Hum se Hajjaj bin Minhal ne bayan kiya, kaha hum se Abdul Aziz Majishoon ne bayan kiya, kaha hum se Muhammad bin Munkadir ne bayan kiya, aur in se Jabir bin Abdullah Radi Allahu Anhuma ne bayan kiya ke Nabi Kareem Sallallahu Alaihi Wa Sallam ne farmaya ke mein (khwab mein) jannat mein dakhil hua to wahan mein ne Abu Talhah Radi Allahu Anhu ki biwi Rumaisa ko dekha aur mein ne qadmon ki awaz suni to mein ne poocha yeh kon sahib hain? Bataya gaya ke yeh Bilal Radi Allahu Anhu hain aur mein ne ek mahal dekha is ke samne ek aurat thi, mein ne poocha yeh kis ka mahal hai? To bataya ke yeh Umar Radi Allahu Anhu ka hai. Mere dil mein aaya ke andar dakhil ho kar ise dekhun, lekin mujhe Umar ki ghairat yaad aayi (aur is liye andar dakhil nahi hua) is par Umar Radi Allahu Anhu ne rote hue kaha mere maan baap Aap par fida hon, Ya Rasul Allah! Kya mein Aap par ghairat karunga.

Hum se Sa'id bin Abi Maryam ne bayan kiya, kaha hum ko Laith ne khabar di, kaha ke mujh se Aqeel ne bayan kiya, in se Ibn Shihab ne bayan kiya ke mujhe Sa'id bin al-Musayyib ne khabar di aur in se Abu Hurairah Radi Allahu Anhu ne bayan kiya ke hum Rasoolullah Sallallahu Alaihi Wa Sallam ki khidmat mein hazir thay. Aap Sallallahu Alaihi Wa Sallam ne farmaya ke mein soya hua tha ke mein ne khwab mein jannat dekhi. Mein ne dekha ke ek aurat ek mahal ke kinare wudhu kar rahi hai. Mein ne poocha yeh mahal kis ka hai? To farishton ne jawab diya ke Umar Radi Allahu Anhu ka. Phir mujhe in ki ghairat-o-hamiyat yaad aayi aur mein wahin se lout aaya. Is par Umar Radi Allahu Anhu ro diye aur arz kiya: Ya Rasul Allah! Kya mein Aap par bhi ghairat karunga?

Mujh se Abu Ja'far Muhammad bin Salt Kufi ne bayan kiya, unhon ne kaha hum se Abdullah bin al-Mubarak ne bayan kiya, in se Yunus ne, in se Zuhri ne bayan kiya, kaha mujh ko Hamza ne khabar di aur unhein in ke walid (Abdullah bin Umar Radi Allahu Anhuma) ne ke Rasoolullah Sallallahu Alaihi Wa Sallam ne farmaya ke mein ne khwab mein doodh piya, itna ke mein doodh ki seerabi dekhne laga jo mere nakhun ya nakhunon par beh rahi hai, phir mein ne piyala Umar ko de diya. Sahaba ne poocha: Ya Rasul Allah! Is khwab ki tabeer kya hai Aap Sallallahu Alaihi Wa Sallam ne farmaya ke is ki tabeer ilm hai.

Hum se Muhammad bin Abdullah bin Numair ne bayan kiya, kaha hum se Muhammad bin Bishr ne bayan kiya, kaha hum se Ubaidullah ne bayan kiya, kaha ke mujh se Abu Bakr bin Salim ne bayan kiya, in se Salim ne aur in se Abdullah bin Umar Radi Allahu Anhuma ne ke Nabi Kareem Sallallahu Alaihi Wa Sallam ne farmaya ke mein ne khwab mein dekha ke mein ek kunwein se ek accha bada dol khinch raha hun, jis par "lakri ka charkh" laga hua hai, phir Abu Bakr aaye aur unhon ne bhi ek ya do dol khinche magar kamzori ke sath aur Allah in ki maghfirat kare. Phir Umar aaye aur in ke hath mein woh dol ek bahut bade dol ki surat ikhtiyar kar gaya. Mein ne in jaisa mazboot aur ba-azmat shakhs nahi dekha jo itni mazbooti ke sath kaam kar sakta ho. Unhon ne itna khincha ke log seerab ho gaye aur apne onton ko pila kar in ke thikanon par le gaye. Ibn Jubair ne kaha ke "abqari" ka mani umdah aur "zarabi" aur "abqari" sardar ko bhi kehte hain (hadeeth mein "abqari" se yahi murad hai) Yahya bin Ziyad Farra ne kaha, "zarabi" in bichonon ko kehte hain jin ke hashiye bareek, phaile hue bahut kasrat se hote hain.

