Hum se ’Ali bin Abdullah ne bayan kiya, kaha hum se Ya’qoob bin Ibrahim bin Sa’d ne, kaha hum se mere baap ne, unhon ne Saleh se suna. Unhon ne Ibn-e-Shihaab se, kaha unhein Mahmood bin Ar-Rabee’ ne khabar di, Ibn-e-Shihaab kehte hain Mahmood wahi hain ke jab woh chhote the to Rasoolullah Sallallahu Alaihi Wasallam ne un hi ke kunwen (ke paani) se un ke munh mein kulli daali thi aur Urwah ne isi Hadees ko Miswar waghera se bhi riwayat kiya hai aur har ek (rawi) un dono mein se ek doosre ki tasdeeq karte hain ke jab Rasoolullah Sallallahu Alaihi Wasallam Wuzu farmaate to Aap Sallallahu Alaihi Wasallam ke bachche huwe Wuzu ke paani par Sahaba Radhiallahu Anhum jhagadne ke qareeb ho jaate the.

Hum se Muhammed bin Yousuf ne bayan kiya, un se Abu Mus-hir ne, un se Muhammed bin Harb ne, un se Zubaidi ne Zohri ke waaste se bayan kiya, woh Mahmood bin Ar-Rabee’ se naql karte hain, unhon ne kaha ke mujhe yaad hai ke (ek martaba) Rasoolullah Sallallahu Alaihi Wasallam ne ek dol se munh mein paani le kar mere chehre par kulli farmaayi, aur main us waqt paanch saal ka tha.

Hum se Yaqub Bin Ibrahim ne bayan kiya, kaha ke hum se Ismail Bin Aliyyah ne bayan kiya, un se Ayub Sakhtiyani ne, un se Nafi ne ke Ibn Umar (Radi Allahu Anhuma) ke larke Abdullah Bin Abdullah un ke yahan gaye. Haj ke liye sawari ghar mein khari hui thi. Unhon ne kaha ke mujhe khatra hai ke is saal Musalmanon mein aapas mein larayi ho jaye gi aur aap ko wo Bait Allah se rok dein ge. Is liye agar aap na jate to behtar hota. Ibn Umar (Radi Allahu Anhuma) ne jawab diya ke Rasul Allah (Sallallahu Alaihi Wasallam) bhi tashreef le gaye thay (Umrah karne Sulah Hudaibiyah ke moqa par) aur kuffar-e-Quraish ne aap ko Bait Allah tak pohanchne se rok diya tha. Is liye agar mujhe bhi rok diya gaya to mein bhi wahi kaam karoon ga jo Rasul Allah (Sallallahu Alaihi Wasallam) ne kiya tha aur tumhare liye Rasul Allah (Sallallahu Alaihi Wasallam) ki zindagi behtareen namuna hai. Phir aap ne farmaya ke mein tumhein gawah banata hoon ke mein ne apne Umrah ke sath Haj (apne oopar) wajib kar liya hai. Unhon ne bayan kiya ke phir aap Makkah aaye aur dono Umrah aur Haj ke liye ek hi tawaf kiya
.

Hum se Ahmad Bin Muhammad ne bayan kiya, kaha hum ko Abdullah ne khabar di, kaha ke hum ko Yunus ne khabar di, un se Zuhri ne kaha ke mujhe Salim ne khabar di, kaha ke Ibn Umar (Radi Allahu Anhuma) farmaya karte thay kya tumhare liye Rasul Allah (Sallallahu Alaihi Wasallam) ki sunnat kafi nahi hai ke agar kisi ko Hajj se rok diya jaye, ho sake to wo Baitullah ka tawaf kar le aur Safa aur Marwah ki sayee, phir wo har cheez se halal ho jaye, yahan tak ke wo doosre saal Hajj kar le phir qurbani kare, agar qurbani na mile to roza rakhe, Abdullah se riwayat hai ke humein Mamar ne khabar di, un se Zuhri ne bayan kiya ke mujh se Salim ne bayan kiya, un se Ibn Umar (Radi Allahu Anhuma) ne isi pehli riwayat ki tarah bayan kiya
.

