Hum se Ali Bin Abdullah ne bayan ka, unhon ne kaha hum se Sufyan ne bayan kiya, unhon ne kaha hum se Safwan Bin Sulaim ne bayan kiya, un se Ata Bin Yasar ne aur un se Abu Saeed Khudri (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Har baligh par Juma ke din ghusl wajib hai."
.

Hum se Muhammad bin Bashar ne byaan kiya , kaha ke hum se Yahya bin Saeed Qattan ne Ubaydullah Umari se byaan kiya , kaha ke mujh se Saeed bin Abi Saeed Maqabri ne apne baap Abu Saeed Maqabri se byaan kiya , unhon ne Abu Hurayrah razi Allahu anhu se ke Rasool Allah salla Allahu alaihi wasallam masjid mein tashreef laye us ke baad ek aur shakhs aaya . Us ne namaaz parhi , phir Nabi Karim salla Allahu alaihi wasallam ko salam kiya . Aap ne salam ka jawab de kar farmaya ke wapas jao aur phir namaaz parh , kyunke tune namaaz nahi parhi . Woh shakhs wapas gaya aur pehle ki tarah namaaz parhi aur phir aa kar salam kiya . Lekin Aap ne is marteba bhi yahi farmaya ke wapas ja aur dobara namaaz parh , kyunke tune namaaz nahi parhi . Aap ne is tarah teen marteba kiya . Aakhir us shakhs ne kaha ke us Zaat ki qasam! jis ne Aap ko haq ke saath maboos kiya hai . Main is ke ilawa aur koi achha tareeqa nahi jaanta , is liye Aap mujhe namaaz sikha deejiye . Aap ne farmaya ke jab namaaz ke liye khara ho to pehle takbeer tahreema keh . Phir aasani ke saath jitna Quran tujhe yaad ho us ki tilawat kar . Us ke baad ruku kar , achhi tarah se ruku ho le to phir sar utha kar poori tarah khara ho ja . Us ke baad sajda kar poore itminan ke saath . Phir sar utha aur achhi tarah baith ja . Isi tarah apni tamam namaaz poori kar .

Hum se Ali bin Abdullah Madini ne byaan kiya , unhon ne kaha ke hum se Sufyan ne byaan kiya , unhon ne kaha ke mujh se Safwan bin Saleem ne Ata se byaan kiya , un se Abu Saeed Khudri razi Allahu anhu ne byaan kiya un se Nabi Karim salla Allahu alaihi wasallam ne farmaya ke juma ke din har baligh ke liye ghusl zaroori hai .

Hum se Abdullah bin Yusuf Taneesi ne byaan kiya , unhon ne kaha ke hamein Imam Malik ne Nafi se khabar di aur un ko Abdullah bin Umar razi Allahu anhuma ne ke Rasool Allah salla Allahu alaihi wasallam ne farmaya ke tum mein se jab koi shakhs juma ki namaaz ke liye aana chahe to usay ghusl kar lena chahiye .

Hum se Abdullah bin Muhammad bin Asma ne byaan kiya , unhon ne kaha ke hum se Juwayriyah bin Asma ne Imam Malik se byaan kiya , un se Zuhri ne , un se Salim bin Abdullah bin Umar razi Allahu anhuma ne un se Ibn Umar razi Allahu anhuma ne ke Umar bin Khattab razi Allahu anhu juma ke din kharay khutba de rahe thay ke itne mein Nabi Karim salla Allahu alaihi wasallam ke agle Sahabah Muhajireen mein se ek buzurg tashreef laye (yani Usman razi Allahu anhu) Umar razi Allahu anhu ne un se kaha bhala yeh kaun sa waqt hai unhon ne farmaya ke main mashghool ho gaya tha aur ghar wapas aate hi azaan suni , is liye main wuzu se zyada aur kuch (ghusl) na kar saka . Umar razi Allahu anhu ne farmaya ke wuzu bhi achha hai . Halaanke Aap ko maloom hai ke Nabi Karim salla Allahu alaihi wasallam ghusl ke liye farmate thay .

Hum se Abdullah bin Yusuf ne hadees byaan ki , unhon ne kaha ke hamein Malik ne Safwan bin Saleem ke wastay se khabar di , unhein Ata bin Yasar ne , unhein Abu Saeed Khudri razi Allahu anhu ne ke Rasool Allah salla Allahu alaihi wasallam ne farmaya ke juma ke din har baligh ke liye ghusl zaroori hai .

