Aur Allah Ta'ala ka (Surah Al-Fatah mein) irshad «laqad raziyallahu anil muminina iz yubayi'unaka tahtash shajarah» ”Beshak Allah Ta'ala momineen se raazi ho gaya jab unhon ne Aap se darakht ke neeche baiat ki“
.

Hum se Khalid Bin Makhlad ne bayan kiya ‘ kaha hum se Sulaiman Bin Bilal ne bayan kiya ‘ kaha ke mujh se Salih Bin Kaisan ne bayan kiya ‘ in se Ubaidullah Bin Abdullah ne aur in se Zaid Bin Khalid Radi Allahu Anhu ne bayan kiya ke Hudaibiya ke saal hum Rasul Allah Sallallahu Alaihi Wasallam ke sath nikle to ek den, raat ko barish hui. Nabi Kareem Sallallahu Alaihi Wasallam ne subah ki namaz parhane ke baad hum se khitab kiya aur daryaft farmaya ke maloom hai tumhare rabb ne kya kaha? Hum ne arz kiya ke Allah aur is ke Rasul ko zyada ilm hai. Aap Sallallahu Alaihi Wasallam ne farmaya ke Allah Ta'ala farmata hai ke subah hui to mere kuch bandon ne is halat mein subah ki ke in ka iman mujh par tha aur kuch ne is halat mein subah ki ke wo mera inkar kiye hue thay. To jis ne kaha ke hum par ye barish Allah ke rizq ‘ Allah ki rahmat aur Allah ke fazl se hui hai to wo mujh par iman lane wala hai aur sitare ka inkar karne wala hai aur jo shakhs ye kehta hai ke barish falaan sitare ki taseer se hui hai to wo sitaron par iman lane wala aur mere sath kufr karne wala hai
.

Hum se Hadba Bin Khalid ne bayan kiya ‘ kaha hum se Hammam Bin Yahya ne bayan kiya ‘ in se Qatada ne bayan kiya ‘ unhein Anas Bin Malik Radi Allahu Anhu ne khabar di ke Rasul Allah Sallallahu Alaihi Wasallam ne char umre kiye aur siwa is umre ke jo Aap Sallallahu Alaihi Wasallam ne hajj ke sath kiya ‘ tamam umre Zil-Qaada (ke mahine) mein kiye. Hudaibiya ka umra bhi Aap Sallallahu Alaihi Wasallam Zil-Qaada (ke mahine) mein karne tashreef le gaye phir dusre saal (is ki qaza mein) Aap ne Zil-Qaada mein umra kiya aur ek umra Jirana se Aap ne kiya tha ‘ jahan Ghazwa Hunain ki ghanimat Aap ne taqseem ki thi. Ye bhi Zil-Qaada mein kiya tha aur ek umra hajj ke sath kiya (jo Zil-Hijja mein kiya tha)
.

Hum se Saeed Bin Rabee ne bayan kiya ‘ kaha hum se Ali Bin Mubarak ne bayan kiya ‘ in se Yahya Bin Abi Kaseer ne ‘ in se Abdullah Bin Abi Qatada ne aur in se in ke walid ne bayan kiya ke hum Rasul Allah Sallallahu Alaihi Wasallam ke sath Sulh-e-Hudaibiya ke saal ravana hue ‘ tamam sahaba (Radi Allahu Anhum) ne ihram baandh liya tha lekin mein ne abhi ihram nahi baandha tha
.

Hum se Ubaidullah Bin Musa ne bayan kiya ‘ in se Israil ne ‘ in se Abu Ishaq ne in se Bara Bin Azib Radi Allahu Anhu ne kaha ke ‘ tum log (Surah Inna Fattahna mein) fatah se murad Makka ki fatah leyte ho. Fatah Makka to baharhaal fatah hi thi lekin hum Ghazwa Hudaibiya ki Baiat-e-Rizwan ko haqiqi fatah samajhte hain. Is den hum Rasul Allah Sallallahu Alaihi Wasallam ke sath chauda sau aadmi thay. Hudaibiya nami ek kunwan wahan par tha ‘ hum ne is mein se itna pani khincha ke is ke andar ek qatra bhi pani baqi na raha. Nabi Kareem Sallallahu Alaihi Wasallam ko jab ye khabar hui (ke pani khatam ho gaya hai) to Aap Sallallahu Alaihi Wasallam kunwein par tashreef laye aur is ke kinare par baith kar kisi ek bartan mein pani talab farmaya. Is se Aap Sallallahu Alaihi Wasallam ne wudhu kiya aur kulli ki aur dua farmai. Phir sara pani is kunwein mein daal diya. Thori der ke liye hum ne kunwein ko yun hi rehne diya aur is ke baad jitna hum ne chaha is mein se pani piya aur apni sawariyon ko pilaya
.