Hum se Muhammad Bin Abdul Rahim ne bayan kiya, unhon ne kaha ke hum ko Abu Badr Shuja Bin Walid ne khabar di, unhon ne kaha ke hum se Mamar Bin Muhammad Umri ne bayan kiya aur un se Nafi ne bayan kiya ke Abdullah aur Salim ne Abdullah Bin Umar (Radi Allahu Anhuma) se guftagu ki, (ke wo is saal Makkah na jayein) to unhon ne farmaya ke hum Rasul Allah (Sallallahu Alaihi Wasallam) ke sath Umrah ka ihram bandh kar gaye thay aur kuffar-e-Quraish ne humein Baitullah se rok diya tha to Rasul Allah (Sallallahu Alaihi Wasallam) ne apni qurbani ko nahr kiya aur sar mundaya
.

Hum se Muhammad Bin Bashar ne bayan kiya, kaha ke hum se Ghundar ne bayan kiya, kaha hum se Shuba ne bayan kiya, un se Abu Ishaq ne bayan kiya, unhon ne Bara Bin Azib (Radi Allahu Anhu) se suna, aap ne bayan kiya ke jab Rasul Allah (Sallallahu Alaihi Wasallam) ne Hudaybiya ki sula (Quraish se) ki to is ki dastavez Ali (Radi Allahu Anhu) ne likhi thi. Unhon ne is mein likha Muhammad Allah ke Rasul (Sallallahu Alaihi Wasallam) ki taraf se. Mushrikeen ne is par aitraz kiya ke lafz Muhammad ke sath Rasul Allah na likho, agar aap Rasul Allah hote to hum aap se larte hi kyun? Aap (Sallallahu Alaihi Wasallam) ne Ali (Radi Allahu Anhu) se farmaya Rasul Allah ka lafz mita do, Ali (Radi Allahu Anhu) ne kaha ke mein ne kaha ke mein to ise nahi mita sakta, to aap (Sallallahu Alaihi Wasallam) ne khud apne hath se wo lafz mita diya aur mushrikeen ke sath is shart par sula ki ke aap apne ashaab ke sath (aayinda saal) teen din ke liye Makkah aayein aur hathiyar miyan mein rakh kar dakhil hon, shagirdou ne poocha ke Julban-us-Silaah (jis ka yahan zikar hai) kya cheez hoti hai? To unhon ne bataya ke miyan aur jo cheez is ke andar hoti hai (is ka naam Julban hai)
.

Hum se Muhammad Bin Rafay ne bayan kiya, kaha hum se Shureih Bin Numan ne bayan kiya, kaha hum se Fulaih ne bayan kiya, un se Nafi ne aur un se Ibn Umar (Radi Allahu Anhuma) ne ke Rasul Allah (Sallallahu Alaihi Wasallam) Umrah ka ihram bandh kar nikle, to kuffar-e-Quraish ne Aap (Sallallahu Alaihi Wasallam) ko Bait-ullah jane se rok diya. Is liye Aap (Sallallahu Alaihi Wasallam) ne qurbani ka janwar Hudaybiya mein zibah kar diya aur sar bhi wahein mundwa liya aur kuffar-e-Makkah se Aap (Sallallahu Alaihi Wasallam) ne is shart par sula ki thi ke Aap (Sallallahu Alaihi Wasallam) aayinda saal Umrah kar sakein ge. Talwaron ke siwa aur koi hathiyar sath na layein ge. (Aur wo bhi niyam mein hon gi) aur Quraish jitne din chahein ge is se zyada Makkah mein na thehar sakein ge. (Yani teen din) chunanchay Aap (Sallallahu Alaihi Wasallam) ne aayinda saal Umrah kiya aur sharait ke mutabiq Aap (Sallallahu Alaihi Wasallam) Makkah mein dakhil hue, phir jab teen din guzar chuke to Quraish ne Makke se chale jane ke liye kaha aur Aap (Sallallahu Alaihi Wasallam) wahan se wapas chale aaye
.

Urwah ne kaha ke mujhe Aisha (Radi Allahu Anha) ne khabar di ke Rasul Allah (Sallallahu Alaihi Wasallam) hijrat karne wali aurton ka is ayat ki wajah se imtihan liya karte thay «{‏ Ya Ayyuhallazina Amanu Izaja Akumul Mu'minatu Muhajiratin Famta'hinuhunna ‏}‏ ila ‏ {‏ Ghafurun Rahim‏ }‏‏.» "Ae musalmano! Jab tumhare yahan musalman aurtein hijrat kar ke aayin to tum un ka imtihan le lo Ghafurun Rahim tak." Urwah ne kaha ke Aisha (Radi Allahu Anha) ne kaha ke in aurton mein se jo is shart ka iqrar kar letein to Rasul Allah (Sallallahu Alaihi Wasallam) farmate ke mein ne tum se bai'at ki, Aap (Sallallahu Alaihi Wasallam) sirf zaban se bai'at karte thay. Qasam Allah ki! Bai'at karte waqt Aap (Sallallahu Alaihi Wasallam) ke hath ne kisi bhi aurat ke hath ko kabhi nahi chhuwa, balki Aap (Sallallahu Alaihi Wasallam) sirf zaban se bai'at liya karte thay
.

