Hum se Ali Bin Abdullah ne bayan kiya, kaha ke hum se Sufyan ne bayan kiya, un se Zuhri ne bayan kiya, un se Saeed Bin Musayyab ne bayan kiya, aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne is se mana farmaya ke koi shehri kisi dehati ka mal-o-asbab beche aur ye ke koi (saman khareedne ki niyat ke baghair doosre asal khareedaron se) barh kar boli na de. Isi tarah koi shakhs apne bhai ke saude mein madakhalat na kare. Koi shakhs (kisi aurat ko) doosre ke paigham-e-nikah hote hue apna paigham na bheje. Aur koi aurat apni kisi deeni behen ko is niyat se talaq na dilwaye ke is ke hissa ko khud hasil kar le
.

Hum se Ismail ne bayan kiya, kaha ke mujh se Imam Malik ne bayan kiya, un se Nafay ne, aur un se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya, koi shakhs apne bhai ki khareed-o-farokht mein dakhal andazi na kare
.

Hum se Yahya Bin Bukair ne bayan kiya, kaha ke hum se Liath Bin Saad ne bayan kiya, un se Jafar Bin Rabia ne, un se Abdur Rahman Bin Hurmuz Aaraj ne, un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya (bechne ke liye) ontni aur bakri ke thanon mein khoon ko rok kar na rakkho. Agar kisi ne (dhoka mein aa kar) koi aisa janwar khareed liya to usay doodh dohne ke baad donon ikhtiyarat hain chahe to janwar ko rakh le, aur chahe to wapas kar de. Aur ek saa khajoor is ke sath doodh ke badal dede. Abu Salih, Mujahid, Waleed Bin Rabah aur Musa Bin Yasar se ba-wasita Abu Hurairah (Radi Allahu Anhu) Nabi Kareem (Sallallahu Alaihi Wasallam) se riwayat ek saa khajoor hi ki hai. Baaz rawiyon ne Ibn Sireen se ek saa khajoor ki riwayat ki hai aur ye ke khareedar ko (soorat-e-madhkoora mein) teen din ka ikhtiyar ho ga. Agarchay baaz doosre rawiyon ne Ibn Sireen hi se ek saa khajoor ki bhi riwayat ki hai, lekin teen din ke ikhtiyar ka zikr nahi kiya aur (tawan mein) khajoor dene ki riwayat hi zyada hain
.

Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Abu-al-Zinad ne, unhein Aaraj ne, aur unhein Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya (tijarti) qafilon ki peshwai (un ka saman shehar pohanche se pehle hi khareed lene ki gharz se) na karo. Ek shakhs kisi doosre ki bai par bai na kare aur koi «najash» (dhoka fareb) na kare aur koi shehri, badwi ka mal na beche aur bakri ke than mein doodh na roke. Lekin agar koi is (aakhri) soorat mein janwar khareed le to usay dohne ke baad donon tarah ke ikhtiyarat hain. Agar wo is bai par raazi hai to janwar ko rok sakta hai aur agar wo raazi nahi to ek saa khajoor is ke sath de kar usay wapas kar de
.

Hum se Muhammad Bin Amr ne bayan kiya, kaha ke hum se Makki Bin Ibrahim ne bayan kiya, unhein Ibn Juraij ne khabar di, kaha ke mujhe Ziyad ne khabar di ke Abdur Rahman Bin Zaid ke ghulam Thabit ne unhein khabar di, ke unhon ne Abu Hurairah (Radi Allahu Anhu) ko ye kehte suna ke Rasul Allah (Sallallahu Alaihi Wasallam) ne farmaya jis shakhs ne «musarrah» bakri khareedi aur usay doha. To agar wo is mamla par raazi hai to usay apne liye rok le aur agar raazi nahi hai to (wapas kar de aur) is ke doodh ke badle mein ek saa khajoor dede
.

Hum se Salt Bin Muhammad ne bayan kiya, kaha ke hum se Abdul Wahid ne bayan kiya, kaha ke hum se Mamar ne bayan kiya, un se Abdullah Bin Taous ne, un se un ke baap ne aur un se Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya (tijarti) qafilon se aage ja kar na mila karo (un ko mandi mein aane do) aur koi shehri, kisi dehati ka saman na beche, unhon ne bayan kiya ke is par mein ne Ibn Abbas (Radi Allahu Anhuma) se poocha ke Nabi Kareem (Sallallahu Alaihi Wasallam) ke is irshad ka ke ”koi shehri kisi dehati ka mal na beche“ ka matlab kya hai ? to unhon ne farmaya ke matlab ye hai ke is ka dalal na bane
.

