Aur Nabi Kareem Sallallahu Alaihi Wa Sallam ne farmaya tha ke jo shakhs Bi'r-e-Roomah (ek kunwan) ko khareed kar sab ke liye aam kar de. Is ke liye jannat hai. To Uthman Radi Allahu Anhu ne ise khareed kar aam kar diya tha aur Nabi Kareem Sallallahu Alaihi Wa Sallam ne farmaya tha ke jo shakhs Jaish-e-Usrah (Ghazwa-e-Tabuk ke lashkar) ko saman se lais kare is ke liye jannat hai to Uthman Radi Allahu Anhu ne aisa kiya tha.

Hum se Sulaiman bin Harb ne bayan kiya, kaha hum se Hammad bin Zaid ne bayan kiya, in se Ayub ne, in se Abu Usman ne aur in se Abu Musa Radi Allahu Anhu ne ke Nabi Kareem Sallallahu Alaihi Wa Sallam ek bagh (Bi'r-e-Aris) ke andar tashreef le gaye aur mujh se farmaya ke mein darwaza par pehra deta rahun. Phir ek sahib aaye aur ijazat chahi. Nabi Kareem Sallallahu Alaihi Wa Sallam ne farmaya ke unhein ijazat de do aur jannat ki khushkhabri bhi sunayein do, woh Abu Bakr Radi Allahu Anhu thay. Phir doosre ek aur sahib aaye aur ijazat chahi. Nabi Kareem Sallallahu Alaihi Wa Sallam ne farmaya ke unhein bhi ijazat de do aur jannat ki khushkhabri sunayein do, woh Umar Radi Allahu Anhu thay. Phir teesre ek aur sahib aaye aur ijazat chahi. Nabi Kareem Sallallahu Alaihi Wa Sallam thodi der ke liye khamosh ho gaye phir farmaya ke unhein bhi ijazat de do aur (dunya mein) ek aazmaish se guzarne ke baad jannat ki bisharat bhi suna do, woh Uthman Ghani Radi Allahu Anhu thay. Hammad bin Salamah ne bayan kiya, hum se Asim Ahwal aur Ali bin al-Hakam ne bayan kiya, unhon ne Abu Usman se suna aur woh Abu Musa se isi tarah bayan karte thay, lekin Asim ne apni is riwayat mein yeh zyada kiya hai ke Nabi Kareem Sallallahu Alaihi Wa Sallam is waqt ek aisi jagah baithe hue thay jis ke andar pani tha aur Aap apne dono ghutne ya ek ghutna khole hue thay lekin jab Uthman Radi Allahu Anhu dakhil hue to Aap ne apne ghutne ko chupa liya.