Aur Laith ne kaha ke mujh se Jafar Bin Rabeeah ne bayan kiya ' un se Abdur Rahman Bin Hurmuz ne bayan kiya ' un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne ek shakhs ka zikr kiya jinhon ne Bani Israel ke kisi doosre shakhs se ek hazar ashrafi qarz manga aur us ne ek muqarrara muddat tak ke liye de diya
.

Hum se Abdan ne bayan kiya, kaha hum ko Abu Hamza ne khabar di, kaha ke mein ne Aamash se suna, unhon ne bayan kiya ke mein ne Abu Wail se pucha, kya aap Siffin ki jung mein maujood thay? Unhon ne bayan kiya ke haan (mein tha) aur mein ne Sahl Bin Hunaif (Radi Allahu Anhu) ko ye kehte suna tha ke tum log khud apni raye ko ghalat samjho, jo aapas mein ladte marte ho. Mein ne apne tain dekha jis din Abu Jandal aaya (yaani Hudaibiya ke din) agar mein Nabi Kareem (Sallallahu Alaihi Wasallam) ka hukm pher deta aur hum ne jab kisi musibat mein darr kar talwarain apne kandhon par rakhein to wo musibat asan ho gayi. Hum ko is ka anjam maloom ho gaya. Magar yahi ek ladai hai (jo sakht mushkil hai is ka anjam behtar nahi maloom hota)
.

Hum se Abdullah Bin Muhammad ne bayan kiya, kaha hum se Yahya Bin Adam ne, un se Yazid Bin Abdul Aziz ne, un se un ke baap Abdul Aziz Bin Siyah ne, un se Habib Bin Abi Sabit ne bayan kiya, kaha ke mujh se Abu Wail ne bayan kiya ke hum maqam-e-Siffin mein dere dale hue thay. Phir Sahl Bin Hunaif (Radi Allahu Anhu) khade hue aur farmaya Ae logo! Tum khud apni raye ko ghalat samjho. Hum sulah Hudaibiya ke mauqa par Rasul Allah (Sallallahu Alaihi Wasallam) se sath thay, agar humein ladna hota to is waqt zaroor ladte. Umar (Radi Allahu Anhu) is mauqa par aaye (yaani Hudaibiya mein) aur arz kiya, Ya Rasul Allah! Kya hum haqq par aur wo baatil par nahi hain? Nabi Kareem (Sallallahu Alaihi Wasallam) ne farmaya ke kyun nahi! Umar (Radi Allahu Anhu) ne kaha kya hamare maqtool Jannat mein aur un ke maqtool Jahannum mein nahi jayenge? Nabi Kareem (Sallallahu Alaihi Wasallam) ne farmaya, ke kyun nahi! Phir Umar (Radi Allahu Anhu) ne kaha ke phir hum apne deen ke muamle mein kyun dabein? Kya hum (Madinah) wapas chale jayenge, aur hamare aur un ke darmiyan Allah koi faisla nahi karega. Nabi Kareem (Sallallahu Alaihi Wasallam) ne farmaya "Ibn Khattab! Mein Allah ka Rasul hoon aur Allah mujhe kabhi barbad nahi karega." Is ke baad Umar (Radi Allahu Anhu) Abu Bakr (Radi Allahu Anhu) ke paas gaye aur un se wahi sawalat kiye, jo Nabi Kareem (Sallallahu Alaihi Wasallam) se abhi kar chuke thay. Unhon ne bhi yahi kaha ke Aap (Sallallahu Alaihi Wasallam) Allah ka Rasul hain, aur Allah unhein kabhi barbad nahi hone dega. Phir Surah Fatah nazil hui aur Aap (Sallallahu Alaihi Wasallam) ne Umar (Radi Allahu Anhu) ko ise aakhir tak parh kar sunaya, to Umar (Radi Allahu Anhu) ne arz kiya kya yahi fatah hai? Aap (Sallallahu Alaihi Wasallam) ne farmaya ke haan! Bila shaq yahi fatah hai
.

