Hum se Musaddad ne bayan kiya , unhon ne kaha hum se Abdul Warith ne bayan kiya , unhon ne Abul Tayyah ke wastay se bayan kiya , unhon ne Anas bin Malik raziyallahu anhu se , unhon ne kaha ke jab Nabi Karim salla Allahu alaihi wa sallam Madina tashreef laye to yahan ke buland hissay mein Bani Amr bin Awf ke yahan aap utray aur yahan chobis raaten qiyam farmaya . Phir aap salla Allahu alaihi wa sallam ne Banu Najjar ko bula bheja , to woh log talwaren latkaye hue aaye . Anas ne kaha , goya meri nazron ke samne Nabi Karim salla Allahu alaihi wa sallam apni sawari par tashreef farma hain , jabke Abu Bakr Siddiq raziyallahu anhu aap salla Allahu alaihi wa sallam ke peechay baithe hue hain aur Banu Najjar ke log aap salla Allahu alaihi wa sallam ke charon taraf hain . Yahan tak ke aap salla Allahu alaihi wa sallam Abu Ayyub ke ghar ke samne utray aur aap salla Allahu alaihi wa sallam yeh pasand karte thay ke jahan bhi namaz ka waqt aa jaye foran namaz ada kar len . Aap bakriyon ke baron mein bhi namaz parh lete thay , phir aap ne yahan masjid banane ke liye hukm farmaya . Chunanched Banu Najjar ke logon ko aap salla Allahu alaihi wa sallam ne bulwa kar farmaya ke aye Banu Najjar! tum apne is bagh ki qeemat mujh se le lo . Unhon ne jawab diya nahi ya Rasool Allah! is ki qeemat hum sirf Allah se mangte hain . Anas raziyallahu anhu ne bayan kiya ke mein jaisa ke tumhein bata raha tha yahan mushrikeen ki qabren thin , is bagh mein ek weeran jagah thi aur kuch khajoor ke darakht bhi thay pas Nabi Karim salla Allahu alaihi wa sallam ne mushrikeen ki qabron ko ukharwa diya weerana ko saaf aur barabar karwaya aur darakhton ko katwa kar un ki lakriyon ko masjid ke qibla ki janib bichha diya aur pattharon ke zariye unhein mazboot bana diya . Sahaba patthar uthate hue rajz parhte thay aur Nabi Karim salla Allahu alaihi wa sallam bhi un ke sath thay aur yeh keh rahe thay ke aye Allah! aakhir ke faida ke ilawa aur koi faida nahi pas Ansar wa Muhajireen ki maghfirat farmana .

Hum se Adam ne bayan kiya, kaha hum se Sho’bah ne, kaha mujhe Abu Tayyah Yazeed bin Humaid ne Anas Radhiallahu Anhu se khabar di, woh kehte hain ke Rasoolullah Sallallahu Alaihi Wasallam Masjid ki ta’meer se pehle Namaz bakriyon ke baade mein padh liya karte the. (Ma’loom huwa ke bakriyon waghera ke baade mein bawaqt-e-zaroorat Namaz padhi jaa sakti hai).

Hum se Abdullah Bin Muhammad Musnadi ne bayan kiya, kaha hum se Muawiyah Bin Amr ne bayan kiya, kaha hum se Ishaq ne bayan kiya, un se Humaid ne bayan kiya mein ne Anas (Radi Allahu Anhu) se suna, wo bayan karte thay ke Nabi Kareem (Sallallahu Alaihi Wasallam) maidan-e-khandaq ki taraf tashreef le gaye (ghazwah-e-khandaq ke shuru hone se kuch pehle jab khandaq ki khudayi ho rahi thi), Aap ne dekha ke Muhajireen aur Ansar (Ridwanullahi Alaihim Ajmaeen) sardi ki shakti ke bawajood subah hi subah khandaq khodne mein masroof hain, un ke paas ghulam bhi nahi thay jo un ki is khudayi mein madad karte. Aap (Sallallahu Alaihi Wasallam) ne un ki thakan aur bhook ko dekha to Aap (Sallallahu Alaihi Wasallam) ne dua farmai "Ae Allah! Zindagi to pas aakhirat hi ki zindagi hai pas Ansar aur Muhajireen ki maghfirat farma." Yani dar-haqeeqat jo maza hai aakhirat ka hai maza... bakhsh de Ansar aur pardesiyon ko ae Allah... Sahaba ne is ke jawab mein kaha "Hum wo hain jinhon ne Muhammad (Sallallahu Alaihi Wasallam) ke hath par is waqt tak jihad karne ka ahd kiya hai jab tak hamari jaan mein jaan hai." Apne Payamber Muhammad (Sallallahu Alaihi Wasallam) se ye bai'at hum ne ki jab talak hai zindagi... larte rahein ge hum sada
.

