Hum se Yahya bin Qaza'ah ne bayan kiya, kaha hum se Ibrahim bin Sa'd ne bayan kiya, in se un ke walid ne, in se Abu Salamah ne aur in se Abu Hurairah Radi Allahu Anhu ne bayan kiya ke Rasoolullah Sallallahu Alaihi Wa Sallam ne farmaya ke tum se pehli ummaton mein muhaddis hua karte thay, aur agar meri ummat mein koi aisa shakhs hai to woh Umar hain. Zakariya bin Zaidah ne apni riwayat mein Sa'd se yeh barhaya hai ke in se Abu Salamah ne bayan kiya aur in se Abu Hurairah Radi Allahu Anhu ne ke Nabi Kareem Sallallahu Alaihi Wa Sallam ne farmaya ke tum se pehle Bani Israel ki ummaton mein kuch log aise hua karte thay ke nabi nahi hote thay aur is ke bawajood farishte in se kalam kiya karte thay aur agar meri ummat mein koi aisa shakhs ho sakta hai to woh Umar hain. Ibn Abbas Radi Allahu Anhuma ne parha "min nabiyyin wala muhaddis"

Hum se Abdullah bin Yusuf Tannisi ne bayan kiya, unhon ne kaha hum se Laith ne bayan kiya, unhon ne kaha hum se Aqeel ne bayan kiya, in se Ibn Shihab ne, in se Sa'id bin al-Musayyib aur Abu Salamah bin Abdur Rahman ne bayan kiya ke hum ne Abu Hurairah Radi Allahu Anhu se suna, woh bayan karte thay ke Rasoolullah Sallallahu Alaihi Wa Sallam ne farmaya ke ek charwaha apni bakriyan chura raha tha ke ek bhediye ne is ki ek bakri pakar li. Charwahe ne is ka peecha kiya aur bakri ko is se chhurha liya. Phir bhediya is ki taraf mutawajje ho kar bola: Darindon ke din is ki hifazat karne wala kon hoga? Jab mere siwa is ka koi charwaha na hoga. Sahaba Radi Allahu Anhum is par bol utthe: Subhan Allah! Aap Sallallahu Alaihi Wa Sallam ne farmaya ke mein is waqia par iman laya aur Abu Bakr-o-Umar (Radi Allahu Anhuma) bhi. Halankay wahan Abu Bakr-o-Umar (Radi Allahu Anhuma) maujood nahi thay.

Hum se Yahya bin Bukair ne bayan kiya, kaha hum se Laith bin Sa'd ne bayan kiya, in se Aqeel ne, in se Ibn Shihab ne bayan kiya, mujh ko Abu Umamah bin Sahl bin Hunaif ne khabar di aur in se Abu Sa'id Khudri Radi Allahu Anhu ne bayan kiya ke mein ne Rasoolullah Sallallahu Alaihi Wa Sallam se suna: Aap Sallallahu Alaihi Wa Sallam ne farmaya ke mein ne khwab mein dekha ke kuch log mere samne pesh kiye gaye jo qamees pehne hue thay in mein se baaz ki qamees sirf seene tak thi aur baaz ki is se bhi chhoti aur mere samne Umar pesh kiye gaye to woh itni badi qamees pehne hue thay ke chalte hue ghasitti thi. Sahaba ne arz kiya: Ya Rasul Allah! Aap ne is ki tabeer kya li? Nabi Kareem Sallallahu Alaihi Wa Sallam ne farmaya ke deen murad hai.