Hum se Ahmad Bin Usman Bin Hakeem ne bayan kiya, kaha hum se Shuraih Bin Maslama ne bayan kiya, kaha hum se Ibrahim Bin Yusuf Bin Abi Ishaq ne bayan kiya, kaha ke mujh se mere walid ne bayan kiya, un se Abu Ishaq ne bayan kiya, kaha ke mujh se Bara Bin Azib (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne jab umrah karna chaha to Aap ne Makkah mein dakhila ke liye Makkah ke logon se ijazat lene ke liye aadmi bheja. Unhon ne is shart ke sath (ijazat di) ke Makkah mein teen din se zyada qayam na karein. Hathyar niyam mein rakhe baghair dakhil na hon aur (Makkah ke) kisi aadmi ko apne sath (Madinah) na le jayein (agarchay wo jana chahe) unhon ne bayan kiya ke phir in sharait ko Ali Bin Abi Talib (Radi Allahu Anhu) ne likhna shuru kiya aur is tarah "Ye Muhammad Allah ke Rasul ke sulah-nama ki tehreer hai." Makkah walon ne kaha ke agar hum jaan lete ke Aap Allah ke Rasul hain to phir Aap ko rokte hi nahi balki Aap par iman late, is liye tumhein yun likhna chahiye, "Ye Muhammad Bin Abdullah ki sulah-nama ki tehreer hai". Is par Aap (Sallallahu Alaihi Wasallam) ne farmaya, Allah gawah hai ke mein Muhammad Bin Abdullah hoon aur Allah gawah hai ke mein Allah ka Rasul bhi hoon. Aap (Sallallahu Alaihi Wasallam) likhna nahi jante thay. Rawi ne bayan kiya ke Aap (Sallallahu Alaihi Wasallam) ne Ali (Radi Allahu Anhu) se farmaya ke Rasul Allah ka lafz mita de. Ali (Radi Allahu Anhu) ne arz kiya ke Allah ki qasam! Ye lafz to mein kabhi na mitaoon ga, Aap (Sallallahu Alaihi Wasallam) ne farmaya ke phir mujhe dikhlao, rawi ne bayan kiya ke Ali (Radi Allahu Anhu) ne Aap (Sallallahu Alaihi Wasallam) ko wo lafz dikhaya. Aur Aap (Sallallahu Alaihi Wasallam) ne khud apne hath se ise mita diya. Phir jab Aap (Sallallahu Alaihi Wasallam) Makkah tashreef le gaye aur (teen) din guzar gaye to Quraish Ali (Radi Allahu Anhu) ke paas aaye aur kaha ke ab apne saathi se kaho ke ab yahan se chale jayein (Ali Radi Allahu Anhu ne bayan kiya ke) mein ne is ka zikr Aap (Sallallahu Alaihi Wasallam) se kiya to Aap ne farmaya ke haan, chunanche Aap wahan se rawana ho gaye
.

Hum se Yahya bin Sulaiman ne bayan kiya, kaha ke mujh se Abdullah bin Wahb ne bayan kiya, kaha ke mujh se Umar bin Muhammad ne bayan kiya, in se Zaid bin Aslam ne bayan kiya aur in se in ke walid ne bayan kiya, unhon ne kaha ke Abdullah bin Umar Radi Allahu Anhuma ne mujh se apne walid Umar Radi Allahu Anhu ke baaz halat pooche, jo mein ne unhein bata diye to unhon ne kaha: Rasoolullah Sallallahu Alaihi Wa Sallam ke baad mein ne kisi shakhs ko deen mein itni zyada koshish karne wala aur itna zyada sakhi nahi dekha aur yeh khasail Umar bin Khattab Radi Allahu Anhu par khatam ho gaye.

Mujh se Fazl Bin Yaqub ne bayan kiya ‘ hum se Hasan Bin Muhammad Bin Ayin Abu Ali Harrani ne bayan kiya ‘ kaha hum se Zuhair Bin Muawiya ne bayan kiya ‘ kaha hum se Abu Ishaq Sabi'i ne bayan kiya ke humein Bara Bin Azib Radi Allahu Anhu ne khabar di ke wo log Ghazwa Hudaibiya ke mauqe par Rasul Allah Sallallahu Alaihi Wasallam ke sath ek hazar char sau ki tidad mein thay ya is se bhi zyada. Ek kunwein par parao hua lashkar ne is ka (sara) pani khinch liya aur Nabi Kareem Sallallahu Alaihi Wasallam ki khidmat mein hazir hue. Nabi Kareem Sallallahu Alaihi Wasallam kunwein ke pas tashreef laye aur is ki mundeer par baith gaye. Phir farmaya ke ek doal mein isi kunwein ka pani lao. Pani laya gaya to Aap Sallallahu Alaihi Wasallam ne is mein kulli ki aur dua farmai. Phir farmaya ke kunwein ko yun hi thori der ke liye rehne do. Is ke baad sara lashkar khud bhi serab hota raha aur apni sawariyon ko bhi khoob pilata raha. Yahan tak ke wahan se unhon ne kooch kiya
.