Hum se Ali bin Abdullah bin Madini ne bayan kiya, kaha hum se Ya'qub bin Ibrahim ne bayan kiya, kaha ke mujh se mere walid ne bayan kiya in se Salih ne, in se Ibn Shihab ne, kaha mujh ko Abdul Hameed bin Abdur Rahman ne khabar di, unhein Muhammad bin Sa'd bin Abi Waqqas ne khabar di aur un se in ke walid (Sa'd bin Abi Waqqas Radi Allahu Anhu) ne bayan kiya (doosri sanad) aur mujh se Abdul Aziz bin Abdullah ne bayan kiya, kaha hum se Ibrahim bin Sa'd ne bayan kiya, in se Salih ne, in se Ibn Shihab ne, in se Abdul Hameed bin Abdur Rahman bin Zaid ne, in se Muhammad bin Sa'd bin Abi Waqqas ne aur in se in ke walid ne bayan kiya ke Umar Radi Allahu Anhu ne Rasoolullah Sallallahu Alaihi Wa Sallam se andar aane ki ijazat chahi. Is waqt Aap ke pas Quraish ki chand aurtein (Ummahat al-Momineen mein se) baithi batein kar rahi thin aur Aap ki awaz par apni awaz unchi karte hue Aap se naan-o-nafaqah mein ziyati ka mutaliba kar rahi thin. Joun hi Umar Radi Allahu Anhu ne ijazat chahi to woh tamam khari ho kar parde ke peeche jaldi se bhag khari hui. Aakhir Aap Sallallahu Alaihi Wa Sallam ne ijazat di aur woh dakhil hue to Aap Sallallahu Alaihi Wa Sallam muskura rahe thay. Umar Radi Allahu Anhu ne arz kiya: Ya Rasul Allah! Allah Ta'ala Aap Sallallahu Alaihi Wa Sallam ko hamesha khush rakkhe. Aap Sallallahu Alaihi Wa Sallam ne farmaya: Mujhe in aurton par hansi aa rahi hai jo abhi mere pas baithi hui thin, lekin tumhari awaz sunte hi sab parde ke peeche bhag gayin. Umar Radi Allahu Anhu ne arz kiya: Ya Rasul Allah! Darna to unhein Aap se chahiye tha. Phir unhon ne (aurton se) kaha Ae apni jaanon ki dushmano! Tum mujh se to darti ho aur Nabi Kareem Sallallahu Alaihi Wa Sallam se nahi dartin, aurton ne kaha ke haan, Aap theek kehte hain. Nabi Kareem Sallallahu Alaihi Wa Sallam ke muqable mein Aap kahin zyada sakht hain. Is par Aap Sallallahu Alaihi Wa Sallam ne farmaya: Ae Ibn Khattab! Is zaat ki qasam jis ke hath mein meri jaan hai, agar Shaitan tumhein kisi raste par chalta dekhta hai to ise chhorh kar woh kisi doosre raste par chal parta hai.

Hum se Muhammad bin Muthanna ne bayan kiya, kaha hum se Yahya ne bayan kiya, in se Ismail ne bayan kiya, kaha hum se Qais ne bayan kiya ke Abdullah bin Mas'ud Radi Allahu Anhu ne kaha ke Umar Radi Allahu Anhu ke Islam lane ke baad phir humein hamesha izzat hasil rahi.