Hum se Ahmad bin Shabeeb bin Sa'id ne bayan kiya, kaha ke mujh se mere walid ne bayan kiya, in se Yunus ne ke Ibn Shihab ne bayan kiya, kaha mujh ko Urwah ne khabar di, unhein Ubaidullah bin Adi bin Khiyar ne khabar di ke Miswar bin Makhramah aur Abdur Rahman bin Aswad bin Abdi Yaghuth Radi Allahu Anhu ne in se kaha ke tum Uthman Radi Allahu Anhu se in ke bhai Waleed ke muqaddama mein (jise Uthman Radi Allahu Anhu ne Kufa ka governor banaya tha) kyun guftagu nahi karte, log is se bahut naraz hain. Chunanche mein Uthman Radi Allahu Anhu ke pas gaya, aur jab woh namaz ke liye bahar tashreef laye to mein ne arz kiya ke mujhe Aap se ek zaroorat hai aur woh hai Aap ke sath ek khair khwahi! Is par Uthman Radi Allahu Anhu ne farmaya: Bhale aadmi tum se (mein Allah ki panah chahta hun) Imam Bukhari Rahimahullah ne kaha: Mein samajhta hun ke Ma'mar ne yun riwayat kiya, mein tujh se Allah ki panah chahta hun. Mein wapas in dono ke pas gaya, itne mein Uthman Radi Allahu Anhu ka qasid mujh ko bulane ke liye aaya mein jab is ke sath Uthman Radi Allahu Anhu ki khidmat mein hazir hua to unhon ne daryaft farmaya ke tumhari khair khwahi kya thi? Mein ne arz kiya: Allah Subhan-a-wa Ta'ala ne Muhammad Sallallahu Alaihi Wa Sallam ko haq ke sath bheja aur in par kitab nazil ki Aap bhi in logon mein shamil thay jinhon ne Allah aur is ke Rasool ki dawat ko qubool kiya tha. Aap ne do hijratein kien. Nabi Kareem Sallallahu Alaihi Wa Sallam ki suhbat uthayi aur Aap ke tariqe aur sunnat ko dekha, lekin baat yeh hai ke log Waleed ki bahut shikayatein kar rahe hain. Uthman Radi Allahu Anhu ne is par poocha: Tum ne Rasoolullah Sallallahu Alaihi Wa Sallam se kuch suna hai? Mein ne arz kiya ke nahi. Lekin Rasoolullah Sallallahu Alaihi Wa Sallam ki ahadeeth ek kunwari larki tak ko is ke tamam pardon ke bawajood jab pahunch chuki hain to mujhe kyun na maloom hotien. Is par Uthman ne farmaya: Amm-a-ba'd: Beshak Allah Ta'ala ne Muhammad Sallallahu Alaihi Wa Sallam ko haq ke sath bheja aur mein Allah aur is ke Rasool ki dawat ko qubool karne walon mein bhi tha. Nabi Kareem Sallallahu Alaihi Wa Sallam jis dawat ko le kar bheje gaye thay mein is par poore tour se iman laya aur jaisa ke tum ne kaha do hijratein bhi kien. Mein Nabi Kareem Sallallahu Alaihi Wa Sallam ki suhbat mein bhi raha hun aur Aap se bai'at bhi ki hai. Pas Allah ki qasam mein ne kabhi Aap ke hukm se sartabi nahi ki. Aur na Aap ke sath kabhi koi dhoka kiya, yahan tak ke Allah Ta'ala ne Aap ko wafat di. Is ke baad Abu Bakr Radi Allahu Anhu ke sath bhi mera yahi maamla raha. Aur Umar Radi Allahu Anhu ke sath bhi yahi maamla raha to kya jab ke mujhe in ka jansheen bana diya gaya hai to mujhe woh huqooq hasil nahi honge jo unhein thay? Mein ne arz kiya ke kyun nahi, Aap ne farmaya ke phir in baton ke liye kya jawaz reh jata hai jo tum logon ki taraf se mujhe pahunchti rehti hain lekin tum ne jo Waleed ke halat ka zikr kiya hai, In sha Allah hum is ki saza jo wajib-ee hai is ko dein gay. Phir Uthman Radi Allahu Anhu ne Ali Radi Allahu Anhu ko bulaya aur un se farmaya ke Waleed ko hadd lagayein. Chunanche unhon ne Waleed ko assi kore hadd ke lagaye.

Hum se Musaddad ne bayan kiya, unhon ne kaha hum se Yahya ne bayan kiya, in se Sa'id ne, in se Qatadah ne aur in se Anas Radi Allahu Anhu ne bayan kiya ke Nabi Kareem Sallallahu Alaihi Wa Sallam jab Uhud pahar par charhe aur Aap ke sath Abu Bakr, Umar aur Uthman Radi Allahu Anhum bhi thay to pahar kanpne laga. Aap Sallallahu Alaihi Wa Sallam ne is par farmaya "Uhud thehar ja." Mera khayal hai ke Nabi Kareem Sallallahu Alaihi Wa Sallam ne ise apne paon se maara bhi tha ke tujh par ek nabi, ek siddiq aur do shaheed hi to hain.

Mujh se Muhammad bin Hatim bin Bazi ne bayan kiya, kaha hum se Shadhan ne bayan kiya, kaha hum se Abdul Aziz bin Abi Salamah Majishoon ne bayan kiya, in se Ubaidullah ne, in se Nafi ne aur in se Abdullah bin Umar Radi Allahu Anhuma ne bayan kiya ke Nabi Kareem Sallallahu Alaihi Wa Sallam ke ehad mein hum Abu Bakr Radi Allahu Anhu ke barabar kisi ko nahi qarar dete thay. Phir Umar Radi Allahu Anhu ko phir Uthman Radi Allahu Anhu ko. Is ke baad Nabi Kareem Sallallahu Alaihi Wa Sallam ke Sahaba par hum koi behas nahi karte thay aur kisi ko ek doosre par fazeelat nahi dete thay, is hadeeth ko Abdullah bin Salih ne bhi Abdul Aziz se riwayat kiya hai. Is ko Ismaili ne wasal kiya hai.