Hum se Salt Bin Muhammad ne bayan kiya, kaha hum se Yazid Bin Zurai ne bayan kiya, in se Saeed Bin Abi Aroobah ne, in se Qatada ne ke mein ne Saeed Bin Musayyab se poocha ‘ mujhe maloom hua hai ke Jabir Radi Allahu Anhu kaha karte thay ke (Hudaibiya ki sulh ke mauqe par) sahaba ki tidad chauda sau thi. Is par Saeed Bin Musayyab ne bayan kiya ke mujh se Jabir Radi Allahu Anhu ne ye kaha tha is mauqe par pandrah sau sahaba (Radi Allahu Anhum) maujood thay. Jinhon ne Nabi Kareem Sallallahu Alaihi Wasallam se Hudaibiya mein baiat ki thi. Abu Dawood Tayalisi ne bayan kiya, hum se Qurrah Bin Khalid ne bayan kiya, in se Qatada ne aur Muhammad Bin Bashar ne bhi Abu Dawood Tayalisi ke sath is ko riwayat kiya hai
.

Hum se Abdullah Bin Muhammad Musnadi ne bayan kiya ‘ kaha hum se Sufyan Bin Uyainah ne bayan kiya ‘ kaha ke jab Zuhri ne ye hadees bayan ki (jo aage mazkoor hui hai) to is mein se kuch mein ne yaad rakhi aur Ma'mar ne is ko acchi tarah yaad dilaya. In se Urwah Bin Zubair ne ‘ in se Miswar Bin Makhramah Radi Allahu Anhu aur Marwan Bin Hakam ne bayan kiya ‘ in mein se har ek dusre se kuch barhata hai. Unhon ne bayan kiya ke Nabi Kareem Sallallahu Alaihi Wasallam sulh-e-Hudaibiya ke mauqe par taqreeban ek hazar sahaba ko sath le kar ravana hue. Phir jab Aap Zu-Hulaifa pahunche to Aap ne qurbani ke janwar ko qilada pehnaya aur is par nishan lagaya aur wahin se umra ka ihram baandha. Phir Aap ne qabila-e-Khuza'a ke ek sahabi ko jasoosi ke liye bheja aur khud bhi safar jari rakha. Jab Aap Ghadir-ul-Ashtat par pahunche to Aap ke jasoos bhi khabren le kar aa gaye. Jinhon ne bataya ke Quraish ne Aap ke muqable ke liye bahut bara lashkar tayyar kar rakha hai aur bahut se qabail ko bulaya hai. Wo Aap se jung karne par tule hue hain aur Aap ko Bait-Allah se rokein ge. Is par Nabi Kareem Sallallahu Alaihi Wasallam ne sahaba se farmaya ke mujhe mashwara do kya tumhare khayal mein ye munasib hoga ke mein in kuffar ki aurton aur bachon par hamla kar doon jo hamare Bait-Allah tak pahunchne mein rukawat banna chahte hain? Agar unhon ne hamara muqabla kiya to Allah Azzawajal ne mushrikeen se hamare jasoos ko mahfooz rakha hai aur agar wo hamare muqable par nahi aate to hum unhein ek hari hui qaum jaan kar chor dein ge. Abu Bakr Radi Allahu Anhu ne kaha ke Ya Rasul Allah! Aap to sirf Bait-Allah ke umra ke liye nikle hain na Aap ka irada kisi ko qatl karne ka hai aur na kisi se larayi ka. Is liye Aap Bait-Allah tashreef le chalein. Agar humein phir bhi koi Bait-Allah tak jane se roke ga to hum is se jung karein ge. Aap Sallallahu Alaihi Wasallam ne farmaya ke phir Allah ka naam le kar safar jari rakho
.