Hum se Abu Ma'mar ne bayan kiya, kaha hum se Abdul Waris ne bayan kiya, kaha hum se Abdul Aziz ne bayan kiya aur un se Anas Bin Malik (Radi Allahu Anhu) ne bayan kiya ke (jab tamam Arab ke Madinah Munawwarah par hamla ka khatra hua to) Madinah ke ard-gird Muhajireen o Ansar khandaq khodne mein mashghool ho gaye, mitti apni pusht par laad laad kar uthate aur (ye rajaz) parhte jaate "Hum wo hain jinhon ne Muhammad (Sallallahu Alaihi Wasallam) ke hath par is waqt tak jihad ke liye bai'at ki hai jab tak hamari jaan mein jaan hai." Nabi Kareem (Sallallahu Alaihi Wasallam) un ke paas rajaz ke jawab mein ye dua farmate "Ae Allah! Aakhirat ki khair ke siwa aur koi khair nahi, pas tu Ansar aur Muhajireen ko barkat ata farma."
.

Hum se Hafs Bin Umar ne bayan kiya. Kaha hum se Shuba ne bayan kiya, un se Humaid ne bayan kiya aur unhon ne Anas (Radi Allahu Anhu) se suna. Aap bayan karte thay ke Ansar khandaq khodte hue (Ghazwah-e-Khandaq ke mauqe par) kehte thay «nhn alzyn bayew mhmda ely aljhad ma hyyna abda» "Hum wo log hain jinhon ne Muhammad (Sallallahu Alaihi Wasallam) se jihad par bai'at ki hai hamesha ke liye, jab tak hamare jism mein jaan hai."
.

Hum se Adam Bin Abi Iyas ne bayan kiya, kaha hum se Shuba ne bayan kiya, kaha hum se Abu Iyas ne bayan kiya un se Anas Bin Malik Radi Allahu Anhu ne bayan kiya ke Rasul Allah Sallallahu Alaihi Wasallam ne (khandaq khodte waqt) farmaya " Haqeeqi zindagi to sirf Akhirat ki zindagi hai, pas ay Allah! Ansar aur Muhajireen par apna karam farma. " Aur Qatadah se riwayat hai un se Anas Radi Allahu Anhu ne bayan kiya Nabi Kareem Sallallahu Alaihi Wasallam se isi tarah, aur unhon ne bayan kiya is mein yun hai " Pas Ansar ki maghfirat farma de. "
.

Hum se Adam Bin Abi Iyas ne bayan kiya, kaha hum se Shuba ne bayan kiya, un se Humaid Taweel ne, unhon ne Anas Bin Malik Radi Allahu Anhu se suna Aap ne farmaya ke Ansar ghazwa Khandaq ke mauqa par (khandaq khodte hue) ye sher parhte thay «Nahnu-llazeena baya'u Muhammadan alal jihadi ma hayeena abada» " Hum wo hain jinhon ne Muhammad (Sallallahu Alaihi Wasallam) se jihad par bai'at ki hai, jab tak hamari jaan mein jaan hai. " Aap Sallallahu Alaihi Wasallam ne (jab ye suna to) is ke jawab mein yun farmaya «Allahumma la aisha illa aishul Akhirah fa akrimil Ansara wal Muhajirah» " Ay Allah! Akhirat ki zindagi ke siwa aur koi zindagi haqeeqi zindagi nahi hai, pas Ansar aur Muhajireen par apna fazl o karam farma. "
.

Mujh se Muhammad Bin Ubaidullah ne bayan kiya, kaha hum se Ibn Hazim ne bayan kiya, un se un ke walid ne aur un se Sahl Radi Allahu Anhu ne bayan kiya ke Rasul Allah Sallallahu Alaihi Wasallam hamare paas tashreef laye to hum khandaq khod rahe thay aur apne kandhon par matti utha rahe thay. Is waqt aap ne ye dua farmai «Allahumma la aisha illa aishul Akhirah faghfir lil Muhajireena wal Ansar» " Ay Allah! Akhirat ki zindagi ke siwa aur koi zindagi haqeeqi zindagi nahi, pas Muhajireen aur Ansar ki tu maghfirat farma. "
.

Hum se Qutaiba Bin Saeed ne bayan kiya, kaha hum se Abdul Aziz Bin Abi Hazim ne bayan kiya, un se Abu Hazim ne aur un se Sahl Bin Saad Radi Allahu Anhu ne bayan kiya ke hum Rasul Allah Sallallahu Alaihi Wasallam ke sath khandaq mein thay. Sahaba (Radi Allahu Anhum) khandaq khod rahe thay aur mitti hum apne kandhon par utha utha kar nikal rahe thay. Is waqt Aap Sallallahu Alaihi Wasallam ne dua ki «allahumma la aisha illa aishul akhirah, faghfir lil muhajirina wal ansar» ”Ai Allah! Akhirat ki zindagi hi bas aram ki zindagi hai. Pas tu ansar aur muhajireen ki maghfirat farma“
.