Mujh se Abdullah Bin Sabah ne bayan kiya, kaha ke hum se Abu Ali Hanafi ne bayan kiya, un se Abdur Rahman Bin Abdullah Bin Dinar ne bayan kiya, kaha ke mujh se mere walid ne bayan kiya aur un se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne is se mana farmaya ke koi shehri, kisi dehati ka mal beche. Yehi Ibn Abbas (Radi Allahu Anhuma) ne bhi kaha hai
.

Hum se Makki Bin Ibrahim ne bayan kiya, kaha ke mujhe Ibn Juraij ne khabar di, unhein Ibn Shihab ne, unhein Saeed Bin Musayyab ne, unhon ne Abu Hurairah (Radi Allahu Anhu) se suna ke Nabi Kareem (Sallallahu Alaihi Wasallam) ne farmaya, koi shakhs apne kisi bhai ke maul par maul na kare aur koi «najash» (dhoka, fareb) na kare, aur na koi shehri, kisi dehati ke liye beche ya maul le
.

Hum se Muhammad Bin Muthanna ne bayan kiya, kaha ke hum se Maaz Bin Maaz ne bayan kiya, un se Abdul-lah Bin Aun ne bayan kiya, un se Muhammad Bin Sireen ne ke Anas Bin Malik (Radi Allahu Anhu) ne bayan kiya ke humein is se roka gaya ke koi shehri kisi dehati ka mal-e-tijarat beche
.

Hum se Muhammad Bin Bashar ne bayan kiya, kaha ke hum se Abdul Wahhab ne bayan kiya, un se Ubaidullah Umri ne bayan kiya, un se Saeed Bin Abi Saeed ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne (tijarti qafilon se) aage barh kar milne se mana farmaya hai aur basti walon ko bahar walon ka mal bechne se bhi mana farmaya
.

Hum se Musaddad ne bayan kiya, kaha ke hum se Yezid Bin Zuraie ne bayan kiya, ke hum se Taimi ne bayan kiya, un se Abu Usman ne aur un se Abdullah Bin Masood (Radi Allahu Anhu) ne bayan kiya ke jo koi doodh jama ki hui bakri khareede (wo bakri pher de) aur is ke sath ek saa dede aur Nabi Kareem (Sallallahu Alaihi Wasallam) ne qafila walon se aage barh kar milne se mana farmaya
.

Hum se Abdullah Bin Yusuf ne bayan kiya, kaha ke hum ko Imam Malik (Rahimahullah) ne khabar di, unhein Nafay ne aur unhein Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya koi shakhs kisi doosre ki bai par bai na kare aur jo mal bahar se aa raha ho is se aage ja kar na mile jab tak wo bazaar mein na aaye
.

Hum se Musaddad ne bayan kiya, kaha ke hum se Abdul Wahid Bin Ziyad ne bayan kiya, un se Maamar ne bayan kiya, un se Ibn Tawus ne, un se un ke baap ne, aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne (tijarati) qafilon se (mandi se aage ja kar) mulaqat karne se mana farmaya tha. Aur ye ke shehri dehati ka maal na bechein, mein ne poocha, ay Ibn Abbas (Radi Allahu Anhuma)! ”Shehri dehati ka maal na bechein“ ka kya matlab hai ? Unhon ne farmaya ke murad ye hai ke un ke dallal na banein
.

Hum se Musaddad ne bayan kiya, kaha hum se Yazid Bin Zuray ne bayan kiya, un se Ma'mar ne bayan kiya, un se Zuhri ne, un se Saeed ne aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Koi shehri kisi dehati ka maal-e-tijarat na beche. Koi shakhs najsh na kare aur na apne bhai ki lagayi hui qeemat par bhao barhaye. Na koi shakhs apne kisi bhai ke paigham-e-nikah ki maujoodgi mein apna paigham bheje aur na koi aurat (kisi mard se) apni behen ki talaq ka mutaliba kare (jo us mard ke nikah mein ho) taake is tarah us ka hissa bhi khud le le."
.

Hum se Muhammad Bin Ar'arah ne bayan kiya, kaha hum se Shuba ne, un se Adi Bin Sabit ne, un se Abu Hazim ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne (tijarati qafilon ki) peshwai se mana farmaya tha aur is se bhi ke koi shehri kisi dehati ka saman-e-tijarat beche aur is se bhi ke koi aurat apni (deeni ya nasabi) behen ke talaq ki shart lagaye aur is se ke koi apne kisi bhai ke bhao par bhao lagaye, isi tarah Aap (Sallallahu Alaihi Wasallam) ne najsh aur tasriyah se bhi mana farmaya. Muhammad Bin Ar'arah ke sath is hadees ko Muaz Bin Muaz aur Abdusamad Bin Abdul Waris ne bhi Shuba se riwayat kiya hai aur Ghundar aur Abdur Rahman Bin Mahdi ne yun kaha ke mumanat ki gayi thi (majhool ke sighay ke sath) Adam Bin Abi Iyas ne yun kaha ke humein mana kiya gaya tha Nazr aur Hajjaj Bin Minhal ne yun kaha ke mana kiya tha (Rasul Allah Sallallahu Alaihi Wasallam ne)
.