Mujh se Ishaq Bin Rahviya ne bayan kiya ‘ kaha hum ko Yaqub Bin Ibrahim ne khabar di ‘ kaha ke mujh se mere bhatije Ibn Shihab ne bayan kiya ‘ in se in ke chacha Muhammad Bin Muslim Bin Shihab ne kaha ke mujhko Urwah Bin Zubair ne khabar di aur unhon ne Marwan Bin Hakam aur Miswar Bin Makhramah (Radi Allahu Anhuma) se suna ‘ dono raviyon ne Rasul Allah Sallallahu Alaihi Wasallam se umra-e-Hudaibiya ke bare mein bayan kiya to Urwah ne mujhe is mein jo kuch khabar di thi ‘ is mein ye bhi tha ke jab Nabi Kareem Sallallahu Alaihi Wasallam aur (Quraish ka numayinda) Suhail Bin Amr Hudaibiya mein ek muqarrara muddat tak ke liye sulh ki dastaweiz likh rahe thay aur is mein Suhail ne ye shart bhi rakhi thi ke hamara agar koi aadmi Aap ke yahan panah le khwah wo Aap ke deen par hi kyun na ho jaye to Aap ko ise hamare hawale karna hi hoga taake hum is ke sath jo chahein karein. Suhail is shart par arr gaya aur kehne laga ke Nabi Kareem Sallallahu Alaihi Wasallam is shart ko qabool kar lein aur musalman is shart par kisi tarah raazi na thay. Majbooran unhon ne is par guftagu ki (kaha ye kiyunkar ho sakta hai ke musalman ko kafir ke supard kar dein) Suhail ne kaha ke ye nahi ho sakta to sulh bhi nahi ho sakta. Nabi Kareem Sallallahu Alaihi Wasallam ne ye shart bhi tasleem kar li aur Abu Jandal Bin Suhail Radi Allahu Anhu ko in ke walid Suhail Bin Amr ke supard kar diya (jo isi waqt Makka se farar ho kar beri ko ghaseette hue musalmanon ke pas pahunche thay) (shart ke mutabiq muddat-e-sulh mein Makka se farar ho kar) jo bhi aata Nabi Kareem Sallallahu Alaihi Wasallam ise wapas kar deyte ‘ khwah wo musalman hi kyun na hota. Is muddat mein baaz momin aurten bhi hijrat kar ke Makka se ayin. Umm-e-Kulsum Bint-e-Uqba Ibn Abi Muit bhi in mein se hain jo is muddat mein Nabi Kareem Sallallahu Alaihi Wasallam ke pas ayi thin ‘ wo is waqt naujawan thin ‘ in ke ghar wale Nabi Kareem Sallallahu Alaihi Wasallam ki khidmat mein hazir hue aur Aap se mutaliba kiya ke unhein wapas kar dein. Is par Allah Ta'ala ne momin aurton ke bare mein wo ayat nazil ki jo shart ke munasib thi
.

Hum se Musaddad Bin Musarhad ne bayan kiya ‘ kaha hum se Yahya Bin Saeed Qattan ne bayan kiya ‘ in se Ubaidullah Bin Abdullah ne ‘ in se Nafi ne ke Abdullah Bin Umar Radi Allahu Anhu ne ihram baandha aur kaha ke agar mujhe Bait-Allah jane se roka gaya to mein bhi wahi kaam karunga jo Rasul Allah Sallallahu Alaihi Wasallam ne kiya tha. Jab Aap ko kuffar-e-Quraish ne Bait-Allah jane se roka to is ayat ki tilawat ki ke «laqad kana lakum fi rasulillahi uswatun hasanatun» ”Yaqeenan tum logon ke liye Rasul Allah Sallallahu Alaihi Wasallam ki zindagi behtareen namuna hai.“
.

Hum se Hasan Bin Ishaq ne bayan kiya ‘ kaha hum se Muhammad Bin Sabiq ne bayan kiya ‘ kaha hum se Malik Bin Maghool ne bayan kiya ‘ kaha ke mein ne Abu Husain se suna ‘ in se Abu Wail ne bayan kiya ke Sahl Bin Hunaif Radi Allahu Anhu jab jung-e-Siffin (jo Ali Radi Allahu Anhu aur Muawiya Radi Allahu Anhu mein hui thi) se wapas aaye to hum in ki khidmat mein haalat maloom karne ke liye hazir hue. Unhon ne kaha ke is jung ke bare mein tum log apni raye aur fikr par nazan mat ho. Mein Yaum-e-Abu Jandal (sulh-e-Hudaibiya) mein bhi maujood tha. Agar mere liye Rasul Allah Sallallahu Alaihi Wasallam ke hukm ko manne se inkar mumkin hota to mein is den zaroor hukm udooli karta. Allah aur is ka Rasul khoob jaante hain ke jab hum ne kisi mushkil kaam ke liye apni talwarom ko apne kandhon par rakha to surat-e-haal aasan ho gayi aur hum ne mushkil hal kar li. Lekin is jung ka kuch ajeeb haal hai ‘ is mein hum (fitne ke) ek kone ko band karte hain to dusra kona khul jata hai. Hum nahi jaante ke hum ko kya tadbeer karni chahiye
.