Hum se Musa bin Ismail ne bayan kiya, kaha hum se Abu Awana ne, kaha hum se Usman bin Mawhab ne bayan kiya ke Misr walon mein se ek naam-na-maloom aadmi aaya aur Hajj-e-Baitullah kiya, phir kuch logon ko baithe hue dekha to us ne poocha ke yeh kon log hain? Kisi ne kaha ke yeh Quraishi hain. Us ne poocha ke in mein buzurg kon sahib hain? Logon ne bataya ke yeh Abdullah bin Umar hain. Us ne poocha. Ae Ibn Umar! Mein Aap se ek baat poochna chahta hun. Umeed hai ke Aap mujhe batayein gay. Kya Aap ko maloom hai ke Uthman Radi Allahu Anhu ne Uhud ki ladayi se raah-e-farar ikhtiyar ki thi? Ibn Umar Radi Allahu Anhuma ne farmaya ke haan aisa hua tha. Phir unhon ne poocha: Kya Aap ko maloom hai ke woh Badr ki ladayi mein shareek nahi hue thay? Jawab diya ke haan aisa hua tha. Us ne poocha kya Aap ko maloom hai ke woh Bai'at-e-Ridwan mein bhi shareek nahi thay. Jawab diya ke haan yeh bhi sahi hai. Yeh sun kar us ki zaban se nikla Allahu Akbar to Ibn Umar Radi Allahu Anhuma ne kaha ke qareeb aa jao, ab mein tumhein in waqiat ki tafseel samajhaunga. Uhud ki ladayi se farar ke mutalliq mein gawahi deta hun ke Allah Ta'ala ne unhein maaf kar diya hai. Badr ki ladayi mein shareek na hone ki wajah yeh hai ke in ke nikah mein Rasoolullah Sallallahu Alaihi Wa Sallam ki sahibzadi thin aur is waqt woh bimar thin aur Nabi Kareem Sallallahu Alaihi Wa Sallam ne farmaya tha ke tumhein (mareez-ah ke pas thehrne ka) itna hi ajr-o-sawab milega jitna is shakhs ko jo Badr ki ladayi mein shareek hoga aur isi ke mutabiq maal-e-ghaneemat se hissa bhi milega aur Bai'at-e-Ridwan mein shareek na hone ki wajah yeh hai ke is mauqay par Waadi-e-Makkah mein koi bhi shakhs (Musalmanon mein se) Uthman Radi Allahu Anhu se zyada izzat wala aur ba-asar hota to Nabi Kareem Sallallahu Alaihi Wa Sallam isi ko in ki jagah wahan bhejte, yahi wajah hui thi ke Aap Sallallahu Alaihi Wa Sallam ne unhein (Quraish se batein karne ke liye) Makkah bhej diya tha aur jab Bai'at-e-Ridwan ho rahi thi to Uthman Radi Allahu Anhu Makkah ja chuke thay, is mauqay par Nabi Kareem Sallallahu Alaihi Wa Sallam ne apne dahne hath ko utha kar farmaya tha ke yeh Uthman ka hath hai aur phir ise apne doosre hath par hath rakh kar farmaya tha ke yeh bai'at Uthman ki taraf se hai. Is ke baad Ibn Umar Radi Allahu Anhuma ne sawal karne wale shakhs se farmaya ke ja, in baton ko hamesha yaad rakhna. Hum se Musaddad ne bayan kiya, kaha hum se Yahya ne bayan kiya, in se Sa'id ne, in se Qatadah ne aur in se Anas Radi Allahu Anhu ne bayan kiya ke Nabi Kareem Sallallahu Alaihi Wa Sallam jab Uhud pahar par charhe aur Aap ke sath Abu Bakr, Umar aur Uthman Radi Allahu Anhum bhi thay to pahar kanpne laga. Aap Sallallahu Alaihi Wa Sallam ne is par farmaya Uhud thehar ja mera khayal hai ke Aap Sallallahu Alaihi Wa Sallam ne ise apne paon se maara bhi tha ke tujh par ek nabi, ek siddiq aur do shaheed hi to hain.