Hum se Abu al-Yaman ne byaan kiya , kaha hum ko Shuayb ne khabar di , unhein Zuhri ne ke Urwah bin Zubayr ne byaan kiya aur un se Aisha razi Allahu anha ne byaan kiya tandurusti ke zamane mein Rasool Allah salla Allahu alaihi wasallam farmaya karte thay ke jab bhi kisi Nabi ki rooh qabz ki gayi to pehle jannat mein us ki qiyam-gah usay zaroor dikha di gayi , phir usay ikhtiyar diya gaya (rawi ko shak tha ke lafz «yuhya» hai ya «yukhayyar» , donon ka mafhoom ek hi hai) phir jab Nabi Karim salla Allahu alaihi wasallam beemar pare aur waqt qareeb aa gaya to sar mubarak Aisha razi Allahu anha ki raan par tha aur Aap par ghashi tari ho gayi thi , jab kuch hosh hua to Aap ki aankhein ghar ki chhat ki taraf uth gayin aur Aap salla Allahu alaihi wasallam ne farmaya . «allahumma fir rafeeqil aa'la» . Main samajh gayi ke ab Nabi Karim salla Allahu alaihi wasallam hamain (yani dunyawi zindagi ko) pasand nahi farmayein ge . Mujhe woh hadees yaad aa gayi jo Aap salla Allahu alaihi wasallam ne tandurusti ke zamane mein farmayi thi .

Hum se Muhammad bin Yahya Zhuhli ne byaan kiya . Kaha hum se Affan bin Muslim ne byaan kiya , un se Sakhr bin Juwayriyah ne , un se Abdur Rahman bin Qasim ne , un se un ke walid (Qasim bin Muhammad) ne aur un se Aisha razi Allahu anha ne ke (un ke bhai) Abdur Rahman bin Abi Bakr razi Allahu anhu Nabi Karim salla Allahu alaihi wasallam ki khidmat mein hazir huay . Nabi Karim salla Allahu alaihi wasallam mere seene se taik lagaye huay thay . Abdur Rahman razi Allahu anhu ke hath mein ek taza miswak istemal ke liye thi . Aap salla Allahu alaihi wasallam is miswak ki taraf dekhte rahe . Chunanche main ne un se miswak le li aur usay apne daanton se chaba kar achhi tarah jhaarne aur saaf karne ke baad Nabi Karim salla Allahu alaihi wasallam ko de di . Aap ne woh miswak istemal ki jitne umdah tariqa se Aap salla Allahu alaihi wasallam is waqt miswak kar rahe thay , main ne Aap ko itni achhi tarah miswak karte kabhi nahi dekha . Miswak se farigh hone ke baad Aap ne apna hath ya apni ungli uthayi aur farmaya . «fir rafeeqil aa'la» teen martaba , aur Aap ka intiqal ho gaya . Aisha razi Allahu anha kaha karti thien ke Nabi Karim salla Allahu alaihi wasallam ki wafat hui to sar mubarak meri hansli aur thori ke darmiyan mein tha .

Mujh se Habban bin Musa Marwazi ne byaan kiya , kaha hum ko Abdullah bin Mubarak ne khabar di , unhein Yunus ne khabar di , unhein Ibn Shihab ne kaha ke mujhe Urwah bin Zubayr ne khabar di aur unhein Aisha razi Allahu anha ne khabar di ke Rasool Allah salla Allahu alaihi wasallam jab beemar parte to apne oopar Muawwizhatayn (Surah al-Falaq aur Surah an-Naas) parh kar dam kar liya karte thay aur apne jism par apne hath pher liya karte thay , phir jab woh marz Aap ko lahaq hua jis mein Aap ki wafat hui to main Muawwizhatayn parh kar Aap par dam kiya karti thi aur hath par dam kar ke Nabi Karim salla Allahu alaihi wasallam ke jism par phera karti thi .

Hum se Mualla bin Asad ne byaan kiya , kaha hum se Abdul Aziz bin Mukhtar ne byaan kiya , kaha hum se Hisham bin Urwah ne byaan kiya , un se Abbad bin Abdullah bin Zubayr ne aur unhein Aisha razi Allahu anha ne khabar di ke Aap ne Nabi Karim salla Allahu alaihi wasallam se suna , wafat se kuch pehle Nabi Karim salla Allahu alaihi wasallam pusht se un ka sahara liye huay thay . Aap ne kaan laga kar suna ke Nabi Karim salla Allahu alaihi wasallam dua kar rahe hain «allahummaghfirli warhamni , wa al-hiqni bir rafeeq» ”Ae Allah! Meri maghfirat farma , mujh par raham kar aur mere rafeeqon se mujhe mila .“

Hum se Salt bin Muhammad ne byaan kiya , kaha hum se Abu Awanah Waddah Yashkuri ne byaan kiya , un se Hilal bin Abi Humayd Wazzan ne , un se Urwah bin Zubayr ne aur un se Aisha razi Allahu anha ne byaan kiya ke Nabi Karim salla Allahu alaihi wasallam ne apne marz al-maut mein farmaya ke Allah Ta'ala ne Yahudiyon ko apni rahmat se door kar diya ke unhon ne apne anbiya ki qabron ko sajda-gah bana liya tha . Aisha razi Allahu anha ne kaha ke agar yeh baat na hoti to Aap salla Allahu alaihi wasallam ki qabr bhi khuli rakkhi jati lekin Aap ko yeh khatra tha ke kahin Aap ki qabr ko bhi sajda na kiya jaane lage .

