Hum se Muhammad Bin Bashar ne bayan kiya, kaha ke hum se Ghundar ne bayan kiya, kaha hum se Shuba ne bayan kiya, un se Abu Ishaq ne bayan kiya, unhon ne Bara Bin Azib (Radi Allahu Anhu) se suna, aap ne bayan kiya ke jab Rasul Allah (Sallallahu Alaihi Wasallam) ne Hudaybiya ki sula (Quraish se) ki to is ki dastavez Ali (Radi Allahu Anhu) ne likhi thi. Unhon ne is mein likha Muhammad Allah ke Rasul (Sallallahu Alaihi Wasallam) ki taraf se. Mushrikeen ne is par aitraz kiya ke lafz Muhammad ke sath Rasul Allah na likho, agar aap Rasul Allah hote to hum aap se larte hi kyun? Aap (Sallallahu Alaihi Wasallam) ne Ali (Radi Allahu Anhu) se farmaya Rasul Allah ka lafz mita do, Ali (Radi Allahu Anhu) ne kaha ke mein ne kaha ke mein to ise nahi mita sakta, to aap (Sallallahu Alaihi Wasallam) ne khud apne hath se wo lafz mita diya aur mushrikeen ke sath is shart par sula ki ke aap apne ashaab ke sath (aayinda saal) teen din ke liye Makkah aayein aur hathiyar miyan mein rakh kar dakhil hon, shagirdou ne poocha ke Julban-us-Silaah (jis ka yahan zikar hai) kya cheez hoti hai? To unhon ne bataya ke miyan aur jo cheez is ke andar hoti hai (is ka naam Julban hai)
.

Hum se Ubaidullah Bin Musa ne bayan kiya Israel se, un se Abu Ishaq ne aur un se Bara Bin Azib (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne Zil-Qadah ke mahine mein Umrah ka ihram bandha. Lekin Makkah walon ne Aap (Sallallahu Alaihi Wasallam) ko shehar mein dakhil nahi hone diya. Aakhir sula is par hui ke (aayinda saal) Aap (Sallallahu Alaihi Wasallam) Makkah mein teen roz qayam karein ge. Jab sula-nama likha jane laga to is mein likha gaya ke ye wo sula-nama hai jo Muhammad Rasul Allah (Sallallahu Alaihi Wasallam) ne kiya hai. Lekin mushrikeen ne kaha ke hum to ise nahi mante. Agar hamein ilm ho jaye ke Aap Allah ke Rasul hain to hum Aap ko na rokein. Bas Aap sirf Muhammad Bin Abdullah hain. Aap (Sallallahu Alaihi Wasallam) ne farmaya ke mein Rasul Allah bhi hoon aur Muhammad Bin Abdullah bhi hoon. Is ke baad aap ne Ali (Radi Allahu Anhu) se farmaya ke Rasul Allah ka lafz mita do, unhon ne arz kiya nahi Allah ki qasam! mein to ye lafz kabhi na mitaoon ga. Aakhir Aap (Sallallahu Alaihi Wasallam) ne khud dastavez li aur likha ke ye is ki dastavez hai ke Muhammad Bin Abdullah ne is shart par sula ki hai ke Makkah mein wo hathiyar miyan mein rakkhe baghair dakhil na hon ge. Agar Makkah ka koi shaks in ke sath jana chahe ga to wo ise sath na le jayein ge. Lekin agar in ke ashaab mein se koi shaks Makkah mein rehna chahe ga to ise wo na rokein ge. Jab (aayinda saal) Aap (Sallallahu Alaihi Wasallam) Makkah tashreef le gaye aur (Makkah mein qayam ki) muddat poori ho gayi to Quraish Ali (Radi Allahu Anhu) ke paas aaye aur kaha ke apne sahab se kahiye ke muddat poori ho gayi hai aur ab wo hamare yahan se chale jayein. Chunanchay Nabi Kareem (Sallallahu Alaihi Wasallam) Makkah se rawan hone lage. Is waqt Hamza (Radi Allahu Anhu) ki ek bacchi Chacha Chacha karti aaein. Ali (Radi Allahu Anhu) ne unhein apne sath le liya, phir Fatima (Radi Allahu Anha) ke paas hath pakar kar laye aur farmaya, apni chachazad behen ko bhi sath le lo, unhon ne is ko apne sath sawaar kar liya, phir Ali, Zaid aur Jafar (Radi Allahu Anhum) ka jhagra hua. Ali (Radi Allahu Anhu) ne farmaya ke is ka mein zyada mustahiq hoon, ye mere chacha ki bacchi hai. Jafar (Radi Allahu Anhu) ne farmaya ke ye mere bhi chacha ki bacchi hai aur is ki khala mere nikah mein bhi hain. Zaid (Radi Allahu Anhu) ne farmaya ke mere bhai ki bacchi hai. Nabi Kareem (Sallallahu Alaihi Wasallam) ne bacchi ki khala ke haq mein faisla kiya aur farmaya ke khala maan ki jagah hoti hai, phir Ali (Radi Allahu Anhu) se farmaya ke tum mujh se ho aur mein tum se hoon. Jafar (Radi Allahu Anhu) se farmaya ke tum soorat aur aadaat-o-akhlaq sab mein mujh se mushabeh ho. Zaid (Radi Allahu Anhu) se farmaya ke tum hamare bhai bhi ho aur hamare mola bhi
.