Aur Allah Ta'ala ka (Surah al-Falaq mein) farman «wa min sharri haasidin izhaa hasada» ”aur hasad karne wale ki burayi se teri panah chahta hoon, ya Allah! Jab woh hasad kare.“

Hum se Bishr bin Muhammad ne bayan kiya, kaha hum ko Abdullah bin Mubarak ne khabar di, kaha hum ko Mamar ne khabar di, unhein Humam bin Munabbih ne khabar di aur unhein Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”bad-gumani se bachte raho kyunke bad-gumani ki baatein aksar jhooti hoti hain, logon ke ayoob talash karne ke peeche na paro, aapas mein hasad na karo, kisi ki peeth peeche burayi na karo, bughz na rakkho, balkay sab Allah ke bande aapas mein bhai bhai ban kar raho.“

Hum se Abu al-Yaman ne bayan kiya, unhon ne kaha hum ko Shuayb ne khabar di, in se Zuhri ne bayan kiya unhon ne kaha ke mujh se Anas Malik razi Allahu anhu ne bayan kiya ke Rasool Allah salla Allahu alaihi wasallam ne farmaya ”aapas mein bughz na rakkho, hasad na karo, peeth peeche kisi ki burayi na karo, balkay Allah ke bande aapas mein bhai bhai ban kar raho aur kisi Musalman ke liye jaiz nahi ke ek bhai kisi bhai se teen din se zyada salam kalam chhorr kar rahe.“