Hum se Ali bin Madini ne byaan kiya , unhon ne kaha ke hamein Hurmi bin Umarah ne khabar di unhon ne kaha ke hum se Shubah bin Hajjaj ne Abu Bakr bin Munkadir se byaan kiya , unhon ne kaha ke mujh se Amr bin Saleem Ansari ne byaan kiya , unhon ne kaha ke main gawah hoon ke Abu Saeed Khudri razi Allahu anhu ne farmaya tha ke main gawah hoon ke Rasool Allah salla Allahu alaihi wasallam ne farmaya ke juma ke din har jawan par ghusl , miswaak aur khushboo lagana agar maysar ho , zaroori hai . Amr bin Saleem ne kaha ke ghusl ke mutalliq to main gawahi deta hoon ke woh wajib hai lekin miswaak aur khushboo ka ilm Allah Taala ko zyada hai ke woh bhi wajib hain ya nahi . Lekin hadees mein isi tarah hai . Abu Abdullah (Imam Bukhari rahimahullah) ne farmaya ke Abu Bakr bin Munkadir Muhammad bin Munkadir ke bhai thay aur un ka naam maloom nahi (Abu Bakr un ki kuniyat thi) Bukayr bin Ashaj . Saeed bin Abi Hilal aur bohot se log un se riwayat karte hain . Aur Muhammad bin Munkadir un ke bhai ki kuniyat Abu Bakr aur Abu Abdullah bhi thi .

Hum se Abu Naeem ne byaan kiya , kaha ke hum se Shayban bin Abdur Rahman ne Yahya bin Abi Kathir se byaan kiya , un se Abu Hurayrah razi Allahu anhu ne ke Umar bin Khattab razi Allahu anhu juma ke din khutba de rahe thay ke ek buzurg (Usman razi Allahu anhu) daakhil huay . Umar bin Khattab razi Allahu anhu ne farmaya ke Aap log namaaz ke liye aane mein kyun der karte hain . (awal waqt kyun nahi aate) aane wale buzurg ne farmaya ke der sirf itni hui ke azaan sunte hi main ne wuzu kiya (aur phir haazir hua) Aap ne farmaya ke kya Aap logon ne Nabi Karim salla Allahu alaihi wasallam se yeh hadees nahi suni hai ke jab koi juma ke liye jaye to ghusl kar lena chahiye .

Hum se Abul Yaman ne byaan kiya , unhon ne kaha ke hamein Shoaib ne Zuhri se khabar di ke Taus bin Kaysan ne byaan kiya ke main ne Abdullah bin Abbas razi Allahu anhuma se poocha ke log kehte hain ke Rasool Allah salla Allahu alaihi wasallam ne farmaya hai ke juma ke din agarche junub na ho lekin ghusl karo aur apne sar dhoya karo aur khushboo lagaya karo . Ibn Abbas razi Allahu anhuma ne kaha ke ghusl ka hukm to theek hai lekin khushboo ke mutalliq mujhe ilm nahi .

Hum se Ibrahim bin Musa ne byaan kiya , unhon ne kaha ke hamein Hisham bin Yusuf ne khabar di , ke unhein Ibn Jurayj ne khabar di unhon ne kaha ke mujhe Ibrahim bin Maysarah ne Taus se khabar di aur unhein Abdullah bin Abbas razi Allahu anhuma ne , Aap ne juma ke din ghusl ke bare mein Nabi Karim salla Allahu alaihi wasallam ki hadees ka zikr kiya to main ne kaha ke kya tel aur khushboo ka istimal bhi zaroori hai ? Aap ne farmaya ke mujhe maloom nahi .

Hum se Abul Yaman ne byaan kiya , unhon ne kaha ke hamein Shoaib ne Zuhri se khabar di , unhon ne kaha ke mujh se Salim bin Abdullah ne byaan kiya , unhon ne (apne walid) Abdullah bin Umar razi Allahu anhuma se suna woh farmate thay ke main ne Rasool Allah salla Allahu alaihi wasallam se suna ke tum mein se jo shakhs juma parhne aaye to ghusl kare .

Hum se Abdullah bin Maslamah Qanabi ne byaan kiya , un se Imam Malik ne byaan kiya , un se Safwan bin Saleem ne , un se Ata bin Yasar ne , un se Abu Saeed Khudri razi Allahu anhu ne ke Rasool Allah salla Allahu alaihi wasallam ne farmaya ke har baligh ke oopar juma ke din ghusl wajib hai .

Hum se Abdaan Abdullah bin Usman ne byaan kiya , kaha ke hamein Abdullah bin Mubarak ne khabar di , kaha ke hamein Yahya bin Saeed ne khabar di ke unhon ne Umrah bint Abdur Rahman se juma ke din ghusl ke baare mein poocha . Unhon ne byaan kiya ke Aishah razi Allahu anha farmati thi ke log apne kaamon mein mashghool rehte aur juma ke liye isi haalat (mail kucheel) mein chale aate , is liye un se kaha gaya ke kaash tum log (kabhi) ghusl kar liya karte .

Hum se Aadam bin Abi Iyaas ne byaan kiya , unhon ne kaha ke hum se Ibn Abi Zayb ne byaan kiya , un se Zuhri ne , un se Salim ne , un se un ke baap (Ibn Umar razi Allahu anhuma) ne farmaya ke main ne Nabi Karim salla Allahu alaihi wasallam se suna . Aap salla Allahu alaihi wasallam ne minbar par khutbah dete hue farmaya ke jo juma ke liye aaye woh pehle ghusl kar liya kare .