Hum se Abdullah Bin Muhammad Musnadi ne bayan kiya, kaha hum se Muawiya Bin Amr ne bayan kiya, un se Abu Ishaq Fazari ne bayan kiya, un se Humaid Taweel ne, unhon ne Anas Radi Allahu Anhu se suna, wo bayan karte thay ke Rasul Allah Sallallahu Alaihi Wasallam khandaq ki taraf tashreef le gaye. Aap Sallallahu Alaihi Wasallam ne mulahiza farmaya ke muhajireen aur ansar sardi mein subah sawere hi khandaq khod rahe hain. In ke pas ghulam nahi thay ke in ke bajaye wo is kaam ko anjam detay. Jab Aap Sallallahu Alaihi Wasallam ne in ki is mushaqqat aur bhook ko dekha to dua ki «allahumma innal aisha aishul akhirah. faghfir lil ansari wal muhajirah» ”Ai Allah! Zindagi to bas akhirat hi ki zindagi hai. Pas ansar aur muhajireen ki maghfirat farma.“ Sahaba (Radi Allahu Anhum) ne is ke jawab mein kaha «nahnul lazina baya'u muhammadan, alal jihadi ma baqaina abada» hum hi hain jinhon ne Muhammad (Sallallahu Alaihi Wasallam) se jihad karne ke liye baiat ki hai. Jab tak hamari jaan mein jaan hai
.

Hum se Abu Ma'mar Abdullah Bin Umar Aqdi ne bayan kiya, kaha hum se Abdul Waris Bin Saeed ne bayan kiya, un se Abdul Aziz Bin Suhaib ne aur un se Anas Radi Allahu Anhu ne bayan kiya ke Madina ke gird muhajireen-o-ansar khandaq khodne mein masroof ho gaye aur mitti apni peeth par uthane lage. Is waqt wo ye sher parh rahe thay «nahnul lazina baya'u muhammadan, alal islami ma baqaina abada» hum ne hi Muhammad (Sallallahu Alaihi Wasallam) se Islam par baiat ki hai jab tak hamari jaan mein jaan hai. Unhon ne bayan kiya ke is par Nabi Kareem Sallallahu Alaihi Wasallam ne dua ki «allahumma innahu la khaira illa khairul akhirah. fabarik fil ansari wal muhajirah» ”Ai Allah! Khair to sirf akhirat hi ki khair hai. Pas ansar aur muhajireen ko to barkat ata farma.“ Anas Radi Allahu Anhu ne bayan kiya ke ek mutthi jao aata aur in sahaba ke liye aise roghan mein jis ka maza bhi bigar chuka hota mila kar paka diya jata. Yahi khana in sahaba ke samne rakh diya jata. Sahaba bhooke hote. Ye in ke halaq mein chipakta aur is mein badbu hoti. Goya is waqt in ki khorak ka bhi ye haal tha
.

Hum se Muhammad bin Bashar ne bayan kiya , kaha hum se Ghundar ne bayan kiya , kaha hum se Shubah ne bayan kiya , in se Muawiyah bin Qurrah ne aur in se Anas razi Allahu anhu ne ke Nabi Karim salla Allahu alaihi wasallam ne farmaya «allaahumma laa aisha illaa aishul-aakhirah , fa-aslihil-ansaara wal-muhaajirah» ”Ae Allah! Aakhirat ki zindagi ke siwa aur koi zindagi nahi . Pas tu Ansar wa Muhajireen mein salah ko baqi rakh .“

Hum se Ahmad bin Miqdam ne bayan kiya , kaha hum se Fuzhail bin Sulayman ne bayan kiya , kaha hum se Abu Hazim ne bayan kiya , in se Sahl bin Saad Saadi razi Allahu anhu ne ke hum Rasool Allah salla Allahu alaihi wasallam ke saath Ghazwa e Khandaq ke mauqa par maujood thay , Nabi Karim salla Allahu alaihi wasallam bhi khandaq khodte jaate thay aur hum matti ko uthate jaate aur Nabi Karim salla Allahu alaihi wasallam hamare qareeb se guzarte huay farmate «allaahumma laa aisha illaa aishul-aakhirah , fagh-fir lil-ansaari wal-muhaajirah» ”Ae Allah! Zindagi to bas aakhirat hi ki zindagi hai , pas tu Ansar wa Muhajireen ki maghfirat kar .“ Is riwayat ki mutabia-t Sahl bin Saad razi Allahu anhu ne bhi Nabi Karim salla Allahu alaihi wasallam se ki hai .

`Hum se Umar bin Ali ne bayan kiya, unhon ne kaha hum se Khalid bin Haris ne bayan kiya, unhon ne hum se Hamid ne bayan kiya aur un se Anas bin Malik Radi Allahu Anhu ne ke Nabi Kareem صلی اللہ علیہ وسلم sardi mein subah ke waqt bahar nikle aur Muhajireen aur Ansar khandaq khod rahe thay, phir Nabi Kareem صلی اللہ علیہ وسلم ne farmaya ”Ae Allah! khair to Aakhirat hi ki khair hai. Pas Ansar o Muhajireen ki magfirat kar de.“ Is ka jawab logon ne diya ke hum wo hain jinhon ne Muhammad صلی اللہ علیہ وسلم se jihad par bai'at ki hai hamesha ke liye jab tak wo zinda hain.