Hum se Ibrahim Bin Musa ne bayan kiya, kaha ke hum ko Hisham Bin Yusuf ne khabar di, unhein Ibn Juraij ne khabar di, kaha ke mujhe Ya'la Bin Muslim aur Amr Bin Dinar ne khabar di Saeed Bin Jubair se aur un mein ek doosre se zyada bayan karta hai, Ibn Juraij ne kaha mujh se ye hadees Ya'la aur Amr ke siwa auron ne bhi bayan ki, wo Saeed Bin Jubair se riwayat karte hain ke hum Ibn Abbas (Radi Allahu Anhuma) ki khidmat mein hazir thay. Unhon ne kaha ke mujh se Ubayy Bin Kaab (Radi Allahu Anhu) ne bayan kiya, unhon ne kaha ke Rasul Allah (Sallallahu Alaihi Wasallam) ne farmaya "Khizr se jo ja kar mile thay wo Musa Alaihissalam thay." Phir aakhir tak hadees bayan ki ke Khizr Alaihissalam ne Musa Alaihissalam se kaha kya mein aap ko pehle hi nahi bata chuka tha ke aap mere sath sabr nahi kar sakte (Musa Alaihissalam ki taraf se) pehla sawal to bhool kar hua tha, beech ka shart ke taur par aur teesra jaan boojh kar hua tha. Aap ne Khizr se kaha tha ke "Mein jis ko bhool gaya aap us mein mujh se moakhazah na kijiye aur na mera kaam mushkil banaiye." Dono ko ek larka mila jise Khizr Alaihissalam ne qatl kar diya wo aage barhe to unhein ek diwar mili jo girne wali thi lekin Khizr Alaihissalam ne ise durust kar diya. Ibn Abbas (Radi Allahu Anhuma) ne «Wara'ahum Malika» «Wara'ahum» ke bajaye «Amamahum Malika» parha hai
.

Hum se Makki bin Ibrahim ne byaan kiya , kaha hum se Jurayj ne byaan kiya , kaha ke main ne Nafi se suna , unhon ne byaan kiya ke Abdullah bin Umar razi Allahu anhuma byaan karte thay ke Nabi Karim salla Allahu alaihi wasallam ne is se mana farmaya hai ke hum kisi ke bhao par bhao lagayein aur kisi shakhs ko apne kisi (deeni) bhai ke paigham e nikah par paigham bhejein yahan tak ke paigham bhejne wala apna irada badal de ya usay paigham e nikah bhejne ki ijazat de de to jaiz hai .

Aur koi shakhs apne bhai ke paigham par paigham na bheje yahan tak ke woh nikah kare ya chhor de .

Ibn Masood razi Allahu anhu ne kaha ke koi aurat (saukan) behen ki talaq ki shart na lagaye.

Hum se Abu al-Yaman ne bayan kiya, unhon ne kaha hum ko Shuayb ne khabar di, in se Zuhri ne bayan kiya unhon ne kaha ke mujh se Anas Malik razi Allahu anhu ne bayan kiya ke Rasool Allah salla Allahu alaihi wasallam ne farmaya ”aapas mein bughz na rakkho, hasad na karo, peeth peeche kisi ki burayi na karo, balkay Allah ke bande aapas mein bhai bhai ban kar raho aur kisi Musalman ke liye jaiz nahi ke ek bhai kisi bhai se teen din se zyada salam kalam chhorr kar rahe.“

Hum se Abdullah bin Yusuf ne bayan kiya, kaha unhein Imam Malik rahmahullah ne khabar di, unhein Ibn Shihab ne aur in se Anas bin Malik razi Allahu anhu ne ke Rasool Allah salla Allahu alaihi wasallam ne farmaya ”aapas mein bughz na rakkho aur ek doosre se hasad na karo, peeth peeche kisi ki burayi na karo, balkay Allah ke bande aur aapas mein bhai bhai ban kar raho aur kisi Musalman ke liye jaiz nahi ke kisi bhai se teen din se zyada tak baat-cheet band kare.“

Hum se Abdullah bin Yusuf ne bayan kiya , kaha hum ko Imam Malik ne khabar di , unhein Abu al-Zinad ne , unhein Aaraj ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ke koi aurat apni kisi (deeni) behen ki talaq ka mutalba (shohar se) na kare ke is ke ghar ko apne hi liye khaas kar lena chahe . Balkay usay nikah (doosri aurat ki maujoodgi mein bhi) kar lena chahiye kyunke usay itna hi mile ga jitna is ke muqaddar mein ho ga .