Hum se Makki bin Ibrahim ne bayan kiya , unhon ne kaha hum ko Abdullah bin Saeed ne khabar di , woh Abu Hind ke sahab-zade hain , unhein in ke walid ne aur in se Abdullah bin Abbas razi Allahu anhuma ne bayan kiya ke Nabi Karim salla Allahu alaihi wasallam ne farmaya ”do neimatein aaisi hain ke aksar log in ki qadr nahi karte , sehat aur faraghat .“ Abbas Anbari ne bayan kiya ke hum se Safwan bin Esa ne bayan kiya , in se Abdullah bin Abi Hind ne , in se in ke walid ne ke main ne Abdullah bin Abbas razi Allahu anhuma se suna , unhon ne Nabi Karim salla Allahu alaihi wasallam se isi hadees ki tarah .

Hum se Muhammad bin Bashar ne bayan kiya , kaha hum se Ghundar ne bayan kiya , kaha hum se Shubah ne bayan kiya , in se Muawiyah bin Qurrah ne aur in se Anas razi Allahu anhu ne ke Nabi Karim salla Allahu alaihi wasallam ne farmaya «allaahumma laa aisha illaa aishul-aakhirah , fa-aslihil-ansaara wal-muhaajirah» ”Ae Allah! Aakhirat ki zindagi ke siwa aur koi zindagi nahi . Pas tu Ansar wa Muhajireen mein salah ko baqi rakh .“

Hum se Ahmad bin Miqdam ne bayan kiya , kaha hum se Fuzhail bin Sulayman ne bayan kiya , kaha hum se Abu Hazim ne bayan kiya , in se Sahl bin Saad Saadi razi Allahu anhu ne ke hum Rasool Allah salla Allahu alaihi wasallam ke saath Ghazwa e Khandaq ke mauqa par maujood thay , Nabi Karim salla Allahu alaihi wasallam bhi khandaq khodte jaate thay aur hum matti ko uthate jaate aur Nabi Karim salla Allahu alaihi wasallam hamare qareeb se guzarte huay farmate «allaahumma laa aisha illaa aishul-aakhirah , fagh-fir lil-ansaari wal-muhaajirah» ”Ae Allah! Zindagi to bas aakhirat hi ki zindagi hai , pas tu Ansar wa Muhajireen ki maghfirat kar .“ Is riwayat ki mutabia-t Sahl bin Saad razi Allahu anhu ne bhi Nabi Karim salla Allahu alaihi wasallam se ki hai .