Mujh se Abdullah bin Abi Shaybah ne byaan kiya kaha hum se Yahya bin Saeed ne byaan kiya , un se Sufyan bin Uyaynah ne , un se Musa bin Abi Aisha ne , un se Ubaydullah bin Abdullah bin Utbah ne aur un se Aisha razi Allahu anha aur Ibn Abbas razi Allahu anhuma ne byaan kiya ke Rasool Allah salla Allahu alaihi wasallam ki wafat ke baad Abu Bakr razi Allahu anhu ne Aap ko bosa diya tha .

Hum se Ali bin Abdullah Madini ne byaan kiya . Kaha hum se Yahya bin Saeed ne byaan kiya Abdullah bin Abi Shaybah ki hadees ki tarah , lekin unhon ne apni is riwayat mein yeh izafa kiya ke Aisha razi Allahu anha ne kaha Nabi Karim salla Allahu alaihi wasallam ke marz mein hum Aap ke munh mein dawa dene lage to Aap ne isharah se dawa dene se mana kiya . Hum ne samjha ke mareez ko dawa peene se (baaz auqat) jo nagowari hoti hai yeh bhi isi ka nateeja hai (is liye hum ne israr kiya) to Aap salla Allahu alaihi wasallam ne farmaya ke ghar mein jitne aadmi hain sab ke munh mein mere samne dawa daali jaye . Sirf Abbas razi Allahu anhu is se alag hain ke woh tumhare saath is kaam mein shareek nahi thay . Is ki riwayat Ibn Abi al-Zinad ne bhi ki , un se Hisham ne , un se un ke walid ne aur un se Aisha razi Allahu anha ne Nabi Karim salla Allahu alaihi wasallam ke hawala se .

Hum se Abdullah bin Muhammad Musandi ne byaan kiya , kaha hum ko Azhar bin Saad Samman ne khabar di , kaha hum ko Abdullah bin Aun ne khabar di , unhein Ibrahim Nakhai ne aur un se Aswad bin Yazid ne byaan kiya ke Aisha razi Allahu anha ke samne is ka zikr aaya ke Nabi Karim salla Allahu alaihi wasallam ne Ali razi Allahu anhu ko koi (khaas) wasiyat ki thi ? To unhon ne batlaya kaun kehta hai , main khud Nabi Karim salla Allahu alaihi wasallam ki khidmat mein hazir thi , Aap mere seene se taik lagaye huay thay , Aap ne tasht mangwaya , phir ek taraf jhuk gaye aur Aap ki wafat ho gayi . Is waqt mujhe bhi kuch maloom nahi hua , phir Ali razi Allahu anhu ko Aap ne kab wasi bana diya .

Hum se Abu Naeem ne byaan kiya , kaha hum se Malik bin Maghool ne byaan kiya , un se Talha bin Musarrif ne byaan kiya ke main ne Abdullah bin Abi Awfa razi Allahu anhu se poocha , kya Rasool Allah salla Allahu alaihi wasallam ne kisi ko wasi banaya tha . Unhon ne kaha ke nahi . Main ne poocha ke logon par wasiyat karna kaise farz hai ya wasiyat karne ka kaise hukm hai ? Unhon ne bataya ke Aap ne Kitab Allah ke mutabiq amal karte rehne ki wasiyat ki thi .

Hum se Qutaybah bin Saeed ne byaan kiya , unhon ne kaha hum se Abu al-Ahwas (Salam bin Hakeem) ne byaan kiya , un se Abu Ishaq ne , un se Amr bin al-Harith razi Allahu anhu ne byaan kiya ke Rasool Allah salla Allahu alaihi wasallam ne na dirham chhore thay , na dinar , na koi ghulam na baandi , siwa apne safaid khachar ke jis par Aap salla Allahu alaihi wasallam sawar hua karte thay aur Aap ka hathiyar aur kuch woh zameen jo Aap salla Allahu alaihi wasallam ne apni zindagi mein mujahidon aur musafiron ke liye waqf kar rakkhi thi .

Hum se Sulayman bin Harb ne byaan kiya , kaha hum se Hammad bin Zayd ne byaan kiya , un se Sabit Banani ne aur un se Anas bin Malik razi Allahu anhu ne ke shiddat e marz ke zamane mein Nabi Karim salla Allahu alaihi wasallam ki be-chaini bahut barh gayi thi . Fatimah al-Zahra razi Allahu anha ne kaha: Aah , Abba jaan ko kitni be-chaini hai . Aap salla Allahu alaihi wasallam ne is par farmaya ke aaj ke baad tumhare Abba jaan ki yeh be-chaini nahi rahe gi . Phir jab Nabi Karim salla Allahu alaihi wasallam ki wafat ho gayi to Fatima razi Allahu anha kehti thien , haye Abba jaan! Aap apne Rabb ke bulawe par chale gaye , haye Abba jaan! Aap Jannat al-Firdous mein apne maqam par chale gaye . Hum Jibraeel alaihissalam ko Aap ki wafat ki khabar sunate hain . Phir jab Nabi Karim salla Allahu alaihi wasallam dafan kar diye gaye to Aap razi Allahu anha ne Anas razi Allahu anhu se kaha ”Anas! Tumhare dil Rasool Allah salla Allahu alaihi wasallam ki naash par mitti daalne ke liye kis tarah aamada ho gaye thay .“