Mujh se Ubaidullah Bin Musa ne bayan kiya ‘ in se Israil ne bayan kiya ‘ in se Abu Ishaq ne aur in se Bara Radi Allahu Anhu ne bayan kiya ke Anas Radi Allahu Anhu Nabi Kareem Sallallahu Alaihi Wasallam ne Zil-Qaada mein umra ka ihram baandha. Makka wale Aap ke Makka mein dakhil hone se manay aaye. Aakhir muahida is par hua ke (aainda saal) Makka mein teen din Aap qayam kar sakte hain. Muahida yun likha jaane laga ”Ye wo muahida hai jo Muhammad Rasul Allah Sallallahu Alaihi Wasallam ne kiya. Kuffar-e-Quraish kehne lage ke hum ye tasleem nahi karte. Agar hum Aap ko Allah ka Rasul maante to rokte hi kyun ‘ Aap to bas Muhammad Bin Abdullah hain. Aap ne farmaya ke mein Allah ka Rasul bhi hoon aur Muhammad Bin Abdullah bhi hoon. Phir Ali Radi Allahu Anhu se farmaya ke (Rasul Allah ka lafz mita do) unhon ne kaha ke hargiz nahi, Allah ki qasam! Mein ye lafz kabhi nahi mita sakta. Nabi Kareem Sallallahu Alaihi Wasallam ne wo tehreer apne hath mein le li. Aap likhna nahi jaante thay lekin Aap ne is ke alfaz is tarah kar diye ”Ye muahida hai jo Muhammad Bin Abdullah ne kiya ke wo hathiyar le kar Makka mein nahi aayein ge. Albatta aaisi talwar jo niyam mein ho sath la sakte hain aur ye agar Makka walon mein se koi in ke sath jana chahe ga to ise apne sath nahi le jayein ge. Lekin agar in ke sathiyon mein koi Makka mein rehna chahe ga ise na rokein ge. Phir jab (aainda saal) Aap is muahida ke mutabiq Makka mein dakhil hue (aur teen din ki) muddat poori ho gayi to Makka wale Ali Radi Allahu Anhu ke pas aaye aur kaha ke apne saathi se kaho ke ab yahan se chale jayein ‘ kyunke muddat poori ho gayi hai. Jab Nabi Kareem Sallallahu Alaihi Wasallam Makka se nikle to Aap ke peeche Hamza Radi Allahu Anhu ki beti chacha chacha kehti hui ayin. Ali Radi Allahu Anhu ne unhein le liya aur hath pakar kar Fatima Radi Allahu Anha ke pas laye aur kaha ke apne chacha ki beti ko le lo mein ise leta aaya hoon. Ali ‘ Zaid ‘ Jafar Radi Allahu Anhum ka ikhtilaf hua. Ali Radi Allahu Anhu ne kaha ke ye mere chacha ki larki hai aur Jafar Radi Allahu Anhu ne kaha ke ye mere chacha ki larki hai is ki khala mere nikah mein hain. Zaid Radi Allahu Anhu ne kaha ye mere bhai ki larki hai lekin Nabi Kareem Sallallahu Alaihi Wasallam ne in ki khala ke haq mein faisla farmaya (jo Jafar Radi Allahu Anhu ke nikah mein thin) aur farmaya khala maa ke darje mein hoti hai aur Ali Radi Allahu Anhu se farmaya ke tum mujh se ho aur mein tum se hoon. Jafar Radi Allahu Anhu se farmaya ke tum surat-o-shakal aur aadat-o-akhlaq dono mein mujh se mushaba ho aur Zaid Radi Allahu Anhu se farmaya ke tum hamare bhai aur hamare maula ho. Ali Radi Allahu Anhu ne Nabi Kareem Sallallahu Alaihi Wasallam se arz kiya ke Hamza Radi Allahu Anhu ki sahabzadi ko Aap apne nikah mein le lein lekin Aap ne farmaya ke wo mere razaayi bhai ki larki hai
.

