Hum se Hajjaj bin Minhal ne bayan kiya, kaha hum se Abdul Aziz Majishoon ne bayan kiya, kaha hum se Muhammad bin Munkadir ne bayan kiya, aur in se Jabir bin Abdullah Radi Allahu Anhuma ne bayan kiya ke Nabi Kareem Sallallahu Alaihi Wa Sallam ne farmaya ke mein (khwab mein) jannat mein dakhil hua to wahan mein ne Abu Talhah Radi Allahu Anhu ki biwi Rumaisa ko dekha aur mein ne qadmon ki awaz suni to mein ne poocha yeh kon sahib hain? Bataya gaya ke yeh Bilal Radi Allahu Anhu hain aur mein ne ek mahal dekha is ke samne ek aurat thi, mein ne poocha yeh kis ka mahal hai? To bataya ke yeh Umar Radi Allahu Anhu ka hai. Mere dil mein aaya ke andar dakhil ho kar ise dekhun, lekin mujhe Umar ki ghairat yaad aayi (aur is liye andar dakhil nahi hua) is par Umar Radi Allahu Anhu ne rote hue kaha mere maan baap Aap par fida hon, Ya Rasul Allah! Kya mein Aap par ghairat karunga.