Hum se Yahya bin Bukair ne bayan kiya , unhon ne kaha hum se Layth ne Aqeel ke wastay se bayan kiya , unhon ne Ibn Shihab se , unhon ne Urwah se ke Aisha raziyallahu anha ne unhein khabar di ke ek raat Rasool Allah salla Allahu alaihi wa sallam ne isha ki namaz der se parhi . Yeh Islam ke phelnay se pehle ka waqia hai . Aap salla Allahu alaihi wa sallam is waqt tak bahar tashreef nahi laye jab tak Umar raziyallahu anhu ne yeh na farmaya ke auraten aur bache sab so gaye . Pas aap salla Allahu alaihi wa sallam tashreef laye aur farmaya ke tumhare ilawa duniya mein koi bhi insaan is namaz ka intizar nahi karta .

Hum se Adam bin Abi Iyaas ne bayan kiya, unhon ne kaha hum se Ibn-e-Abi Zi’b ne bayan kiya, unhon ne kaha hum se Sa’eed Al-Maqburi ne bayan kiya, woh Abu Hurairah se riwayat karte hain, woh kehte hain ke Rasoolullah Sallallahu Alaihi Wasallam ne farmaaya ke bandah us waqt tak Namaz hi mein rehta hai jab tak woh Masjid mein Namaz ka intezaar karta hai. Taa-waqt-ye-ki woh hadas na kare. Ek ’ajami aadmi ne poocha ke aye Abu Hurairah! Hadas kya cheez hai? Unhon ne farmaaya ke hawa jo peeche se khaarij ho. (Jise ’urf-e-aam mein goz maarna kehte hain).

Hum se Ayyub bin Sulaiman ne bayan kiya , kaha hum se Abu Bakr ne Sulaiman se , un se Saleh bin Kaisan ne bayan kiya ke mujhe Ibn Shihab ne Urwah se khabar di ke Aisha raziyallahu anha ne batlaya ke Rasool Allah salla Allahu alaihi wa sallam ne ek dafa isha ki namaz mein der farmayi . Yahan tak ke Umar raziyallahu anhu ne pukara , namaz! auraten aur bache sab so gaye . Tab aap salla Allahu alaihi wa sallam ghar se bahar tashreef laye , aap salla Allahu alaihi wa sallam ne farmaya ke roye zameen par tumhare ilawa aur koi is namaz ka intizar nahi karta . Raawi ne kaha , is waqt yeh namaz bajamaat Madina ke siwa aur kahin nahi parhi jati thi . Sahaba is namaz ko sham ki surkhi ke ghaib hone ke baad raat ke pehle tehai hissay tak kisi waqt bhi parhte thay .

Hum se Abdur Raheem Muharibi ne bayan kiya , kaha hum se Zaida ne Humaid Taweel se , unhon ne Anas raziyallahu anhu se ke Nabi Karim salla Allahu alaihi wa sallam ne ek din isha ki namaz aadhi raat gaye parhi . Aur farmaya ke doosre log namaz parh kar so gaye honge . Yani doosri masajid mein parhne wale musalman aur tum log jab tak namaz ka intizar karte rahe goya sare waqt namaz hi parhte rahe . Ibn Maryam ne is mein yeh zyada kiya ke humein Yahya bin Ayyub ne khabar di . Kaha mujh se Humaid Taweel ne bayan kiya , unhon ne Anas raziyallahu anhu se yeh suna , goya is raat aap ki anguthi ki chamak ka naqsha is waqt bhi meri nazron ke samne chamak raha hai .

Hum se Abdullah bin Sabah ne bayan kiya , kaha hum se Abu Ali Ubaidullah Hanafi ne , kaha hum se Qurra bin Khalid Sadoosi ne , unhon ne kaha ke ek din Hassan Basri rahimahullah ne bari der ki . Aur hum aap ka intizar karte rahe . Jab un ke uthne ka waqt qareeb ho gaya to aap aaye aur butor mazrat farmaya ke mere un parosion ne mujhe bula liya tha is liye der ho gayi phir batlaya ke Anas bin Malik raziyallahu anhu ne kaha tha ke hum ek raat Nabi Karim salla Allahu alaihi wa sallam ka intizar karte rahe . Taqreeban aadhi raat ho gayi to aap salla Allahu alaihi wa sallam tashreef laye , phir humein namaz parhayi . Is ke baad khutba diya . Pas aap ne farmaya ke doosron ne namaz parh li aur so gaye . Lekin tum log jab tak namaz ke intizar mein rahe ho goya namaz hi ki halat mein rahe ho . Imam Hassan Basri rahimahullah ne farmaya ke agar log kisi khair ke intizar mein baithe rahen to woh bhi khair ki halat hi mein hain . Qurra bin Khalid ne kaha ke Hassan ka yeh qaul bhi Anas raziyallahu anhu ki hadees ka hai jo unhon ne Nabi Karim salla Allahu alaihi wa sallam se riwayat ki hai .