Mujh se Muhammad Bin Rafi ne bayan kiya ‘ kaha hum se Suraij ne bayan kiya ‘ kaha hum se Fulaih ne bayan kiya. (Dusri sanad aur mujh se Muhammad Bin Husain Bin Ibrahim ne bayan kiya ‘ kaha ke mujh se mere walid ne bayan kiya ‘ in se Fulaih Bin Sulaiman ne bayan kiya ‘ in se Nafi ne aur in se Ibn Umar Radi Allahu Anhuma ne ke Rasul Allah Sallallahu Alaihi Wasallam umra ke irade se nikle ‘ lekin kuffar-e-Quraish ne Bait-Allah pahunchne se Aap ko roka. Chunancha Nabi Kareem Sallallahu Alaihi Wasallam ne apna qurbani ka janwar Hudaibiya mein hi zibah kar diya aur wahin sar bhi mundwaya aur in se muahida kiya ke Aap aainda saal umra kar sakte hain lekin (niyam mein) talwarom ke siwa aur koi hathiyar sath nahi la sakte aur jitne dinon Makka wale chahein ge ‘ is se zyada Aap wahan thahar nahi sakein ge. Is liye Nabi Kareem Sallallahu Alaihi Wasallam ne aainda saal umra kiya aur muahida ke mutabiq Makka mein dakhil hue. Teen din wahan muqeem rahe. Phir Quraish ne Aap se jaane ke liye kaha aur Aap Makka se chale aaye
.

Hum se Ahmad bin Ishaq Salmi ne byaan kiya , kaha hum se Yala ne , kaha hum se Abdul Aziz bin Siyah ne , un se Habib bin Sabit ne , ke main Abu Wail razi Allahu anhu ki khidmat mein ek masla poochne ke liye (Khawarij ke mutalliq) gaya , unhon ne farmaya ke hum Maqam e Siffeen mein parao dalay huay thay (jahan Ali aur Muawiyah razi Allahu anhuma ki jang hui thi) ek shakhs ne kaha ke Aap ka kya khayal hai agar koi shakhs Kitab Allah ki taraf sulah ke liye bulaye ? Ali razi Allahu anhu ne farmaya khair hai . Lekin Khawarij ne Muawiyah razi Allahu anhu ke khilaf Ali razi Allahu anhu ke saath thay is ke khilaf aawaz uthayi . Is par Sahl bin Hunayf ne farmaya tum pehle apna jaiza lo . Hum log Hudaybiyah ke mauqa par maujood thay Aap ki murad is sulah se thi jo Maqam e Hudaybiyah mein Nabi Karim salla Allahu alaihi wasallam aur mushrikeen ke darmiyan hui thi aur jang ka mauqa aata to hum is se peeche hatne wale nahi thay . (lekin sulah ki baat chali to hum ne is mein bhi sabr o sabat ka daman hath se nahi chhora) itne mein Umar razi Allahu anhu Nabi Karim salla Allahu alaihi wasallam ki khidmat mein hazir huay aur arz kiya kya hum haq par nahi hain ? Aur kya kuffar baatil par nahi hain ? Kya hamare maqtooleen jannat mein nahi jayein ge aur kya un ke maqtooleen dozakh mein nahi jayein ge ? Nabi Karim salla Allahu alaihi wasallam ne farmaya ke kyun nahi! Umar razi Allahu anhu ne kaha phir hum apne deen ke baare mein zillat ka mazahira kyun karein (yani dabb kar sulah kyun karein) aur kyun wapas jayein , jabke Allah Ta'ala ne hamain is ka hukm farmaya hai . Nabi Karim salla Allahu alaihi wasallam ne farmaya: Ae Ibn e Khattab! Main Allah ka Rasool hoon aur Allah Ta'ala mujhe kabhi zaya nahi kare ga . Umar razi Allahu anhu Nabi Karim salla Allahu alaihi wasallam ke paas se wapas aa gaye un ko ghussa aa raha tha , sabr nahi aaya aur Abu Bakr razi Allahu anhu ke paas aaye aur kaha , Ae Abu Bakr! Kya hum haq par aur woh baatil par nahi hain ? Abu Bakr ne bhi wahi jawab diya ke Ae Ibn e Khattab! Nabi Karim salla Allahu alaihi wasallam Allah ke Rasool hain aur Allah unhein hargiz zaya nahi kare ga . Phir Surah al-Fatah nazil hui .