Hum se Saeed bin Afir ne byaan kiya , kaha ke mujh se Layth bin Saad ne byaan kiya ke mujh se Aqeel ne byaan kiya , un se Ibn Shihab ne kaha ke mujhe Ubaydullah bin Abdullah bin Utbah bin Masood ne khabar di aur un se Umm al-Momineen Aisha razi Allahu anha ne byaan kiya ke jab Rasool Allah salla Allahu alaihi wasallam ke liye uthna baithna dushwar ho gaya aur Aap ke marz ne shiddat ikhtiyar kar li to tamam azwaj e mutahharat razi Allahu anhun se Aap ne mere ghar mein ayyam e marz guzarne ke liye ijazat maangi . Sab ne jab ijazat de di to Aap Maimoona razi Allahu anha ke ghar se niklay , Aap do aadmiyon ka sahara liye huay thay aur Aap ke paon zameen se ghisat rahe thay . Jin do sahabah ka Aap salla Allahu alaihi wasallam sahara liye huay thay , un mein ek Abbas bin Abdul Muttalib razi Allahu anhu thay aur ek aur sahab . Ubaydullah ne byaan kiya ke phir main ne Aisha razi Allahu anha ki is riwayat ki khabar Abdullah bin Abbas razi Allahu anhuma ko di to unhon ne batlaya , maloom hai woh doosre sahab jin ka naam Aisha razi Allahu anha ne nahi liya , kaun hain ? Byaan kiya ke main ne arz kiya mujhe to nahi maloom hai . Unhon ne batlaya ke woh Ali razi Allahu anhu thay aur Nabi Karim salla Allahu alaihi wasallam ki zauja mutahhara Aisha razi Allahu anha byaan karti thien ke Nabi Karim salla Allahu alaihi wasallam jab mere ghar mein aa gaye aur takleef bahut barh gayi to Aap salla Allahu alaihi wasallam ne farmaya ke saat mushkeeze pani ke bhar kar lao aur mujh par daal do , mumkin hai is tarah main logon ko kuch nasihat karne ke qabil ho jaon . Chunanche hum ne Aap ko Aap ki zauja mutahhara Hafsa razi Allahu anha ke ek lagan mein bithaya aur unhein mushkeezon se Aap par pani dhaarne lage . Aakhir Aap salla Allahu alaihi wasallam ne apne hath ke isharah se roka ke bas ho chuka , byaan kiya ke phir Aap logon ke majma mein gaye aur namaz parhayi aur logon ko khitab kiya .

Aur mujhe Ubaydullah bin Abdullah bin Utbah ne khabar di aur un se Aisha razi Allahu anha aur Abdullah bin Abbas razi Allahu anhuma ne byaan kiya ke shiddat e marz ke dinon mein Nabi Karim salla Allahu alaihi wasallam apni chadar khainch kar baar baar apne chehre par daalte thay , phir jab dam ghutne lagta to chehre se hata dete . Aap salla Allahu alaihi wasallam isi shiddat ke aalam mein farmate thay , Yahud o Nasara Allah ki rahmat se door huay kyunke unhon ne apne anbiya ki qabron ko sajda-gah bana liya tha . Is tarah Aap salla Allahu alaihi wasallam (apni ummat ko) un ka amal ikhtiyar karne se bachte rehne ki takeed farma rahe thay .

Aur mujhe Ubaydullah bin Abdullah bin Utbah ne khabar di aur un se Aisha razi Allahu anha aur Abdullah bin Abbas razi Allahu anhuma ne byaan kiya ke shiddat e marz ke dinon mein Nabi Karim salla Allahu alaihi wasallam apni chadar khainch kar baar baar apne chehre par daalte thay , phir jab dam ghutne lagta to chehre se hata dete . Aap salla Allahu alaihi wasallam isi shiddat ke aalam mein farmate thay , Yahud o Nasara Allah ki rahmat se door huay kyunke unhon ne apne anbiya ki qabron ko sajda-gah bana liya tha . Is tarah Aap salla Allahu alaihi wasallam (apni ummat ko) un ka amal ikhtiyar karne se bachte rehne ki takeed farma rahe thay .

Mujhe Ubaydullah ne khabar di ke Aisha razi Allahu anha ne kaha , main ne is muamla (yani ayyam e marz mein Abu Bakr razi Allahu anhu ko Imam banane) ke silsile mein Nabi Karim salla Allahu alaihi wasallam se baar baar poocha . Main baar baar Aap se sirf is liye pooch rahi thi ke mujhe yaqeen tha ke jo shakhs (Nabi Karim salla Allahu alaihi wasallam ki zindagi mein) Aap ki jagah par khara ho ga , log is se kabhi mohabbat nahi rakh sakte balkay mera khayal tha ke log is se bad-faali lein ge , is liye main chahti thi ke Nabi Karim salla Allahu alaihi wasallam Abu Bakr razi Allahu anhu ko is ka hukm na dein . Is ki riwayat Ibn Umar , Abu Musa aur Ibn Abbas razi Allahu anhum ne Nabi Karim salla Allahu alaihi wasallam se ki hai .

Hum se Abdullah bin Yusuf ne byaan kiya , kaha hum se Layth bin Saad ne byaan kiya , kaha ke mujh se Yazid bin al-Haad ne byaan kiya , un se Abdur Rahman bin Qasim ne , un se un ke walid Qasim bin Muhammad ne aur un se Aisha razi Allahu anha ne byaan kiya ke Nabi Karim salla Allahu alaihi wasallam ki wafat hui to Aap meri hansli aur thori ke darmiyan (sar rakkhe huay) thay . Aap salla Allahu alaihi wasallam (ki shiddat e sakarat) dekhne ke baad ab main kisi ke liye bhi naza ki shiddat ko bura nahi samajhti .