Mujh se Fazl Bin Yaqub ne bayan kiya ‘ hum se Hasan Bin Muhammad Bin Ayin Abu Ali Harrani ne bayan kiya ‘ kaha hum se Zuhair Bin Muawiya ne bayan kiya ‘ kaha hum se Abu Ishaq Sabi'i ne bayan kiya ke humein Bara Bin Azib Radi Allahu Anhu ne khabar di ke wo log Ghazwa Hudaibiya ke mauqe par Rasul Allah Sallallahu Alaihi Wasallam ke sath ek hazar char sau ki tidad mein thay ya is se bhi zyada. Ek kunwein par parao hua lashkar ne is ka (sara) pani khinch liya aur Nabi Kareem Sallallahu Alaihi Wasallam ki khidmat mein hazir hue. Nabi Kareem Sallallahu Alaihi Wasallam kunwein ke pas tashreef laye aur is ki mundeer par baith gaye. Phir farmaya ke ek doal mein isi kunwein ka pani lao. Pani laya gaya to Aap Sallallahu Alaihi Wasallam ne is mein kulli ki aur dua farmai. Phir farmaya ke kunwein ko yun hi thori der ke liye rehne do. Is ke baad sara lashkar khud bhi serab hota raha aur apni sawariyon ko bhi khoob pilata raha. Yahan tak ke wahan se unhon ne kooch kiya
.

Hum se Yusuf Bin Isa ne bayan kiya ‘ kaha hum se Muhammad Bin Fuzail ne ‘ kaha hum se Husain Bin Abdur Rahman ne ‘ in se Salim Bin Abi Al-Jad ne aur in se Jabir Radi Allahu Anhu ne bayan kiya ke Ghazwa Hudaibiya ke mauqe par sara hi lashkar pyasa ho chuka tha. Rasul Allah Sallallahu Alaihi Wasallam ke samne ek chagal tha ‘ is ke pani se Aap ne wudhu kiya. Phir sahaba Aap ki khidmat mein hazir hue to Aap Sallallahu Alaihi Wasallam ne daryaft farmaya ke kya baat hai? Sahaba bole ke Ya Rasul Allah! Hamare pas ab pani nahi raha ‘ na wudhu karne ke liye aur na peene ke liye. Siwa is pani ke jo Aap ke bartan mein maujood hai. Bayan kiya ke phir Nabi Kareem Sallallahu Alaihi Wasallam ne apna hath is bartan mein rakha aur pani Aap ki ungliyon ke darmiyan se chashme ki tarah phoot phoot kar ubalne laga. Ravi ne bayan kiya ke phir hum ne pani piya bhi aur wudhu bhi kiya. (Salim kehte hain ke) mein ne Jabir Radi Allahu Anhu se poocha ke Aap log kitni tidad mein thay? Unhon ne batlaya ke agar hum ek lakh bhi hote to bhi wo pani kafi ho jata. Waise is waqt hamari tidad pandrah sau thi
.

Hum se Salt Bin Muhammad ne bayan kiya, kaha hum se Yazid Bin Zurai ne bayan kiya, in se Saeed Bin Abi Aroobah ne, in se Qatada ne ke mein ne Saeed Bin Musayyab se poocha ‘ mujhe maloom hua hai ke Jabir Radi Allahu Anhu kaha karte thay ke (Hudaibiya ki sulh ke mauqe par) sahaba ki tidad chauda sau thi. Is par Saeed Bin Musayyab ne bayan kiya ke mujh se Jabir Radi Allahu Anhu ne ye kaha tha is mauqe par pandrah sau sahaba (Radi Allahu Anhum) maujood thay. Jinhon ne Nabi Kareem Sallallahu Alaihi Wasallam se Hudaibiya mein baiat ki thi. Abu Dawood Tayalisi ne bayan kiya, hum se Qurrah Bin Khalid ne bayan kiya, in se Qatada ne aur Muhammad Bin Bashar ne bhi Abu Dawood Tayalisi ke sath is ko riwayat kiya hai
.

Hum se Ali Bin Abdullah Madini ne bayan kiya ‘ kaha hum se Sufyan Bin Uyainah ne bayan kiya ‘ in se Amr Bin Dinar ne bayan kiya ‘ unhon ne kaha ke mein ne Jabir Bin Abdullah (Radi Allahu Anhuma) se suna ‘ unhon ne bayan kiya ke hum se Rasul Allah Sallallahu Alaihi Wasallam ne Ghazwa Hudaibiya ke mauqe par farmaya tha ke tum log tamam zameen walon mein sab se behtar ho. Hamari tidad is mauqe par chauda sau thi. Agar aaj meri aankhon mein binayi hoti to mein tumhein is darakht ka maqam dikhata. Is riwayat ki mutabiat Aamash ne ki, in se Salim ne suna aur unhon ne Jabir Radi Allahu Anhu se suna ke chauda sau sahaba Ghazwa Hudaibiya mein thay
.

Aur Ubaidullah Bin Muaz ne bayan kiya ‘ in se in ke walid ne bayan kiya ‘ in se Shuba ne bayan kiya ‘ in se Amr Bin Murrah ne ‘ in se Abdullah Bin Abi Aufa (Radi Allahu Anhuma) ne bayan kiya ke darakht walon (Baiat-e-Rizwan karne walon) ki tidad tayrah sau thi. Qabila Aslam muhajireen ka aathvein hissa thay. Is riwayat ki mutabiat Muhammad Bin Bashar ne ki ‘ in se Abu Dawood Tayalisi ne bayan kiya aur in se Shuba ne
.