu Hurayrah razi Allahu anhu se ke Rasool Allah salla Allahu alaihi wasallam ne farmaya ke jab «ghayril maghzoobi alayhim wala daalleen» kahe to tum bhi «Ameen» kaho kyunke jis ne farishton ke saath «Ameen» kahi us ke pichhle tamam gunah maaf kar diye jate hain . Sami ke saath is hadees ko Muhammad bin Amr ne Abu Salamah se , unhon ne Abu Hurayrah razi Allahu anhu se , unhon ne Nabi Karim salla Allahu alaihi wasallam se riwayat kiya . Aur Naeem Mujammar ne bhi Abu Hurayrah razi Allahu anhu se , unhon ne Nabi Karim salla Allahu alaihi wasallam se .

Hum se Musa bin Ismail ne byaan kiya , kaha ke hum se Humam bin Yahya ne Ziyadah bin Hasan Alam se byaan kiya , unhon ne Hasan rahimahullah alayhi se , unhon ne Abu Bakrah razi Allahu anhu se ke woh Rasool Allah salla Allahu alaihi wasallam ki taraf (namaaz parhne ke liye) gaye . Aap salla Allahu alaihi wasallam us waqt ruku mein thay . Is liye saf tak pohanchnay se pehle hi unhon ne ruku kar liya , phir us ka zikr Nabi Karim salla Allahu alaihi wasallam se kiya to Aap ne farmaya ke Allah tumhara shauq aur zyada kare lekin dobara aisa na karna .

Ibn Abbas razi Allahu anhuma ne Nabi Karim salla Allahu alaihi wasallam se naql kiya hai aur Malik bin Huwayrith razi Allahu anhu ne bhi is baab mein riwayat ki hai .

Hum se Ishaaq bin Shaheen Wasti ne byaan kiya , unhon ne kaha ke hum se Khalid bin Abdullah Tahhan ne Saeed bin Iyas Jurayri se byaan kiya , unhon ne Abul Alaa Yazid bin Abdullah se , unhon ne Mutarrif bin Abdullah se , unhon ne Imran bin Husayn se ke unhon ne Ali razi Allahu anhu ke saath Basrah mein ek marteba namaaz parhi . Phir kaha ke hamein unhon ne woh namaaz yaad dila di jo hum Nabi Karim salla Allahu alaihi wasallam ke saath parhaya karte thay . Phir kaha ke Ali razi Allahu anhu jab sar uthate aur jab sar jhukate us waqt takbeer kehtay .

Hum se Abdullah bin Yusuf Taneesi ne byaan kiya , kaha ke hamein Imam Malik rahimahullah alayhi ne Ibn Shihab se khabar di , unhon ne Abu Salamah bin Abdur Rahman se , unhon ne Abu Hurayrah razi Allahu anhu se ke Aap logon ko namaaz parhate thay to jab bhi woh jhukte aur jab bhi woh uthate takbeer zaroor kehtay . Phir jab farigh hote to farmate ke main namaaz parhne mein tum sab logon se zyada Rasool Allah salla Allahu alaihi wasallam ki namaaz se mushabahat rakhne wala hoon .