Hum se Qutaybah bin Saeed ne byaan kiya , kaha ke hum se Ismail bin Jafar ne byaan kiya Humayd Taweel se , unhon ne kaha ke Anas bin Malik razi Allahu anhu se darkhwast kiya gaya ke kya Rasool Allah salla Allahu alaihi wasallam ne koi angoothi pehni hai ? Aap ne farmaya ke haan! ek raat Isha ki namaaz mein Aap salla Allahu alaihi wasallam ne aadhi raat tak der ki . Namaaz ke baad hamari taraf mutawajjah huay aur farmaya , log namaaz parh kar so chuke hon ge . Aur tum log us waqt tak namaaz hi ki haalat mein thay jab tak tum namaaz ka intizaar kartay rahe . Anas razi Allahu anhu ne farmaya jaise us waqt main Aap salla Allahu alaihi wasallam ki angoothi ki chamak dekh raha hoon (yani Aap salla Allahu alaihi wasallam ki angoothi ki chamak ka sama meri aankhon mein hai) .

Aur hum se Aadam bin Abi Iyaas ne kaha ke un se Shubah ne byaan kiya un se Ayyub Sakhtiyani ne un se Nafi ne , farmaya ke Abdullah bin Umar razi Allahu anhuma (nafl) usi jagah par parhte thay aur jis jagah farz parhte aur Qasim bin Muhammad bin Abi Bakr ne bhi isi tarah kiya hai aur Abu Hurayrah razi Allahu anhu se marfooan riwayat hai ke imam apni (farz parhne ki) jagah par nafl na parhe aur yeh sahi nahi .

Hum se Abul Yaman ne byaan kiya , unhon ne kaha ke hamein Shoaib ne Zuhri se khabar di , unhon ne kaha ke mujhe Urwah bin Zubayr ne khabar di ke Umm al-Momineen Aishah razi Allahu anha ne farmaya ke Nabi Karim salla Allahu alaihi wasallam ne ek raat Isha mein der ki aur Ayyash ne hum se Abdul Aala se byaan kiya , unhon ne kaha ke hum se Mamar ne Zuhri se byaan kiya , un se Urwah ne aur un se Aishah razi Allahu anha ne farmaya ke Rasool Allah salla Allahu alaihi wasallam ne Isha mein ek marteba der ki . Yahan tak ke Umar razi Allahu anhu ne awaaz di ke auraten aur bache so gaye . Phir Nabi Karim salla Allahu alaihi wasallam (hijray se) tashreef laye aur farmaya ke dekho roye zameen par is namaaz ka (us waqt) tumhare siwa aur koi intizaar nahi kar raha hai . Un dinon Madinah ke siwa aur kahin namaaz nahi parhi jati thi .

Hum se Abul Yaman ne byaan kiya , kaha ke hamein Shoaib ne Zuhri se khabar di , unhon ne kaha ke mujhe Urwah bin Zubayr ne Aishah razi Allahu anha se byaan kiya , Aap razi Allahu anha ne farmaya ke Rasool Allah salla Allahu alaihi wasallam ne ek marteba Isha ki namaaz mein itni der ki ke Umar razi Allahu anhu ko kehna para ke auraten aur bache so gaye . Phir Nabi Karim salla Allahu alaihi wasallam (hijray se tashreef laye aur farmaya ke dekho roye zameen par is namaaz ka (us waqt) tumhare siwa aur koi intizaar nahi kar raha hai . Un dinon Madinah ke siwa aur kahin namaaz nahi parhi jati thi aur log Isha ki namaaz shafaq doobne ke baad se raat ki pehli tehayi guzarne tak parha karte thay .

Hum se Abdan ne bayan kiya , kaha hum ko Yazid bin Zuray ne khabar di , kaha hum ko Humayd ne khabar di , kaha unhon ne ke Anas razi Allahu anhu se poochha gaya kya Nabi Karim salla Allahu alaihi wasallam ne angoothi banwayi thi ? Unhon ne bayan kiya ke Nabi Karim salla Allahu alaihi wasallam ne ek raat Isha ki namaz aadhi raat mein parhayi . Phir chehra mubarak hamari taraf kiya , jaise ab bhi main Nabi Karim salla Allahu alaihi wasallam ki angoothi ki chamak dekh raha hoon . Farmaya ke bahut se log namaz parh kar so chuke hon ge lekin tum is waqt bhi namaz mein ho jab tak tum namaz ka intizar karte rahe ho .