Hum se Salt bin Muhammad ne bayan kiya kaha hum se Ismail bin Ibrahim ne bayan kiya, kaha hum se Ayub ne bayan kiya, in se Ibn Abi Mulaikah ne aur in se Miswar bin Makhramah ne bayan kiya ke jab Umar Radi Allahu Anhu zakhmi kar diye gaye to Aap ne badi be-chaini ka izhaar kiya. Is mauqay par Ibn Abbas Radi Allahu Anhuma ne Aap se tasalli ke tour par kaha ke Ae Ameer al-Momineen! Aap is darja ghabra kyun rahe hain. Aap Rasoolullah Sallallahu Alaihi Wa Sallam ki suhbat mein rahe aur Nabi Kareem Sallallahu Alaihi Wa Sallam ki suhbat ka poora haq ada kiya aur phir jab Aap Nabi Kareem Sallallahu Alaihi Wa Sallam se juda hue to Nabi Kareem Sallallahu Alaihi Wa Sallam Aap se khush aur raazi thay, is ke baad Abu Bakr Radi Allahu Anhu ki suhbat uthayi aur in ki suhbat ka bhi Aap ne poora haq ada kiya aur jab juda hue to woh bhi Aap se raazi aur khush thay. Aakhir mein Musalmanon ki suhbat Aap ko hasil rahi. In ki suhbat ka bhi Aap ne poora haq ada kiya aur agar Aap in se juda hue to is mein koi shubha nahi ke unhein bhi Aap apne se khush aur raazi hi chhorhein gay. Is par Umar Radi Allahu Anhu ne farmaya: Ibn Abbas! Tum ne jo Rasoolullah Sallallahu Alaihi Wa Sallam ki suhbat ka aur Aap Sallallahu Alaihi Wa Sallam ki raza-o-khushi ka zikr kiya hai to yaqeenan yeh sirf Allah Ta'ala ka ek fazl aur ehsan hai jo us ne mujh par kiya hai. Isi tarah jo tum ne Abu Bakr Radi Allahu Anhu ki suhbat aur in ki khushi ka zikr kiya hai to yeh bhi Allah Ta'ala ka mujh par fazl-o-ehsan tha. Lekin jo ghabrahat aur pareshani mujh par tum tari dekh rahe ho woh tumhari wajah se aur tumhare sathiyon ki fikr ki wajah se hai. Aur Allah ki qasam! Agar mere pas zameen bhar sona hota to Allah Ta'ala ke azab ka samna karne se pehle is ka fidya de kar is se najat ki koshish karta. Hammad bin Zaid ne bayan kiya, in se Ayub ne bayan kiya, in se Ibn Abi Mulaikah ne aur in se Ibn Abbas Radi Allahu Anhuma ne ke mein Umar Radi Allahu Anhu ki khidmat mein hazir hua. Phir aakhir tak yahi hadeeth bayan ki.

Mujh se Yusuf bin Musa ne bayan kiya, kaha hum se Abu Usama ne bayan kiya, kaha ke mujh se Usman bin Ghiyath ne bayan kiya, kaha ke mujh se Abu Usman Nahdi ne bayan kiya, aur in se Abu Musa Ash'ari Radi Allahu Anhu ne bayan kiya ke mein Madinah ke ek bagh (Bi'r-e-Aris) mein Rasoolullah Sallallahu Alaihi Wa Sallam ke sath tha ke ek sahib ne aa kar darwaza khulwaya, Aap Sallallahu Alaihi Wa Sallam ne farmaya ke in ke liye darwaza khol do aur unhein jannat ki bisharat suna do, mein ne darwaza khola to Abu Bakr Radi Allahu Anhu thay. Mein ne unhein Nabi Kareem Sallallahu Alaihi Wa Sallam ke farmane ke mutabiq jannat ki khushkhabri sunayi to unhon ne is par Allah ki hamd ki, phir ek aur sahib aaye aur darwaza khulwaya. Nabi Kareem Sallallahu Alaihi Wa Sallam ne is mauqay par bhi yahi farmaya ke darwaza in ke liye khol do aur unhein jannat ki bisharat suna do, mein ne darwaza khola to Umar Radi Allahu Anhu thay, unhein bhi jab Nabi Kareem Sallallahu Alaihi Wa Sallam ke irshad ki ittela sunayi to unhon ne bhi Allah Ta'ala ki hamd-o-sana bayan ki. Phir ek teesre aur sahib ne darwaza khulwaya. In ke liye bhi Nabi Kareem Sallallahu Alaihi Wa Sallam ne farmaya ke darwaza khol do aur unhein jannat ki bisharat suna do in masaib aur aazmaishon ke baad jin se unhein (dunya mein) wasita parega. Woh Uthman Radi Allahu Anhu thay. Jab mein ne in ko Nabi Kareem Sallallahu Alaihi Wa Sallam ke irshad ki ittela di to unhon ne Allah ki hamd-o-sana ke baad farmaya ke Allah Ta'ala hi madad karne wala hai.

Hum se Yahya bin Sulaiman ne bayan kiya, kaha ke mujh se Abdullah bin Wahb ne bayan kiya, kaha ke mujhe Haiwah bin Shuraih ne khabar di, kaha ke mujh se Abu Aqeel Zahrah bin Ma'bad ne bayan kiya aur unhon ne apne dada Abdullah bin Hisham Radi Allahu Anhu se suna, unhon ne bayan kiya ke hum ek martaba Nabi Kareem Sallallahu Alaihi Wa Sallam ke sath thay. Aap is waqt Umar bin Khattab Radi Allahu Anhu ka hath apne hath mein liye hue thay.