Hum se Abdan ne bayan kiya, kaha hum ko Abdullah ne khabar di, kaha hum se Umar bin Sa'id ne bayan kiya, in se Ibn Abi Mulaikah aur unhon ne Ibn Abbas Radi Allahu Anhuma ko kehte suna ke jab Umar Radi Allahu Anhu ko (shahadat ke baad) in ki charpai par rakkha gaya to tamam logon ne na'sh mubarak ko gher liya aur in ke liye (Allah se) dua aur maghfirat talab karne lage, na'sh abhi uthayi nahi gayi thi, mein bhi wahin maujood tha. Isi halat mein achanak ek sahib ne mera shana pakar liya, mein ne dekha to woh Ali Radi Allahu Anhu thay, phir unhon ne Umar Radi Allahu Anhu ke liye dua-e-rahmat ki aur (in ki na'sh ko mukhatib kar ke) kaha: Aap ne apne baad kisi bhi shakhs ko nahi chhorha ke jise dekh kar mujhe yeh tamanna hoti ke is ke amal jaisa amal karte hue mein Allah se ja milun aur Allah ki qasam! Mujhe to (pehle se) yaqeen tha ke Allah Ta'ala Aap ko Aap ke dono sathiyon ke sath hi rakkhega. Mera yeh yaqeen is wajah se tha ke mein ne aksar Rasoolullah Sallallahu Alaihi Wa Sallam ki zaban mubarak se yeh alfaz sune thay ke "Mein, Abu Bakr aur Umar gaye. Mein, Abu Bakr aur Umar dakhil hue. Mein, Abu Bakr aur Umar bahar aaye."

Hum se Musaddad ne bayan kiya, kaha hum se Yazid bin Zurai ne bayan kiya, kaha hum se Sa'id ne bayan kiya, (doosri sanad) Imam Bukhari Rahimahullah farmate hain aur mujh se Khalifah ne bayan kiya, in se Muhammad bin Sawa aur Kahmas bin Minhal ne bayan kiya, in se Sa'id ne bayan kiya, in se Qatadah ne aur in se Anas bin Malik Radi Allahu Anhu ne bayan kiya ke Nabi Kareem Sallallahu Alaihi Wa Sallam Uhud pahar par charhe to Aap ke sath Abu Bakr, Umar aur Uthman Radi Allahu Anhum bhi thay, pahar larzne laga to Nabi Kareem Sallallahu Alaihi Wa Sallam ne apne paon se ise maara aur farmaya "Uhud! Thehra reh ke tujh par ek nabi, ek siddiq aur do shaheed hi to hain."

Hum se Yahya bin Sulaiman ne bayan kiya, kaha ke mujh se Abdullah bin Wahb ne bayan kiya, kaha ke mujh se Umar bin Muhammad ne bayan kiya, in se Zaid bin Aslam ne bayan kiya aur in se in ke walid ne bayan kiya, unhon ne kaha ke Abdullah bin Umar Radi Allahu Anhuma ne mujh se apne walid Umar Radi Allahu Anhu ke baaz halat pooche, jo mein ne unhein bata diye to unhon ne kaha: Rasoolullah Sallallahu Alaihi Wa Sallam ke baad mein ne kisi shakhs ko deen mein itni zyada koshish karne wala aur itna zyada sakhi nahi dekha aur yeh khasail Umar bin Khattab Radi Allahu Anhu par khatam ho gaye.

Hum se Sulaiman bin Harb ne bayan kiya, kaha hum se Hammad bin Zaid ne bayan kiya, in se Thabit ne aur in se Anas bin Malik Radi Allahu Anhu ne ke ek sahib (Dhul-Khuwaisirah ya Abu Musa) ne Rasoolullah Sallallahu Alaihi Wa Sallam se Qiyamat ke bare mein poocha ke Qiyamat kab qaim hogi? Is par Aap Sallallahu Alaihi Wa Sallam ne farmaya ke tum ne Qiyamat ke liye tayyari kya ki hai? Unhon ne arz kiya kuch bhi nahi, siwa is ke ke mein Allah aur is ke Rasool se mohabbat rakhta hun. Aap Sallallahu Alaihi Wa Sallam ne farmaya ke phir tumhara hashar bhi unhi ke sath hoga jin se tumhein mohabbat hai. " Anas Radi Allahu Anhu ne bayan kiya ke humein kabhi itni khushi kisi baat se bhi nahi hui jitni Aap ki yeh hadeeth sun kar hui ke "tumhara hashar unhi ke sath hoga jin se tumhein mohabbat hai." Anas Radi Allahu Anhu ne kaha ke mein bhi Rasoolullah Sallallahu Alaihi Wa Sallam se aur Abu Bakr-o-Umar Radi Allahu Anhuma se mohabbat rakhta hun aur in se apni is mohabbat ki wajah se umeed rakhta hun ke mera hashar unhi ke sath hoga, agarchay mein in jaise amal na kar saka.